[1] Isin yaa gooftolii, isiniis Gooftaa samii irraa akka qabdan waan beeytaniif jecha, warra isin kaadamaniif haqaa fi mirga isaanii eegaafi!
[2] Rabbi kadhaaf if kannitanii, warra dammaqoo fi warra hamdiis galchu tahaa!
[3] Nutiis hiccitii Kiristoos, taniin ani amma illee isiif jecha hidhamee jiruuf tana, qoowlii tana labsuuf, Rabbi karaa akka nuuf banu nuuf kadhadhaa!
[4] Aniis, akka ana irraa eegamutti, zaahir baasee akkaan isa labsuuf anaaf kadhachuu itti oofaa!
[5] Waytii isiniif kannamtetti qaceellotti itti fayyadamaa, namoota waldaya kiristaanaa keeysa hin jirreen wajji hikmaa dhaan jiraadhaa!
[6] Haasooyni keeysaniis hoggayyuu, ni'imaa qabaachuun akka waan soogiddaan mi'eessanitti gaarii namatti tolu haa tahu! Namoota hundumaa fuu akkaataa jawaaba kannuuf isin irra jiru baradhaa!
[7] Xikiqoos, obboleeysi jaalatamaan, hojii keeysattiis gola koo kaadamaa amanamaa kan tahe, waaniin ani keeysa jiru hundumaa isinitti ni hima.
[8] Hundi keenyaa huu akkamitti akka jirru isinitti himee, qalbii teeysan akka jajjabeeysuuf jechaan, kunoo ani isa gara keeysanitti ergee tiin jira.
[9] Oneesimos, obboleeysa amanamaa fi jaalatamaa, kan isin keeysaa tokko tahe wajjiin tahanii waan asitti tahe hundumaa tokko tokkoon isinitti ni himu.
[10] Arisxaarkos kan anaa wajjiin hidhamee jiruus, nagaya isiniif dhaama. Maarqos, namtichi dubrii Baarnaabaasiis, akkasumatti nagaya isiniifi dhaama. Waa'ee Maarqos, kanaan duraa huu dhaamsi isin gahee ti jira; inni gara keeysan wayta dhufu simadhaa!
[11] Yoshu'aan, namtichi Yusxoos jedhamuus, nagaya isiniif erga; warra seera dheeyna-qabaa eegan keeysaa, isaan kanneen kofaatu mootummaa Rabbii tiif anaa wajjiin carraaqa; isaan ammaas warra hedduu na jajjabeeysani.
[12] Ephafraas, kaadamaan Yesuus Kiristoos, kan isin keeysaa tokko tahees, nagaya isiniif erga; inni waytuma hundumaa, isin, fedhii Rabbii hundumaa keeysatti jabaattanii akka dhaabbattaniif jecha, fardeeyfatee kadhataaf if kannee ti jira.
[13] Inni isinii fi warra Laa'odiiqeyaa jiraniif, ammaas warra Heraapholisiif dalagutti jabeeysee akka tattaafate, anuu mataan koo ragaa dhaan bahaafi.
[14] Luqaas, haakimtichi qorichaa jaalatamaan, ammaas Deemaasiis nagaya isiniif dhaamu.
[15] Kiristaanota Laa'odiiqeyaa tii fi aadde Niimfaatitti, ammaas waldaya mana isiitti walitti qabamuttiis, nagaya keenya nuuf himaa!
[16] Xalayaan tun isin jiddutti eega dubbifamte booddee, waldaya Laadoqiyaattiis akka dubbifamtu godhaa! Xalayaa waldaya Laadoqiyaatti ergamte saniis ammaas isiniis dubbisuu tu isin irra jira.
[17] Arkiphosiin ammaas “Tajaajila Gooftaa irraa fudhatte san, akka raawwattu godhi!” jedhaani!
[18] Ani Phaawulos, nagaya kana harka kiyyaaniin isiniif barreeysa; shanshalata sibiilaa tiin hidhamuu kiyyaas yaadadhaa! Ni'imaan Rabbii isiniin wajjiin haa taatu!