[1] Chhám lé! Ngài-têu ke sùn-kîm pien-chṳt, chhiòn-mò kông-chhái! Sṳn-thien ke sa̍k-thèu pûn-ngìn fit chhai kiê-lu!
[2] Siak-ôn chhiâng-ngièn pún-lòi chhiong sùn-kîm án kô-kui, chúng-he liá-ha pûn-ngìn khon-cho chhû-fì yit-yong.
[3] Yâ-kiéu hàn tî oi pûn yu-chṳ́ sṳ̍t-nen, chúng-he ngài ke ngìn-mìn chhiong khóng-yâ ke thò-niâu án mò-chhìn.
[4] Kì-têu yù-chhai ô-nga-é choi-châu to voi sí; se-ngìn-è thó-sṳ̍t, ya mò-ngìn nâ-pûn kì-têu.
[5] Yit-liu-lî sṳ̍t sân-chṳ̂n hói-mi ke ngìn, liá-ha chhai kiê-thèu hong-mî mò-ngìn chhap; yit-liu-lî ko chhâ-fà sên-fa̍t ke ngìn, liá-ha vang chhai lá-sap-tôi chhìm sṳ̍t-vu̍t.
[6] Ngài ke ngìn-mìn só sṳ̀n-su ke chit-fa̍t, pí Só-tô-mâ ngìn-mìn só su ke hàn-kha chhûng. Só-tô-mâ yit-ngiap-muk chhiu sêu-me̍t thet, m̀-sṳ́ su-tó má-ke kûng-kit.
[7] Ngài-têu ke kui-chhu̍k yit-liu-lî pí siet pí nen kha pha̍k-chhiang; kì-têu ke mien-set fùng-yun, sṳ̂n-khiòng li̍t-chong.
[8] Liá-ha kì-têu chhai kiê-hong mò-ngìn sṳt; kì-têu ke mien pí fó-than hàn-kha vû, phì pâu-kut, chheu-to chhiong châu-chhèu yit-yong.
[9] Pûn tô-kiam chhṳ̀-sí ke, pí ngo-sí ke ngìn kha hen-fuk; ngo-sí ke oi ngiûn-su yâu ke thung-khú, man-man thô-to sí.
[10] Ngài ke ngìn-mìn só su ke châi-nan fî-sòng tet-ngìn-kiâng, chhṳ̀-oi ke â-mê chhîn-sú chú chhṳ-kâ ke se-ngìn-è lòi sṳ̍t!
[11] Song-chú chiông Kì ke thai fat-khién chhin-piang chhut-lòi; Kì tiám-chho̍k lie̍t-fó chiông Siak-ôn sêu-cho phiàng-thi.
[12] Sṳ-kiên mò-ngìn siông-sin, lièn lie̍t-koet ke kiûn-vòng ya m̀ siông-sin: Chhîm-lio̍k-chá nèn chin-ngi̍p Yâ-lu-sat-lâng ke sàng-mùn.
[13] Chúng-he án-ngiòng ke sṳ chṳn-kîn fat-sên; liá he yîn-vi kì ke siên-tî lâu chi-sṳ̂ fam-chhui, chhai sàng-tú chiông mò-chhui ke ngìn chhú sí-hìn.
[14] Kì ke-têu liâng-chhiu chhiong mô-muk ke chhai kiê-hong chhong-lòi chhong-hi; kì-têu kò-tó mân-sṳ̂n ke hiet, mò-ngìn kám hi miâ-tó kì-têu.
[15] Ngìn-mìn thai-sâng chhin-tot kì-têu kóng: “Chéu-khôi, ngì liá-têu ô-chô tûng-sî! Cho-m̀-tet hàng-kiâm ngài liá-vi lòi!” Yîn-vi án-ngiòng, kì-têu to-chhu liù-long, mò yit-ke koet-kâ hén sû-liù kì-têu.
[16] Song-chú mò-oi chai koân-sîm kì-têu; Kì chhṳ-kâ chiông kì-têu kiuk chhut-hi. Ngìn-mìn mò khon-chhung chi-sṳ̂, ya mò hó khoán-thai liâng-chhiu.
[17] Ngài-têu phan-mong yû-ngìn lòi pông-chhu, chúng-he phan-mong to muk-chû fâ-thet. Kîn-pún mò koet-kâ yû-li̍t pông-chhu ngài-têu! Ngài-têu hàn yit-chhṳ̍t chhai sú-mong-thòi kín-mong.
[18] Sù-thi̍t chhiong tá-lia̍p án-ngiòng tûi ngài-têu, chṳ-to ngài-têu m̀-kám chhai kiê-hong hàng. Ngài-têu ke ngit-è mân lé! Ngài-têu ke kiet-khiu̍k to lé.
[19] Tûi ngài-têu ke ngìn pí khûng-chûng ke ên-tiâu hàn-kha kiak; kì-têu chhai sân-táng tûi ngài-têu, chhai khóng-yâ phu-tén ngài-têu.
[20] Kì-têu chok-tó Song-chú kò-yù só-li̍p ke vòng, chhiu-chhiong sû-chéu ngài-têu théu ke hi. Ngài-têu ngièn-tán khok-sin kì voi pó-fu ngài-têu; kì voi kiu ngài-têu thot-lì khiòng-thi̍t ke kiûn-vòng.
[21] He̍t chhai Vû-sṳ̂ ke Yî-tûng-ngìn â, cho ngì-têu chhin-liong fôn-hí khoai-lo̍k! Khú-nan ke chiú-pî ya voi chhòn-pûn ngì-têu, ngì-têu voi chhiong ngìn chui-to chhak-sṳ̂n lu-thí.
[22] Siak-ôn ke chhui-ok yí-kîn su-tó chit-fa̍t; Song-chú m̀-voi sṳ́ ngài-têu chhòng-kiú liù-mòng. Chúng-he Yî-tûng â, Song-chú oi chit-fa̍t ngì; Kì oi chiông ngì ke chhui-ok hién-mìn chhut-lòi!