[1] Aniis akkuma keeysan manguddoo kan tahe, dararama Kiristoosiif raga-baatuu fi, ammaas ulfina mullifamuuf deemu keeysaa nama hirmaatu, manguddoota waldaya kanneen isin jidduu jiraniin gorsa.
[2] Karra hoolotaa kanneen Rabbi tikaaf isinitti kanne san dirqamtanii odoo hin tahin, jaalalaan, akka Rabbi isin irraa barbaadutti, horitti bololuun odoo hin tahin, if kannuu dhaan egaa!
[3] Hoolota karraa saniif fakkeenya tahuu dhaan egaa malee, warra tika keeysan jala jiran irratti gooftummaa keeysan agarsiisuuf hin dalaginaa!
[4] Gaafa angafni tiiysitootaa san mullatutti, isiniis ammaas gonfoo ulfinaa tan hin dulloomne ni arkattu.
[5] Akkasumatti isin warri umriin xixiqqoo taatan, manguddootaaf ajajamaa! Hundi keeysanuu damboobummaa akkuma huccutti uffadhaa, wajjiin jiraadhaa! Kitaaba keeysatti, “Rabbi warra dhaytaa qabaniin ni morma, warra damboobaniif ammoo ni'imaa isaa ni kanna” jedha.
[6] Kanaaf, Rabbi wayta ifii barbaadetti akka ol isin qabuuf, harka isaa amri-qabeeysa kan tahe jalatti gadi if qabaa!
[7] Inni isiniif waan yaaduuf, waan isin yaachisu hundumaa Rabbuma irratti dhiifadhaa!
[8] Naamusa qabaadhaa, dammaqaasi! Sheeyxaanni adawwiin keeysan, akka leencaatti aadaa, nama liqimsuu barbaacha naannawaa ti jira.
[9] Kanaaf jecha amantitti jabaadhaa tii Sheeyxaanaan mormaa! Obboleeyyan keeysan, warri guutummaa biyya addunyaa keeysa jiraatan, akkuma keeysan kanatti cinqamaa jiraachuu isaanii isinuu ni beeytan.
[10] Wayta gabaabduuf eega cinqamtan booddee ammoo, Rabbiin ni'imaa hundumaa qabu, isuma kan Kiristoosiin ulfina bara baraatti isin yaame, isumaa tu bakkatti deebisee isin jaaree ti dhaaba, isin ni jajjabeeysaasi, hundee teeysaniis jabeeysee ti mirkaneeysa.
[11] Amriin bara baraaf isaaf haa taatu! Aammiin.
[12] Ani, harka Silwaanos, obboleeysaan ani amanamatti fudhadhuun, ergaa gabaabduu tanaan isin jajjabeeysuuf, ammaas tun ni'imaa Rabbii aslii tahuu isii dhaa, ragaa bahuufiin isiniif katabe. Ni'imaa tanatti jabaadhaa dhaabbadhaa!
[13] Waldayan akkuma keeysanitti filatamtee Baabiloon jirtuus, nagaya isiniif ergiti; Maarqos, ilmi ruuhaanii kiyyaas, akkasumatti ammaas nagaya isiniif dhaama.
[14] Jaalala obbolummaa tiin wal dhudhungachuun nagaya wal gaafadhaa! Nagayni, isin kanneen Kiristoos taatan hundumaa fuu haa tahu!