[1] Chhám lé! Yî-chhièn chhin-tô ngìn he̍t ke sàng-sṳ, liá-ha kû-tân vang chhai ke-vi! Yî-chhièn chhai kok-koet chûng cho thai ke, liá-ha chhiong koá-fu! Yî-chhièn he kok-sén ke ńg-vòng, liá-ha cho nù-pî.
[2] Kì kûi am-pû thai-kieu, muk-chṳp liù-to mân-mien. Yî-chhièn ke-têu chhîn-oi ke phèn-yû, liá-ha mò yit-sà lòi ôn-ví kì. Kì ke thùng-phân chhiòn-phu chhut-mai kì, chhiòn-phu sàng-cho kì ke sù-thi̍t!
[3] Yù-thai ngìn-mìn he khó-lièn ke nù-chhòi, pûn-ngìn pet-to lì-khôi kâ-hiông. Kì-têu liù-long to ngoi-pâng, mò thi-fông hó ôn-sîm he̍t. Kì-têu chhai khú-nan chûng, pûn-ngìn tûi-to mò lu hó chéu.
[4] Oi hi Siak-ôn ke kiê-lu chhî-liòng; yîn-vi mò-ngìn hi ke-vi ko-chiet. Sṳn-thien chhong-kô ke se-moi-é pî-sông; ke-têu chi-sṳ̂ chṳ́-yû ôi-sông than-sit. Sàng-mùn lâng-lo̍k; Siak-ôn pî-ôi!
[5] Thi̍t-ngìn pien-cho kì ke chú-ngìn; kì ke sù-thi̍t ôn-lo̍k chhṳ-chhai. Yîn-vi kì ke chhui-ok chhin-tô, Song-chú chang voi sṳ́ kì su-khú; kì ke chṳ́-ńg pûn thi̍t-ngìn chok-chéu.
[6] Siak-ôn-sàng yí-kîn sṳt-thet kì ke kông-yùng. Kì ke liâng-chhiu chhiong chhìm m̀-tó chhó-chhòng ke lu̍k-é; tá-lia̍p ke ngìn lòi-kiuk kì-têu, kì-têu mò-li̍t hó chéu.
[7] Yâ-lu-sat-lâng chhai chhî-liòng fông-fi ke tông-chûng, chang sióng-tó thèu-pái yit-chhiet ke yùng-fà fu-kui. Kì ke ngìn-mìn lo̍k chhai thi̍t-ngìn sú-chûng ke sṳ̀, ya mò yit-ke ngìn lòi pông-chhu kì. Sù-thi̍t khon-tó liá chhìn-hìn, chhiu sâu-nat kì ke me̍t-mòng.
[8] Yâ-lu-sat-lâng chhui-ok tông-thai, sàng-cho mò chhiang-li ke tûng-sî. Ngièn-lòi chûn-kin kì ke, khon-tó kì chhak-sṳ̂n lu-thí, chhiu khon-khiâng kì. Kì chṳ́-yû théu thai-hi, chón-sṳ̂n m̀-kám kien ngìn.
[9] Kì ke ô-chô kò-tó khiùn; kì mò kháu-li chhṳ-kâ ke chiông-lòi. Kì thai sṳt-phai; ya mò-ngìn ôn-ví kì. Kì kóng: Song-chú â, khon ngài ke khú-nan, yîn-vi thi̍t-ngìn tet-sṳn lé.
[10] Sù-thi̍t chhióng-chéu kì só-yû ke chhòi-pó; kì khon-tó kì-têu chhong-tén ngi̍p sṳn-thien, chhiu-he Ngì — Song-chú kim-chṳ́ ngoi-pâng-ngìn ngi̍p-hi ke só-chhai.
[11] Ngìn-mìn kín théu thai-hi, hi tak só-chhai chhìm sṳ̍t ke tûng-sî; kì-têu nâ pó-vu̍t hi-von sṳ̍t-vu̍t, sióng-oi vì-chhṳ̀ sâng-miang. Chhiòn-sàng khì-khiù: Song-chú â, khiù Ngì lòi khon, khiù Ngì lòi sióng; ngài he ngióng-pân pûn-ngìn khon-khiâng!
[12] Ngì liá-têu ko-lu ngìn â, liá-sṳ ngì-têu mò koân-sîm he-mò! Ngì-têu oi chu-yi khon. Chhṳ-chhiùng m̀-sṳt yû-ngìn chhiong ngài su-tó án-ngiòng ke thung-khú; liá he Song-chú thai fat-khién ke sṳ̀ kâ-pûn ngài ke thung-khú.
[13] Ngài ke kut-thèu chhiong pûn fó sêu-tó, he Kì tui thiên-táng kong hâ-lòi ke. Kì ôn lò-mióng, sṳ́ ngài kang tiet-tó. Kì fit-thet ngài, sṳ́ ngài kûi-ngit thèu-nà fùn-fùn.
[14] Kì chiông ngài ke ko-fam, nâ-lòi thak-cho yit-chhon, chhiong ak án-ngiòng koa chhai ngài ke kiáng-kîn, chiông ngài chak-to chhin-thiám. Chú chiông ngài kâu-pûn sù-thi̍t; ngài mò li̍t-liong lòi tí-khong.
[15] Ngài só-yû ke yúng-sṳ, Chú mò khon chhai ngién-chûng; Kì phai thai-kiûn lòi kûng-kit ngài ke heu-sâng-ngìn. Chú chien-tha̍p Yù-thai ke ngìn-mìn, chhiu-chhiong tha̍p phù-thò khiung-yong.
[16] Ngài vi liá-têu sṳ kín-kieu, ngài ke muk-chṳp liù mò-thìn. Mò-ngìn yû phan-fap ôn-ví ngài; mò-ngìn nèn pûn ngài yúng-hi. Sù-thi̍t tá-yàng ngài; ngài ke ngìn-mìn má-ke tû mò lé.
[17] Siak-ôn chhûn-sú khiù pông-chhu, chúng-he mò-ngìn hén then-sú. Song-chú min-lin sù-thi̍t, tui si-mien pat-fông lòi pâu-vì Ngâ-kok ke heu-thoi; kì-têu khon Yâ-lu-sat-lâng cho ô-chô ke tûng-sî.
[18] Song-chú he kûng-ngi ke, Kì án-ngiòng tui-thai ngài, he yîn-vi ngài vì-poi Kì ke min-lin. Kok-thi ke ngìn-mìn â, oi chu-yi thâng; khon chhîn-chhú ngài só su ke thung-khú. Ngài ke chhiâng-ngièn nàm-ńg pûn-ngìn chok-chéu lé!
[19] Ngài khiù ke-têu chhîn-oi ke phèn-yû pông-chhu, chúng-he kì-têu chhiòn-phu khî-phien ngài. Vi-tó oi chhìm sṳ̍t ke tûng-sî vì-chhṳ̀ sâng-miang, ngài ke-têu chi-sṳ̂ lâu liâng-chhiu ya sí chhai kiê-hong.
[20] Song-chú â, khiù Ngì khon ngài ke yù-sèu! Chhiáng khon ngài sîm-lìn só su ke thung-khú! Ngài ke sîm-chhòng pho-sui thung-khú, yîn-vi ngài thai-thai phoi-ngia̍k Ngì. Ngoi-poi yû hiûng-sat, vuk-tú yû sí-sṳt.
[21] Yû-ngìn thâng-tó ngài ke than-sit, chúng-he mò-ngìn ôn-ví ngài. Sù-thi̍t yîn-vi Ngì hiong ngài kong châi-nan chhiu lòi fôn-hí khoai-lo̍k. Ngien Ngì siên-ko ke ngit-è kiak-kiak lòi-to; ngien ke-têu sù-thi̍t lâu ngài su khiung-yong ke khú-nan.
[22] Ngien Ngì chit-phi kì-têu ke chhui-ok; khiù Ngì chit-fa̍t kì-têu, chhiu-chhiong Ngì yîn-vi ngài ke chhui chit-fa̍t ngài khiung-yong. Ngài kân-khú to kín-chhên, ngài ke sîm-kôn fî-sòng thung-khú!