[1] Yaa obboleeyyan keenya! Isin bira dhufuun keenya faayda-malii taatee akka hin hafin, isinuu akka gaaritti beeytu.
[2] Kanaan dura Filiphisiiyusitti akka cinqamne, namoonni akka nu arrabsaniis waanuma isinuu beeytani. Ammaas isin birattiis warri nuun morman nutti jabaatan illee, gargaarsa Rabbii tiin Wangeela isinitti himuuf ija jabaannee ti turre.
[3] Wanni nuti jabeeysinee isin gorsine, dogongora irraa, yookiin najisa irraa waan hin burqini; ammaas isin shaaxiruufiis hin yaadamne.
[4] Gara kaaniin nuti, akka warra imaannaan Wangeelaa itti kannamuuf Rabbiin fudhatamanitti, dubbachaa ti turre; Rabbuma garaa keenya keeysa beeku malee, nama gammachiisuuf wanni goonees hin jiru.
[5] Nuti isin biratti mi'eeysaaf faaruu hin jirre akka hin yadaleeysin, ni beeytan; bololummaa dhooysuuf akka nuti irra hin diddibin, Rabbii tu nutti raga.
[6] Nuti namoota irraa, isinuma irraahi illee taanaan, yookiin warra biraa irraahiis ulfina arkachuuf hin turre.
[7] Nuti akka ergamoota Kiristoositti silaa isin irraa waa gaafachuu ni dandeenya turre; haa tahu malee ammoo, akka haadha daa'imman isii shurur gootutti, isin jiddutti nuti saaliha garaa ballatu turre.
[8] Dharraa jaalala isiniif qabnuuf jecha, Wangeeluma Rabbii qofa odoo hin tahin, lubbuma teenya illee isiniif kannuuf ni hawwina turre, tanaas wanni goonuuf, isin nutti jaboo waan taataniif jecha.
[9] Yaa obboleeyyan keenya! Wangeela Rabbii hanga isiniif lallabaa turre, isin keeysaa nam tokkotti illee ba'aa akka hin taaneef jecha, ta'abaa fi rakkinaan, halkanii fi guyyaas dalaguu teenya ni yaadattu.
[10] Isin warra amantan jiddutti nuti akkamitti qulqullummaan, qaceelummaan, illaan maleetti akka jiraanne, isinii fi Rabbii tu ragaa keenya.
[11] Hunduma keeysan matuma matatti, akka abbaan ilmaan isaa itti qabutti nutiis akkasumatti isin qabuu keenya ni beeytu.
[12] Rabbi kan mootummaa isaa tii fi durrii ulfina isaatti isin yaame saniif, jiraachuun akka isin irraa eegamutti akka jiraattaniif, isin gorsaa ti, isin jajjabeeysina.
[13] Qoowlii Rabbii tan nuti lallabnu dhageeysanii hogguu fudhattan, akka dubbii namaatti odoo hin tahin, akka Qoowlii Rabbii asliitti fudhattanii ti jirtu; kunoo, isiiniis isin warra amantan keeysatti hojjachaa ti jirti; kana hundumaa fuu odoo addaan hin kutin, Rabbi ni galateeyfanna.
[14] Yaa obboleeyyan keenya! Akkuma warri biyya Yihudaa keeysaa, kanneen Yesuus Kiristoos amanuun waldoota Rabbii tahan, harka warra Yihudootaatti hiraaramanitti, isiniis haaluma san fakkaatutti, harka warra biyya keeysanitti hiraaramtanii ti jirtu.
[15] Warri Yihudootaa, Gooftaa Yesuusii fi nabiyyoota isaanii tiis warra ajjeese, nuus arihanii reebanii if keeysaa nu baasanii ti jiru; isaan warra Rabbi hin gammachiifne, kanneen nama hunda wajjiin diinummaa qabani.
[16] Saboonni qomoo Israa'el hin tahin akka najaa bahaniif isaanitti dubbachuu nu dhoorku. Haala kanatti isaan wayta hundumaa, hanga qunnaan dilii isaanii guutamutti ni tattaafatu; gara dhumaatti lolli Rabbii ammumaa huu isaan irratti dhufee ti jira.
[17] Yaa obboleeyyan keenya! Yaadaa fi qalbiin odoo hin tahin, qaamaan wayta gabaabduuf gargar fagaannee isiniif waan dharraaneef jecha, fuula keeysan arkuuf hedduu dha tattaafanne.
[18] Kanaaf dhufnee isin laaluu dha barbaanne; keeysumaa huu ani Phaawulos irra deddeebi'ee yaalee tiin ture, Sheeyxaanni ammoo irraa nu ittise.
[19] Abdiin teenyaa fi gammachuun teenyaas, gonfoon nuti wayta Gooftaan keenya Yesuus dhufu isa duratti ittiin if dhaadannu maali? Isinumaa mitii?
[20] Isuma dhugaa, ulfinnni keenyaas, gammachuun teenyaas bar isinumaa!