[1] وُࢽْدُ دُوُوࢽْ عِیسَمَ أَلْمَسِیوُ وُورُو مْرْسَجْࢽَمَدْ اللَّهیٜࢽْ تَمْبْࢽَ، کُورُو وُࢽْدُ دُوُوࢽْ بَوَا ثْرَاࢽَمَدْ تِ اللَّهیٜࢽْ تَمْبْࢽَدْ یٜیَ ثْرَاࢽَ؞
[2] أَکُّو جِرِ تَدَوَ اللَّهیٜیَ رَیِیٜࢽَرُو ࢽُوࢽِیٜࢽَدْ: اللَّهَ رَیِیٜ وَدَوَࢽْجُ غَیْیٜ؞
[3] اللَّهَ رَوُودْ تِمَ وَدَوَࢽْجُ غَ، کُورُو وَدَوَࢽْجُدْ کُرْوُووُ غْࢽِ،
[4] أَوُووَ وُࢽْدُ دُوُوࢽْ اللَّهیٜࢽْ تَمْبْࢽَدْ کْلَ دُࢽِیَیٜࢽْ کْࢽَّسَرْ ثُوَࢽْدِ، کُورُو کْࢽَّسَرْ دُࢽِیَا ࢽَسَرْجْࢽَدْ کَمْبْرْسٜࢽْدٜ؞
[5] وُࢽْدُ غْلٜ کْلَ دُࢽِیَیٜࢽْ کْࢽَّسَرْ ثُوَࢽْدِ، کَمْ عِیسَمَ تَدَ اللَّهیٜ وُورُو مْرْسَجْࢽَدْ غْࢽِیَ؟
[6] عِیسَى أَلْمَسِیوُدْ تِمَ إِࢽْغِیَ بُوَیٜࢽْ إِسْࢽَدْ وُو؞ إِࢽْغِ رُࢽْجُیٜࢽْ غْࢽِ، إِࢽْغِیَ بُوَیٜࢽْ إِسْࢽَ؞ کُورُو شٜدَࢽْجُدْ رُحُ اللَّهیٜ، رُحُدْ تِمَ جِرٜدْ وُو؞
[7] شٜدَ یَکُّ مبٜجِ:
[8] رُحُوَ إِࢽْغِیَ بُوَ، کُورُو تَیِ یَکُّدْ شٜدَࢽْجَ تِلُو؞
[9] شٜدَ کَمْبٜ کَسَدِّیٜیَ، شٜدَ اللَّهیٜدْ کَمْبٜیَ کُوجْࢽَ، تِمَ شٜدَ دُوُوࢽْ اللَّه کْلَ تَدَࢽْجُیٜࢽْ ثْدْࢽَدْ وُو؞
[10] کَمْ تَدَ اللَّهیٜیَ مْرْسَجْࢽَمَدْ شٜدَ أَدَ کَرْوُࢽْجُࢽْ ثْدَࢽَ؞ کَمْ اللَّهَ مْرْسَجْࢽِّمَدْ تِیَ کَتُّوُمَرُو کَلَکْثْࢽَ، شٜدَ دُوُوࢽْ اللَّه کْلَ تَدَࢽْجُیٜࢽْ ثْدْࢽَدَ کَسَثّْࢽِّ ࢽَࢽْغَرُو؞
[11] شٜدَدْ تِمَ اللَّه أَࢽْدِرُو رُو سَوِسُویٜ سَدْࢽَ، کُورُو رُو أَدْ تَدَࢽْجُࢽْ کْرْغَ؞
[12] کَمْ دُوُوࢽْ تَدَدَ ثُوَࢽْدْࢽَمَدْ رُو ثُوَࢽْدْࢽَ؞ کَمْ دُوُوࢽْ تَدَ اللَّهیٜیَ ثُوَࢽْدْࢽِّدْ رُو ثُوَࢽْدْࢽِّ؞
[13] ࢽَیِ ثُ تَدَ اللَّهیٜیَ مْرْسَࢽُوَّدْرُو أَوُو أَࢽِیَ رُوُࢽْجَغَکّْࢽَ، ࢽغَیْࢽِࢽْ رُو سَوِسُویٜ ࢻَࢽْدُوَّرُو ࢽُوࢽُوَّ؞
[14] أَوُو ࢽَࢽْجُࢽْ رِدُ بَوُووَرُو یَسَرَیْیٜࢽَدْ تِمَ أَوُو لَآ کْلَ رَوُوࢽْجُیٜࢽْ کُورِیٜیَ، أَࢽْدِیَ کْرْࢽْسَیْ؞
[15] کُورُو أَوِ کُورِیٜ یَیٜ کْرْࢽْسَیْرُو ࢽُوࢽِیٜࢽَدْ، أَوُو تِیَ کُورِیٜࢽَدَ ࢻَࢽْدِیٜࢽَرُو ࢽُوࢽِیٜࢽَ؞
[16] کَمْ لَا کْرَمِࢽْجُ بِوُ لَا کَرْمُورُو ثَدْࢽِّ ثْدِ ثُرُیْرُو وَلْیٜࢽُووَ، اللَّهَ ثُوُورُو، تِرُو رُو ثِ؞ أَدْ کْلَ أَمْ دُوُوࢽْ بِوُ کَرْمُورُو ثَدِوَوُو ثَدِدْیٜࢽْ؞ بِوُ کَرْمُورُو ثَدِ مبٜجِ، أَمَّ کْلَ بِوُ أَدْیٜࢽْ غْࢽِ ثُوُورُورُو وُلْیٜکُّو؞
[17] جِرٜࢽَمْبُ سَمَّدْ بِوُ یَیٜ، بِوُ لَا کَرْمُورُو ثَدِوَوُو مبٜجِ؞
[18] وُࢽْدُ دُوُوࢽْ اللَّهیٜࢽْ تَمْبْࢽَدْ بِوُ ثْدِوَوُورُو ࢽُوࢽِیٜࢽَ، أَمَّ تَدَ اللَّهیٜدْ تِیَ رُوجِ، کُورُو کْلَدُودْ تِیَ لٜجِوَوُو؞
[19] أَࢽْدِ اللَّهیٜ یٜ، دُࢽِیَ سَمَّ ࢻْرْدُ کْࢽْدُوُو کْلَدُودْیٜࢽْ دَسَاࢽَ یٜرُو ࢽُوࢽِیٜࢽَ؞
[20] کُورُو تَدَ اللَّهیٜ إِسْࢽَ یٜ، أَࢽْدِرُو حَࢽْغَلْ تِ جِرٜمَدَ ࢽُودُرُو سَدْࢽَ یٜرُو ࢽُوࢽِیٜࢽَ؞ کُورُو أَࢽْدِ تِ جِرٜدْلَࢽْ کْرْغَیْیٜ، وُوتّٜ تَدَࢽْجُ عِیسَى أَلْمَسِیوُدْلَࢽْ؞ تِمَ اللَّه جِرٜىٰ یٜ، رُو سَوِسُویٜ یٜ وُو؞
[21] ࢽجُرِیَ، سْࢽْمْبُو کَدْࢽُواْ!