[1] Ngì lâu thai ngìn-vu̍t khiung-chok sṳ̍t-fan ke sṳ̀-chiet, oi ki-tet chhô chhai ngiâ mien-chhièn ke he má-ngìn.
[2] Na-he ngì fan-liong thai, chhiu oi yok-suk chhṳ-kâ.
[3] M̀-hó thâm-sṳ̍t kì ke phông-phai; kiâng-pha liá he kì ke yîm-mèu.
[4] Ngì oi chhûng-mìn têu-é, mo̍k ko-lò, sí-oi chhièn.
[5] Chhièn-chhòi yit-ngiap-muk chhiu sêu-sṳt; yîn-vi chhièn-chhòi voi sâng yi̍t-kap, chhiu chhiong yeu-phò pî-to thiên-táng.
[6] Mo̍k sṳ̍t ngat-chhat ngìn ke fan, m̀-hó thâm kì ke phông-phai.
[7] Kì kóng: “M̀-sṳ́ se-ngi, sṳ̍t â, lîm â”, chúng-he kì sîm-tú nang-ngoi yû tá-son. Kì cho-ngìn, sîm-tú chôn-mùn kie-kau chhièn.
[8] Ngì só-sṳ̍t ke yit-si̍t tûng-sî voi éu chhut-lòi; ngì só-kóng ke chiâng-fa ya voi pien-cho khûng-khûng.
[9] Ngì m̀-hó kóng-fa pûn ngong-ngìn thâng; kì voi méu-sṳ ngì chṳ-fi ke fa.
[10] M̀-hó sái kú-sṳ̀ ke thi-kie, m̀-hó cham kû-yì ke thièn-thi;
[11] yîn-vi kì-têu ke Pó-fu-chá thai-yû nèn-li̍t, Kì oi cho ngì ke tui-thèu, vi kì-têu sṳ̂n-yên.
[12] Oi chôn-sîm chiap-su kau-hiun, ngin-chṳ̂n thâng chṳ-sṳt ke fa.
[13] M̀-hó m̀ kón-kau se-ngìn-è; yung chuk-siû-é m̀-voi tá-sí;
[14] ngì yung chuk-siû-é tá kì, chang voi kiu kì ke sâng-miang.
[15] Lai-é â, ngì na yû chṳ-fi, ngài he ngióng-pân fôn-hí khoai-lo̍k!
[16] Ngì yit-kóng chṳn-chhṳ̍t ke fa, ngài ke sîm-kôn chhiu tông-thiong!
[17] Ngì m̀-hó chhit-tu chhui-ngìn, oi ngit-ya kin-vi Song-chú;
[18] án-ngiòng, ngì ke chhièn-thù chhiu kông-mìn, ngì ke chiông-lòi ya m̀-voi chhie̍t-mong.
[19] Lai-é â, thâng ngài ke fa lòi tet-tó chṳ-fi; oi liù-sîm hàng chṳn-lu.
[20] Hau lîm-chiú ke, thâm-sṳ̍t ngiuk ke, m̀-hó thùng kì-têu cho phèn-yû;
[21] yîn-vi hau-chiú thâm-sṳ̍t ke, voi pien khiùng-khú ngìn; hau soi-muk ke ngìn, yit-thin voi chok lan sâm-fu.
[22] Yin-kôi thâng-chhiùng kiung ngì ke yà-ôi; chhiu-son ló lé, ya m̀-hó khon-khiâng kì-têu.
[23] Ngì oi fu thoi-ka lòi tet-tó chṳ̂n-lî, chṳ-fi, kau-hiun lâu kien-sṳt; chhiên-van m̀-hó chiông kì-têu mai-thet.
[24] Ngi-ngìn ke yà-è, thin-chho̍k voi fî-sòng khoai-lo̍k; lai-é yû chṳ-fi, kiung kì ke chhiu chhin fôn-hí.
[25] Yin-tông pûn ngì ke yà-ôi khoai-lo̍k; oi pûn kiung ngì ke â-mê fôn-hí!
[26] Lai-é â, oi chhiòn-sîm hiong ngài ho̍k-si̍p, oi chu-yi khon ngài ke mù-yong.
[27] Kî-ńg he vù-tái chhṳ̂m-hâng; yìm-fu he chṳ-miang ham-chiáng.
[28] Kì-têu chhiong mài-fu̍k ke khiòng-tho, sṳ́ kien-tô ke ngìn pien kiên-cha.
[29] Má-ngìn yû châi-fo? Má-ngìn yû yù-sông? Má-ngìn yû siông-châng? Má-ngìn yû mài-yen? Má-ngìn vù-ku su-sông? Má-ngìn muk-chû chhak-chhak?
[30] Chhiu-he ke-têu liù-lièn chui-hiông, hau-chiú thâm-pî ke ngìn.
[31] M̀-hó thâm-oi pî-chûng yu-fùng yu-chiâng, chhai hèu-lièn chûng yu-sùn yu-sun ke chiú.
[32] Chui-heu chiú voi chhiong sà-kô chhàn ngì, chhiong thu̍k-sà ngâu ngì.
[33] Ngì voi muk fâ-fâ, thèu fûn-fûn, lon kóng-fa.
[34] Ngì voi chui-to fèu-fèu, chhiong chhai hói-chûng, yu chhiong soi chhai sòn ke ngùi-kôn táng-kô.
[35] Ngì voi kóng: “Ngài pûn-ngìn chhùi, m̀-voi thung, pûn-ngìn tá, mò kám-kok. Ngài ngióng siáng m̀ ko-lòi? Ngài oi chai lîm yit-pî!”