[1] Phaawulos, Silwaanosii fi Ximotewoos biraa, gara waldaya Tasaloonqee tan Rabbi Abbaa fi Gooftaa Yesuus Kiristoos taateef barreeyfame.
[2] Rabbi Abbaa fi, Yesuus Kiristoos Gooftaa biraa ni'imaa fi nagayni niis isiniif haa tahu!
[3] Yaa obboleeyyan keenya! Wayta hundumaa waa'ee keeysaniif jecha, Rabbi galateeyfachuu tu nu irra jira; isuma dhugaa amantiin teeysan caalatti guddachaa, jaalalti hundi keeysanuu waliif qabdaniis hoddomaachaa waan deemtuuf, galateeyfachuun keenya sirrii dha.
[4] Kanaaf reebama isin irra gahee fi cinqii isin mudatte hundumaa obsuu dhaan, amantitti jiraachaa waan deemtaniif, waldayoota Rabbii biratti nuti isiniin if dhaadannaa bar!
[5] Kun hundinuu, firdiin Rabbii tan haqaa tahuu isii tii fi, isiniis mootummaa Rabbii tan amma hiraaramaa jirtaniif tanaaf, warra tahuun malutti lakkaawamuu keeysani agarsiisa.
[6] Rabbi, Abbaa haqaa ti, warra hiraar isin mudees hiraaruma deebisee kafalaafi.
[7] Isin warra hiraaramee fi ammaas nuuf illee, Rabbi furmaata ni kanna; kuniis wayta Gooftaan Yesuus maleeykoota isaa warra amri-qabeeysaan wajjiin samii irraa mullifamutti taha.
[8] Gooftaan ibidda belbeluun wajjiin mullata; gaafas inni warra Rabbi hin beeynee fi kanneen Wangeela Gooftaa keenyaa Yesuusiif ajajamuu didaniis ni adaba.
[9] Isaan kun fuula Gooftaa duraa, ulfina durrii qiwwaa isaa biraahiis fageeyfamanii ti, badii abadiin ni adabamu.
[10] Kuniis guyyaa inni ummata isaa qulqulluu keeysatti ulfina arkachuuf, warra isatti amanan hundumaa birattiis ajaa'ibamuuf dhufu sanitti raawwatama; isiniis waan nuti isinitti himne waan amantaniif jecha, warra isaan keeysatti lakkaawamuu dha.
[11] Kanaaf jecha, Rabbiin keenya waamicha isaatiif warra maltan godhee akka isin lakkaawuuf, ammaas dandeeyyii isaa tiin gaarii hawwitan hundumaa fi hojii amantii tiis akka fiinxaan isiniif baasu, wayta hundumaa isiniif kadhachaa ti jirra.
[12] Haala kanatti, maqaan Yesuus Gooftaa keenyaa isin keeysatti ulfina arkatee, isiniis akka ni'imaa Rabbii keenyaa tii fi akka ni'imaa Gooftaa Yesuus Kiristoositti, isa keeysatti ulfina akka arkattaniif Rabbi kadhanna.