[1] Eegasuu Kiristoos namummaa jasadaa tiin eega dararame, isiniis ammaas akkuma isaatitti yaadaan akkuma nama lolaaf meeshaa hidhatee tahaa! Namni namummaa jasadaa tiin dararamu, dilii irraa fixatee ti jira.
[2] Eegaa inni, asii achi jireenya addunyaa irratti hafteef tana, fedha si'oo hamtuu jasadaa tiif odoo hin tahin, fedhii Rabbii irratti oolcha.
[3] Isin kanaan dura, waanuma ummanni Rabbi hin beeyne godhuu barbaadan godhaa ti turtan, isaaniis kanneen akka mufallisummatti, kajeella hamtutti, farshaanummatti, shakarutti, hizaaba malee dhugutti, waaqayyolii tolfamaniifiis sagaduun, barri hangi akkasitti jiraattan sanuu dheeraa isiniifi gaha.
[4] Isin amma isaaniin wajjiin, galaana jireenyaa kan ittisa hin qabneen fudhatamuu dhiisuu keeysan ni ajaa'ibu, maqaas isin balleeysu.
[5] Isaan ammoo, waan dalagan maaliif akka dalagan, isa kan warra jiranii fi warra du'anittiis firdii godhuuf qophaawee jiru duratti, dalagaa mataa isaanii laalchisuun gabaasa kannuu tu isaan irra jira.
[6] Kanaaf jecha warra duruun du'aniifiis qoowliin najaataa, Kiristoosiin isaaniif labsamtee ti turte; isaan jasada keeysatti akka namaatti warra firdiin itti godhamte tahan illee, ruuhaa dhaan akka fedhii Rabbitti haa jiraataniifi.
[7] Xumurri waan hundumaa dhihaatee ti jira; eegaa naamusa eeggatanii, qalbii takkaan warra kadhata irratti bobbahu tahaa!
[8] Hundumaa irra caalaa, jaalala waliif qabdan san jabeeysaa qabaa, jaalalti bar dilii hedduu dha hagooydii!
[9] Guungumuun maleetti, wal keeysummachiisuuf hulaa banadhaa!
[10] Namayyuu kannaa Rabbi irraa arkateen, namoota biraa ittiin haa tajaajiluu! Aaminummaa dhaan kannaa ni'imaa Rabbii, haala adda addaatti ittiin kaadamaa!
[11] Namni dubbatu, akka Qoowliin Rabbii jettetti haa dubbatuu; inni waa tajaajiluus, humna Rabbi isaaf kanneen haa tajaajiluu; Rabbiis waa hundumattuu karaa Yesuus Kiristoosiin ulfina haa arkatu! Isaaf ulfinninii fi amriin bara baraaf haa tahan! Aammiin.
[12] Yaa saahibban koo jaalatamoo, fitinaa akka ibiddaatti nama gubdu keeysa dabraa jiraachuun keeysan, akka waan wanni haarayni takka isin mudattetti, ajaa'iba isinitti hin tahin!
[13] Kiristoos ulfina isaa tiin wayta mullatu, gammaddanii akka ililchitaniif, hammuma dararama isaa irraa hirmaattan takka, isiniis hammasuma gammaddu!
[14] Maqaa Kiristoosiif jecha yoo arrabfamtan, isin warra eeybifamoo dha; Ruuhaan ulfinaa, Ruuhaan Rabbiitiis isin irra ni qubata.
[15] Ammoo isin keeysaa namni tokko illeen, akka nama nama ajjeesee, yookiin hattuu, yookiin yakka biraa hojjatee, yookiin kan dubbiin nama jidduu deemu tahuu isaa tiif jecha hin dararamin!
[16] Kiristaana tahuu isaa tiif jecha yoo dararame ammoo, tanaaf jecha hin qaanfatin! Maqaa Kiristoosiin waan yaamameef jecha, hamdii Rabbiif haa galchuu!
[17] Wayti firdiin itti kannamtu geeysee ti jirti; firdiin tuniis warra mana Rabbii keeysaa irraa jalqabamti; dura kan nuun jalqabamtu yoo taate, xumurri hiree warra wangeela Rabbii tiif ajajamuu didanii, maal haa tahu?
[18] Kitaaba keeysatti, “Namni qaceelaan najaa bahuun rakkinaan yoo tahe, hireen warra Rabbi-dhablee fi dilaawoo dhaa maal tahuuf deema ree?” jedha.
[19] Kanaaf jecha warri akka fedhii Rabbitti dararamaa jiran, keeyraata dalaguu dhaan Rabbi amanamaa isaan uume sanitti if haa kannanii.