[1] Lai-é â, oi chûn-sú ngài ke fa, m̀-hó m̀ ki-tet ngài ke kie-min.
[2] Chûn-sú ngài ke kie-min, ngì chhiu voi yû fûng-sṳn ke sâng-miang; oi sú ngài ke kau-sṳ, chhiong pó-fu chhṳ-kâ ke muk-chû-yìn.
[3] Oi thak chhai ngì ke sú-chṳ́-thèu, oi khat chhai ngì ke sîm-pán hong.
[4] Oi tui Chṳ-fi kóng: “Ngì he ngài ke chí-moi”; oi chiông kien-sṳt chún-cho ngì ke chhîn-ngìn.
[5] Kì-têu chhiu voi pông-chhu ngì yén-lì yìm-fu, lì-khôi phe̍t-ngìn choi-thiàm sa̍t-va̍t ke pû-ngiòng.
[6] Yû yit-pái, ngài chhai vuk-tú tui chhûng-mùn khon hâ-hi,
[7] khon-tó chhin-tô ngong-chhṳ̍t ke heu-sâng-ngìn; ngài thi̍t-phe̍t chu-yi khì-chûng yit-ke thèu-nó kién-tân ke.
[8] Kì chhai kiê-lu khiun chón-kok ke thi-fông, hàng-ngi̍p yit-ke yìm-fu he̍t ke hong-tú,
[9] ngit-thèu lo̍k-sân heu, thiên am lé, chhai am sò-sò tông-chûng, hàng-khiûn kì ke mùn-héu.
[10] Ngài khon-tó yit-ke fu-ńg chhut-lòi ngiàng-chiap kì, tá-pan chhiong chhông-kî, yû kúi-cha ke sîm-sṳ̂.
[11] Kì yit-liu-lî fong-thong m̀-tî kien-seu, sṳ̀-sòng chhai kiê-hong hàng-lòi hàng-hi,
[12] yû-sṳ̀ chhai kiê-thèu hong-mî, yû-sṳ̀ chhai sṳ-chhòng tú yín-yu ngìn.
[13] Kì lâi-tó ke heu-sâng-ngìn, lâu kì chîm-choi, m̀-tî kien-seu tui kì kóng:
[14] “Ngài kîm-pû-ngit vàn-ngien hien-chi, vuk-hâ hàn-chhûn chhin-tô sên-ngì,
[15] só-yî ngài chhut-lòi chhìm ngì, chhin sióng-oi lâu ngì kien-mien, mò sióng-tó chhai liá-vi tù-tó ngì!
[16] Ngài yí-kîn nâ Âi-khi̍p chhái-set chhòng-tân phû-hó ngài ke mìn-chhòng,
[17] yung mu̍t-yo̍k, chhṳ̀m-hiông, kui-phì, chiông mìn-chhòng hiûn-to hiông-hiông.
[18] Lòi â, ngài-têu hióng-su oi-chhìn, chhin-chhìn fôn-lo̍k, chhṳ̍t-to thiên-kông.
[19] Ngài ke ló-kûng mò-chhôi vuk-hâ, hi chhin-yén ke thi-fông lî-hàng.
[20] Kì tai yit thai-pit chhièn hi, to ngie̍t-pan chang voi chón-lòi.”
[21] Ńg-ngìn yung ô-mì fung-sṳ̀n yín-yu kì, yung choi-thiàm sa̍t-va̍t ke fa mì-fe̍t kì.
[22] Heu-sâng-ngìn chit-sṳ̀ thèn-tén kì hàng, chhiong ngiù pûn-ngìn khiên-hi thù-chái-chhòng, yu chhiong lu̍k-é tiet-lo̍k ham-chiáng tú,
[23] chhṳ̍t-to li-chien sa-chhôn kì ke sîm-kôn; kì chhiong tiâu-é pî-ngi̍p lò-mióng, vàn-chhiòn m̀-tî chhṳ-kâ ke sâng-miang chhai ngùi-hiám chûng.
[24] Lai-é â, ngì-têu liá-ha oi thâng-chhiùng ngài, oi chu-yi thâng ngài só-kóng ke fa.
[25] M̀-hó pûn yìm-fu mì-fe̍t ngì-têu ke sîm; m̀-hó ngong-sṳ̀n ngong-sṳ̀n thèn-tén kì hi.
[26] Kì yí-kîn sṳ́ hó-tô ngìn vang-tó, yû chhin-tô nàm-ngìn pûn kì hoi-sí.
[27] Ngì hi kiâ vuk-hâ, he hàng vòng-chhièn lu, lo̍k sí-mòng yîm-kiên.