[1] M̀-hó chhit-tu fái-ngìn, m̀-hó sióng-oi thùng kì-têu cho-phân;
[2] yîn-vi kì-têu ke sîm kie-mèu hiûng-phau ke sṳ, kì-têu só-kóng ke chhiòn he sông-hoi ngìn ke fa.
[3] Kâ-thìn he yung chṳ-fi lòi kien-chho, he thûng-ko liáu-kié tet-tó vún-ku;
[4] yîn-vi yû chṳ-sṳt, vuk-tú ya chhûng-mân kok-chúng chṳ̂n-khì mî-hó ke pó-vu̍t.
[5] Yû chṳ-fi ke ngìn thai-yû nèn-li̍t; yû chṳ-sṳt ke ngìn li̍t-song kâ-li̍t.
[6] Siông-chhṳ̀ oi yû hó kie-mèu; chhâm-mèu tô chhiu nèn tá-yàng.
[7] Chṳ-fi he chhêu-ko ngong-ngìn só-nèn liáu-kié ke; kì-têu chhai fi-ngi chûng m̀-kám khôi-choi kóng-fa.
[8] Kie-mèu cho fái-sṳ ke, chhiu ôn-to yîm-mèu-kâ.
[9] Ngong-tong ngìn ke kie-mèu chhiu-he chhui-ok; ngau-man ngìn chhin tet-ngìn-nâu.
[10] Ngì chhai fam-nan ke sṳ̀ na-he sṳt-chṳ mò-tám, ngì ke li̍t-liong chhiu chhin yû-han.
[11] Ngìn vù-khû phan sí-hìn, ngì oi hi chhióng-kiu; kì pûn-ngìn lâi-hi oi chhṳ̀, ngì oi lâi chón-lòi.
[12] Ngì na-he kóng: “Liá sṳ-chhìn ngài-têu m̀-tî”; kám-kóng ke kam-chhat ngìn-sîm ke Song-ti voi m̀-tî he-mò? Pó-fu ngì sâng-miang ke, Kì fî-sòng chhîn-chhú! Kì oi cheu tak-sà só-hàng ke lòi po-yin.
[13] Lai-é â, oi sṳ̍t phûng-thòng, yîn-vi tui ngì yû hó-chhu; sṳ̍t phûng-teu tit-hâ ke phûng-thòng, ngì voi kám-kok kâm-thiàm.
[14] Ngì ya oi tî, chṳ-fi tui ngì ke sîm-lìn ya he án-ngiòng; ngì na chhìm-tó, chhièn-thù chhiu kông-mìn, ngì ke chiông-lòi ya m̀-voi chhie̍t-mong.
[15] Ok-kun â, m̀-hó mài-fu̍k kûng-kit ngi-ngìn ke kâ; m̀-hó pho-fai kì ke vuk;
[16] yîn-vi ngi-ngìn sûi-yèn tiet-tó chhit-pái, kì hàn voi hong-hí-lòi; chúng-he, châi-fo yit-to, sià-ok ke ngìn chhiu voi vang-to tap-tap.
[17] Khon-tó ngì ke sù-thi̍t tiet-tó, m̀-hó fôn-hí; kì kang-tó ke sṳ̀, ngì ke sîm m̀-hó khoai-lo̍k;
[18] kiâng-pha Song-ti khon-tó ngì ke fái-sîm chhiu mò fôn-hí, yèn-heu chiông Kì ke nu-hi tui sù-thi̍t sṳ̂n-hong sái-chéu.
[19] M̀-hó yîn-vi fái-ngìn sên-fa̍t hó-se lòi pot-at; ya m̀-hó chhit-tu sià-ok ke ngìn;
[20] yîn-vi fái-ngìn mò chhièn-thù, sià-ok ke ngìn mò chṳ́-mong.
[21] Lai-é â, oi kin-vi Song-chú, chûn-kin kiûn-vòng; ya m̀-hó thùng phoi-ngia̍k ke ngìn khiung-ha kiet-kâu,
[22] yîn-vi liá-têu ngìn yit-ha-é chhiu voi me̍t-mòng. Ngì kám m̀-tî Song-ti lâu kiûn-vòng voi kong châi-nan he-mò?
[23] Hâ-poi ya he chṳ-fi ngìn ke chṳ̂m-ngièn: Sṳ́m-phan ke sṳ̀ m̀-hó khon ngìn ke chhìn-mien.
[24] Má-ngìn tui fái-ngìn kóng: “Ngì mò-chhui”, van-mìn voi chu-chú kì, lie̍t-koet voi kûng-kit kì.
[25] Chúng-he chit-fa̍t fam-chhui ke voi fàm-sṳ sun-li; kok-yong ke chuk-fuk ya voi lìm-to kì sṳ̂n-hong.
[26] Sṳ̀n-sṳ̍t ke fì-tap péu-sṳ chṳ̂n-sṳ̍t ke yû-chhìn.
[27] Oi siên yû mèu-sên ke pá-vok, thièn-yèn ya oi chṳ́n-lî hó-se, chang lòi hí-vuk, sṳ̀n-kâ li̍p-ngia̍p.
[28] M̀-hó sùi-phien cho-chṳn lòi-hoi lìn-sa; ya m̀-hó yung-choi khî-phien ngìn.
[29] M̀-hó kóng: “Ngìn tui ngài án-ngiòng, ngài ya oi tui kì án-ngiòng! Ngài oi cheu kì só-hàng ke po-fu̍k kì!”
[30] Ngài lu-ko lân-sṳ̂ ngìn ke thièn-thi, mò sòng-sṳt ke ngìn ke phù-thò-yèn;
[31] khon net-è tông-tô, chha̍p-chhó mân-phien he, sa̍k-chhiòng ya pên-thet.
[32] Ngài kín-khon kín-sióng ke sṳ̀, chhiu tet-tó yit-ke kau-hiun:
[33] Ngì soi kâ yit-ha-é, tuk-kû hiû-sit yit-ha-é, nám-tén sú hiet-khun yit-ha-é;
[34] chúng-he phìn-khiùng voi fut-yèn-kiên chhiong khiòng-tho lòi chhióng ngì, khiet-fa̍t voi chhiong thú-fî lòi kûng-tá ngì.