[1] Ana Phexiroos, ergamaan Yesuus Kiristoos tu, xalayaa tana isiniif barreeysuu kiyya. Haa gahu gara warra Rabbiin filatamanii, kanneen biyyaa baafamanii gara kutaalee biyya Phonxositti, Galaatiyaatti, Qaphadooqiyaatti, Asiyaatti akkasumatti ammaas Bitiiniyaatti faca'anii jiraniif.
[2] Isin akka akeeka Rabbii Abbaatti filatamtanii, Yesuus Kiristoosiif ajajamuuf, dhiiyni isaa isinitti facaafamee Ruuhal Qudusiin qulqulleeyfamtanii ti jirtu. Ni'imaanii fi nagayni niis isiniif haa hoddomaatan!
[3] Rabbi, Abbaa Gooftaa keenyaa Yesuus Kiristoosiif, galanni haa tahu! Inni araara isaa guddaa dhaan, warra du'an keeysaa ka'uu Yesuus Kiristoosiin, abdii jiraattuu keeysatti haarayatti dhalachuu nuuf kannee ti jira.
[4] Kanaas, dhaalmaya gonkumaa hin badne, kan xurii hin qabne, kaniis hin moofooyne, samii keeysa isiniif ol kaayee ti jira.
[5] Eegaa, isin warra amantiin najaata bara booddeetti mullachuuf jecha qophaawee taa'u saniif, humna Rabbii tiin eegamtanii ti jiraattaniifi.
[6] Amma wayta gabaabduuf fitinaa adda addaa tiin naasifamuun keeysan, kan hin hafne yoo tahe illee, kun waanuma isin hedduu itti gammadduu qabdani.
[7] Ziqeeyni badu illeen ibiddaani fitinama; amantiin teeysan tan ziqeeya irra caalaa gatii qabdu ammoo, guyyaa Yesuus Kiristoos itti mullachuuf deemu sanitti faarfamtee, guddinaa fi ulfina akka arkattuufi fitinamtee ni ilaalamti.
[8] Isin, isa mullachuuf deemu san yoo arkuu baattan illee, ni jaalattu; ammumaaf yoo isa arkuu baattaniis, isatti ni amantu; akkasumatti ammaas gammachuu tana hin jedhamne, tan durrii ulfina guddaa qabduun ililchitu.
[9] Najaata lubbuu teeysanii, kan akeeka amantii teeysanii tahe saniis ni arkattu.
[10] Nabiyyoonni, warri waa'ee ni'imaa isiniif kannamuu sanii raajii dubbatan, najaata kana keeysa barachuuf fardeeyfatanii ti xiinxalan.
[11] Isaan, waa'ee dararama Kiristoos irra gahuu, waa'ee ulfina booddee isaaf dhufuuf deemuu, duraan dursanii wayta dubbatan, Ruuhaan Kiristoos kan isaan keeysa ture, gara nama kamitti yookiin wayta tam akka inni agarsiisaa ture xiinxalan.
[12] Wanti isaan hojjachaa turaniis, mataa isaanii tiif odoo hin tahin, isiniif akka ture mullifamee ti jira. Kuniis Ruuhal Qudus samii irraa ergameen, amma karaa warra wangeela lallabuu tiin isinitti himame; waan kana maleeykoonni Rabbii ti illeen, keeysa seenanii laaluu ni hawwu turan.
[13] Kanaaf qalbii dhaan dalaguuf qophaawoo tahaa, dammaqaa tii abdii teeysan guutummatti, ni'imaa wayta Yesuus Kiristoos mullatu sanitti isiniif kannamu irra kaayadhaa!
[14] Akka joollee eemaramtuu tahaa malee, si'oo jasadaa tan bara wallaalummaa keeysanii saniin hin fuudhaminaa!
[15] Rabbiin isin yaame qulqulluu akkuma tahe, isiniis waanuma gootan hundumatti qulqulloota tahaa!
[16] Inni Barreeyfama Qulqullaawaa keeysatti, “Ani qulqulluu waaniin taheef, isiniis qulqulloota tahaa!” jedhee ti jira.
[17] Rabbi, kan nama odoo wal hin caalchifne, adduma addaan akka hojii isaatti firdii itti godhu san “Abbaa” jettanii warra yaamtan yoo taatan, eegasuu umrii teeysan guutuu, hanga biyyaa baatanii baqatummaan jiraattan hundaa huu isa sodaa dhaan jiraadhaa.
[18] Akka jireenya abbootii teeysan irraa isinitti dabre, kan faaydaa hin qabne san jalaa, gumaa maaliin eewalamtanii akka baafamtaniis numa beeytu; waan akka meetaa tii fi ziqeeyaa kanneen badaniin hin turre.
[19] Ammoo dhiiga Kiristoos gati-qabeeysaan, kan akka hoolaa aarsaa illaas ammaas irrinaas hin qabneeni furamtan.
[20] Inni, uumamuu biyya addunyaa dura, Rabbiin herregamee, gara dhuma baraa kanatti isiniif jecha mullifame.
[21] Karaa isaa tiin isin, Rabbi kan isa du'aa kaasee ulfinaas kanneefitti amantan; haala kanatti amantii teeysanii fi abdii teeysaniis Rabbi irra kaayattanii ti jirtu.
[22] Isin dhugaaf ajajamuu keeysaniin, jireenya keeysan xaliileeysitanii, amantoota obboleeyyan keeysaniis garaa xaliilaan jaalachu dandeeysan; ammaas jaalala dhugaa tiin wal jaalachuun keeysan itti fufa!
[23] Isin shanyii baddu irraa odoo hin tahin, shanyii hin badne irraa, Qoowlii Jiraattuu Rabbii tan bara baraa tiin, lamadaa haarayatti dhalattan.
[24] Kanaaf Barreeyfamni Qulqulluun, “Namni jasada uffate hundinuu akka meeyra citaa ti, ulfinni isaa hundi niis akka daraaraa citaa ti; meeyri citaa ni xoollaqa, daraaraan isaa tiis ni harca'a.
[25] Qoowliin Gooytaa ammoo, haftee bara baraaf ni jiraatti” jedha; Qoowliin tuniis, oduu gammachuu tanuma isinittuu himamte.