[1] সইদ্য বছর ফরদি আঁই বান্যাবাসর লগে আবার জেরুজালেমত গেলাম, আর তিতরেঅ লগে নিলাম।
[2] আল্লাহ্র ইছ্যা ফকাশিত অইবার ফরদি আঁই য়েডে গেলাম। যে সুহ্যবর আঁই অ-ইহুদিঅক্যলর হাছে তবলিগ গরি থাকি য়িয়ান হইলাম। জামাতর গইন্যমাইন্য মানুষঅক্যলর হাছে য়েগিন গোফনতই হইলাম, হারন আঁর ডর অইতো আছিল্ দে, অঅত আঁই উউদাউদি মিন্যোত গরির্ বা গজ্যি।
[3] কিন্তু অ-ইহুদি অইলেঅ আঁর উঁয়াইজ্যা তিতরে সুন্যত গরিবার লাই বাইধ্য গরা নঅঅ অঅ।
[4] হয়েকজন ভন্ড ভাই গোফনত ঢুকি ফরিবার হারনে হতাগান উইট্যেল্। মসিহ্ ইসার উঅর ইমানদার ইসাবে আঁরার যে সাধিনতা আছে য়েই সাধিনতার দোষ ধরিবার লাইই ইতারা গোফনত ঢুইক্যেল্। যেন্ আঁরারে গোলাম বানাইত্ ফারে।
[5] কিন্তু সুহ্যবরর আঁসা যেন্ তোঁয়ারার লাই রক্যা গরিত্ ফারি য়িয়ানর লাই এক মোওতোর লাইঅ আঁরা য়িতারার হতা মানি নঅঅ লইয়্যি।
[6] জামাতর গইন্যমাইন্য মানুষঅক্যলে সুহ্যবরর বিষয়ে নয়া হনঅ কিছুই আঁরে নঅঅ জানাআ। আসলে য়িতারা যিয়ানই অইবো অঅক য়িয়ানত আঁর কিছুই নঅ আইয়্যে যাআ। আল্লাহ্ বাইরর চিয়ারা দেকিয়েনে বিচার নঅ গরে।
[7] যিয়ান অইবো অঅক, য়িতারা দেকিল্, ইহুদিঅক্যলর হাছে সুহ্যবর তবলিগ গরিবার ভার যেইল্যা ফিতরর উঅর দেয়া অইয়্যেল্, য়েইল্যা অ-ইহুদিঅক্যলর হাছে সুহ্যবর তবলিগ গরিবার ভার আল্লাহ্ আঁর উঅর দিয়্যে।
[8] য়িতারা ইয়ান দেকিত্ ফাইল্, হারন ইহুদিঅক্যলর হাছে ফিতরর সাআবি-হামর ফিছদি যিবা আছিল্ য়েই আল্লাহ্ অ-ইহুদিঅক্যলর হাছে আঁর সাআবি-হামর ফিছদিঅ আছিল্।
[9] য়েই গইন্যমাইন্য মানুষঅক্যলে, মানি ইয়াকুব, ফিতর আর ইউহোন্যা এগিন দেকিয়েনে বুঝিত্ ফাইজ্যেল্ দে, আঁই আল্লাহ্র হাছর ত্যুন বিশেষ রহমত ফাইয়্যি। য়িতারার আর আঁরার মাঝে যে যোগাযোগ-সম্যন্দ আছে য়িয়ান দেহ্যাইবার লাই য়িতারা আঁর আর বান্যাবাসর লগে ডাইন আত্ মিলাইল্। য়িতারা রাজি অইল্ দে, আঁরা অ-ইহুদিঅক্যলর হাছে যাইয়্যোম আর য়িতারা নিজরা ইহুদিঅক্যলর হাছে যাইবো।
[10] য়িতারার উগ্যুয়া মাত্র অনুরোধ আছিল্ দে, আঁরা যেন্ গরিবঅক্যলর হতা মনত রাকি; অবইশ্য আঁরঅ য়েই আগ্রঅ আছিল্।
[11] ফিতর যহন এন্টিয়ক শঅরত আইল্ তহন তেঁইর মুকর উঅরদিই আঁই আফত্যি জানাইলাম, হারন তেঁই অন্যায় গইজ্যেল্।
[12] ইমানদার ইহুদিঅক্যলর যে দলগান অ-ইহুদিঅক্যলর সুন্যত গরিবার উঅর জোর দেএ, য়িতারার হয়েকজন ইয়াকুবর হাছর ত্যুন আইবার আগদি ফিতর অ-ইহুদিঅক্যলর লগে হ্যানা-দানা গইত্যো। কিন্তু যহন য়েই দলর মানুষঅক্যলে আইল্ তহন তেঁই য়িতারার ডরে অ-ইহুদিঅক্যলর লগ ছারি দিয়েনে নিজরে আলিদা গরি লইল্।
[13] এন্টিয়কর অইন্যাইন্য ইমানদার ইহুদিঅক্যলঅ ফিতরর লগে এই ভন্ডামিত্ যোগ দিয়্যেল। এন্ কি, বান্যাবাসঅ য়িতারার ভন্ডামির হারনে ভুল ফথদি ঠেং বারাইয়্যেল্।
[14] কিন্তু আঁই যহন দেকিলাম দে, সুহ্যবরর আঁসার লগে য়িতারার হামর হনঅ মিল নাই তহন আঁই বেক্যিনর সাম্নদি ফিতররে হইলাম, “অনে ইহুদি অইয়্যেনেঅ যহন ইহুদিঅক্যলর মতন নঅ চলিয়েনে অ-ইহুদিঅক্যলর মতন সইল্যোন তহন কেন্ গরিয়েনে অ-ইহুদিঅক্যলরে ইহুদিঅক্যলর মতন সইলতো বাইধ্য গইত্যা লাইগ্যোন?
[15] “আঁরা ইহুদি, গুনাহ্গার অ-ইহুদি অইয়েনে জন্মগ্রঅন নঅঅ গরি।
[16] কিন্তু তঅঅ আঁরা এই হতা জানি দে, শরিয়ত ফালনর লাই আল্লাহ্ মানুষরে ধার্মিক বুলি গ্রঅন নঅ গরে, বরং ইসা মসিহ্র উঅর ইমানর লাইই য়িয়ান গরে। য়িয়ানর লাই আঁরাঅ মসিহ্ ইসার উঅর ইমান আন্যি, যেন্ শরিয়ত ফালনর লাই নঅঅ বরং মসিহ্র উঅর ইমানর লাইই আঁরারে ধার্মিক বুলি গ্রঅন গরা অঅ; হারন শরিয়ত ফালন গরিবার হারনে কেউরেই ধার্মিক বুলি গ্রঅন গরা অইতো নঅ।
[17] “মসিহ্র মইধ্য দিয়েনে ধার্মিক বুলি আল্লাহ্র গ্রঅনযোইগ্য অইবার চেষ্টাত যুদি দেহ্যা যাআ, অ-ইহুদিঅক্যলর মতন আঁরাঅ গুনাহ্গার, তইলে য়িয়ানর মানি কি এই দে, মসিহ্ গুনাহ্র সেবা গরে? হনঅ দিনঅ নঅ।
[18] যে জিনিস আঁই ভাঁগি ফেল্যি য়িয়ান যুদি আঁই আবার বানাই তইলে তঅ আঁই নিজেই নিজরে দুষি বুলি ফরমান গরি।
[19] শরিয়তর দাবি-দাওয়ার হাছে শরিয়ত দিয়েনেই আঁর মরন অইয়্যে যেন্ আঁই আল্লাহ্র লাই বাঁচি থাকিত্ ফারি।
[20] আঁরে মসিহ্র লগে কুরুশর উঅর মারি ফেলা অইয়্যে। য়িয়ানর লাই আঁই আর জিন্দা নঅঅ, মসিহ্ই আঁর মইধ্যে জিন্দা আছে। এহন এই শরিলত আঁই যে জিবন হাডাইর য়িয়ান ইব্নুল্লাহ্র উঅর ইমানর মইধ্য দিয়েনেই হাডাইর। তেঁই আঁরে মহব্যত গরিয়েনে আঁর লাই নিজরে দান গইজ্যেল্।
[21] আল্লাহ্র এই রহমতরে আঁই বাতিল নঅ গইজ্যোম, হারন মানুষ যুদি শরিয়ত ফালনর মইধ্য দিয়েনেই আল্লাহ্র গ্রঅনযোইগ্য অইত্ ফারে তইলে মসিহ্ মিছাই মরিল্।”