[1] Walitti duuluu fi wal loluus maaltu isin jidduu naqe? Si'oo jasada dhagna qaama keeysanii keeysatti wal loluu tu, kanneen kaasaa mitii?
[2] Wahi kajeeltu, ammoo waan san hin arkattan; nama ajjeeftu, jabeeysitanii tiis ni kajeeltu, ammoo waan barbaaddan san hin arkattan. Wal loltu, ammaas walitti duultu, ammoo, Rabbi akka isiniif kannuuf, waan isa hin kadhatiniif jecha arkachuu hin dandeeysan.
[3] Wayta kadhattan illee, xalalii jalloon, waanuma ifii keeysaniif ittiin bashannantan, waan kadhattaniif jecha, hin arkattan.
[4] Isin yaa ummata garagaggaloo! Biyya addunyaa dhaa saahibuun diina Rabbii akka nama godhu hin beeytanii? Namni saahiba biyya addunyaa tahuu barbaadu, diina Rabbii ti if godha.
[5] Yookiin Kitaabni, “Rabbi, ruuhaan inni nu keeysa kaaye kan hinaaffaa qabu” wayta jedhu, sababaan maletti waan dubbatu isinitti ni fakkaataa?
[6] Akka Kitaabni jedhutti, ni'imaan inni kannuu tu irra caala. Kanaaf, “Rabbi warra dhaytaawootaan ni morma, warra damboobaniif ammoo ni'imaa ni kanna” jedha.
[7] Eegasuu harka Rabbii jala if galchaa tii; Sheeyxaanaan ammoo mormaa! Inni niis isin dhiisee ti dheeysa.
[8] Gara Rabbii dhihaadhaa, inni niis gara keeysan ni dhihaata. Isin warri dilaawoonni, harka keeysan qulqulleeyfadhaa. Isin warri waswaastan, qalbii teeysan xaliileeyfadhaa!
[9] Warra hedduu gadditan tahaa, waywaadhaa booyaa! Kofli keeysan booyatti, gammachuun teeysaniis naasutti haa jijjiiramu!
[10] Gooftaa duratti gad if qabaa damboobaa, inni niis ol isin qaba.
[11] Yaa obboleeyyan koo! Maqaa wal hin balleeysinaa! Namni obboleeysa isaa irratti hamtuu dubbatu, yookiin isatti firdii godhu, seeraani morma, ammaas seera irratti firdii godhaasi. Eegaa, wayta seera irratti firdii gootan, seericha eeguun keeysan hafee, seeruma irrattuu firdii godhuuf tetteeysu jechu.
[12] Inni seera tumuu fi kan firdii kannuus tokkuma; isuma kan eewaluu tu ammaas dhabamsiisuus dandaya; ati ammoo eenyuma taatee ti, kan ollaa kee ti irratti firdii gootu?
[13] Isin, “Arra yookiin boru magaalaa abalu jedhamtu dheeynee ti, bara tokko achi teenyee, daldaallee ti faaydaa arganna” waara jettaniif, waaniin isinitti himuun qaba.
[14] Isin waan boru tahuuf deemu, jireenyi keeysaniis boru akkam akka tahu hin beeytan; isin akka hurree wayta gabaabduuf mullattee deebitee dhabamtuu ti.
[15] Akkanaa mannaa, “Yoo Rabbi jedhe jiraannee ti, kana yookiin kaaniis ni goona” jechuu tu isin irra jira.
[16] Amma ammoo isin kordiidummaan if dhaadachaa jirtu; if dhaadachuun akkasii hundinuu hamaa dha.
[17] Namni waan gaarii hojjachuun isa irra jiru beeku, kan ammoo waan gaarii san hin hojjanne, dilii dha itti taha.