[1] Yaa obboleeyyan keenya! Tana irraa wanni hafe, Rabbi gammachiisuuf akkamitti jiraachuun akka isin irra jiru, nuti isin barsiifnee ti jirra; inni niis akkuma isinuu itti jiraachaa jirtan kana, ammaas maqaa Gooftaa Yesuusiin, kanuma caalaatti akka itti dabaltani, gadi jabeeysinee isin kadhanna.
[2] Waan dalaguun isin irra jiru, maqaa Gooftaa Yesuusiin qaceelfama akka isiniif kannine isinuu ni beeytu.
[3] Rabbi, zinaa fi ejjummaa irraa fagaattanii, qulqullummatti akka jiraattan isin irraa fedha.
[4] Hundi keeysanuu matuma matatti, dhagna isaa qulqullummattii fi haala naamusa-qabeeysatti eeggachuu haa baratu!
[5] Akka saba awaama warra Rabbi hin beeynetti, si'oo shahawaatti if gadi hin dhiisinaa!
[6] Eegasuu, namni kana irra dabree dubbii tanatti obboleeysa isaa hin gowwoomsin; Gooftaan warra balleeysaa akkasii hojjatan ni adaba jennee, duraan dursinee isinitti himnee ti jirra, isiniis if eeggachiifnee ti jirra.
[7] Najisummatti odoo hin tahin, qulqullummatti akka jiraannuuf, bar Rabbi nu yaamee!
[8] Kanaaf jecha, namni eemara kana tuffatu, Rabbi kan Ruuhal Qudus isiniif kannu tuffata malee, nama tuffata jechuu miti.
[9] Waa'ee jaalala obbolummaa ammoo, nuti isiniif barreeysuun barbaachisaa miti; isin ifii fuu akka wal jaalattan warra Rabbiin barsiifamtanii dha.
[10] Isiniis kanuma duukaa buutanii, amantoota guutummaa kutaa biyya Maqedooniyaa keeysa jiran hundumaa ni jaalattu; tahu illee, ammaas caalchiftanii akka itti furtan, yaa obboleeyyan keenya, isin gorsina.
[11] Akkuma nuti duraan isinitti himnetti, jireenya qabbana nagayaa qabu jiraachuuf, hojii teeysan irratti bobahuu fi harka keeysaniin dalaguu ulfina kannaafi!
[12] Akkasitti yoo jiraattan warra biraa kanneen alaa isin daawwatan duratti ulfina ni arkattu; waan isin barbaachisuufiis harka namaa hin eeggattan.
[13] Yaa obboleeyyan keenya! Akka warra abdii hin qabnetti gadduu dhiiftanii, waa'ee warra aakiramanii, abdii jirtu akka beeytani barbaanna.
[14] Yesuus du'ee, du'a keeysaa deebi'ee akka ka'e ni amanna; akkasumatti ammaas, Rabbi, warra Yesuusitti amananii aakiramaniis, isumaan wajjiin deebisee akka fiduus ni amanna.
[15] Akka Qoowlii Gooftaan ifii dubbatetti, nuti warri amma lubbuun jiraannu, ammaas warri hanga Gooftaan deebi'ee dhufutti jiraannee hafnu kun, kanneen aakiramanii turan san akka hin dursine isinitti himna.
[16] Sagaleen guddoon ajajaa, sagaleen angafa maleeykootaa tiis ni dhagayamti, garriin Rabbii tiis ni afuufamti. Kana hundumaa wajjiin, Gooftaan samii irraa gadi ni bu'a; warri Kiristoositti amananii aakiraman dura deebi'anii ni ka'u.
[17] Kana booddee nuti warri odoo hin du'in hafnees, isaaniin wajjiin hawaa keeysatti Gooftaa simachuuf duumeeysa keeysa ol fuudhamna; akkasitti bara baraaf Gooftaan wajjiin jiraanna.
[18] Akkana waan taheef jecha, isiniis qoowlii tanaan wal jajjabeeysaa!