[1] Isin warri sooreeyyiin, amma cinqama isinitti dhufaa jiruuf booyaa tii, waywaadhaasi!
[2] Qabeenyi keeysan ni tortora; uffanni keeysaniis bilii dhaan nyaatama.
[3] Ziqeeyni keeysanii fi meetni keeysaniis dandaawanii ti jiru, dandoon isaanii tuniis isin irratti ragaa dha bahu, ammaas qaama keeysan akka ibiddaatti gubu; kunoo, isin ammuma guyyoota boodaa kana keeysatti illee horuma walitti qabachaa jirtu.
[4] Kunoo, warri isin ooyruu teeysan irraa midhaan haamsiifattanii, mindaa isaanii dhorkattan, isin irratti iyyaa ti jiru; iyyansi warra midhaan isiniif oomishan kanaa, gurra Gooftaa hundamaa dandayuu bira gahee ti jira.
[5] Qananii fi gammachutti lafa irra jiraattanii ti jirtu; amma ammoo akka sangaa gabbifamee qalamuuf, guyyaa isaa eeggatuu ti if gootan.
[6] Namoota nassabaas kanneen isiniin hin mormin irratti yakka murtanii ajjeeftanii ti jirtu.
[7] Ammaas yaa obboleeyyan koo, hanga Gooftaan deebi'ee dhufutti obsa qabaadhaa! Kunoo, qote-bulaan tokko hanga lafti, rooba badheeysa roobuu fi ammaas kan hagayya roobu arkatutti, obsaan dandayuu dhaan oomisha faaydaa qabu eeggata.
[8] Isiniis akkasumatti, deebi'ee dhufuun Gooftaa waan dhihaateef jecha, obsaa, jabaadhaa, dhaabbadhaa!
[9] Yaa obboleeyyan koo, wal irratti hin guunguminaa, yookaan isinitti faradama; daanyichi niis kunoo balbala irra dhaabbata!
[10] Waa'ee warra dararama keeysatti obsanii, nabiyyoota kanneen maqaa Gooytaa tiin dubbatanii san, fakkeenyaaf fudhadhaa!
[11] Warra obsa-qabeeyyii turan san, nuti akka warra eeybifamootti isaan laalla. Iyoob akkamitti akka obse, dhageeysanii ti jirtu, waan Gooytaan dhuma irratti godhees, agartanii ti jirtu. Kuniis Gooytaan gara-laafoo fi rahamata-qabeeysa tahuu isaa ti agarsiisa.
[12] Wanti guddoon hafte, yaa obboleeyyan kiyya, samiiniis tahe, dachiiniis, waanuma fedhee nuu taanaan numa hin kakatinaa! Ammoo firdii jala akka hin buuneef jecha, eeyyeen teeysan, eeyyee dhugaa haa taatu, mitiin teeysaniis, mitii dhugaa haa taatu.
[13] Isin keeysaa namni rakkinni irra gahe yoo jiraate, inni haa kadhatuu! Namni gammadees yoo jiraate, inni faaruun hamdii haa galchuu.
[14] Isin keeysaa namni dhukkubsate jiraa? Inni manguddoo waldaya kiristaanaa yaamsisee, isaan maqaa Gooftaa tiin zeeta isa muudanii Rabbi haa kadhataniifii.
[15] Kadhanni amantii dhaan godhamu kun, nama dhukkubsataa ni fayyisa; Gooftaaniis isa ol ni kaasa, kan dilii hojjate taanaaniis oomfiin ni godhamaafi.
[16] Eegasuu, dilii dalaydaniis walitti if himaa, akka aafihamtaniifiis Rabbi waliif kadhadhaa! Kadhannaan nama qaceelaa dhaa humna guddoo dha qabdi, niis ni fayyaddi.
[17] Eliyaas, namuma akka keenyaa ti ture; kadhata isaa keeysatti, roobni akka hin roobneef wayta kadhate, bara sadihii fi ji'a jahaafi roobni biyya sanitti hin roobini.
[18] Wayta inni deebi'ee ammaas kadhate, samiin rooba ni kannite, lafti niis midhaan ni baafte.
[19] Yaa obboleeyyan koo! Isin keeysaa namni tokko, karaa dhugaa irraa yoo maqe, namni biraa kan isa deebisee fidu jiraachuu tu irra jira.
[20] Tana yaadadhaa! Namtichi nama dilaawaa tokko karaa jallaa isaa irraa deebise, lubbuu namticha sanii du'a irraa akka eewalee fi, ammaas danuu dilii tiis akka hagoogamu godha.