[1] ᐁᑯᑕ ᒫᑲ ᑭ ᐅᐦᒋ ᓯᐯᐧᑌᐤ, ᐁᑯᓯ ᑭ ᐅᑎᑕᑦ ᐁ ᐋᐧᓴᑳᒥᐊᐧᕽ ᒍᑎᔭ ᒥᓇ ᐊᑳᒥᕽ ᒑᕒᑕᐣ: ᒥᐦᒉᐟ ᒫᑲ ᐊᔨᓯᔨᓂᐊᐧ ᑳᐃᐧ ᒥᓇ ᒫᒪᐃᐧ ᑭ ᐅᑎᐦᑎᐠ; ᐁᑯᓯ, ᐁ ᐃᓯ ᓀᑳᒥ ᐃᑐᑕᕽ, ᑭ ᑭᐢᑭᓄᐦᐊᒫᐁᐧᐤ ᒥᓇ.
[2] ᑭ ᐯ ᐅᑎᐦᑎᐠ ᒫᑲ ᐹᕒᐊᓯᔭ, ᐁᑯᓯ ᑭ ᑲᑫᐧᒋᒥᐠ, ᐃᑕᐢᑌᐤ ᒋ ᐅᔭᓱᐁᐧᐃᐧᐣ ᐊᔨᓯᔨᓂᐤ ᑭᑕ ᐁᐧᐱᓈᐟ ᐃᐧᐊᐧ? ᐁ ᑲᑫᐧᒋᐦᐃᑯᐟ.
[3] ᑭ ᓇᐢᑫᐧᐊᐧᓯᒣᐤ ᒫᑲ ᒥᓇ ᑭ ᐃᑌᐤ, ᑖᓂᓯ ᒧᓯᐢ ᑳ ᐃᑕᓱᐋᐧᑎᑯᔦᐠ?
[4] ᑭ ᐃᑌᐧᐊᐧᐠ ᒫᑲ, ᒧᓯᐢ ᑭ ᐃᔨᓇᒫᑫᐤ ᑭᑕ ᒪᓯᓇᐃᑳᑌᐠ ᐁᐧᐱᓂᑐᐃᐧ ᒪᓯᓇᐦᐃᑲᐣ, ᐁᑯᓯ ᑭᑕ ᐁᐧᐱᓂᐦᐟ.
[5] ᒋᓴᐢ ᒫᑲ ᑭ ᐃᑌᐤ, ᑭ ᒪᐢᑲᐃᐧᑌᐁᐃᐧᓂᐋᐧᐤ ᐅᐦᒋ ᑳ ᑭ ᒪᓯᓇᐦᐊᒫᑯᔦᐠ ᐅᒪ ᐅᔭᓱᐁᐧᐃᐧᐣ.
[6] ᒫᑲ ᒥᒋᒫᐨ ᐁ ᐅᓯᐃᐁᐧᕽ ᓈᐯᐊᔭ ᒥᓇ ᓄᓭᐊᔭ ᑭ ᐃᓯ ᐅᓯᐁᐤ.
[7] ᐁᐊᐧᑯ ᐅᒪ ᐅᐦᒋ ᓈᐯᐤ ᑭᑕ ᓇᑲᑌᐤ ᐅᑖᐃᐧᔭ ᒥᓇ ᐅᑳᐃᐧᔭ ᐁᑯᓯ ᑭᑕ ᐃᐧᒉᐋᐧᐟ ᐃᐧᐊᐧ;
[8] ᐁᑯᓯ ᐁ ᓂᓯᒋᐠ ᑭᑕ ᐯᔭᑯ ᐃᐧᔮᓭᐊᐧᐠ: ᐁᑲᐧ ᓇᒪᐃᐧᔭ ᓂᓯᐊᐧᐠ, ᒫᑲ ᐯᔭᐠ ᐃᐧᔮᐢ.
[9] ᐊᓂᒪ ᒫᑲ ᑭᓭᒪᓂᑐ ᑳ ᑭ ᒫᒪᐃᐧᑖᐟ ᐁᑳᐃᐧᔭ ᐊᔨᓯᔨᓂᐤ ᑭᑕ ᓇᓈᓂᐢᒋᑖᐤ.
[10] ᐁᑯᓯ ᐋᐧᐢᑳᐦᐃᑲᓂᕽ ᒥᓇ ᑭᐢᑭᓄᐦᐊᒪᐋᐧᑲᓇᐠ ᑭ ᑲᑫᐧᒋᒣᐊᐧᐠ ᐁᐊᐧᑫᐧᔨᐤ ᐅᐦᒋ.
[11] ᐅᒥᓯ ᒫᑲ ᐃᑌᐤ, ᐊᐃᐧᔭᐠ ᐁᐧᐱᓈᒋ ᐃᐧᐊᐧ, ᐁᑯᓯ ᑯᑕᑲ ᐃᐧᑭᒫᒋ, ᐱᓯᑳᐧᒋᑐᑕᐁᐧᐤ:
[12] ᑭᐢᐱᐣ ᒫᑲ ᐃᐢᑫᐧᐤ ᐁᐧᐱᓈᒋ ᐅᓈᐯᒪ, ᒥᓇ ᑯᑕᑲ ᐃᐧᑭᒫᒋ, ᐃᑐᑕᑦ ᐱᓯᑳᐧᑎᓯᐃᐧᐣ.
[13] ᑭ ᐯᑐᐁᐧᐊᐧᐠ ᒫᑲ ᐊᐱᐢᑕᐋᐧᓯᓴ ᑭᑕ ᓴᓵᒥᓈᐟ: ᐁᑯᓯ ᐅ ᑭᐢᑭᓄᐦᐊᒪᐋᐧᑲᓇ ᑭ ᑭᑐᑌᔨᐊᐧ ᐊᓂᐦᐃ ᑳ ᐯᓯᐋᐧᔨᐟ.
[14] ᒫᑲ ᐃᐢᐱ ᒋᓴᐢ ᐃᐧᐋᐸᑕᕽ ᒥᐢᑕᐦᐃ ᑭ ᓇᔦᑖᐁᐧᔨᑕᑦ, ᐁᑯᓯ ᑭ ᐃᑌᐤ, ᐃᔨᓇᒫᑯᐠ ᐊᐱᐢᑕᐋᐧᓯᓴᐠ ᑭᑕ ᐯ ᓈᓯᒋᐠ; ᐁᑳᐃᐧᔭ ᑭᑕᐊᒫᑯᐠ: ᒋᑫᒫ ᐁᑯᑐᐊᐧ ᑭᓭᒪᓂᑐ ᐅᐟ ᐅᑌᓇᐃᐧᐃᐧᓂᕽ ᑳ ᐊᔮᒋᐠ.
[15] ᑖᐯᐧ ᑭᐟ ᐃᑎᓈᐋᐧᐤ, ᐊᐃᐧᔭᐠ ᐁᑳ ᐅᑎᓇᑭ ᑭᓭᒪᓂᑐ ᐅᐟ ᐅᑌᓇᐃᐧᐃᐧᐣ ᑖᐱᐢᑯᐨ ᐊᐱᐢᑕᐋᐧᓯᐢ, ᓇᒪᐃᐧᔭ ᓈᐣᑕᐤ ᐃᓯ ᐁᑯᑌ ᑭᑕ ᐱᐦᑐᑫᐤ.
[16] ᑭ ᐅᑎᓀᐤ ᒫᑲ ᐁ ᑕᐦᑯᓈᐟ, ᒥᓇ ᑭ ᓴᐁᐧᔨᒣᐤ ᐁ ᓴᓵᒥᓈᐟ.
[17] ᐃᐢᐱ ᒫᑲ ᑳ ᐊᑎ ᓯᐯᐧᑌᐟ ᐊᓂᑕ ᒣᐢᑲᓈᕽ, ᐁᑯᑕ ᐯᔭᐠ ᑭ ᐯ ᐃᐢᐸᑖᐤ, ᒥᓇ ᐁ ᐅᒋᐦᒋᐦᑲᐧᓇᐱᐢᑖᑯᐟ, ᐁᑯᓯ ᐁ ᑲᑫᐧᒋᒥᑯᐟ, ᑳ ᒥᔮᐧᑎᓯᔭᐣ ᐅᑭᐢᑭᓄᐦᐊᒫᑫᐤ, ᑫᑲᐧᐩ ᑫ ᑐᑕᒫᐣ ᑭᑕ ᐊᔮᔮᐣ ᑳᑭᑫ ᐱᒫᑎᓯᐃᐧᐣ?
[18] ᒋᓴᐢ ᒫᑲ ᐃᑌᐤ, ᑖᓀᑭ ᑳ ᒥᔮᐧᑎᓯᔭᐣ ᑳ ᐃᓯᔭᐣ? ᓇᒪᐃᐧᔭ ᐊᐃᐧᔭᐠ ᒥᔮᐧᑎᓯᐤ, ᐱᑯ ᐯᔭᐠ, ᐁᐊᐧᑯ ᑭᓭᒪᓂᑐ.
[19] ᑭ ᑭᐢᑫᔨᑌᐣ ᐅᔭᓱᐁᐧᐃᐧᓇ, ᐁᑳᐃᐧᔭ ᓂᐸᑖᑫ, ᐁᑳᐃᐧᔭ ᐱᓯᑳᐧᑎᓯ, ᐁᑳᐃᐧᔭ ᑭᒧᑎ, ᐁᑳᐃᐧᔭ ᑭᔮᐢᑭᐋᐧᒋᒧ, ᑭᐢᑌᔨᑦ ᑯᑖᐃᐧ ᒥᓇ ᑭᑳᐃᐧ.
[20] ᑭ ᐃᑎᐠ ᒫᑲ, ᑫᐢᑭᓄᐦᐊᒫᑫᔭᐣ, ᑲᐦᑭᔭᐤ ᐅᐦᐃ ᐁ ᐅᐢᑭᓂᑭᔮᐣ ᐅᐦᒋ ᓂ ᑭ ᐯ ᓈᑲᑕᐁᐧᔨᑌᐣ.
[21] ᐁᑯᓯ ᒋᓴᐢ ᐁ ᑲᓇᐋᐧᐸᒫᐟ, ᓵᑭᐦᐁᐤ, ᐅᒥᓯ ᒫᑲ ᑭ ᐃᑌᐤ, ᐯᔭᐠ ᑫᑲᐧᐩ ᑭ ᑭᐧᑕᒫᐣ: ᓂᔮ, ᐊᑖᐋᐧᑫ ᑲᐦᑭᔭᐤ ᑫᑲᐧᐩ ᑳ ᐊᔮᔭᐣ, ᐁᑯᓯ ᒥᔨᐠ ᐅᑭᑎᒫᑭᓯᐊᐧᐠ, ᑭ ᑲ ᐊᔮᐣ ᒫᑲ ᐁᐧᔪᑎᓯᐃᐧᐣ ᑭᐦᒋ ᑭᓯᑯᕽ: ᐯ ᐱᒥᑎᓴᐦᐅᐣ ᒫᑲ.
[22] ᓇᒪᐃᐧᔭ ᒫᑲ ᓇᐁᔨᑕᒥᓈᑯᓯᐤ ᐊᓂᒪ ᐁ ᐃᑌᐧᔨᐟ, ᐁᑯᓯ ᑭ ᓯᐯᐧᑌᐤ ᐁ ᒥᒋᔭᐁᐧᓯᐟ; ᒋᑫᒫ ᐃᐧᔭ ᐁᑯᑐᐊᐧ ᒥᐢᑕᐦᐃ ᑫᑲᐧᐩ ᑳ ᑎᐱᔭᐁᐧᐃᐧᓯᐟ.
[23] ᐁᑯᓯ ᒋᓴᐢ ᑭ ᐋᐧᓴᑳᒣᐃᑖᐱᐤ, ᐅᒥᓯ ᒫᑲ ᐁ ᐃᑖᐟ ᐅ ᑭᐢᑭᓄᐦᐊᒪᐋᐧᑲᓇ, ᑖᐯᐧ ᐊᑳᐋᐧᐨ ᐊᓂᑭ ᑳ ᐁᐧᔪᑎᓯᒋᐠ ᑭᑕ ᐱᐦᑐᑫᐊᐧᐠ ᑭᓭᒪᓂᑐ ᐅᐟ ᐅᑌᓇᐃᐧᐃᐧᓂᕽ!
[24] ᐁᑯᓯ ᑭᐢᑭᓄᐦᐊᒪᐋᐧᑲᓇᐠ ᑭ ᒫᒪᐢᑳᑕᒣᐧᐊᐧᐠ ᐅᐟ ᐃᑌᐧᐃᐧᓂᔨᐊᐧ. ᒫᑲ ᒋᓴᐢ ᑭ ᓇᐢᑫᐧᐊᐧᓯᒣᐤ ᒥᓇ, ᐁᑯᓯ ᐅᒥᓯ ᑭ ᐃᑌᐤ, ᐊᐋᐧᓯᓯᑎᐠ ᑖᓂᔨᑯᕽ ᐋᔨᒪᓂᔨᐤ ᐊᓂᑭ ᑳ ᒪᒥᓯᑐᑕᑭᐠ ᐁᐧᔪᑎᓯᐃᐧᓇ ᑭᑕ ᐱᐦᑐᑫᒋᐠ ᑭᓭᒪᓂᑐ ᐅᐟ ᐅᑌᓇᐃᐧᐃᐧᓂᕽ!
[25] ᓇᐊᐧᐨ ᐁᐧᑕᓂᔨᐤ ᐱᐢᑳᐧᐃᐧᑲᓀᐃᐧᐱᓯᐢᑭᐤ ᑭᑕ ᓵᐳᐢᑲᕽ ᐁ ᐸᑯᓀᔮᐱᐢᑳᔨᐠ ᓵᐳᓂᑲᓂᔨᐤ, ᐃᐢᐱᐨ ᐁᐧᔪᑎᓯᐃᐧᔨᓂᐤ ᑭᑕ ᐱᐦᑐᑫᐟ ᑭᓭᒪᓂᑐ ᐅᐟ ᐅᑌᓇᐃᐧᐃᐧᓂᕽ.
[26] ᐁᑯᓯ ᒫᑲ ᒥᐢᑕᐦᐃ ᑭ ᒫᒪᐢᑳᑕᒪᐧᐠ, ᐁ ᐃᑖᒋᐠ, ᐊᐃᐧᓇ ᒫᑲ ᑫ ᑭ ᐱᒫᒋᐦᐅᐟ?
[27] ᒋᓴᐢ ᒫᑲ ᐁ ᑲᓇᐋᐧᐸᒫᐟ ᐃᑌᐤ, ᐊᔨᓯᔨᓂᐊᐧᐠ ᐃᐧᔭ ᓇᒪᐃᐧᔭ ᑭᑕ ᑭ ᑲᐢᑭᑖᒋᐠ, ᒫᑲ ᓇᒪᐃᐧᔭ ᐁᑯᓯ ᐃᓯ ᐃᐧᔭ ᑭᓭᒪᓂᑐ: ᒋᑫᒫ ᑲᐦᑭᔭᐤ ᑫᑲᐧᐩ ᑲᐢᑭᑖᐤ ᐃᐧᔭ ᑭᓭᒪᓂᑐ.
[28] ᐱᑕᕒ ᒫᑲ ᑭ ᒫᒋ ᐊᔨᑌᐤ, ᒋᐢᐟ, ᓂᔭᓈᐣ ᐃᐧᔭ ᑲᐦᑭᔭᐤ ᑫᑲᐧᐩ ᓂ ᑭ ᓇᑲᑎᓈᐣ, ᐁᑯᓯ ᐁ ᑭ ᐱᒥᑎᓴᐅᑖᕽ.
[29] ᒋᓴᐢ ᑭ ᐃᑌᐤ, ᓇᒪᐃᐧᔭ ᐊᐃᐧᔭᐠ ᐊᔨᓯᔨᓂᐤ ᐃᑖᐤ, ᑳ ᑭ ᓇᑲᑕᕽ ᐃᐧᑭ, ᐊᐦᐳ ᐅᒋᐋᐧᒪ, ᐊᐦᐳ ᐅᑕᐁᐧᒫᐊᐧ, ᐊᐦᐳ ᐅᑳᐃᐧᔭ, ᐊᐦᐳ ᐅᑖᐃᐧᔭ, ᐊᐦᐳ ᐅᐟ ᐊᐋᐧᓯᒥᓴ, ᐊᐦᐳ ᐊᐢᑭ, ᓂᔭ ᐅᐦᒋ, ᒥᓇ ᒥᔪ ᐊᒋᒧᐃᐧᐣ ᐅᐦᒋ,
[30] ᐁᑳ ᑫ ᒥᔨᐦᐟ ᒥᑖᑕᐦᑐᒥᑕᓇᐤ ᑕᐦᑖᐧᐤ ᐃᔨᑯᕽ ᐊᓄᐦᐨ ᐅᒪ ᒣᑳᐧᐨ, ᐋᐧᐢᑳᐦᐃᑲᓇ, ᒥᓇ ᐅᒋᐋᐧᒪ, ᒥᓇ ᐅᑕᐁᐧᒫᐊᐧ, ᒥᓇ ᐅᑳᐃᐧᔭ, ᒥᓇ ᐅᐟ ᐊᐋᐧᓯᒥᓴ, ᑭᑭ ᐋᔨᒥᓯᐃᐧᓇ; ᐁᑯᓯ ᐊᐢᑭᕽ ᓂᑳᐣ ᑳ ᐊᔮᐠ ᑳᑭᑫ ᐱᒫᑎᓯᐃᐧᐣ.
[31] ᒫᑲ ᒥᐦᒉᐟ ᑳ ᓂᑳᓂᒋᐠ ᐅᑖᕽ ᑭᑕ ᐊᔮᐊᐧᐠ; ᒥᓇ ᐅᑖᕽ ᑳ ᐊᔮᒋᐠ ᑭᑕ ᓂᑳᓂᐊᐧᐠ.
[32] ᒣᐢᑲᓈᕽ ᒫᑲ ᑭ ᐊᔮᐊᐧᐠ ᒉᕒᐅᓴᓬᐊᒥᕽ ᐁ ᐊᑎ ᐃᑐᐦᑌᒋᐠ. ᒋᓴᐢ ᒫᑲ ᑭ ᐊᑎ ᓂᑳᓄᑕᐁᐧᐤ: ᑭ ᒫᒪᐢᑳᑕᒪᐧᐠ ᒫᑲ; ᐊᓂᑭ ᒫᑲ ᑳ ᐱᒥᑎᓴᐃᑫᒋᐠ ᑭ ᓭᑭᓯᐊᐧᐠ. ᒥᓇ ᒫᑲ ᑭ ᐅᑎᓀᐤ ᐊᓂᐦᐃ ᒥᑖᑕᐟ ᓂᓱᓵᑊ ᑳ ᐃᐦᑕᓯᔨᐟ, ᐁᑯᓯ ᑭ ᒫᒋ ᐃᐧᐦᑕᒪᐁᐧᐤ ᐊᓂᐦᐃ ᑫ ᐊᑎ ᐊᔨᐢᐸᔨᐃᑯᐟ, ᐁ ᐃᑌᐧᐟ,
[33] ᒫᑎᑲ, ᑭᐟ ᐃᑐᑖᓈᓇᐤ ᒉᕒᐅᓴᓬᐊᒥᕽ; ᐁᑯᓯ ᐃᔨᓂᐃᐧᑯᓯᓵᐣ ᑭᑕ ᐸᑭᑎᓇᐤ ᑭᑕ ᐅᑎᓂᑯᐟ ᑭᐦᒋ ᐊᔭᒥᐦᐁᐃᐧᔨᓂᐊᐧ ᒥᓇ ᒪᓯᓇᐦᐃᑫᐃᐧᔨᓂᐊᐧ; ᑭᑕ ᐅᔭᓱᐋᐧᑌᐊᐧᐠ ᒫᑲ ᑭᑕ ᓂᐸᐦᐋᒋᐠ, ᐁᑯᓯ ᑭᑕ ᐸᑭᑎᓇᒪᐁᐧᐊᐧᐠ ᒉᐣᑕᐃᓬᐊ:
[34] ᑭᑕ ᒣᑕᐋᐧᑳᑎᐠ ᒫᑲ, ᒥᓇ ᑭᑕ ᓴᓯᑳᐧᑎᐠ, ᒥᓇ ᑭᑕ ᐸᐸᓴᐢᑌᐅᐠ, ᒥᓇ ᑭᑕ ᓂᐸᐦᐃᐠ; ᒫᑲ ᑭ ᓂᐢᑐ ᑭᓯᑳᔨᑭ ᒥᓇ ᑭᑕ ᐊᐧᓂᐢᑳᐤ.
[35] ᐁᑲᐧ ᒫᑲ ᑭᓯᐊᐧᐠ ᑭ ᐯ ᓈᑎᐠ ᒉᒥᐢ ᒥᓇ ᒑᐣ, ᐅᑯᓯᓴ ᓭᐱᑎ, ᐁ ᐃᑎᑯᐟ, ᑫᐢᑭᓄᐦᐊᒫᑫᔭᐣ, ᑭ ᐸᑯᓭᔨᒥᑎᓈᐣ ᑭᑕ ᑐᑕᒪᐃᐧᔮᕽ ᑫᑲᐧᐩ ᑳ ᐃᓯ ᐸᑯᓭᔨᒧᔮᕽ.
[36] ᐅᒥᓯ ᒫᑲ ᑭ ᐃᑌᐤ, ᑫᑲᐧᐩ ᓀᑕᐁᐧᔨᑕᒣᐠ ᑭᑕ ᑐᑕᒫᑕᑯᐠ?
[37] ᐁᑯᓯ ᑭ ᐃᑌᐊᐧᐠ, ᒥᔨᓈᐣ ᑭᑕ ᐊᐱᔮᕽ ᐯᔭᐠ ᑭ ᑭᐦᒋᓂᐢᑭᕽ, ᐯᔭᐠ ᒥᓇ ᑭ ᓇᒪᑎᓂᕽ, ᑭ ᑭᐢᑌᔨᑖᑯᓯᐃᐧᓂᕽ.
[38] ᒋᓴᐢ ᒫᑲ ᑭ ᐃᑌᐤ, ᓇᒪᐃᐧᔭ ᑭ ᑭᐢᑫᔨᑌᓈᐋᐧᐤ ᑫᑲᐧᐩ ᑲ ᓇᑐᑕᒣᐠ. ᑭ ᑲ ᑲᐢᑭᑖᓈᐋᐧᐤ ᒋ ᑭᑕ ᒥᓂᑫᐧᔦᐠ ᒥᓂᑳᐧᑲᐣ ᑳ ᐅᐦᒋ ᒥᓂᑫᐧᔮᐣ, ᒥᓇ ᑭᑕ ᐹᑊᑕᐃᓯᐃᐧᐃᑲᐃᐧᔦᐠ ᐊᓂᒪ ᐹᑊᑕᐃᓯᐃᐧᐃᐧᐣ ᓂᔭ ᑳ ᐅᐦᒋ ᐹᑊᑕᐃᓯᐃᐧᐃᑲᐃᐧᔮᐣ?
[39] ᐁᑯᓯ ᑭ ᐃᑌᐊᐧᐠ ᓂ ᑲ ᑲᐢᑭᑖᓈᐣ. ᒋᓴᐢ ᒫᑲ ᑭ ᐃᑌᐤ, ᒥᓂᑳᐧᑲᐣ ᑳ ᐅᐦᒋ ᒥᓂᑫᐧᔮᐣ ᑭ ᑲ ᒥᓂᑳᐧᓈᐋᐧᐤ ᑖᐯᐧ; ᒥᓇ ᐹᑊᑕᐃᓯᐃᐧᐃᐧᐣ ᑳ ᐅᐦᒋ ᐹᑊᑕᐃᓯᐃᐧᐃᑲᐃᐧᔮᐣ ᑭ ᑲ ᐹᑊᑕᐃᓯᐃᐧᐃᑲᐃᐧᓈᐋᐧᐤ;
[40] ᒫᑲ ᑭᑕ ᐊᐱᔦᐠ ᓂ ᑭᐦᒋᓂᐢᑭᕽ ᐊᐦᐳ ᓂ ᓇᒪᑎᓂᕽ ᓇᒪᐃᐧᔭ ᓂᔭ ᓂᐟ ᐊᔮᐣ ᑭᑕ ᒣᑭᔮᐣ: ᒫᑲ ᑭᑕ ᒥᔮᐊᐧᐠ ᐊᓂᑭ ᑳ ᑭ ᐊᐧᐁᐧᔨᑕᒫᒋᐠ.
[41] ᐃᐢᐱ ᒫᑲ ᐊᓂᑭ ᒥᑖᑕᐟ ᐱᔦᐦᑕᐦᑭᐠ ᑭ ᐃᐧ ᓇᔦᑖᐁᐧᔨᒣᐊᐧᐠ ᒉᒥᓴ ᒥᓇ ᒑᓇ.
[42] ᒋᓴᐢ ᒫᑲ ᑭ ᓇᑐᒣᐤ ᐃᑕ ᐁ ᐊᔮᐟ, ᐁᑯᓯ ᐃᑌᐤ, ᑭ ᑭᐢᑫᔨᑌᓈᐋᐧᐤ ᐊᓂᑭ ᑳ ᐃᑕᑭᒥᐦᒋᐠ ᑭᑕ ᑎᐯᔨᒫᒋᐠ ᒉᐣᑕᐃᓬᐊ ᐅᑭᒫᐁᐧᔨᒥᓱᐊᐠ; ᐁᑯᓯ ᐅ ᑭᐦᒋᔨᓂᒥᐋᐧᐊᐧ ᐋᐧᐅᔭᓱᐋᐧᑎᑲᐧᐠ.
[43] ᒫᑲ ᑭᔭᐋᐧᐤ ᓇᒪᐃᐧᔭ ᐁᑯᓯ ᑭᐟ ᐃᓯ ᐊᔮᓈᐋᐧᐤ; ᒫᑲ ᑖᓈᓇ ᐁ ᐃᐧ ᑭᐦᒑᔨᐃᐧᐟ ᐅᒪ ᑳ ᐃᑕᓯᔦᐠ, ᑭ ᑲ ᐅᐸᒥᐢᑖᑲᓂᓈᐋᐧᐤ:
[44] ᒥᓇ ᐊᐃᐧᔭᐠ ᐃᐧ ᓂᑳᓇᑭᒋᑳᓱᒋ ᐅᒪ ᑳ ᐃᑕᓯᔦᐠ ᑭᑕ ᒫᒪᐃᐧ ᐊᑐᐢᑫᔮᑲᓂᐃᐧᐤ.
[45] ᒋᑫᒫ ᑖᐯᐧ ᐃᔨᓂᐃᐧᑯᓯᓵᐣ ᑭ ᐯ ᐃᑐᐦᑌᐤ ᓇᒪᐃᐧᔭ ᑭᑕ ᐸᒥᐦᐃᐦᐟ ᒫᑲ ᑭᑕ ᐸᒥᐦᐃᐁᐧᐟ, ᒥᓇ ᑭᑕ ᒣᑭᐟ ᐅ ᐱᒫᑎᓯᐃᐧᐣ ᒥᐦᒉᐟ ᑭᑕ ᐅᐦᒋ ᐱᒫᑎᓯᔨᐟ.
[46] ᑭ ᑕᑯᓯᓇᐧᐠ ᒫᑲ ᒉᕒᐃᑯᐃᕽ: ᐁᑯᓯ ᐁ ᐊᑎ ᐊᐧᔭᐃᐧᐟ ᒉᕒᐃᑯᐃᕽ ᐅᐦᒋ, ᐁ ᐃᐧᒉᐃᐧᑯᐟ ᐅ ᑭᐢᑭᓄᐦᐊᒪᐋᐧᑲᓇ ᒥᓇ ᒥᐦᒉᐟ ᐊᔨᓯᔨᓂᐊᐧ, ᐹᕒᑎᒥᐊᐢ, ᐅᑯᓯᓴ ᑕᐃᒥᐊᐢ, ᐁᑳ ᐁ ᐋᐧᐱᐟ ᐅᐸᑯᓯᑖᐧᐤ, ᑭ ᐊᐱᐤ ᐅᐱᒣᐢᑲᓈᕽ.
[47] ᐃᐢᐱ ᒫᑲ ᐱᔦᐦᑕᕽ ᐁᐊᐧᑲᐧᓂ ᒋᓴᓴ ᓈᓴᕒᐁᑎᕽ ᑳ ᐅᐦᒋᔨᐟ, ᑭ ᑌᐯᐧᐤ, ᐁ ᐃᑌᐧᐟ, ᒋᓴᐢ, ᑭᔭ ᑌᐱᐟ ᐅᑯᓯᓴ ᑭᑎᒫᑭᓇᐃᐧᐣ.
[48] ᒥᐦᒉᐟ ᒫᑲ ᑭ ᑭᑐᑌᐊᐧᐠ, ᑭᑕ ᑭᐱᑐᐁᐧᔨᐟ: ᒫᑲ ᐊᐦᒋ ᐱᑯ ᐊᐊᐧᓯᒣ ᑭ ᑌᐯᐧᐤ, ᑭᔭ ᑌᐱᐟ ᐅ ᑯᓯᓴ ᑭᑎᒫᑭᓇᐃᐧᐣ.
[49] ᒋᓴᐢ ᒫᑲ ᑭ ᑭᐱᒋᑳᐸᐃᐧᐤ, ᐁᑯᓯ ᐁ ᑭ ᐃᑌᐧᐟ, ᓇᑐᒥᕽ. ᐁᑲᐧ ᑖᐯᐧ ᑭ ᓇᑐᒣᐊᐧᐠ ᐁᑳ ᑳ ᐋᐧᐱᔨᐟ ᓈᐯᐊᐧ, ᐁ ᐃᑖᒋᐠ, ᒥᔦᐧᔨᑕ; ᐸᓯᑯ, ᑭ ᓇᑐᒥᐠ.
[50] ᐁᑯᓯ ᒫᑲ ᐃᐧᔭ ᐁ ᐁᐧᐱᓇᕽ ᐅᐢᑯᑖᑲᐩ, ᑭ ᐸᓯᑯᓯᐸᑖᐤ, ᒥᓇ ᑭ ᐯ ᓈᑌᐤ ᒋᓴᓴ.
[51] ᒋᓴᐢ ᒫᑲ ᑭ ᓇᐢᑫᐧᐊᐧᓯᒣᐤ ᐅᒥᓯ ᐁ ᑭ ᐃᑖᐟ, ᑫᑲᐧᐩ ᓀᑕᐁᐧᔨᑕᒪᐣ ᑭᑕ ᑐᑖᑖᐣ? ᐁᑯᓯ ᐊᓇ ᐁᑳ ᑳ ᐋᐧᐱᐟ ᓈᐯᐤ ᑭ ᐃᑌᐤ, ᕒᐋᐳᓇᐩ, ᑭᑕ ᑭ ᐋᐧᐱᔮᐣ.
[52] ᒋᓴᐢ ᒫᑲ ᑭ ᐃᑌᐤ, ᓯᐯᐧᐦᑌ; ᑭ ᑖᐯᐧᑕᒧᐃᐧᐣ ᑭ ᑭ ᒥᓈᐧᒋᐃᑯᐣ. ᓭᒫᐠ ᒫᑲ ᑭ ᐋᐧᐱᐤ ᐁᑯᓯ ᑭ ᐊᑎ ᐱᒥᑎᓴᐁᐧᐤ ᒋᓴᓴ ᒣᐢᑲᓇᕽ.