[1] Song-ti fat-khién ke sṳ̀ ngài pûn Kì chit-phi, ngài he kîn-ngiam liá khú-nan ke ngìn.
[2] Kì chiông ngài kiuk-to vû-am chûng, m̀ pûn ngài liù chhai kông-mìn chûng.
[3] Kì ton-chṳ̂n yit-pái yu yit-pái tá-kit ngài, kûi-ngit mò-thìn.
[4] Kì sṳ́ ngài ke phì-ngiuk ló-sôi; kì áu-thôn ngài ke kut-thèu.
[5] Kì chhai ngài ke si-vì hí kô-chhiòng, yung kiên-nàn thung-khú lòi pâu-vì ngài.
[6] Kì pet ngài he̍t chhai vû-am chûng, chhiong sí chhin-kiú ke ngìn yit-yong.
[7] Kì yung tông-chhûng ke thiet-lien khún-tén ngài; ngài sàng-cho fam-ngìn, mò fap-thu thò-chéu.
[8] Ngài thai-sâng chhin-hêm kiu-miang, chúng-he Song-ti m̀-thâng ngài ke khì-tó.
[9] Kì yung thai-sa̍k tóng ngài ke lu, sṳ́ ngài ke lu vân-vân vat-vat.
[10] Kì chhiong yùng-è án-ngiòng phu-tén ngài, ya chhiong sṳ̂-é khong chhai am-chûng tén-tén ngài.
[11] Kì kiuk ngài lì-khôi thai-lu, chiông ngài pak-to lan-lan fit-thet.
[12] Kì lâi-khôi kiûng tap-sông chien, nâ ngài chún chien-pá lòi-sa.
[13] Kì nâ chien-thoi ke chien, sa-ngi̍p ngài ke nui-chhong.
[14] Ke-têu ngìn kûi-ngit sâu-nat ngài; ngài sàng-cho thai-kâ ke seu-khô.
[15] Kì pet ngài sṳ̍t fú-chhoi, khiòng-kon ngài lîm fú-chiú.
[16] Kì chiông ngài ke mien khim chhai thi-nài-hâ; Kì yung sa̍k-thèu khau-thôn ngài ke ngà-chhṳ́.
[17] Ngài ke sên-fa̍t mò phìn-ôn; ngài m̀ ki-tet fuk-hi he má-ke.
[18] Ngài chhai sṳ-kiên ke ngit-è mò-tô lé; ngài tui Song-chú ke phan-mong ya mò lé.
[19] Sióng-tó ngài ke thung-khú lâu liù-long, chhiu-chhiong fú-tám lâu thu̍k-yo̍k khiung-yong.
[20] Ngài yit-chhṳ̍t sióng liá-têu sṳ-chhìn, ngài ke sîm-lìn kân-khú yù-sông!
[21] Chúng-he ngài sióng-tó nang-ngoi yit-khien sṳ, ngài chhiu chhùng-sîn yû hî-mong:
[22] Song-chú ke chhṳ̀-oi yún-yén m̀-voi thôn-thet; Kì ke lìn-mén ya yún-yén m̀-voi thìn-thet;
[23] tak chêu-sṳ̀n liá-têu chhiòn-phu he sîn ke, Ngì ke sin-sṳ̍t khi̍t-thai vù-pí!
[24] Ngài sióng: Song-chú he ngài ke yit-chhiet; só-yî, ngài yit-thin oi ngióng-mong Kì.
[25] Chhìm-khiù Kì, sin-kho Kì ke ngìn, Song-chú oi sṳ̂-ên pûn kì-têu.
[26] Só-yî ngài-têu yin-tông ngióng-mong Kì, nai-sîm tén-heu Song-chú ke kiu-ên.
[27] Ngài-têu yin-kôi chhai heu-sâng ke sṳ̀ ho̍k-si̍p pà chhûng-tâm.
[28] Chú su ngài-têu khú-nan ke sṳ̀, chhṳ-kâ yin-kôi tiâm-tiâm chhô-tén.
[29] Ngài-têu yin-kôi tâi-thèu sun-fu̍k, mò thin-chho̍k hàn-yû hî-mong.
[30] Yù-chhai ngìn tá choi-kok, thin-chho̍k oi ngiûn to-tái.
[31] Yîn-vi Chú mân-yû chhṳ̀-oi, Kì m̀-voi yún-yén fit-thet ngài-têu.
[32] Kì sûi-yèn sṳ́ ngài-têu yù-sèu, chúng-he tui ngài-têu ke thung-siak m̀-voi kói-pien.
[33] Kì m̀-he chhùn-sîm oi ngài-têu su-khú, ya mò-oi sṳ́ ngài-têu yù-sèu.
[34] Chhai kâm-ngiu̍k tú pûn-ngìn tha̍p-to kiok tái-hâ, Chú thin-chho̍k voi koân-sîm!
[35] Pok-siok Chṳ-kô Song-ti su ke ngìn-khièn, Chú thin-chho̍k voi koân-sîm!
[36] Chhai fap-thìn pûn-ngìn yên-vóng, Chú thin-chho̍k voi koân-sîm!
[37] Na-m̀-he Chú ha min-lin, mò-ngìn nèn sṳ̀n-chhiu má-ke.
[38] He fo-fam ya-he fuk-hi, chhiòn-phu oi khon Chṳ-kô-chá ke min-lin.
[39] Hàn sâng ke ngìn yîn-vi fam-chhui su chit-fa̍t, hàn-yû má-ke hó koai-yen nè?
[40] Ngài-têu yin-kôi fán-sén chhṳ-kâ ke hàng-vì, fì-thèu kûi-hiong Song-chú.
[41] Ngài-têu yin-kôi tá-khôi sîm-mùn, khià-sú hiong thiên-táng ke Song-ti kóng:
[42] Ngài-têu fam-chhui phoi-ngia̍k Ngì, Ngì chang mò sa-miên ngài-têu.
[43] Ngì thai fat-khién chiông ngài-têu kiuk-chéu; Ngì chiáu-me̍t ngài-têu chhiòn-mò liù-chhìn.
[44] Ngì yung vû-yùn châ-tén chhṳ-kâ, sṳ́ ngài-têu ke khì-tó mò phan-fap tha̍t-tó Ngì mien-chhièn.
[45] Ngì sṳ́ ngài-têu chhai van-mìn chûng sàng-cho lá-sap, pûn-ngìn fit-thet.
[46] Ngài-têu ke sù-thi̍t sâu-nat ngài-têu, chhiòn-phu khôi-choi met-sa ngài-têu.
[47] Ngài-têu tù-tó chho̍k-kiâng lâu ham-hoi, su-tó châi-nan lâu me̍t-mòng.
[48] Vi-tó thùng-pâu su-tó ke me̍t-mòng, ngài ke muk-chṳp chhiong hò-pa-súi liù mò-thìn.
[49] Ngài ke muk-chṳp kín-liù, thìn m̀ hâ-lòi,
[50] kín-tén Song-chú ke khon-ku, mong Kì tui thiên-táng kam-chhat.
[51] Ngài khon-tó sàng-chûng ke fu-ńg su-tó châi-nan, ngài ke sîm chhiu pî-sông thung-khú.
[52] Thi̍t-ngìn mò-yèn mò-ku chok ngài, chhiong chok tiâu-é yit-yong.
[53] Kì-têu chiông ngài sâng-sâng fit-lo̍k tún-súi-fut, táng-kô hàn yung thai sa̍k-thèu khièm-tén.
[54] Súi chim-tó ngài ke thèu-nà; ngài sióng: Ngài voi mò-miang lé!
[55] Song-chú â, chhai chhṳ̂m-chhṳ̂m ke fut-tú, ngài khiù-ham Ngì ke miàng.
[56] Khiù Ngì thâng ngài khiù-kiu ke sâng, khiù Ngì m̀-hó set-tén ngí-kûng.
[57] Ngài khiù Ngì ke sṳ̀, Ngì chhîn-khiun ngài, en ngài kóng: “M̀-sṳ́ kiâng!”
[58] Chú â, Ngì thoi ngài sṳ̂n-yên; Ngì kiu-su̍k ngài ke sin-miang.
[59] Song-chú â, Ngì khon-tó ngài su ke yên-vóng; khiù Ngì phan ngài mò-chhui!
[60] Ngì khon-tó sù-thi̍t ngióng-pân hen ngài, ngióng-pân mèu-hoi ngài.
[61] Song-chú â, Ngì thâng-tó kì-têu lon-ma ngài; Ngì tî kì-têu oi mèu-hoi ngài.
[62] Tui-thi̍t kûi-ngit chhâm-siòng oi kûng-kit ngài, sat-kie oi ham-hoi ngài.
[63] Ngì khon, kì-têu mò-lun chhô-tén ya-he khî-tén, yit-chhṳ̍t phiên kô-é lòi sâu-nat ngài.
[64] Song-chú â, khiù Ngì chit-fa̍t kì-têu, cheu kì-têu só-cho ke po-yin kì-têu.
[65] Khiù Ngì chu-chú kì-têu, sṳ́ kì-têu chhie̍t-mong.
[66] Khiù Ngì fat-khién kiuk-chéu kì-têu, sṳ́ kì-têu tui phû-thiên-ha sêu-me̍t!