[1] Ani Simoon Phexiroos, kaadamaan Yesuus Kiristoosii fi ergamaas kan tahe, gara warra karaa qaceelina Rabbii keenyaa tii fi naja-baasoo keenyaa Yesuus Kiristoos, amantii ulfina-qabeeytii tan akka nuti qabnuu tana, warra arkataniif barreeysuu kiyya.
[2] Rabbi, ammaas Gooftaa keenya Yesuus beekuu keeysaniin, ni'imaanii fi nagayni isiniif haa hoddommaatu.
[3] Rabbi humna Rabbummaa isaa tiin, nama Rabbii tahanii jiraachuuf waan nu barbaachisu hundumaa nuuf kannee ti jira, kuniis isuma kan durrii ulfina isaattii fi gaarummaa isaatti nu yaame beekuuni taha.
[4] Kannaa tanaan, isin turaabama sababa si'oo jasadaa biyya addunyaa tana keeysa jiru jalaa baatanii, warra zaata Rabbummaa irraa hirmaatu akka taataniif, ammaas abdiiwwan guguddoo ulfina-qabeeyyiis nuuf kannamanii ti jiru.
[5] Sababa kanaaf jecha, amantii teeysan irratti tattaafadhaa tii gaarummaa itti dabalaa, gaarummaa irrattiis beekumsa;
[6] beekumsa irrattiis naamusa qabaachuu, naamusa qabaachuu irrattiis obsa qabaachuu, obsa qabaachuu irrattiis ibaadaa Rabbii qabaachuu;
[7] ibaadaa teeysan irrattiis obboleeyyan Ruuhaanii jaalachuu, obboleeyyan Ruuhaanii jaalachuu irrattiis namuma hundumaa jaalachuu agarsiisaa!
[8] Waan kanneen yoo hedduu qabaattan, isaan kashlabummaa isin hanqisanii, yookiin Gooftaa keenya Yesuus Kiristoos beekutti, warra faaydaa qabu isin godhu.
[9] Namni waan kanneen hundumaa hin qabne ammoo, nama if irraa achi hiiysee hin laalle jaamaa qarrayyoo hin qabne; inni, dilii isaa tan dur irraa dhiqamuu huu nama irraanfate.
[10] Kanaaf jecha yaa obboleeyyan koo, yaamamuu keeysanii fi filatamuu keeysaniis, mirkaneeysuuf irra caalatti tattaafadhaa! Waan kanneen yoo gootan gonkumaa hin kuftan.
[11] Akkasitti isin mootummaa bara baraa, tan Gooftaa fi naja-baasoo keenyaa Yesuus Kiristoositti galuuf, simannaa kabajaa qabdu arkachuufi teeysan.
[12] Eegaa, isin warra waan kanneen beekuu fi ammaas warra dhugaa qabdanittiis gadi dhaabamtanii jirtan yoo taatan illee, ani hoggayyuu waan kanneen isinuma yaadachiisuu dhaan barbaada.
[13] Jasada kiyya, kan akka daasaa kana keeysa hangaan jiru, isin yaadachiisee dammaysuun kiyya, waanuma gaari natti fakkaata.
[14] Gooftaan keenya Yesuus Kiristoos akka ana agarsiisetti, jasadni kiyya kan akka daasaa kun, dafee buqqifamuuf akka deemu niin beeka.
[15] Eegaan ani biyya addunyaa tana irraa gale booddee, akka waan kanneen wayta halle, yaadachuu dandeeysan godhuuf jechaan tattaafadha.
[16] Wayta waa'ee humnaa fi dhufa Gooftaa keenyaa Yesuus Kiristoos isinitti himne, sheekkoo shaaxirummaa namaa tiin uumameen odoo hin tahin, nuti durrii ulfina isaa tiif ragaa ijaa taanee ti isinitti himne.
[17] Inni, Rabbi Abbaa biraa kabajaa fi durrii ulfinaa wayta fudhate, sagaleen, “Kun Ilma kiyya jaalatamaa kaniin hedduu itti gammade” jettu takka, Gooytaa guddaa mulki-qabeeysa biraa dhuftee ti turte.
[18] Nutuu gaara qulqulluu gubbaa irra isaa wajjiin waan turreef jecha, sagalee samii irraa isaaf dhufte tana dhageenyee ti jirra.
[19] Ammaas, qoowliin nabiyyoonni dubbataniis, caalatti nuuf mirkanooytee ti jirti; isiniis laalmaya keeysan yoo isii irratti xiyyeeyfattan gaari; qoowliin isaanii tun, akka ibsaa bakka dukkanaa keeysatti ibsuutitti, hanga bariisaan jalaan diimattee, bakkalchi qalbii teeysan keeysatti bahutti ni ibsa.
[20] Hundumaa caalatti, raajiin Barreeyfama Qulqulluu keeysaa namni tokko, akkuma yaada mataa isaatti hiikuu akka hin dandeenye, akka beeytaniin barbaada.
[21] Raajiin dubbataman, takkaa tuu fedha namaa tiin hin taane; ammoo namoonni Ruuhal Qudusiin geggeeyfamaa, waanuma Rabbi biraa fudhatan san dubbatanii ti jiru.