[1] Lai-é â, oi khon-chhung ngài ke chṳ-fi, oi ngin-chṳ̂n thâng ngài chhûng-mìn ke fa-ngî;
[2] án-ngiòng, ngì chhiu voi kiún-sṳ́m hàng-sṳ, ngì ke choi-sùn voi mân-yû chṳ-sṳt.
[3] Yìm-fu ke choi-sùn tit-hâ phûng-thòng, kì ke choi pí kám-lám-yù kha-va̍t;
[4] chúng-he chui-mî kì pí vòng-lièn kha fú, ya pí lióng-piên ke tô-kiam hàn-kha li.
[5] Kì ke kiok hàng sí-mòng ke lu; kì ke kiok-phu chhṳ̍t-hiong yîm-kiên.
[6] Kì mò chu-yi hàng sâng-miang ke lu, kiok-phu hàng-chhâ, chhṳ-kâ me m̀-tî.
[7] Lai-é â, liá-ha oi thâng-chhiùng ngài; ngì-têu m̀-hó vì-poi ngài ke fa.
[8] Oi yén-yén lì-khôi yìm-fu! Chhiên-van m̀-hó hàng-khiûn kì ke mùn-héu!
[9] Kiâng-pha ngì voi chiông hó miàng-sâng sung-pûn phe̍t-ngìn, chiông chhiâng-chhûn ke ngièn-ngit kâu-pûn hiûng-ok ke ngìn;
[10] kiâng-pha sâng-fun-ngìn chhiu lòi chhióng-chéu ngì ke chhòi-sán, ngì lò-luk tet-lòi ke voi lo̍k-ngi̍p ngoi-ngìn ke kâ.
[11] Ngì lìm-chûng ke sṳ̀, hiet-hi sêu-chhin, voi kín-chhên mò-thìn, kóng:
[12] “Ngài cho-má-ke án yen-hen kón-kau? Ngài ke sîm ngióng-voi méu-sṳ khien-va?
[13] Ngài tông-sṳ̀ m̀-thâng sṳ̂-fu ke fa, vàn-chhiòn m̀-tap ngài ke-têu sîn-sâng.
[14] Ngài liá-ha chhai kûng-khiung chhòng-só chung-ngìn ke mien-chhièn, kien-seu to voi sí!”
[15] Ngì oi lîm chhṳ-kâ pî-thòng chûng ke súi, lîm ngì chhṳ-kâ chiáng-tú liù-chhut ke súi.
[16] Ngì ke chhièn-ngièn kám cho-tet liù-to kiê-hong? Ngì ke chhièn-súi kám cho-tet yúng-to kóng-chhòng?
[17] Ngì ke chhièn-ngièn oi tân-tân kûi-su̍k ngì; chhie̍t-tui cho-m̀-tet lâu ngoi-ngìn chhâm-chha̍p.
[18] Ngien ngì ke chhièn-ngièn mùng-fuk; ngien ngì fôn-hí heu-sâng sṳ̀ só-thó ke pû-ngiòng.
[19] Kì chhiong tet-ngìn-siak yu tông-chiâng ke lu̍k-é; ngien kì ke hiûng-fài sṳ̀-sòng pûn ngì sîm-mân yi-chiuk, ngien kì ke oi-chhìn yit-chhṳ̍t sṳ́ ngì sṳ̀n-fùn tiên-to.
[20] Lai-é â, cho-má-ke oi pûn phe̍t ke fu-ngìn-kâ mì-tó? Cho-má-ke oi nám yìm-fu ke hiûng-fài?
[21] Ngìn só-hàng ke tho, chhai Song-chú ngién-chhièn; ngìn yit-chhiet ke lu, Kì lûng-chúng kam-chhat.
[22] Sià-ok ngìn ke chhui chhiong lò-mióng, chiông chhṳ-kâ khún-to hèn-hèn; kì só-fam ke chhui chhiong sok-è, chiông chhṳ-kâ chhàn-to sí-sí.
[23] Kì yîn-vi m̀-su kón-kau, chhiu sóng-sṳt sâng-miang; yîn-vi ngong-tong chṳ-khi̍t, kì pit-thin hàng-chhâ lu.