[1] ᑭ ᐃᑌᐤ ᒫᑲ, ᑖᐯᐧ ᑭᐟ ᐃᑎᓈᐋᐧᐤ, ᐋᑎᐦᐟ, ᐅᑕ ᓂᐸᐃᐧᐊᐧᐠ ᐁᑳ ᓈᐣᑕᐤ ᐃᓯ ᑫ ᑯᒋᐢᑕᑭᐠ ᓂᐱᐃᐧᐣ, ᐹᑐᐢ ᐃᔨᑯᕽ ᐋᐧᐸᐦᑕᑲᐧᐃᐧ ᑭᓭᒪᓂᑐ ᐅᐟ ᐅᑌᓇᐃᐧᐃᐧᐣ ᐁ ᑕᑯᓯᓄᒪᑲᓂᔨᐠ ᓱᑫᔨᑖᑯᓯᐃᐧᓂᕽ.
[2] ᑳ ᓂᑯᑖᐧᓱ ᑭᓯᑳᔨᐠ ᒫᑲ ᒋᓴᐢ ᑭ ᐃᐧᒉᐁᐧᐤ ᐱᑕᕒ, ᒥᓇ ᒉᒥᐢ, ᒥᓇ ᒑᐣ, ᐁᑯᓯ ᐁ ᑭ ᐃᑐᐦᑕᐦᐋᐟ ᐊᐧᒋᕽ ᐁ ᐃᐢᐹᒪᑎᓈᐠ: ᑭ ᑫᐧᐢᑭᓈᑯᓯᐤ ᒫᑲ ᐁ ᑲᓇᐋᐧᐸᒥᑯᐟ:
[3] ᐅ ᑭᑭᐢᑳᒋᑲᓇ ᒫᑲ ᑭ ᐋᐧᓯᑌᔨᐊᐧ, ᐊᔨᐋᐧᐠ ᐁ ᐋᐧᐱᐢᑳᔨᑭ; ᐃᔨᑯᕽ ᐁᑳ ᐅᐋᐧᐱᐢᑫᑭᓄᑫᐤ ᐅᑕ ᐊᐢᑭᕽ ᑭᑕ ᑭ ᐋᐧᐱᐢᑭᑖᐟ.
[4] ᑭ ᓄᑯᐦᐃᓱᐢᑖᑲᐧᐠ ᒫᑲ ᐃᓬᐊᐃᒐᐊᐧ ᐊᓯᒋ ᒧᓯᓴ: ᐁ ᐃᐧᒋ ᐊᔭᒥᒫᔨᐟ ᒋᓴᓴ.
[5] ᐱᑕᕒ ᒫᑲ ᐁ ᓇᐢᑫᐧᐊᐧᓯᐃᐁᐧᐟ, ᐃᑌᐤ ᒋᓴᓴ, ᕒᐋᐸᐩ, ᒥᔮᐧᓯᐣ ᐅᑕ ᐁ ᐊᔮᔮᕽ: ᑭᔮᑦ ᒫᑲ ᓂ ᑲ ᐅᓯᑖᓈᐣ ᓂᐢᑐ ᒥᑭᐋᐧᐸ; ᐯᔭᐠ ᑭᔭ ᑭᑕ ᐊᔮᔭᐣ, ᒥᓇ ᐯᔭᐠ ᒧᓯᐢ ᑭᑕ ᐊᔮᐟ, ᒥᓇ ᐯᔭᐠ ᐃᓬᐊᐃᒐ ᑭᑕ ᐊᔮᐟ.
[6] ᒋᑫᒫ ᓇᒪᐃᐧᔭ ᑭᐢᑫᔨᑕᑦ ᑖᓂᓯ ᑭᑕ ᐃᑌᐧᐟ; ᐃᐧᔭ ᒥᐢᑕᐦᐃ ᐁ ᓭᑭᓯᒋᐠ.
[7] ᑭ ᐯ ᐋᑯᐸᔨᐤ ᒫᑲ ᐊᐧᐢᑯ: ᐁᑯᓯ ᐊᐃᐧᔭᐠ ᐯᐦᑖᑯᓯᐤ ᐊᐧᐢᑯᕽ ᐁ ᐃᑌᐧᐟ, ᐁᐊᐧᑯ ᐊᐊᐧ ᑳ ᓵᑭᐦᐊᐠ ᓂᑯᓯᐢ, ᓇᑐᐦᑖᕽ.
[8] ᓯᓯᑯᐨ ᒫᑲ ᐋᐧᓴᑳᑦ ᐁ ᐊᔨᑖᐱᒋᐠ ᓇᒪᐃᐧᔭ ᐊᐃᐧᔭ ᐋᐧᐸᒣᐊᐧᐠ ᐱᑯ ᒋᓴᓴ ᐃᐧᔭᐋᐧᐤ ᐊᓯᒋ.
[9] ᐁ ᐯ ᓂᑕᒋᐁᐧᒋᐠ ᒫᑲ, ᑭ ᐊᔮᑳᐧᒥᒣᐤ ᐁᑳ ᐊᐃᐧᔭ ᐊᔨᓯᔨᓂᐊᐧ ᑭᑕ ᐃᐧᐦᑕᒪᐋᐧᔨᐟ ᐊᓂᐦᐃ ᑳ ᑭ ᐋᐧᐸᐦᑕᐦᑭᐠ, ᐹᑐᐢ ᐱᑯ ᐃᔨᑯᕽ ᐃᔨᓂᐃᐧᑯᓯᓵᐣ ᓂᐳᐃᐧᓂᕽ ᑭᑕ ᐅᐦᒋ ᐊᐧᓂᐢᑳᐟ.
[10] ᑭ ᑲᓇᐁᐧᔨᑕᒪᐧᐠ ᒫᑲ ᐁᐊᐧᑯ ᐃᑌᐧᐃᐧᐣ, ᐁ ᑲᑫᐧᒋᑐᒋᐠ, ᑫᑲᐧᐩ ᐊᓂᒪ ᐊᐧᓂᐢᑳᐃᐧᐣ ᓂᐳᐃᐧᓂᕽ ᐅᐦᒋ.
[11] ᐁᑯᓯ ᑭ ᑲᑫᐧᒋᒣᐊᐧᐠ, ᐁ ᐃᑌᐧᒋᐠ, ᑖᓀᑭ ᑳ ᐃᑌᐧᒋᐠ ᒪᓯᓇᐦᐃᑫᐃᐧᔨᓂᐊᐧᐠ ᐃᓬᐊᐃᒐ ᓂᑳᐣ ᑭᑕ ᑕᑯᓯᕽ?
[12] ᑭ ᐃᑌᐤ ᒫᑲ, ᐃᓬᐊᐃᒐ ᑖᐯᐧ ᓂᑳᐣ ᑕᑯᓯᐣ, ᒥᓇ ᑲᐦᑭᔭᐤ ᑫᑲᐧᐩ ᒥᓄᑖᐤ; ᒥᓇ ᑖᓂᓯ ᐃᓯ ᑳ ᐃᑕᓯᓇᐦᐃᑳᑌᐠ ᐃᔨᓂᐃᐧᑯᓯᓵᐣ, ᒥᐦᒉᐟ ᑫᑲᐧᔭ ᑭᑕ ᐃᓯ ᑯᑕᑭᐦᐃᐦᐟ ᒥᓇ ᑭᑕ ᐋᑕᐁᐧᔨᒥᐦᐟ?
[13] ᑭᐟ ᐃᑎᓈᐋᐧᐤ ᒫᑲ, ᐃᓬᐊᐃᒐ ᓵᓴᐩ ᑭ ᑕᑯᓯᐣ, ᑭ ᐃᑐᑕᐁᐧᐊᐧᐠ ᒫᑲ ᐱᑯ ᐁ ᐃᑌᔨᑕᐦᑭᐠ, ᒣᐧᐦᒋ ᑳ ᐃᑕᓯᓇᐦᐃᑳᑌᐠ ᐁᐊᐧᑯ ᐅᐦᒋ.
[14] ᐃᐢᐱ ᒫᑲ ᐁᐧᑎᑖᒋᐠ ᑭᐢᑭᓄᐦᐊᒪᐋᐧᑲᓇ, ᐋᐧᐸᒣᐊᐧᐠ ᐁ ᒫᒪᐁᐧᔭᑎᔨᐟ ᐊᔨᓯᔨᓂᐊᐧ ᐁ ᐋᐧᐢᑳᐢᑳᑯᒋᐠ, ᒥᓇ ᒪᓯᓇᐦᐃᑫᐃᐧᔨᓂᐊᐧ ᐁ ᑳᑲᑫᐧᒋᒥᑯᒋᐠ.
[15] ᓭᒫᐠ ᒫᑲ ᑲᐦᑭᔭᐤ ᐊᔨᓯᔨᓂᐊᐧ, ᐃᐢᐱ ᐃᐧᐋᐸᒥᑯᐟ, ᒥᐢᑕᐦᐃ ᑭ ᒫᒪᐢᑳᑕᒥᔨᐊᐧ, ᐁᑯᓯ ᐁ ᐃᐢᐸᑖᔨᐟ ᐁ ᓇᑕᐃᐧ ᐊᑕᒥᐢᑳᑯᐟ.
[16] ᑭ ᑲᑫᐧᒋᒣᐤ ᒫᑲ ᑫᑲᐧᐩ ᐊᓂᒪ ᑳ ᑲᑫᐧᒋᒫᔦᑯᐠ?
[17] ᐯᔭᐠ ᒫᑲ ᐊᓂᑭ ᑳ ᒫᒪᐁᐧᔭᑎᒋᐠ ᑭ ᓇᐢᑫᐧᐊᐧᓯᒣᐤ, ᐁ ᐃᑌᐧᐟ, ᑫᐢᑭᓄᐦᐊᒫᑫᔭᐣ, ᑭ ᑭ ᐯᑕᒫᑎᐣ ᓂᑯᓯᐢ, ᑳ ᑭᑭᐢᑳᑯᐟ ᐁᑳ ᐁ ᓂᑖᐁᐧᔨᐟ ᐊᐦᒑᐦᑲᐧ;
[18] ᐱᑯ ᐃᑕ ᒫᑲ ᐁᐧᑎᑎᓂᑯᒋ, ᐸᑲᒥᓯᒥᐠ ᒧᒋᕽ: ᐁᑯᓯ ᐁ ᐱᐢᑌᐃᐧᑐᓀᐟ, ᒥᓇ ᐁ ᑲᑭᒋᐢᑳᐱᑌᐟ, ᒥᓇ ᐁᔪᑲᑦ ᐊᑎ ᑲᑐᐱᓀᐤ: ᓂ ᑭ ᐃᐧᐦᑕᒪᐋᐧᐊᐧᐠ ᒫᑲ ᑭ ᑭᐢᑭᓄᐦᐊᒪᐋᐧᑲᓇᐠ ᑭᑕ ᐊᐧᔭᐃᐧᐁᐧᐱᓈᒋᐠ; ᒫᑲ ᓇᒪᐃᐧᔭ ᑲᐢᑭᑖᐊᐧᐠ.
[19] ᐁᑯᓯ ᑭ ᓇᐢᑫᐧᐊᐧᓯᒣᐤ ᒥᓇ ᑭ ᐃᑌᐤ, ᐋ ᐁᑳ ᐁᐧᑖᐯᐧᑕᒧᐃᐧᓂᔦᐠ ᑳ ᐊᔨᓯᔨᓂᐃᐧᔦᐠ, ᑖᓂᔨᑯᕽ ᑭᓀᐧᐢ ᑫ ᐃᐧᒉᐃᐧᑕᑯᐠ? ᑖᓂᔨᑯᕽ ᑫ ᓯᑐᐃᐧᔨᑕᑯᐠ? ᐯᑐᐃᐧᐠ ᓂᔭ.
[20] ᐁᑯᓯ ᑭ ᐯᓯᐁᐧᐊᐧᐠ: ᐃᐢᐱ ᒫᑲ ᐃᐧᔮᐸᒫᐟ, ᓭᒫᐠ ᐊᐦᒑᐦᑲᐧ ᑭ ᐋᐧᐃᐧᓴᑭᐱᑎᐠ; ᐁᑯᓯ ᑭ ᐸᐦᑭᓯᐣ ᒧᒋᕽ, ᒥᓇ ᑭ ᑎᐦᑎᐱᐤ ᐱᐢᑌᐤ ᐅᑐᓂᕽ ᐁ ᐅᐦᒋᐸᔨᔨᐠ.
[21] ᑭ ᑲᑫᐧᒋᒣᐤ ᒫᑲ ᐅᑖᐃᐧᔨᐊᐧ, ᑖᓂᐢᐱ ᐅᐦᒋ ᐊᐢᐱᐣ ᐅᒪ ᑳ ᐅᑎᐦᑎᑯᐟ? ᐁᑯᓯ ᑭ ᐃᑌᐧᔨᐊᐧ, ᐁ ᐊᐋᐧᓯᓯᐃᐧᐟ ᐅᐦᒋ.
[22] ᒥᐦᒉᑖᐧᐤ ᒫᑲ ᑭ ᒪᒍᐢᑌᐁᐧᐱᓂᐠ ᒥᓇ ᑭ ᐸᑲᐢᑕᐁᐧᐁᐧᐱᓂᐠ, ᑭᑕ ᓂᓯᐊᐧᓈᒋᐦᐃᑯᐟ: ᒫᑲ ᑭᐢᐱᐣ ᑫᐢᑭᑖᐊᐧᓀ ᑫᑲᐧᐩ ᑭᑕ ᐃᑐᑕᒪᐣ ᑭᑎᒫᑭᓇᐃᐧᓈᐣ, ᒥᓇ ᐃᐧᒋᐃᓈᐣ.
[23] ᒋᓴᐢ ᒫᑲ ᑭ ᐃᑌᐤ, ᑭᐢᐱᐣ ᑫᐢᑭᑖᐊᐧᓀ: ᑲᐦᑭᔭᐤ ᑫᑲᐧᐩ ᑭᑕ ᑭ ᐃᑭᓂᔨᐤ ᐊᓇ ᑳ ᑖᐯᐧᑕᕽ.
[24] ᓭᒫᐠ ᒫᑲ ᐅᑖᐃᐧᔭ ᐊᓇ ᐊᐋᐧᓯᐢ ᑭ ᑌᐯᐧᔨᐊᐧ ᐅᒥᓯ ᐁ ᐃᑌᐧᔨᐟ, ᑌᐯᔨᐦᒋᑫᔭᐣ, ᓂ ᑖᐯᐧᑌᐣ; ᐃᐧᒋᐃᐣ ᐁ ᐅᐟ ᐋᓀᐧᑕᒧᐃᐧᓂᔮᐣ.
[25] ᐃᐢᐱ ᒫᑲ ᒋᓴᐢ ᐃᐧᔮᐸᐦᑕᕽ ᐊᔨᓯᔨᓂᐊᐧ ᐁ ᐯ ᒫᒪᐃᐧ ᐃᐢᐸᑖᔨᐟ, ᑭ ᑭᑐᑌᐤ ᐁᑳ ᑳ ᐯᑭᓯᔨᐟ ᐊᐦᒑᐦᑲᐧ, ᐅᒥᓯ ᐁ ᐃᑖᐟ, ᑭᔭ ᐁᑳ ᑲ ᓂᑖᐁᐧᔭᐣ ᒥᓇ ᐁᑳ ᑳ ᐊᐧᐃᐧᔭᐃᐧᑕᒪᐣ ᐊᐦᒑᕽ, ᑭᐟ ᐃᑕᓱᐋᐧᑎᑎᐣ ᑭᑕ ᐯ ᐊᐧᔭᐃᐧᔭᐣ ᑳ ᑭᑭᐢᑲᐊᐧᐟ, ᒥᓇ ᐁᑳ ᐃᐧᑳᐨ ᑭᑖᐧᑦ ᑭᑕ ᐱᐦᑐᑫᔭᐣ.
[26] ᐁᑯᓯ ᐊᐦᒑᕽ ᑭ ᑌᐯᐧᐤ, ᒥᓇ ᒥᐢᑕᐦᐃ ᐁ ᑭ ᐊᐧᐃᐧᓴᑭᐱᑖᐟ; ᑭ ᐯ ᐊᐧᔭᐃᐧᐤ; ᐊᓇ ᐊᐋᐧᓯᐢ ᒫᑲ ᑭ ᐃᓯ ᐊᔮᐤ ᑖᐱᐢᑯᐨ ᐁᑳ ᐁ ᐱᒫᑎᓯᐟ; ᐅᓵᑦ ᐃᓴ ᐱᑯ ᑭ ᐃᑌᐧᐊᐧᐠ, ᓇᒪᐃᐧᔭ ᐱᒫᑎᓯᐤ.
[27] ᒋᓴᐢ ᒫᑲ ᑭ ᐅᑎᓇᒣᐧᐤ ᐅᒋᐦᒋᔨᐤ, ᒥᓇ ᑭ ᐊᑎ ᐅᐱᓀᐤ; ᐁᑯᓯ ᑭ ᐊᐧᓂᐢᑳᔨᐊᐧ.
[28] ᐃᐢᐱ ᒫᑲ ᑳ ᐱᐦᑐᑫᐟ ᐋᐧᐢᑳᐦᐃᑲᓂᕽ, ᐅ ᑭᐢᑭᓄᐦᐊᒪᐋᐧᑲᓇ ᐅᐦᐱᒣ ᑭ ᑲᑫᐧᒋᒥᐠ, ᐁ ᐃᑌᐧᔨᐟ, ᓂᔭᓈᐣ ᐃᐧᔭ ᓇᒪᐃᐧᔭ ᓂ ᑭ ᐊᐧᔭᐃᐧᐁᐧᐱᓈᓈᐣ.
[29] ᐁᑯᓯ ᒫᑲ ᑭ ᐃᑌᐤ, ᐅᒪ ᑐᐃᐧ ᓇᒪᐃᐧᔭ ᓈᐣᑕᐤ ᑫᑲᐧᐩ ᑭᑕ ᑭ ᐅᐦᒋ ᐊᐧᔭᐃᐧᐤ, ᐱᑯ ᐊᔭᒥᐦᐋᐃᐧᐣ.
[30] ᐁᑯᑕ ᒫᑲ ᑭ ᐅᐦᒋ ᓯᐯᐧᑌᐊᐧᐠ, ᒥᓇ ᑭ ᐊᑎ ᓵᐳ ᐱᒧᐦᑌᐊᐧᐠ ᑳᓬᐊᓬᐃᕽ; ᓇᒪᐃᐧᔭ ᒫᑲ ᓇᑕᐁᐧᔨᑕᑦ ᐊᐃᐧᔭ ᐊᔨᓯᔨᓂᐊᐧ ᑭᑕ ᑭᐢᑫᔨᑕᒥᔨᐟ.
[31] ᒋᑫᒫ ᑭ ᑭᐢᑭᓄᐦᐊᒫᐁᐧᐤ ᐅ ᑭᐢᑭᓄᐦᐊᒪᐋᐧᑲᓇ, ᒥᓇ ᑭ ᐃᑌᐤ, ᐃᔨᓂᐃᐧᑯᓯᓵᐣ ᐸᑭᑎᓈᐤ ᐅᒋᐦᒋᔨᕽ ᐊᔨᓯᔨᓂᐊᐧ, ᐁᑯᓯ ᒫᑲ ᑭᑕ ᓂᐸᐁᐊᐧᐠ; ᐃᐢᐱ ᒫᑲ ᑭ ᓂᐸᐃᐦᒋ, ᑭ ᓂᐢᑐ ᑭᓯᑳᔨᑭ ᒥᓇ ᑭᑕ ᐊᐧᓂᐢᑳᐤ.
[32] ᒫᑲ ᓇᒪᐃᐧᔭ ᓂᓯᑐᐦᑕᒪᐧᐠ ᐁᐊᐧᑯ ᐃᑌᐧᐃᐧᐣ, ᒥᓇ ᑭ ᓵᑫᐧᔨᒧᐊᐧᐠ ᑭᑕ ᑲᑫᐧᒋᒫᒋᐠ.
[33] ᑭ ᑕᑯᓯᐣ ᒫᑲ ᑫᐸᕒᓀᐊᒥᕽ; ᒣᑳᐧᐨ ᒫᑲ ᐱᑐᑲᒥᕽ ᐋᐧᐢᑳᐦᐃᑲᓂᕽ ᐁ ᐊᔮᐟ, ᑭ ᑲᑫᐧᒋᒣᐤ, ᑫᑲᐧᐩ ᐊᓂᒪ ᑳ ᑭ ᐊᔨᑌᐧᐁᐧᑐᔦᐠ ᒣᑳᐧᐨ ᐁ ᐸᐱᒧᑌᔦᐠ?
[34] ᒫᑲ ᓇᒪ ᓈᐣᑕᐤ ᐃᑌᐧᐊᐧᐠ: ᒋᑫᒫ ᐁ ᐯ ᐸᐱᒧᑌᒋᐠ ᑭ ᐊᐧᔪᑌᐧᐁᐧᑐᐊᐧᐠ, ᐊᐃᐧᓇ ᒥᔭᐊᐧᒋ ᑭᐢᑌᔨᑖᑯᓯᐟ.
[35] ᑭ ᓇᐦᐊᐱᐤ ᒫᑲ, ᒥᓇ ᑭ ᓇᑐᒣᐤ ᐊᓂᐦᐃ ᒥᑖᑕᐟ ᓂᓱᓵᑊ; ᐁᑯᓯ ᐃᑌᐤ, ᑭᐢᐱᐣ ᐊᐃᐧᔭᐠ ᐃᐧ ᓂᑳᓀᔨᑖᑯᓯᒋ, ᑭᔮᑦ ᒫᐊᐧᒋ ᐅᑖᕽ ᑭᑕ ᐊᔮᐤ, ᒥᓇ ᑭᑕ ᐅᐟ ᐊᑐᐢᑫᔮᑲᓂᒥᐊᐧᐠ ᑲᐦᑭᔭᐤ.
[36] ᑭ ᐅᑎᓀᐤ ᒫᑲ ᐁ ᐊᐱᓯᓯᓯᔨᐟ ᐊᐋᐧᓯᓴ, ᐁᑯᓯ ᑖᐊᐧᔨᕽ ᑭ ᐊᔦᐤ: ᐁ ᐅᑎᓈᐟ ᒫᑲ ᐁ ᑕᐦᑯᓈᐟ, ᑭ ᐃᑌᐤ,
[37] ᐊᐃᐧᔭᐠ ᑫ ᐅᑎᓈᑫᐧ ᐯᔭᐠ ᐁᑯ ᑐᐃᐧ ᐊᐱᐢᑕᐋᐧᓯᓴ ᓂ ᐃᐧᔪᐃᐧᓂᕽ ᓂᔭ ᓂᐟ ᐅᑎᓂᐠ, ᒥᓇ ᐊᐃᐧᔭᐠ ᓂᔭ ᐅᑎᓂᒋ, ᓇᒪᐃᐧᔭ ᓂᔭ ᑳ ᐅᑎᓂᐟ, ᒫᑲ ᐊᓂᐦᐃ ᑳ ᐯ ᐃᑎᓴᐅᔨᐟ.
[38] ᒑᐣ ᒫᑲ ᑭ ᐃᑌᐤ, ᑫᐢᑭᓄᐦᐊᒫᑫᔭᐣ, ᓂ ᑭ ᐋᐧᐸᒫᓈᐣ ᐯᔭᐠ ᐁ ᐊᐧᔭᐃᐧᐁᐧᐱᓈᐟ ᒪᒋ ᐊᐦᒑᐦᑲᐧ ᑭ ᐃᐧᔪᐃᐧᓂᕽ; ᐁᑯᓯ ᓂ ᑭ ᑭᑕᐦᐊᒪᐋᐧᓈᐣ ᒋᑫᒫ ᓇᒪᐃᐧᔭ ᑭ ᐱᒥᑎᓴᐅᑯᓇᐤ.
[39] ᒫᑲ ᒋᓴᐢ ᑭ ᐃᑌᐤ, ᐁᑳᐃᐧᔭ ᑭᑕᐦᐊᒪᕽ: ᒋᑫᒫ ᓇᒪᐃᐧᔭ ᐃᑖᐤ ᐊᔨᓯᔨᓂᐤ ᑭᑕ ᐃᑐᑕᕽ ᐁ ᓱᑫᔨᑖᑲᐧᓂᐠ ᐊᑐᐢᑫᐃᐧᐣ ᓂ ᐃᐧᔪᐃᐧᓂᕽ, ᐁᑯᓯ ᑭᑕ ᑲᐢᑭᑖᐟ ᑭᔨᐸ ᑭᑕ ᒪᒋ ᐋᔨᒧᒥᐟ.
[40] ᒋᑫᒫ ᐊᓇ ᐁᑳ ᑳ ᓇᑳᐢᑳᑯᔭᕽ ᑭ ᐃᐧᒋᐃᑯᓇᐤ.
[41] ᒋᑫᒫ ᐱᑯ ᐊᐃᐧᔭᐠ ᑫ ᒥᔨᑯᔦᐠ ᐯᔭᐠ ᒥᓂᑳᐧᑲᓂᐢ ᓂᐱ ᑭᑕ ᒥᓂᑫᐧᔦᐠ, ᒋᑫᒫ ᙭ ᐁ ᐊᔮᐃᐧᑯᔦᐠ, ᑖᐯᐧ ᑭᐟ ᐃᑎᓈᐋᐧᐤ, ᓇᒪᐃᐧᔭ ᓈᐣᑕᐤ ᐃᓯ ᑭᑕ ᐊᐧᓂᑖᐤ ᐅ ᑎᐸᐦᐊᒫᑯᐃᐧᐣ.
[42] ᒥᓇ ᐱᑯ ᐊᐃᐧᔭᐠ ᑫ ᐃᑐᑕᐋᐧᑫᐧ ᐯᔭᐠ ᐅᐦᐃ ᑳ ᐊᐱᐢᑌᔨᑖᑯᓯᔨᐟ ᑳ ᑖᐯᐧᑕᐃᐧᔨᐟ ᑭᑕ ᐅᐦᒋ ᐱᓱᑫᓯᓂᔨᐟ, ᓇᐊᐧᐨ ᑭᑕ ᒥᔮᐧᓯᓂᔨᐤ ᒥᓯ ᐱᓂᐳᒋᑲᐣ ᐊᓯᓂᔭ ᑭ ᓴᑲᐱᑎᒥᐦᐟ ᐅᑲᐧᔮᕽ, ᐁᑯᓯ ᑭ ᐸᑲᐢᑕᐁᐧ ᐁᐧᐱᓂᐦᐟ ᑭᐦᒋᑲᒥᕽ.
[43] ᒥᓇ ᑭᐢᐱᐣ ᑭᒋᐦᒋ ᐱᓱᑫᓯᒥᑯᔭᓀ, ᑭᐢᑭᐁᐧᐸᐊ; ᒥᔮᐧᓯᐣ ᑭᑕ ᐱᐦᑐᑫᔭᐣ ᐱᒫᑎᓯᐃᐧᓂᕽ ᐁ ᓇᐸᑌᒋᐦᒉᔭᐣ, ᐃᐢᐱᐨ ᐃᐧᔭ ᐁ ᓂᓯᑭ ᑭ ᒋᐦᒋᔭ ᑭᑕ ᐃᑐᑌᔭᐣ ᐃᐢᑯᑌᕽ, ᐁᑳ ᑫ ᑭ ᐋᐢᑕᐁᐧᐦᐃᑳᑌᐠ ᐃᐢᑯᑌᐤ.
[45] ᒥᓇ ᑭᐢᐱᐣ ᑭᓯᐟ ᐱᓱᑫᓯᒥᑯᔭᓀ ᑭᐢᑭᐁᐧᐸᐊ: ᒥᔮᐧᓯᐣ ᑭᑕ ᐱᐦᑐᑫᔭᐣ ᐱᒫᑎᓯᐃᐧᓂᕽ ᐁ ᓇᐸᑌᓯᑌᔭᐣ, ᐃᐢᐱᐨ ᐃᐧᔭ ᐁ ᓂᓯᑭ ᑭᓯᑕ ᑭᑕ ᐃᓯ ᐁᐧᐱᓂᑲᐃᐧᔭᐣ ᐃᐢᑯᑌᕽ.
[47] ᒥᓇ ᑭᐢᐱᐣ ᑭᐢᑭᓯᐠ ᐱᓱᑫᓯᒥᑯᔭᓀ, ᑫᒋᑯᐁᐧᐱᓇ: ᒥᔮᐧᓯᐣ ᑭᑕ ᐱᐦᑐᑫᔭᐣ ᑭᓭᒪᓂᑐ ᐅᐟ ᐅᑌᓇᐃᐧᐃᐧᓂᕽ ᐁ ᓇᐸᑎᔮᐱᔭᐣ, ᐃᐢᐱᐨ ᐃᐧᔭ ᐁ ᓂᓯᑭ ᑭᐢᑭᓯᑲᐧ ᑭᑕ ᐃᓯ ᐁᐧᐱᓂᑲᐃᐧᔭᐣ ᐃᐢᑯᑌᕽ;
[48] ᐃᑕ ᐅ ᒪᓂᒍᓯᒥᐋᐧᐊᐧ ᐁᑳ ᑳ ᓂᐱᔨᐟ, ᒥᓇ ᐃᐢᑯᑌᐤ ᐁᑳ ᑳ ᐋᐢᑕᐁᐧᐦᐃᑳᑌᐠ.
[49] ᒋᑫᒫ ᑲᐦᑭᔭᐤ ᐊᐃᐧᔭᐠ ᐃᐢᑯᑌᐤ ᑭᑕ ᑭᑭ ᓯᐃᐧᑖᑲᓇᐋᐧᐤ.
[50] ᒥᔮᐧᓯᐣ ᓯᐃᐧᑖᑲᐣ: ᒫᑲ ᑭᐢᐱᐣ ᓯᐃᐧᑖᑲᐣ ᐊᐧᓂᑖᒪᑲᑭ ᐁ ᓯᐋᐧᐠ, ᑫᑲᐧᐩ ᒥᓇ ᑫ ᑭ ᐅᐦᒋ ᓯᐃᐧᑖᕽ? ᑭᑭᐢᑲᒧᐠ ᓯᐃᐧᑖᑲᐣ, ᒥᓇ ᒥᔪ ᐅᑐᑌᒥᐦᑐᐠ.