[1] Yaa obboleeyyan koo! Isin warri Gooftaa keenya Yesuus Kiristoos, Gooftaa ulfinaatti amantan, nama wal hin caalchisinaa!
[2] Fakkeenyaaf, namtichi sooreeysi tokko kan hamartii ziqeeyaa kaayatee, uffata gaariis uffate, gara wal-gahii teeysanitti dhufa haa jennuu; akkasumatti ammaas namtichi hiyyeeysi tokko kan huccuu bututtuu uffatees ni dhufa.
[3] Isin namticha uffata gaarii uffate san irra kabajuun, “Ati kursii gaarii tana irra taa'i!” jettanii ti, namticha hiyyeeysa saniin ammoo, “Ati achi dhaabbadhu, yookiin asuma miillan kiyya cinaan taa'i!” ni jettu taha.
[4] Akkana taanaan, isin ifuma jiddutti warra nama wal irra caalchisu, ammaas daanyoota yaada hamaan firdii godhu tahuu keeysanii mitii ree?
[5] Yaa obboleeyyan koo jaalatamoo, dhaggeeyfadhaa! Rabbi warra miskiinoota addunyaa tanaa, akka amantiin sooreysa tahanii, ammaas mootummaa inni warra isa jaalatan abdachiise akka arkataniif, kan isaan filee mitii?
[6] Isin ammoo nama hiyyeeysaaf ulfina ni waakkattan; warri isin cunqursan, kanneen gara firdiittiis isin harkisan, warruma sooreyyii dhaa mitii?
[7] Warri maqaa kiristaanummaa keeysan gaarii itti yaamamtaniis, warri qoosaa dhaan sakkabu isaanumaa mitii ree?
[8] Seera mootummaa Rabbii kan Barreeyfama Qulqulluu keeysatti, “Ollaa kee akka mataa keetitti jaaladhu!” kan jedhu san yoo raawwattan, waan gaarii dha dalaydan.
[9] Isin ammoo, warra nama wal caalchisu yoo taatan, dilii dha gootu; seerri niis, seera caphsuu keeysanitti isin yakka.
[10] Namticha seera hundumaa eegee, ammoo tokkuma qofa keeysaa caphse, akkuma waan hunduma isaanii caphsetti yakki itti murama.
[11] Inni, “Hin ejjin, zinaa hin godhin!” jedhees, inni isuma “Hin ajjeesin!” jedhe san waan taheef, ati yoo ejjuu yookiin zinaa godhuu baatte illee, ammoo yoo nama ajjeefte, nama seera caphse taatee ti jirta.
[12] Akka warra seera bilisummaa kannuun ilaalamanii, firdii arkachuuf deemanitti dubbadhaa, hojjadhaasi!
[13] Nama rahamata namaaf hin qabne irratti, rahamataan maleetti firdiin itti faradamti; rahamatni bar firdii irraa olii.
[14] Yaa obboleeyyan koo! Namtichi tokko, “Ani amantiin qaba” jedhee, ammoo hojii gaarii tan amantii isaa ittiin mullisu, yoo qabaachuu baate, faayduma maali qabaafi? Amantiin tan akka inni niin qaba jedhuu san, isa najaa baasuu ni dandeeysii?
[15] Fakkeenyaaf, obboleeysa, yookiin obboleeytii takka daaranii, ammaas nyaata guyyuu isaan barbaachisuus warra dhabanii tu jira haa jennuu.
[16] Isin keeysaa tokko ammoo, waan namummaa isaanii tiif isaan barbaachisu odoo hin kanniniif, “Nagayaan deemaa, isiniif haa oowu, akka gaaritti nyaadhaa quufaas!” yoo isaaniin jedhe, faayduma maali kannaafi ree?
[17] Amantiiniis akkasumatti, hojii gaarii dhaan mullifamuu baannaan, amantiin sun matummaan isii tuu duutuu dha.
[18] Namtichi tokko, “Ati amantii dha qabda, ani ammoo hojii gaarii dhaan qaba” yoo jedhe, eegasuu “Amantii tee hojii gaariin maleetti ana agarsiisi; ammaas aniis hojii tiyyaaniin amantii tiyya si agarsiisa” jechuu niin dandaya.
[19] Rabbiin tokko akka jiru ati ni amantaa mitii? Gaari! Jinniini illeen, akka Rabbiin tokko tahe bar ni amanuu, ni hoollatu ille.
[20] Ati yaa gowwaa! Amantiin hojii gaariin maleetti faaydaa akka hin qabne, ragaa amansiisaa tahe arkachuu barbaaddee?
[21] Abbaan keenya Abrahaam ilma isaa Yisihaaq, bakka aarsaa irratti wayta dhiheeyse, hojii isaa tiinii mitii kan qaceelatti lakkaawameen?
[22] Kana keeysatti amantiin isaa tii fi hojiin isaa gaariin wajjiin hojjachaa akka turan, amantiin isaa tiis hojii dhaan akka raawwatamte ni agartu.
[23] Wanni Kitaaba keeysatti, “Abrahaam Rabbitti amane, amanuun isaa tiis qaceelummatti lakkaawamteefi” jettu san ni raawwatamte; akkasitti Abrahaam jaalallee Rabbii jedhamee yaamame.
[24] Eegasuu kunoo, namni amantuma qofaan odoo hin tahin, hojii gaarii dhaan qaceelatti akka lakkaawamu ni agartu.
[25] Akkasumatti Rahaab, dubartiin ejjituun saniis, wayta warra basaasa Israa'el kanneen ergamanii dhufan san ol galchitee, ammaas karaa biraa tiin akka bahan goote, hojii gaarii dhaan qaceeltutti lakkaawamtee turte mitii ree?
[26] Akkuma jasadni lubbuun maleetti du'aa tahe, akkasumatti amantiiniis hojii gaariin maleetti duutuu dha.