[1] Eega tana caalaa obsuu dadhabne, nuti kophaa keenya magaalaa Ateenaatti hafuuf murteeyfanne.
[2] Amantitti akka gadi jabeeysee isin dhaabuu fi ammaas akka isin gorsuuf jecha, nuti obboleeysa keenya Ximotewoos, nama nuu wajjiin Wangeela Kiristoosiif kaadamaa Rabbii tahe, gara keeysan erginee ti jirra.
[3] Nam tokko illee nuu, rakkoolee isin irra geeyse kanneeniif jecha, hin roora'in! Rakkooleen akkanaa tun, fedhii Rabbiitiin hiree teenya tahuu isaanii isinuu numa beeytan.
[4] Inumaatuu nutuu wayta isin bira turre, rakkinni nu mudachuuf akka taa'u duraan dursinee isinitti himnee ti jirra; kunoo gaa, akkuma jenne san tahuu isaa isinuu beeytan.
[5] Akkaataa kanatti, tana irra caalaa obsuu dadhabnaaniin, waa'ee amantii teeysanii addaan baafachuuf jedhee tiin isa gara keeysan erge. Tarii huu inni nama fitinu sun, isin fitinee ta'abni keenya bilaash tahee akka hin hafne, yaadda'ee tiin ture.
[6] Amma ammoo Ximotewoos, isin biraa deebi'ee gara keenya hogguu dhufe, waa'ee amantii teeysanii tii fi waa'ee jaalala teeysanii oduu gaarii dha nuuf fide; akkasumatti ammaas, isin wayta hundumaa haala gaariin akka nu yaadattanii fi, akkuma nuti isin arkuuf yaadnutti isiniis nu arkuuf akka yaaddaniis nutti himee ti jira.
[7] Kanaaf jecha yaa obboleeyyan keenya, cinqiilee fi rakkoolee teenya hunda keeysatti, isin laalchisuu dhaan waa'een amantii teeysanii nu jajjabeeysitee ti jirti.
[8] Amma isin Gooftatti jabaattanii yoo dhaabbattan, nutiis warra jiraatoo dha taane.
[9] Waa'ee keeysan irraa kan ka'e, gammachuu nuti Rabbii keenya duratti qabnu hundumaa fuu mee akkamitti Rabbiif hamdii isa qiimtu galchuu dandeenya?
[10] Deebinee ijaan akka wal arkinee amantiitti waan isin duraa irratees, akka isiniif guutnuuf, halkanii fi guyyaa hedduu dha itti cinnee kadhachuu irra jirra.
[11] Ammaan tana, Rabbi Abbaan keenya matummaan isaa, Gooftaan keenya Yesuusiis, gara keeysan dhufuuf karaa keenya nuuf haa qaceelchu!
[12] Gooftaan, jaalala teeysan isiniif hoddomeeysee, waliif dhadhangalaasuu fi warra biraa tiifiis dhangalaasuu akka dandeeysan, jaalala akka nuti isiniif qabnuu isiniif haa kannu!
[13] Guyyaa Gooftaan keenya Yesuus, qulqulloota isaa hundumaan wajjiin deebi'ee dhufu, humna keeysaa isiniif kannee, Rabbi Abbaa keenya duratti, qulqulloota illaa hin qabne isin haa godhu!