[1] Phaawulos, Silwaanosii fi Ximotewoos irraa gara waldaya Tasaloonqee, kanneen Rabbii Abbaa fi Gooftaa Yesuus Kiristoos keeysatti arkamaniif. Ni'imaanii fi nagayni isiniif haa tahu!
[2] Nuti, kadhata keenya keeysatti, maqaa keeysan dhooynee, wayta hundumaa waa'ee hunduma keeysanii tiif Rabbi ni galateeyfanna.
[3] Fuula Rabbi Abbaa keenyaa duratti, hojii teeysan tan amantiin arkamteef, jaalalaan carraaquu keeysan, Gooftaa keenya Yesuus Kiristoos abdachutti obsaan jabaachuu keeysaniis ni yaadanna.
[4] Yaa obboleeyyan keenya! Rabbi isin jaalatee akka isin filate nuti ni beeyna.
[5] Wangeelli nuti isiniif lallabne, sagalee qofaan odoo hin tahin, qiwwaa fi Ruuhal Qudusiin, akkasumatti ammaas amantii mirkana qabduuni gara keeysan dhufe; nuti ammaas isiniif jennee akkamitti akka isin jiddutti jiraachaa turrees isinuu numa beeytu.
[6] Isiniis, fakkeenya keenyaa fi kan Gooftaa duukaa buutanii ti jirtu; rakkoon jabduun isin mudattu illee, gammachuu Ruuhal Qudus irraa dhuftuun Qoowlii Wangeelaa fudhattanii ti jirtu.
[7] Kanaan isiniis amantoota warra Maqedooniyaa tii fi warra Akaayaa hundumaaf fakkeenya gaari taatan.
[8] Qoowliin Gooftaa tan isin biraa kaatees, Maqedooniyaa fi Akaayaa qofattii miti tan dhagayamte; Rabbitti amanuun keeysan bakkuma hallettuu beekamee ti jira; eegasuu waa'ee kanaaf waa takka illee jechuun nu hin barbaachisu.
[9] Haala akkamitti akka isin nu simattanii fi, ammaas Rabbi jiraataa dhugaa kaadamuuf, waaqayyolii tolfamoo irraa gara Rabbii deebi'uu keeysan, isaanummaanuu ni odeeysu.
[10] Ilma isaa Yesuus, kan Rabbi warra du'an keeysaa kaase, kan lola dhufaa jiru jalaa nu eewalu san, samii irraa abdiin eeggachaa ti jirtu.