[1] ࢽجُرِیَࢽِ، بَرٜ بِوُ دِوِّرُو أَوُو أَࢽِیَ رُوُࢽْجَغَکِّ؞ أَمَّ کَمْ لَا بِوُ ثْدِرُو وَلْیٜࢽُووَ، تِ بَوَدْرُو کْلَࢽْدٜࢽْ وُلْدُوُمَ تَیْیٜࢽَ، تِمَ عِیسَى أَلْمَسِیوُ جِرٜمَدْ وُو؞
[2] تِمَ بِوُوَࢽْدٜدْرُو لَیَ ࢻَسْتُ غْرْغَدُ اللَّهیٜرُو وَلْجُو، کُورُو کَاࢽدٜ رُࢽْجَرُو غْࢽِ، دُࢽِیَ سَمَّیٜ یٜرُو؞
[3] وَدَوَࢽْجُ غَیْیٜیَ، ࢽغَیْࢽِࢽْ تِیَ ࢽُوࢽِیٜࢽَرُو أَسُࢽِیٜ؞
[4] کَمْ تِیَ ࢽُوجْࢽَ ثْࢽِ دُوُوࢽْ وَدَوَࢽْجُ جْغَیْوَوُودْ، تِ کَتُّوُمَ، کُورُو جِرٜدْ تِلَࢽْ بَوُو؞
[5] أَمَّ کَمْ مَࢽَࢽْجُ ࢽغُوجِمَدْ، جِرٜمَرُو کْرَوُو اللَّهیٜدْ تِلَࢽْ کَلْکَلُّو وَلْجِ؞ ࢽغَیْࢽِࢽْ أَࢽْدِ تِلَࢽْ کْرْغَیْیٜرُو ࢽُوࢽِیٜࢽَ؞
[6] کَمْ تِلَࢽْ دْغَیْ ثْࢽِدْ، تِ یٜرُو کْࢽْدْغَیْ عِیسَى ثْدْࢽَدَ دِیُو وَجِࢻْثْغْࢽَ؞
[7] کْرَوُووُࢽِ، وَدَ بْرِࢽْ غْࢽِ، وَدَ ثَیٜ تْࢽْ بَدِدُرَمْࢽِࢽْ ࢻَࢽْدُوَّا رُوُࢽْجَغَکِّ؞ وَدَ ثَیٜ أَدْ تِمَ مَࢽَ ࢻَࢽُّوَّدْ وُو؞
[8] أَدْ یَیٜ وَدَ بْرِࢽْ رُوُࢽْجَغَکِّ، وَدَ دُوُوࢽْ أَلْمَسِیوُ یٜࢽْ جِرٜ، ࢽَیِ یٜࢽْ جِرٜدْ، دَلِلْࢽْجُدْ دُوُدْ کُودُ ثْدِ، کُورُو ࢽُرْ جِرٜىٰدْ کْرْمَمَرُو وَسِّ ࢽَࢽْغَرُو؞
[9] کَمْ تِ ࢽُرْلَࢽْ دْغَࢽَ ثْࢽِ دُوُوࢽْ کْرَمِࢽْجُوَ وَجْࢽَمَدْ کُورُو یَیٜ دُوُلَࢽْ کْرْغَ؞
[10] کَمْ کْرَمِࢽْجُوَ ثْرَاࢽَمَدْ ࢽُرْلَࢽْ دْغَیْ، کُورُو دَلِلْ تَلْدُیٜ تِلَࢽْ بَوُو؞
[11] أَمَّ کَمْ کْرَمِࢽْجُوَ وَجْࢽَمَدْ دُوُلَࢽْ کْرْغَ، کُورُو ثُرُو دُوُیٜࢽْ دَدَجِ، کُورُو ࢽَ لٜجِمَا ࢽُوجْࢽِّ، دَلِلْࢽْجُدْ دُوُدْ سِمْࢽْجُوَ جَکْثْࢽَ ࢽَࢽْغَرُو؞
[12] ࢽجُرِیَ، بِوُوَࢽْدُو کْلَ ثُࢽْجُیٜࢽْ غَوُرْࢽْجَاࢽَ ࢽَࢽْغَرُو ࢽَیِرُو رُوُࢽْجَغَکِّ؞
[13] بَوَوَ، تِ تْࢽْ بَدِدُرَمْࢽِࢽْ دْغَࢽَدَ ࢽُوࢽُوَّ ࢽَࢽْغَرُو ࢽَیِرُو رُوُࢽْجَغَکِّ؞ جَیْرُووَ، کْلَدُودْࢽْ ࢽَسَرْدُوَّ ࢽَࢽْغَرُو ࢽَیِرُو رُوُࢽْجَغَکِّ؞
[14] تَدَوَ سَࢽَࢽَ، بَوَدَ ࢽُوࢽُوَّ ࢽَࢽْغَرُو ࢽَیِرُو رُوُࢽْجَغَکّْࢽَ؞ بَوَوَ، تِ تْࢽْ بَدِدُرَمْࢽِࢽْ دْغَࢽَدَ ࢽُوࢽُوَّ ࢽَࢽْغَرُو ࢽَیِرُو رُوُࢽْجَغَکّْࢽَ؞ جَیْرُووَ، ࢽَیِ دُࢽُووَ، کُورُو مَࢽَ اللَّهیٜ ࢽَیِࢽْ کْرْغَ، کُورُو کْلَدُودْࢽْ ࢽَسَرْدُوَّ ࢽَࢽْغَرُو ࢽَیِرُو رُوُࢽْجَغَکّْࢽَ؞
[15] بَرٜ دُࢽِیَ بِ أَوُووَ دُࢽِیَیٜیَ رَاوِّ؞ وُࢽْدُ دُوُوࢽْ دُࢽِیَ ثْرَاࢽَمَدْ، کْرَوُو بَوَیٜدْ تِلَࢽْ بَوُو،
[16] أَوُووَ أَوُو دُࢽِیَیٜ سَمَّ، وُوتّٜ مَࢽْغَرْ تِییٜ سُو، مَࢽْغَرْ سِمْبٜ سُو، رُوکُرَ کْࢽْدَیٜ سُودْ بَوَدْیٜࢽْ غْࢽِ، دُࢽِیَیٜࢽْ إِسِ؞
[17] دُࢽِیَا مَࢽْغَرْࢽْجُوَ بَوُورُو وَلْجَیْ، أَمَّ کَمْ دُوُوࢽْ رَوُو اللَّهیٜ ثْدِمَدْ سَوِسُورُو دْغَیْ؞
[18] تَدَوَ سَࢽَࢽَ، سَ دَرْیٜىٰ ثْدْࢽَ، کُورُو وَدُمَ أَلْمَسِیوُیٜ إِسِ ࢻَࢽُّوَّدْ غَیْ، کْرْمَ وَدُوُ أَلْمَسِیوُیٜ کَدَ إِسَࢽَ، ࢽغَیْࢽِࢽْ سَ دَرْیٜىٰدَ أَسُࢽِیٜ؞
[19] دَوُࢽْدٜࢽْ کٜلُوُو، أَمَّ تَیِ کَاࢽدٜ غْࢽِ؞ ثَ تَیِ کَاࢽدٜیَ، أَࢽْدِیَ رُوکُّو دَسَاࢽَ، أَمَّ لُوُوࢽْجَدْ تَیِ سَمَّ کَاࢽدٜ غْࢽِرُو ࢻْلٜجِ؞
[20] أَمَّ تِ تَیِرْدْ ࢽَیِرُو رُحُࢽْجُوَ ࢽجَدْࢽَ، کُورُو ࢽَیِ سَمَّ أَسُࢽُوَّ؞
[21] جِرٜدَ ࢽُوࢽُوِّ ࢽَࢽْغَرُو غْࢽِ، أَمَّ ࢽُوࢽُوَّ ࢽَࢽْغَرُو، کُورُو کَتُّوُ ࢻِمَ جِرٜىٰࢽْ إِسِوَوُو ࢽَࢽْغَرُو ࢽَیِرُو رُوُࢽْجَغَکّْࢽَ؞
[22] عِیسَمَ أَلْمَسِیوُدْ وُورُو أَࢽْغْرْجْࢽَمَ غْࢽِیَ، وُࢽْدُ کَتُّوُمَدْ وُو؟ کَمْ بَوَدَ تَدَدَا أَࢽْغْرْجْࢽَمَدْ، تِمَ وَدُمَ أَلْمَسِیوُیٜدْ وُو؞
[23] وُࢽْدُ دُوُوࢽْ تَدَدَ أَࢽْغْرْجْࢽَمَدْ، بَوَدْ کَرْوُࢽْجُࢽْ بَوُو، أَمَّ وُࢽْدُ دُوُوࢽْ تَدَدَ کَسَثّْࢽَمَدْ، بَوَدْ یٜ کَرْوُࢽْجُࢽْ کْرْغَ؞
[24] ࢽَیِدْ، أَوُو تْࢽْ بَدِدُرَمْࢽِࢽْ ࢻَࢽُّوَّدْ ࢽَیِلَࢽْ دْغَ؞ أَوُو تْࢽْ بَدِدُرَمْࢽِࢽْ ࢻَࢽُّوَّدْ ࢽَیِلَࢽْ دْغَیْیَ، ࢽَیِ یٜ تَدَدَ بَوَدَلَࢽْ دْغَوِ؞
[25] أَکُّو أَوُو سَدِ ثْࢽٜ وَدُ ࢽغُوجْࢽَدْ: رُو سَوِسُویٜ؞
[26] أَوُو أَࢽِیَ کْلَ أَمْ ࢽَیِیَ جَمْبَࢽْجَࢽٜ ࢽجَوَتْکِدْیٜࢽْ ࢽَیِرُو رُوُࢽْجَغَکّْࢽَ؞
[27] ࢽَیِدْ، رُحُࢽْجُ ࢽَیِرُو ࢽجَدْࢽَدْ ࢽَیِࢽْ دْغَیْ، کُورُو مْرَدُࢽْدُو أَلَمْدُیٜ بَوُو؞ أَمَّ رُحُࢽْجُ ࢽَیِرُو کْلَ أَوُو سَمَّیٜࢽْ أَلَمْࢽْجَغَیْ، کُورُو أَلَمْدُࢽْجُدْ کَتُّوُ غْࢽِ، جِرٜ؞ أَلَمْࢽْجَاࢽَدْ غَیْ، أَلْمَسِیوُلَࢽْ دْغَیْوُو؞
[28] تُو، ࢽجُرِیَ، تِلَࢽْ دْغَیْوُو، ࢽغَیْࢽِࢽْ ࢻْلٜدِییَ، ࢻُوُࢽْجُࢽْ رِࢽِیٜوَوُو، کُورُو کْࢽْدٜࢽْجُࢽْ ࢽَࢽْغُ ࢻَࢽِّیٜوَوُو؞
[29] تِدَ جِرٜمَرُو ࢽُوࢽُوَّدْ، وُࢽْدُ دُوُوࢽْ جِرٜ ثْدِمَدْ یٜ اللَّهیٜࢽْ تَمْبْࢽَرُو ࢽُوࢽُوَّ؞