[1] وُمَ أَمْوُرَوَیٜ ࢻَلْࢽْجَدْ کَمُ کْرٜیَدَا یَلَّࢽْجُوَرُو: ثُرُو جِرٜىٰࢽْ ࢽجَرَاکّْࢽَ، کُورُو وُ رُࢽِ غْࢽِ، أَمْ جِرٜ ࢽُوجَࢽَ سَمَّ یٜ،
[2] دَلِلْࢽْجُدْ جِرٜدْ ثُرُوࢽْدٜࢽْ دْغَࢽَ، کُورُو أَࢽْدِیَ رُوکُّو حَرْ أَبَدَرُو دْغَیْ ࢽَࢽْغَرُو؞
[3] جِرٜیَ کْرَوُووَلَࢽْ اللَّه بَوَا عِیسَى أَلْمَسِیوُ تَدَ بَوَدْیٜیَ أَࢽْدِرُو سٜرَّ کَࢽْجِمَرِیَ ࢽَࢽْلٜوَا سَدِ؞
[4] جِرِ بَوَ أَࢽْدِرُو وَدَ سَدْࢽَدْ غَیْ، یَلَّࢽْمْبٜ لَاࢽجَ کْࢽْدْغَیْ جِرٜىٰ ثَدِ ࢽَغْکّْࢽَ ࢽَࢽْغَرُو کَرْوُࢽِ جَوْرُو کْجِیٜࢽُو؞
[5] تُو، کَمُ کْرٜیَدَ، کْرْمَ ࢽِیَ لُواْࢽْجْکِّ، وَدَ بْرِࢽْ غْࢽِ، وَدَ تْࢽْ بَدِدُرَمْࢽِࢽْ تَیْیٜࢽَدَ ࢽِرُو رُوُࢽْجْغْکِّ: أَمَࢽْدٜیَ رَیِیُو!
[6] کْرَوُودْ تِمَ وَدَوَࢽْجُ غَیْیُو! تْࢽْ بَدِدُرَمْࢽِࢽْ ࢻَࢽُّوَّدْ غَیْ، وَدَدْ تِمَ کْرَوُولَࢽْ دْغَیْوُو!
[7] جَمْبَوُ کَدَ دُࢽِیَرُو ثَلُوُࢽَ، تَیِ دُوُوࢽْ عِیسَى أَلْمَسِیوُ تِیلَࢽْ إِسْࢽَرُو کَسَثَّیْوَوُودْ؞ کَمْ أَدْ غَیْ تِمَ جَمْبَمَ یٜ، وَدُمَ أَلْمَسِیوُیٜ یٜ وُو؞
[8] بَرٜ أَوُو ࢽغْࢽْࢻْتِیٜ ࢻَࢽْدُوَّدَ ࢻُدُّوِّ، أَمَّ مُکُووَ ثَࢻْ ࢻَࢽْدُواْرُو حَࢽْغَلْ غْࢽَࢽُواْ!
[9] وُࢽْدُ دُوُوࢽْ کْلَ أَلَمْدُ أَلْمَسِیوُیٜࢽْ دْغَࢽِّࢽْ ࢻُوُرُو لٜجِمَدْ کَرْوُࢽْجُࢽْ اللَّه بَوُو؞ أَمَّ کَمْ دُوُوࢽْ أَلَمْدُدْلَࢽْ دْغَࢽَمَدْ بَوَا تَدَࢽْجُوَا ثُوَࢽْدْࢽَ؞
[10] کَمْ لَا أَلَمْدُ أَدَ ثُوُدْࢽِّࢽْ ࢽَࢽْدُورُو إِسِیَ، بَرٜ تِیَ ࢻَࢽّدُوࢽْ سَوُوِّ بِ لٜوَࢽُوِّ،
[11] أَوُووَ کَمْ تِیَ لٜوَجْࢽَدْ کِدَࢽْجُ دِوِدْرُو مُکُّوࢽْجُ ثَکِّ؞
[12] أَوُو ࢽغْوُ ࢽَیِرُو رُوُدُوُرُو تَکّْࢽَ دُوُوࢽْ، کَکَّدُوَ تَدُّوَالَࢽْ غْࢽِ، ثُجُدْرُو کَرْوُکْجِࢽْدٜ تَیْ دَجٜ کْجِجُورُو، ࢽَࢽْدُورُو إِسْکّٜ سِمْبَ سِمْبَلَࢽْ مَࢽَࢽْکِّیَ، تْمَکُّو؞
[13] یَلَّ یَࢽْمْغْࢽَ کْرٜیَدَدْیٜ ࢽِیَ لٜوَࢽْجَیْ؞