[1] ᓭᒫᐠ ᒫᑲ ᐁ ᑫᑭᓭᐸᔮᐠ ᑭᐦᒋ ᐊᔭᒥᐦᐁᐃᐧᔨᓂᐊᐧᐠ ᐊᓯᒋ ᑳ ᓂᑳᓀᔨᑖᑯᓯᒋᐠ ᒥᓇ ᒪᓯᓇᐦᐃᑫᐃᐧᔨᓂᐊᐧᐠ, ᒥᓇ ᑲᐦᑭᔭᐤ ᐅᔭᓱᐁᐧᐃᐧᔨᓂᐊᐧᐠ, ᑭ ᒫᒪᐃᐧ ᐅᔭᓱᐁᐧᐊᐧᐠ, ᐁᑯᓯ ᑭ ᒪᒫᒋᑲᐧᐱᑌᐊᐧᐠ ᒋᓴᓴ, ᒥᓇ ᑭ ᓯᐯᐧᑕᐦᐁᐊᐧᐠ, ᒥᓇ ᑭ ᐸᑭᑎᓇᒪᐁᐧᐊᐧᐠ ᐸᐃᓬᐊᑕ.
[2] ᐸᐃᓬᐊᐟ ᒫᑲ ᑭ ᑲᑫᐧᒋᒣᐤ, ᑭᔭ ᒋ ᒍᐊᐧᐠ ᐅ ᑭᐦᒋ ᐅᑭᒫᒥᐋᐧᐊᐧ? ᐁᑯᓯ ᓇᐢᑫᐧᐊᐧᓯᒣᐤ ᒥᓇ ᐃᑌᐤ, ᑭᔭ ᑭᐟ ᐃᑖᐧᐣ.
[3] ᑭᐦᒋ ᐊᔭᒥᐦᐁᐃᐧᔨᓂᐊᐧ ᒫᑲ ᒥᐦᒉᐟ ᑫᑲᐧᐩ ᑭ ᐊᑖᒥᒥᐠ.
[4] ᐁᑯᓯ ᐸᐃᓬᐊᐟ ᒥᓇ ᑲᑫᐧᒋᒣᐤ, ᐁ ᐃᑌᐧᐟ, ᓇᒪ ᒋ ᑫᑲᐧᐩ ᑭ ᓇᐢᑫᐧᐊᐧᓯᑖᐣ? ᒋᐢᐟ ᑖᓂ ᑕᐦᑐ ᑫᑲᐧᐩ ᐁ ᐊᑖᒥᒥᐢᑭᐠ.
[5] ᒋᓴᐢ ᒫᑲ ᓇᒪᐃᐧᔭ ᐊᐊᐧᓯᒣ ᑫᑲᐧᐩ ᓇᐢᑫᐧᐊᐧᓯᑖᐤ; ᐁᑯᓯ ᐸᐃᓬᐊᐟ ᒫᒪᐢᑳᑕᑦ.
[6] ᐁᑯᑕ ᒫᑲ ᐁᐊᐧᑳᐧᓂᒪ ᐃᐧᐦᑯᐦᑐᐃᐧᓂᕽ ᑭ ᒫᓇ ᐸᑭᑎᓇᒪᐁᐧᐤ ᐯᔭᐠ ᑭᐸᐋᐧᑲᓇ, ᐱᑳᐧᓂᐃ ᐁ ᓇᑕᐁᐧᔨᑕᒫᑯᐟ.
[7] ᐁᑯᑕ ᒫᑲ ᑭ ᐊᔮᐤ ᐯᔭᐠ ᐹᕒᐋᐸᐢ ᐁ ᐃᓯᔨᐦᑳᓱᐟ, ᐁ ᒪᒫᒋᑲᐧᐱᓱᐟ ᐊᓯᒋ ᐊᓂᑭ ᑳ ᑭ ᒫᔭᑲᒥᑭᓯᒋᐠ, ᐊᔨᓯᔨᓂᐊᐧᐠ ᑳ ᑭ ᓂᐸᑖᑫᒋᐠ ᒣᑳᐧᐨ ᐁ ᒫᔭᑲᒥᑲᕽ.
[8] ᐊᓂᑭ ᒫᑲ ᐁ ᒫᒪᐁᐧᔭᑎᒋᐠ ᐊᔨᓯᔨᓂᐊᐧᐠ ᑭ ᓇᑕᐃᐧ ᑲᑫᐧᒋᒣᐊᐧᐠ ᑭᑕ ᐃᑐᑕᒥᔨᐟ ᐁ ᑭ ᒫᓇ ᐃᑐᑖᑯᒋᐠ.
[9] ᐁᑯᓯ ᐸᐃᓬᐊᐟ ᓇᐢᑫᐧᐊᐧᓯᒣᐤ ᐁ ᐃᑖᐟ, ᑭ ᓇᑕᐁᐧᔨᑌᓈᐋᐧᐤ ᒋ ᑭᑕ ᐸᑭᑎᓇᒫᑕᑯᐠ ᒍᐊᐧᐠ ᐅ ᑭᐦᒋ ᐅᑭᒫᒥᐋᐧᐊᐧ?
[10] ᒋᑫᒫ ᐋᐧᐸᐦᑕᑦ ᐃᓴᐋᐧᓇᑫᔨᒧᐃᐧᐣ ᐅᐦᒋ ᑭᐦᒋ ᐊᔭᒥᐦᐁᐃᐧᔨᓂᐊᐧ ᑳ ᑭ ᐸᑭᑎᓇᒫᑯᐟ.
[11] ᒫᑲ ᑭᐦᒋ ᐊᔭᒥᐦᐁᐃᐧᔨᓂᐊᐧᐠ ᑭ ᓯᑭᐢᑲᐁᐧᐊᐧᐠ ᐊᔨᓯᔨᓂᐊᐧ ᓇᐊᐧᐨ ᐹᕒᐋᐸᓴ ᑭᑕ ᐸᑭᑎᓇᒫᑯᒋᐠ.
[12] ᐸᐃᓬᐊᐟ ᒫᑲ ᑭ ᓇᐢᑫᐧᐊᐧᓯᒣᐤ ᒥᓇ ᐅᒥᓯ ᐁ ᑭ ᐃᑖᐟ, ᑖᓂᓯ ᒫᑲ ᑫ ᑐᑕᐊᐧᐠ ᐊᓇ ᒍᐊᐧᐠ ᐅ ᑭᐦᒋ ᐅᑭᒫᒥᐋᐧᐊᐧ ᑳ ᐃᓯᔨᐦᑳᑖᔦᐠ?
[13] ᐁᑯᓯ ᑭ ᑌᐯᐧᐊᐧᐠ ᒥᓇ, ᒋᐢᑕᐦᐋᐢᑳᐧᐢ.
[14] ᐸᐃᓬᐊᐟ ᒫᑲ ᑭ ᐃᑌᐤ, ᑖᓀᑭ, ᑫᑲᐧᐩ ᐁ ᒫᔮᑕᓂᔨᐠ ᑳ ᐃᑐᑕᕽ? ᒫᑲ ᐋᒋ ᐱᑯ ᑭ ᑌᐯᐧᐊᐧᐠ, ᒋᐢᑕᐦᐋᐢᑳᐧᐢ.
[15] ᐁᑯᓯ ᐸᐃᓬᐊᐟ ᐁ ᐃᐧ ᓇᐦᐃᔭᐁᐧᐋᐟ ᐊᔨᓯᔨᓂᐊᐧ, ᑭ ᐸᑭᑎᓇᒪᐁᐧᐤ ᐹᕒᐋᐸᓴ, ᒥᓇ ᑭ ᐸᑭᑎᓀᐤ ᒋᓴᓴ ᐃᐢᐱ ᑳ ᐸᐸᓴᐢᑌᐋᐧᐟ ᑭᑕ ᒋᐢᑕᐦᐋᐢᑳᐧᑎᒥᐦᐟ.
[16] ᐁᑲᐧ ᓯᒫᑲᓂᓴᐠ ᑭ ᐃᑐᐦᑕᐦᐁᐊᐧᐠ ᐱᒑᔨᕽ ᐁ ᐋᐧᐢᑳ ᐊᔮᐠ ᐸᕒᐃᑐᕒᐃᔭᑦ ᑳ ᐃᓯᔨᐦᑳᑌᐠ; ᐁᑯᑕ ᒫᑲ ᑭ ᒫᒪᐃᐧ ᓇᑐᒣᐊᐧᐠ ᐁ ᐃᓯ ᐅ ᐃᐧᒉᐋᐧᑲᓂᒋᐠ.
[17] ᑭ ᐳᐢᑕᓵᑲᐁᐊᐧᐠ ᒫᑲ ᒥᑫᐧᑭᐣ, ᒥᓇ ᐁ ᑭ ᐊᐱᑳᑖᑭᐠ ᑲᐃᐧᒥᓇᑲᓯᔭ ᑭᐦᒋ ᐅᑭᒫᐊᐧᐢᑐᑎᐣ ᐁ ᐅᓯᑖᒋᐠ ᑭ ᐳᐢᑕᐢᑐᑎᓇᐁᐊᐧᐠ;
[18] ᐁᑲᐧ ᑭ ᐊᔭᑕᒥᐢᑲᐁᐧᐊᐧᐠ, ᐦᐁᓬ, ᒍᐊᐧᐠ ᐅ ᑭᐦᒋ ᐅᑭᒫᒥᐋᐧᐊᐧ!
[19] ᑭ ᐸᑲᒪᐁᐧᐊᐧᐠ ᒫᑲ ᐅᐢᑎᑲᐧᓂᔨᕽ ᐋᓂᐢᑲᐊᐧᐢᐠ ᐅᐦᒋ, ᐁᑯᓯ ᑭ ᓯᑳᐧᑌᐊᐧᐠ, ᒥᓇ ᐁ ᓈᒥᑫᔨᒋᐠ ᐁ ᐅᒋᒋᑲᐧᓂᐢᑕᐋᐧᒋᐠ.
[20] ᐃᐢᐱ ᒫᑲ ᑳ ᒣᑐᐋᐧᑳᑖᒋᐠ, ᑭ ᑫᑕᓵᑫᓀᐊᐧᐠ ᒥᑫᐧᑭᓀᐧᓵᑲᐩ, ᒥᓇ ᑭ ᐳᐢᑕᓵᑲᐁᐊᐧᐠ ᐅ ᑭᑭᐢᑳᒋᑲᓂᔨᐊᐧ. ᑭ ᓯᐯᐧᑕᐦᐁᐊᐧᐠ ᒫᑲ ᑭᑕ ᒋᐢᑕᐦᐋᐢᑳᐧᑖᒋᐠ.
[21] ᑭ ᐅᑎᓀᐊᐧᐠ ᒫᑲ ᐯᔭᐠ ᐁᑯᑕ ᐁ ᐱᒧᐦᑌᔨᐟ, ᓴᐃᒪᐣ ᓴᐃᕒᐃᓂ ᐅᐦᒋ, ᐊᐧᔭᐃᐧᑎᒫᔨᕽ ᐁ ᐯ ᐅᑐᑌᔨᐟ, ᐅᑕᐃᐧᐋᐧᐊᐧ ᐋᓬᐃᐠᓵᐣᑕᕒ ᒥᓇ ᕒᐅᐸᐢ, ᑭᑕ ᐃᐧᒉᑯᒋᐠ, ᑭᑕ ᐅᓂᑳᑕᒥᔨᐟ ᐱᒥᑕᐢᑯᐃᑲᓂᔨᐤ.
[22] ᑭ ᐃᑐᐦᑕᐦᐁᐊᐧᐠ ᒫᑲ ᐊᓂᑕ ᑳᓬᑲᑕ, ᐁᐊᐧᑳᐧᓂᒪ, ᐁ ᐃᑌᐧᕽ, ᐃᑕ ᐁ ᐅᐢᑎᑲᐧᓂᑲᓂᐊᐧᕽ.
[23] ᐁᑯᓯ ᑭ ᐃᐧ ᒥᔦᐊᐧᐠ ᓱᒥᓈᐳ ᐁ ᑭᔨᑲᐃᐧᓂᑳᑌᐠ ᐃᐧᓴᑳᐳ: ᒫᑲ ᓇᒪᐃᐧᔭ ᐅᑎᓇᑦ.
[24] ᐁᑯᓯ ᑭ ᒋᐢᑕᐦᐋᐢᑳᐧᑌᐊᐧᐠ, ᒥᓇ ᑭ ᒫᑎᓇᒫᑐᐊᐧᐠ ᐅ ᑭᑭᐢᑳᒋᑲᓂᔨᐊᐧ, ᐁ ᐊᔭᐢᑖᐧᑐᒋᐠ, ᑖᓂᓯ ᑭᑕ ᐃᓯ ᒐᒉᑊ ᐅᑎᓇᑭᐠ.
[25] ᐁᑲᐧ ᒫᑲ ᑭ ᐅᑎᐦᒋᐸᔨᐤ ᓂᐢᑐ ᑎᐸᐃᑲᐣ, ᐁᑯᓯ ᑭ ᒋᐢᑕᐦᐋᐢᑳᐧᑌᐊᐧᐠ.
[26] ᐊᓂᒪ ᒫᑲ ᐁ ᒪᓯᓇᐃᑳᑌᔨᐠ ᐅᐟ ᐊᑖᒥᒥᑯᐃᐧᐣ ᐃᐢᐱᒥᓯᕽ ᑭ ᒪᓯᓇᐃᑳᑌᔨᐤ, ᒍᐊᐧᐠ ᐅ ᑭᐦᒋ ᐅᑭᒫᒥᐋᐧᐊᐧ.
[27] ᓂᓱ ᒫᑲ ᐅ ᒪᐢᑲᑌᐧᐊᐧ ᑭ ᐊᓯᒋ ᒋᐢᑕᐦᐋᐢᑳᐧᑌᐊᐧᐠ; ᐯᔭᐠ ᐅ ᑭᐦᒋᓂᐢᑭᔨᕽ ᒥᓇ ᑯᑕᑲ ᐅ ᓇᒪᑎᓂᔨᕽ.
[28] ᑭᐦᒋ ᒪᓯᓇᐦᐃᑫᐃᐧᐣ ᒫᑲ ᑭ ᑎᐱᐸᔨᐤ ᑳ ᐃᑌᐧᒪᑲᕽ, ᑭ ᐊᓯᑕᑭᒫᐤ ᐅᐊᐧᓂᑐᑕᒧᐊᐧ.
[29] ᐁᑯᑕ ᒫᑲ ᑳ ᐱᒧᐦᑌᒋᐠ ᑭ ᑭᑳᒣᐊᐧᐠ, ᐁ ᐁᐧᐁᐧᐱᐢᑫᐧᔨᒋᐠ, ᒥᓇ ᐁ ᐃᑌᐧᒋᐠ, ᐦᐋ! ᑭᔭ ᑳ ᓂᓯᐊᐧᓈᒋᑖᔭᐣ ᑭᐦᒋ ᐊᔭᒥᐦᐁᐃᐧᑲᒥᐠ, ᐁᑯᓯ ᒥᓇ ᑳ ᐅᓯᐦᑖᔭᐣ ᓂᐢᑐ ᑭᓯᑳᐤ ᐃᔨᑯᕽ,
[30] ᐱᒫᒋᐦᐃᓱ, ᒥᓇ ᐯ ᓂᓵᑕᐃᐧ ᐱᒥᑖᐢᑯᐃᑲᓂᕽ ᐅᐦᒋ.
[31] ᐁᑯᓯ ᒥᓇ ᑖᐱᐢᑯᐨ ᑭᐦᒋ ᐊᔭᒥᐦᐁᐃᐧᔨᓂᐊᐧᐠ ᐁ ᒣᑕᐋᐧᑲᑖᒋᐠ ᐃᐧᔭᐋᐧᐤ ᐊᓯᒋ ᒪᓯᓇᐦᐃᑫᐃᐧᔨᓂᐊᐧᐠ ᑭ ᐃᑌᐧᐊᐧᐠ, ᑭ ᐱᒫᒋᐦᐁᐤ ᑯᑕᑲ; ᐃᐧᔭ ᓇᒪᐃᐧᔭ ᑭ ᐱᒫᒋᐦᐃᓱ.
[32] ᑭᔮᑦ ᙭, ᐅ ᑭᐦᒋ ᐅᑭᒫᒪ ᐃᐢᕒᐁᐃᓬ, ᐁᑲᐧ ᑭᑕ ᐯ ᓂᓵᑕᐃᐧᐤ ᐱᒥᑕᐢᑯᐃᑲᓂᕽ ᐅᐦᒋ ᑭᑕ ᐋᐧᐸᐦᑕᒪᕽ ᒥᓇ ᑭᑕ ᑖᐯᐧᑕᒪᕽ. ᐊᓂᑭ ᒥᓇ ᑳ ᐊᓯᒋ ᒋᐢᑖᐋᐢᑳᐧᑎᒋᐠ ᑭ ᒫᔨ ᐃᑌᐊᐧᐠ.
[33] ᐃᐢᐱ ᒫᑲ ᓂᑯᑖᐧᓯᐠ ᑎᐸᐃᑲᐣ ᐁᐧᑎᒋᐸᔨᐠ, ᑭ ᐊᐧᓂᑎᐱᐢᑳᐤ ᒥᓯᐁᐧ ᐊᓂᒪ ᐊᐢᑭ ᐱᔨᐢ ᑫᑳᐟ ᒥᑖᑕᐟ ᑎᐸᐃᑲᐣ.
[34] ᐃᐢᐱ ᒫᑲ ᐁᐧᑎᒋᐸᔨᐠ ᑫᑳᐟ ᒥᑖᑕᐟ ᑎᐸᐃᑲᐣ ᒋᓴᐢ ᑭ ᑌᐯᐧᐤ ᐁ ᑭᓯᐁᐧᐟ, ᐃᓬᐋᐩ, ᐃᓬᐋᐩ, ᓬᐋᒪ ᓴᐸᐠᑕᓇᐩ? ᐁᐊᐧᑯ, ᐁ ᐃᑌᐧᐢᑕᒪᐋᐧᑕᒥᕽ, ᓂ ᑭᓭᒪᓂᑐᑦ, ᓂ ᑭᓭᒪᓂᑐᑦ, ᑖᓀᑭ ᑳ ᐁᐧᐱᓂᔭᐣ?
[35] ᐋᑎᐦᐟ ᒫᑲ ᐁᑯᑕ ᐁ ᓂᐸᐃᐧᒋᐠ, ᐃᐢᐱ ᐱᔦᐦᑕᐦᑭᐠ, ᑭ ᐃᑌᐧᐊᐧᐠ, ᒋᐢᐟ, ᐃᓬᐊᐃᒐᐊᐧ ᑌᐹᐧᑌᐤ.
[36] ᐯᔭᐠ ᒫᑲ ᑭ ᐃᐢᐸᑖᐤ, ᐁᑯᓯ ᐁ ᒧᐢᑭᓇᑖᐟ ᐸᑯᑫᐧᐅᐣ ᓯᐃᐧᑳᐳᔨᐤ, ᑭ ᐊᐢᑖᐤ ᐊᓂᐢᑲᐊᐧᐢᑯᕽ, ᐁ ᒥᔮᐟ ᒫᑲ ᑭᑕ ᒥᓂᑫᐧᔨᐟ ᐅᒥᓯ ᐁ ᐃᑌᐧᐟ, ᐁᑳ ᑐᑖᕽ; ᒫᐦᑎ ᐃᓬᐊᐃᒐᐊᐧ ᑫ ᐯ ᓇᑕᐃᐧ ᓂᑎᓂᑯᑫᐧ.
[37] ᒋᓴᐢ ᒫᑲ ᑭ ᑌᐯᐧᐤ ᐁ ᑭᓯᐁᐧᐟ, ᐁᑯᓯ ᑭ ᓯᐯᐧᒑᑫᐧᐤ.
[38] ᐋᑯᐁᑲᐃᑲᐣ ᒫᑲ ᑭᐦᒋ ᐊᔭᒥᐦᐁᐃᐧᑲᒥᑯᕽ ᑭ ᔮᔨᑭᐸᔨᐤ ᐁ ᓂᓱᑖᐸᔨᐠ ᐃᐢᐱᒥᕽ ᐅᐦᒋ ᑕᐸᓯᐢ ᐃᐢᑯ.
[39] ᐃᐢᐱ ᒫᑲ ᐊᓇ ᓯᒫᑲᓂᓯᐃᐧᑭᒫᐤ, ᐁᑯᑕ ᑳ ᓂᐸᐃᐧᐢᑕᐋᐧᐟ, ᐃᔮᐸᑕᕽ ᐁᑯᓯ ᐁ ᐃᓯ ᓯᐯᐧᒑᑫᐧᔨᐟ, ᑭ ᐃᑌᐧᐤ, ᑖᐯᐧ ᐊᐊᐧ ᐊᔨᓯᔨᓂᐤ ᑭ ᑭᓭᒪᓂᑐᐃᐧᑯᓯᓵᓂᐃᐧᐤ.
[40] ᐁᑯᑕ ᒫᑲ ᑭ ᐊᔮᐊᐧᐠ ᒥᓇ ᐃᐢᑫᐧᐊᐧᐠ ᐁ ᑭᑖᐸᒫᒋᐠ ᐋᐧᔭᐤ ᐅᐦᒋ: ᐁᑯᑕ ᑭ ᐃᐧᒋᐃᐁᐧᐊᐧᐠ ᑖᐱᐢᑯᐨ ᒣᕒᐃ ᒫᐠᑕᓬᐃᐣ, ᒥᓇ ᒣᕒᐃ ᐅᑳᐃᐧᔭ ᒉᒥᐢ ᓄᑕᐤ ᑳ ᐃᐢᐱᑎᓯᐟ ᒥᓇ ᒍᓯᐢ, ᒥᓇ ᓴᓬᐅᒥ;
[41] ᐁᐊᐧᑲᐧᓂᐠ, ᒣᑳᐧᐨ ᐁ ᐊᔮᔨᐟ ᑳᓬᐊᓬᐃᕽ, ᑳ ᑭ ᐱᒥᑎᓴᐋᐧᒋᐠ, ᒥᓇ ᑳ ᑭ ᐸᒥᐦᐋᒋᐠ; ᒥᐦᒉᐟ ᒫᑲ ᑯᑕᑲ ᐃᐢᑫᐧᐊᐧ ᑳ ᑭ ᐯ ᐃᐧᒉᐃᐧᑯᐟ ᒉᕒᐅᓴᓬᐊᒥᕽ ᐃᓯ.
[42] ᐃᐢᐱ ᒫᑲ ᐁᑲᐧ ᐁ ᐅᑖᑯᓯᐠ, ᒋᑫᒫ ᐁᐊᐧᑯ ᐊᐧᐁᐧᔨᐃᐧᐣ, ᐁᐊᐧᑳᐧᓂᒪ ᑭᓯᑳᐤ ᒪᐧᔦᐢ ᐊᔭᒥᐦᐁᑭᓯᑳᐠ,
[43] ᑭ ᐯ ᐃᑐᐦᑌᐤ ᒍᓯᑊ ᐊᕒᐃᒪᑎᔭ ᐅᐦᒋ, ᐅᔭᓱᐁᐧᐃᐧᔨᓂᐤ ᐁ ᑭᐢᑌᔨᑖᑯᓯᐟ, ᐃᐧᔭ ᒥᓇ ᐁ ᐊᓴᐋᐧᐸᐦᑕᕽ ᑭᓭᒪᓂᑐ ᐅᐟ ᐅᑌᓇᐃᐧᐃᐧᐣ; ᐁᑯᓯ ᐁᑳ ᐁ ᓇᑭᐟ ᐱᑐᑲᐁᐧᐤ ᐸᐃᓬᐊᑕ, ᒥᓇ ᓇᑐᑕᒪᐁᐧᐤ ᒋᓴᓴ ᐃᐧᔭᐃᐧᔨᐤ.
[44] ᐸᐃᓬᐊᐟ ᒫᑲ ᒫᑖᐧᓂ ᒋ ᓵᓴᐧ ᓂᐱᐤ ᐃᑌᔨᑕᑦ: ᐁᑯᓯ ᐁ ᓇᑐᒫᐟ ᓯᒫᑲᓂᓯᐃᐧᑭᒫᐊᐧ ᑭ ᑲᑫᐧᒋᒣᐤ ᑭᐢᐱᐣ ᓵᓴᐩ ᑭᓀᐧᓯᐢ ᑳ ᓂᐱᔨᑫᐧ.
[45] ᐃᐢᐱ ᒫᑲ ᑳ ᑭᐢᑫᔨᑕᒧᐃᑯᐟ ᓯᒫᑲᓂᓯᐃᐧᑭᒫᐊᐧ, ᑭ ᐸᑭᑎᓇᒪᐁᐧᐤ.
[46] ᐃᐧᔭ ᒫᑲ ᑭ ᐊᑖᐁᐧᐤ ᐋᐧᐱᐢᑭ ᐸᐸᑭᐊᐧᔮᓀᑭᐣ, ᐁᑯᓯ ᐁ ᓂᑎᓈᐟ ᑭ ᐁᐧᐁᐧᑭᓀᐤ ᐋᐧᐱᐢᑭ ᐸᐸᑭᐊᐧᔮᓀᑭᓄᕽ, ᒥᓇ ᑭ ᐱᒥᓯᒣᐤ ᓇᐦᐃᓂᑐᐃᐧᑲᒥᑯᕽ ᑭᐢᑖᐱᐢᑳᕽ ᐁ ᑭ ᐃᐧᐱᑲᐃᑳᑌᐠ; ᑭ ᐃᓯ ᑎᑎᐱᓀᐤ ᒫᑲ ᐊᓯᓂᔭ ᐁ ᐃᐢᑳᐧᑌᒥᐊᐧᕽ ᓇᐦᐃᓂᑐᐃᐧᑲᒥᐠ.
[47] ᒣᕒᐃ ᒫᐠᑕᓬᐃᐣ ᒫᑲ ᒥᓇ ᒣᕒᐃ ᐅᑳᐃᐧᔭ ᒍᓯᐢ ᑭ ᐋᐧᐸᐦᑕᒪᐧᐠ ᐃᑕ ᐁ ᐱᒥᓯᒥᒥᐦᐟ.