[1] Eegaa hammeenya hundumaa dhiisaa; shaaxirummaas, fakkeeysitummaas, hinaaffaas, maqaa namaa balleeysuus, waan kanneen hundumaa if irraa fageeysaa!
[2] Akka daa'imman reefuu dhalatan aannan barbaadanitti, isiniis najaataaf ittiin guddachuuf wayta hundumaa qoowlii ruuhaanii tan shaaxirummaan keeysa hin jirreef, akka aannanitti dharra'aaf!
[3] Isin, gaarummaa Gooftaa dhaa warra mi'eeyfattan taanaan kana numa gootu.
[4] Gara Kiristoos koottaa! Inni dhagaa jiraataa, kan namootaan tuffatame; ammoo inni Rabbi biratti filatamaa ulfina qabu.
[5] Amma isin dhagaaggee jiraatoo dha, kanneen galmi ruuhaanii ittiin ijaaramu; isiniis ammaas luboota qulqulluu taatanii, gargaarsa Kiristoosiin, aarsaa Rabbi gammachiiftu ni dhiheeysitu!
[6] Kitaaba keeysatti, “Kunoo, dhagaa mataa utubaa qaceelchu isa filatamaa, gati-qabeeysaas Xiyoon keeysa niin kaaya; kan isatti amanu ammoo hin qaanfatu” kan jedhu barreeyfamee ti jira.
[7] Isin warra itti amantaniif, dhagaan kun gatii guddaa dha qaba; warra itti hin amanneef ammoo, Kitaabni akka jedhutti, “Dhagichi, najjaaroonni tuffatan, inni dhagaa mataa utubaa qaceelchu tahe”.
[8] Akkasumatti ammaas, “Inni dhagaa nama gufachiisu, siibaa nama kuffisuus tahe” jedha; isaan sababa qoowlichaaf ajajamuu didaniifi gufatu, kuniis isaan irratti herregamee ti ture.
[9] Isin ammoo ummata filatamaa, luboota Rabbii mootichaa ti, saba qulqulluu, ummata handhuraa Rabbii ti taatan. Tafakkura hojii Rabbii akka labsitaniifi, dukkana keeysaa ifa isaa kan nama ajaa'ibsisu kanatti isin yaame.
[10] Isin wayta takka, ummata Rabbii hin turre, amma ammoo ummata isaa taatanii ti jirtu; isin araara Rabbii warra hin arkatin turtan, amma ammoo araara isaa arkattanii ti jirtu.
[11] Yaa saahibban koo! Isin akka warra biyya ambaattii fi akka baqattoota biyya addunyaa tana irra warri jiraattan, si'oo fedha jasadaa tan lubbuu teeysan waraantu irraa akka if qusattaniin jabeeysee isin gorsa!
[12] Haala isin warra Rabbi hin beeyne keeysa itti jiraattan, kan hedduu if eeggannaa qabu haa tahuu! Akkaataa kanatti, warri maqaa hamaan isin hamatan yoo jiraatan, guyyaa firdii kannuuf dhufu, isaan hojii keeysan gaarii arkanii, ulfina Rabbiif kannuu ni dandayu.
[13] Gooftaaf jecha, warra amriin kannameef jalatti bulaa, mooticha kan hundumaa irratti amrii qabuuf ajajamaa!
[14] Ammaas, warra biyya bulchan kanneen namoota waan jallaa hojjatan adabaniif, namoota waan qaceelaa hojjatan ammoo galateeyfatan, mooticha biraa waan ergamaniif jecha ajajamaafi!
[15] Waan gaarii hojjachuu keeysaniin, warra gowwoota wallaalaan dubbatan, akka afaan isaan qabachiisuu dandeeysan fedhii Rabbii ti.
[16] Akka warra bilisaatti, akka kaadamtoota Rabbitti jiraadhaa! Ammoo bilisummaa teeysan badii hojjattan ittiin hagooguuf hin oolchinaa!
[17] Nama hundumaa fuu, ulfina tahuuf kannaa; obbolummaa amantootaa jabeeysaa; Rabbi sodaadhaa; mootichaas kabajaa!
[18] Isin warri kaadamtoonni, gooftota keeysaniif ulfina kannuu dhaan ajaja isaanii jala bulaa! Kanaas warruma gaggaarii fi kanneen namaaf yaadan qofaaf odoo hin tahin, warra haqaan hin dalayneefiis akkasuma godhaa!
[19] Namni dararama haqaan maletti isa irra gahe san, fedhii Rabbii yaadachuun dandayee obse ni'imaa isaa ti arkata.
[20] Balleeysaa teeysaniif jecha tumamtanii yoo obsitan, zajuma maali qabdu? Gaarii dalaguu keeysaniif dararama isin irra gahu yoo obsitan ammoo, Rabbi biraa ni'imaa ni arkattu.
[21] Isin, tana godhuuf yaamamtanii ti jirtu; Kiristoos isiniif jecha waan dararameef, isa duukaa akka buutaniifiis fakkeenya isiniif kannee ti jira.
[22] Barreeyfama Qulqulluu keeysatti, “Inni dilii hin hojjanne, jecha afaan isaa keeysattiis, dharti hin arkamne” kan jedhu jira.
[23] Inni wayta arrabfame, deebisee hin arrabsine; wayta dararamees, Rabbi kan firdii qaceelaa kannutti kannate malee, warra isa dararaniis hin sossodaachifne.
[24] Nuti dilii jalaa duunee qaceelinaaf akka jiraannuuf jecha, Kiristoos dilii teenya jasada isaa tiin fannoo irratti baadhate; madaa isaa tiin isin aafihamtan.
[25] Isin, akka hoolota karaa irraa baddanii ti turtan, amma ammoo gara tiiysituu fi toohattuu lubbuu teeysaniititti deebitanii ti jirtu.