[1] Yaa obboleeyyan keenya! Waa'ee baraa tii fi wayta kanneen itti raawwatamanii ammoo nuti isiniif katabuun barbaachisaa miti.
[2] Guyyaan Gooftaa akka hattuun halkan dhuftutti akka dhufu, isin mataan keeysanuu qaceellotti beeytu.
[3] Namoonni, “Nagaya, humaa hin jiru” oduma jedhanii ti, badiin isaan hin eeggatin akkuma cimiimmuun dubartii ulfaa qabdutti, dagutti, isaan irra gaha; tana jalaa bahuus hin dandayan.
[4] Yaa obboleeyyan keenya, isin ammoo dukkana keeysa waan hin jirreef, guyyaan sun akka hattutti isin daguu hin dandayu.
[5] Isin hundinuu ilmaan ifaa ti, ilmaan guyyaa tiisi; nuti warra halkaniif yookiin warra dukkanaaf qoodamee miti.
[6] Eegasuu nuti, akka warra kaanii kanneen rafanii odoo hin tahin, ammoo dammaqinaan naamusa keenya haa eeggannuu!
[7] Warri rafan halkani rafu, warri farshaananiis halkani farshaanu.
[8] Nuti ammoo warra guyyaa eega taane, naamusa keenya haa eeggannuu, akka uffata sibiilaa, qomatti amantii fi jaalala uffannee, ammaas abdiis akka gonfoo sibiilaatti matatti haa kaayannuu.
[9] Rabbi, karaa Gooftaa keenyaa Yesuus Kiristoosiin, najaata akka arkannuufi malee, lolaaf nu hin herregne.
[10] Nuti jiraannuus yookiin duunuus, akka isaan wajjiin taanuuf, Kiristoos bakka teenya bu'ee ti du'e.
[11] Akkana waan taheef jecha, akkuma amma godhaa jirtanitti, wal jajjabeeysaa, waliis cimsaa!
[12] Yaa obboleeyyan keenya, warra isin jiddutti hojitti jabaatanii tattaafatanii, ammaas karaa Gooftattiis warra isin hooggananii isiniis gorsaniif, ulfina akka kannitaniin isin kadhanna.
[13] Dalagaa isaanii tiif jecha, kabajaa jaalalaa tiin isaan hayaan qabaa; isiniis nagayaan walii wajjiin jiraadhaa!
[14] Yaa obboleeyyan keenya, warra masluufoota if eeggachiisaa, warra ija-laafoos jajjabeeysaa, warra dadhaboos gargaaraa, nama hundumaafiis obsa qabaadhaa jennee ti isin gorsina.
[15] Isin keeysaa namni tokko illeen, waan hamaa isa irra gaheef hamaa akka hin deebifne, toohadhaa! Waytuma hundumaa rahamata waliif qabaadhaa, warra kanneen biraa tiifiis akkasumatti rahamata qabaadhaa!
[16] Wayta hundumaa gammachuu qabaadhaa!
[17] Kadhata keeysan walitti dhaabaa kadhadhaa!
[18] Haaluma hunduma keeysatti, Rabbiif hamdii galchaa! Isin warra Yesuus Kiristoositti amantaniif, kun fedhii Rabbii ti.
[19] Ruuhal Qudus hin ukkaamsinaa!
[20] Raajii himamuus hin tuffatinaa!
[21] Ammoo waan hundumaa xiinxalaa, waan gaarii tahe jabeeysaa tii qabadhaa!
[22] Waanuma hamaa tahe hundumaa irraa if qusadhaa!
[23] Rabbi, Abbaan nagayaa, mattummaan isaa guutummatti isin qulqulleeysee, wayta dhufa Gooftaa keenya Yesuus Kiristoositti, ruuhaa keeysan, lubbuu teeysanii fi jasada keeysaniis guutummatti illaan maleetti haa eegu!
[24] Inni isin yaame amanamaa waan taheef jecha, tana ni godha.
[25] Yaa obboleeyyan keenya, nuufiis kadhadhaa!
[26] Garaa xaliilaan, amantoota hundumaa dhudhungadhaa nagaya gaafadhaa!
[27] Hadaraa Gooftaa, xalayaan tun amantoota hundumaaf haa dubbifamtuu!
[28] Ni'imaan Gooftaa keenyaa Yesuus Kiristoos isin wajjiin haa taatu!