[1] Chhám lé! Chú thai fat-khién, yung vû-yùn châ-tén Siak-ôn-sàng! Kì chiông Yî-set-lie̍t ke kông-chhái tui thiên-táng te̍p hâ-lòi; chhai Kì fat-khién ke ngit, lièn chhṳ-kâ ke sṳn-thien ya m̀-ku.
[2] Chú fí-me̍t Ngâ-kok ke tak-chak chhûn-chông, mò pan-si̍t lìn-mén. Kì chhai thai fat-khién chṳ̂-ha chiông pó-fu Yù-thai ke sàng-pó chhiòn-phu chhak-thet. Kì sṳ́ liá-koet lâu ke-têu liâng-chhiu su-tó vú-yu̍k.
[3] Kì khién-to chiông Yî-set-lie̍t só-yû ke li̍t-liong sêu-me̍t; sù-thi̍t lòi kûng-kit ke sṳ̀, Kì m̀-hén chhut-sú chṳ́n-kiu. Kì chhiong fó án-ngiòng thûn-me̍t Ngâ-kok, chiông só-yû ke sêu chhiang-chhiang.
[4] Kì hiong ngài-têu khôi-kiûng tap-chien, chhiu-chhiong oi sa sù-thi̍t khiung-yong. Kì chhṳ̀-thet ngài-têu só khon-chhung ke ngìn; Kì hiong kûi-chak Yâ-lu-sat-lâng thai fat-fó.
[5] Chú chhiong sù-thi̍t án-ngiòng oi lòi sêu-me̍t Yî-set-lie̍t; Kì sṳ́ Yî-set-lie̍t ke sàng-pó, vòng-kiûng chhiòn-phu pien-cho fông-phû; Kì sṳ́ Yù-thai ngìn-mìn kâ-thiâm tô-tô ke sông-sîm lâu thai-kieu.
[6] Kì pho-fái chhṳ-kâ ke chong-phùng, chhiong fông-fi ke yèn-è khiung-yong, chhak-thet ngài-têu chhi-fi kin-pai ke sṳn-thien; Song-chú fi-thet chhai Siak-ôn ke chiet-khì lâu ôn-sit-ngit. Kì chhai thai fat-khién chṳ̂-ha hi-chhie̍t kiûn-vòng lâu chi-sṳ̂.
[7] Chú vok-thet chhṳ-kâ ke chi-thàn lâu sṳn-só; Kì chún thi̍t-ngìn chhak-thet kiûng-thien ke vì-chhiòng; chhai Song-chú ke sṳn-thien tî-poi, kì-têu chhiong ko-chiet án-ngiòng thai-sâng chhàu-nau!
[8] Song-chú kiet-sîm oi chhak-thet Siak-ôn ke sàng-chhiòng; Kì thàn me̍t-téu-sien cho ki-ho, chhut-sú lòi fí-me̍t kì. Kì sṳ́ sàng-lèu lâu sàng-chhiòng pî-ôi, cho yit-ha vang-thet.
[9] Sàng-mùn mài chhai nài-tôi tú; Kì chiông mùn-kong fí-fái yu áu-thôn. Kiûn-vòng lâu kui-chhu̍k pûn-ngìn kiuk-to ngoi-koet hi. Mò-ngìn chai chhòn-kóng fap-li̍t; siên-tî ya tet m̀-tó tui Song-chú lòi ke yi-siong.
[10] Siak-ôn-sàng ke fu-ló chhô chhai thi-song, mò-ngìn chhut-sâng. Kì-têu chhiòn-phu chok mà-sâm, ve chhṳ̀n-fôi chhai thèu-nà-táng; Yâ-lu-sat-lâng ke-têu se-moi-é thèu-nà lài-to tap-thi.
[11] Ngài ke muk-chû kieu-to voi chhiâng-miâng; ngài ke sîm-kôn thung-to voi lie̍t-thet. Ngài yîn-vi thùng-pâu ke su pet-hoi chhiu fî-sòng ôi-sông; ngài khon-tó se-ngìn-è lâu ô-nga-é chhai kiê-lu fûn-thet!
[12] Kì-têu chhiong chho̍k-sông ke ngìn án-ngiòng vang chhai lu-hong, kì-têu thôn-hi chhièn hàn chhai â-mê ke hiûng-phù chûng kín mun: Nai-vi chang yû-hó sṳ̍t? Nai-vi chang yû-hó lîm?
[13] Yâ-lu-sat-lâng-ngìn â, ngài oi kóng má-ke nè? Ngài oi nâ má-ke lâu ngì pí nè? Siak-ôn ke ngìn-mìn â, ngài oi ngióng-pân ôn-ví ngì nè? Yû má-ngìn chhiong ngì su-tó án-thai ke châi-nan? Ngì ke sông-héu chhiong thai-hói án-fat; má-ngìn yû phan-fap yî-hó ngì nè?
[14] Ngì ke siên-tî chôn-mùn kóng fâ-liâu; kì-têu ke yi-siong ya he ká ke. Kì-têu kóng-tho mò chit-phi ngì ke chhui-ok, miên-tet ngì-têu pûn-ngìn chok-chéu; só khon-tó ke khí-sṳ ya mò-yáng mò-chiak, hoi ngì hàng m̀-chho̍k ke lu.
[15] Ko-lu ke ngìn chhiòn-phu phok-sú sâu-nat ngì; kì-têu kín yèu-thèu seu Yâ-lu-sat-lâng, kóng: Liá chhiu-he ke-chho vàn-mî ke sàng he-mò? Liá chhiu-he chhiòn sṳ-kie fôn-hí ke sàng mâ?
[16] Só-yû ke sù-thi̍t khôi-choi met-sa ngì; kì-têu ngâu-ngà chhiet-chhṳ́ lòi sâu-nat ngì. Kì-têu kóng: Ngài-têu chiông kì fí-me̍t lé! Ngài-têu só phan-mong ke ngit to lé! Liá-ha ngài-têu chhîn-ngién khon-tó lé!
[17] Song-chú yí-kîn sṳ̍t-hàng chhṳ-kâ ke kie-va̍k, he sṳ̀n-chhiu Kì thèu-pái tui ngài-têu ke kín-ko; Kì chiông ngài-têu me̍t-thet, mò yit-si̍t m̀ phan-tet. Kì pûn ngài-têu ke sù-thi̍t yàng-ko ngài-têu; Kì pûn ngài-têu ke sù-thi̍t fôn-hí na-thiên.
[18] Ngìn-mìn ke sîm hiong Chú ôi-khiù. Siak-ôn ke sàng-chhiòng â, ngien ngì ke muk-chṳp ngit-ya chhiong hò-pa súi án-ngiòng kín-liù; ngien ngì muk-chû liù muk-chṳp, chhie̍t-tui m̀-voi thìn hâ-lòi!
[19] Am-pû-thèu tak-pái von-kâng ke sṳ̀, ngì oi hong-hí-lòi hiong Chú khiù-ham; oi chhai Chú mien-chhièn chhiòn-sîm kín-khiù, chhiong liù-súi yit-chhṳ̍t mò-thìn; oi vi ngì ke-têu se-ngìn-è khià-sú khì-tó; kì-têu yí-kîn chhai kiê-thèu hong-mî ngo-to fûn-thet.
[20] Song-chú â, khiù Ngì lòi khon, khiù Ngì lòi sióng! Kám yû-ngìn chhiong án-ngiòng pûn Ngì chit-fa̍t ko? Chhám lé, fu-ngìn-kâ sṳ̍t chhṳ-kâ só-kiung só-siak ke ô-nga-é! Chhám lé, chi-sṳ̂ lâu siên-tî chhai Chú ke sṳn-thien pûn-ngìn chhṳ̀-sí!
[21] Ló-ngìn-kâ lâu heu-sâng-ngìn khiung-yong vang chhai kiê-hong; chhiâng-ngièn nàm-ńg sí chhai thi̍t-ngìn ke tô-kiam hâ-poi. Ngì chhai fat-khién ke ngit-è chhṳ̀-thet kì-têu, chhiòn-mò liù-chhìn.
[22] Ngì hêm-lòi ke sù-thi̍t chhiong lòi ko-chiet yong, chhai ngài si chû-vì hak ngài; chhai Ngì — Song-chú fat-khién ke ngit-è, mò-ngìn sám tet-chéu, mò-ngìn liù-tó sâng-miang. Ngài só-siak só yông-yuk ke chṳ́-ńg, chhiòn-phu pûn sù-thi̍t chhṳ̀ chhiang-chhiang.