[1] Akkasumatti isin beerran, abbaan warraa keeysan warra Qoowlii Rabbii hin amanne yoo tahan illee, isin isaanitti dubbachuu dhaan maleetti haaluma gaarii niitii isaanii tiin gara amantitti dhufuun isaanii ni malaa, jaarsa keeysaniif ajajamaa!
[2] Kuniis, wayta isaan xaliilummaa qalbii teeysanii tii fi sodaa Rabbii qabaachuu keeysan arkani taha.
[3] Bareedni keeysan waan alaan tahe, kanneen akka naannoo dhangalaasuu fi hamashaa kukurfeeysuu, ziqeeya naqachuu fi ammaas uffata hariiraa tiin if shashalamuu tiinii miti.
[4] Akkasii mannaa, namummaa keeysa keeysanii, amala keeysan lashii hin moofooyne, kan Rabbi durattiis gatii guddaa qabuun, tahuu tu irra jira.
[5] Bara dur dubartoonni qulqulluun, warri abdii isaanii Rabbi irra kaayate, haala kanatti if babbareechaa, jaarsa isaanii tiif raaziyoota turan. Akkasitti isaan abbootii warraa tiif ajajamuun if faayanii ti turan.
[6] Akkuma Saaraan jaarsa isii Abrahaamiif ajajamuuf, gooftaa kiyya jettee isa yaamaa turte sanitti, gaarii dalaydanii sodaafiis karaa kannuu dhiifnaan, isinuu ammuma irraa ilmaan Saaraa tahuu keeysani.
[7] Akkasumatti isiniis warri dhiiraa, beerran keeysaniif keeysatti laalaa, wajjiin jiraadhaa! Isaan hammana moorgayaan cimoo tahuu dhabuu isaanii beekaa; kannaa jireenyaa, tan tola isiniif kannamtu san waan isin wajjiin dhaalaniif jecha, kabajaaniis isaan qabaa! Akkana taanaan, wanni kadhata keeysan ittisu hin jiru.
[8] Xumura irratti hundi keeysanuu wal taatanii, waliifiis yaaduu dhaan wajjiin jiraadhaa! Akka obboleeyyanitti wal jaalachaa, rahamataas qabaachaa damboobummaan jiraadhaa!
[9] Hammeenyaaf hammeenyuma, abaarsaafiis abaarsuma deebisuu mannaa, Rabbi, eeyba isiniif kannuuf waan isin yaameef jecha, warra isin abaaru eeybisaa!
[10] Kitaaba keeysatti, “Namni jireenyatti gammaduu barbaadu, kan bara gaarii arkuu fedhuus, arraba isaa hamtuu dubbachuu irraa, afaan isaa tiis shaaxirummaa dhaan dubbachuu irraa haa ittisuu!
[11] Inni, waan hamaa irraa deebi'ee, gaarii haa godhuu, nagayaas haa barbaaduu, nagaya duukaas haa bu'uu!
[12] Ijji Gooytaa, gara warra qaceelotaa ti millatti; gurri isaa tiis kadhata isaanii ti dhagaya; ammaas fuulli Gooytaa, warra hamtuu hojjatan irratti, nyaara guuraa ti jira” jedha.
[13] Waan gaarii dalaguuf mirqaanuu keeysaniif jecha, namni isin miidhu ni jiraa?
[14] Waan haqa tahe dalaydanii, silaa dararamtan illee, isin warra eeybifamoo dha! Eegaa, waan namni isin godhuus hin sodaatinaa, niis hin cinqaminaa!
[15] Qalbii teeysan keeysatti Kiristoos Gooftummatti kabajaa. Waa'ee abdii isin keeysa jirtuu, nama gaafatee jawaaba isin irraa barbaaduuf, jawaaba quubsu deebisuuf, wayta hundumaa warra qophooytan tahaa! Ammaas jawaabni keeysaniis kabajaa fi naamusaan haa tahu.
[16] Xalalii xaliilummatti eegaa! Haala kanatti namoota kanneen, isin warra Kiristoos duukaa buutanii waan gaarii hojjattan maqaa balleeysan san, if ni qaanfachiiftan.
[17] Waan hamaa dalaydanii dararamuu mannaa, fedhii Rabbii taanaan, sababa waan gaarii godhaniif jecha dararamuu tu irra wayyaa dha.
[18] Kiristoos ammoo gara Rabbitti isin fiduuf jecha, wayta hundumaaf hoggu takka, dilii nama hedduu tiif dararamee ti jira; inni qaceelaan san jasada uffatee, bakka warra yakkamootaa bu'ee ti ajjeefame; ammoo Ruuhaan jiraataa tahee ti jira.
[19] Ruuhaa saniin deemee dhaqee ti, ruuhoota warra aakiramee amma mana hidhaa keeysa jiranitti lallabe.
[20] Isaan ruuhoota namoota dur bara Noohii, wayta markabni tolfamu, yeroo Rabbi obsaan isaan eegaa ture san, warra isaaf ajajamuu dhabee hafe. Markaba kanaani namoonni muraasni, jechuun, lubbuu saddeetii tu bishaan keeysaa eewalame.
[21] Kuniis akka fakkeenyaatti cuuphaa isin amma ittiin najaa baafamtan; cuuphaan tuniis xurii qaama irraa dhiquu odoo hin tahin, du'aa ka'uu Yesuus Kiristoosiin, xalalii qaceeltuun gara Rabbii deebi'uu jechu.
[22] Inni du'aa ka'e sun, samiitti ol bahee, harka mirgaa Rabbii tiini jira; maleeykoonni Rabbii tii fi, humnoonni amrii qaban kanneen hawaa keeysaa tiis, harka isaa jala jiru.