[1] ᐁᑯᐢᐱ ᒫᑲ ᑭ ᒫᒪᐃᐧ ᓈᑎᐠ ᐹᕒᐊᓯᐊᐧ, ᒥᓇ ᐋᑎᐦᐟ ᒪᓯᓇᐦᐃᑫᐃᐧᔨᓂᐊᐧ, ᒉᕒᐅᓴᓬᐊᒥᕽ ᐁ ᑭ ᐯ ᐅᑐᑌᔨᐟ,
[2] ᐁ ᑭ ᐋᐧᐸᒫᔨᐟ ᒫᑲ ᐋᑎᐦᐟ ᐅ ᑭᐢᑭᓄᐦᐊᒪᐋᐧᑲᓇ ᐁ ᒧᐋᐧᔨᐟ ᐅ ᐸᑫᐧᓯᑲᓂᒥᐋᐧᐊᐧ ᐁᑳ ᐁ ᐯᑭᒋᐦᒉᔨᐟ, ᐁᑳᐧᓂᒪ, ᐁᑳ ᐁ ᑳᓯᒋᐦᒉᔨᐟ.
[3] ᒋᑫᒫ ᐹᕒᐊᓯᐊᐧᐠ, ᒥᓇ ᑲᐦᑭᔭᐤ ᒍᐊᐧᐠ ᑭᐢᐱᐣ ᐁᑳ ᐁ ᐋᑲᒥ ᑳᓯᒋᐦᒉᒋᐠ ᓇᒪᐃᐧᔭ ᒥᒋᓱᐊᐧᐠ, ᐁ ᒥᒋᒥᓇᒫᐧᒋᐠ ᐅᐟ ᐊᒋᒧᐃᐧᓂᔨᐤ ᑳ ᓂᑳᓀᔨᑖᑯᓯᔨᐟ:
[4] ᐃᐢᐱ ᒥᓇ ᑌᑯᓯᑳᐧᐃᐧ ᐊᑖᑐᐃᐧᓂᕽ ᐅᐦᒋ ᑭᐢᐱᐣ ᐁᑳ ᑳ ᑭᒋᐢᑖᐸᐊᐧᔪᑖᐧᐃᐧ, ᓇᒪᐃᐧᔭ ᒥᒋᓱᐊᐧᐠ: ᒥᐦᒉᐟ ᒥᓇ ᑯᑕᑲ ᑫᑲᐧᔭ ᐃᑕᑲᐧᓇᐧ ᐁ ᑭ ᐅᑎᓇᑭᐠ ᑭᑕ ᒥᒋᒥᓇᑭᐠ, ᐁ ᑭᒋᐢᑖᐹᐊᐧᑖᓂᐊᐧᑭ ᒥᓂᑳᐧᑲᓇ ᒥᓇ ᐊᐢᑐᐹᑲᓇ ᒥᓇ ᐅᓵᐋᐧᐱᐢᑯᐃᐧ ᐊᓯᐊᐧᒋᑲᓇ.
[5] ᐹᕒᐊᓯᔭ ᒫᑲ ᒥᓇ ᒪᓯᓇᐦᐃᑫᐃᐧᔨᓂᐊᐧ ᑭ ᑲᑫᐧᒋᒥᐠ, ᑖᓀᑭ ᑭ ᑭᐢᑭᓄᐦᐊᒪᐋᐧᑲᓇᐠ ᐁᑳ ᑳ ᐱᒥᑎᓴᐦᐊᐦᑭᐠ ᐅᐟ ᐋᒋᒧᐃᐧᓂᔨᐤ ᑳ ᓂᑳᓀᔨᑖᑯᓯᔨᐟ, ᒫᑲ ᑳ ᒧᐋᐧᒋᐠ ᐅ ᐸᑫᐧᓯᑲᓂᒥᐋᐧᐊᐧ ᐁᑳ ᐁ ᐯᑭᒋᐦᒉᒋᐠ?
[6] ᑭ ᐃᑌᐤ ᒫᑲ, ᑖᐯᐧ ᑲᐧᔭᐢᐠ ᐊᐩᓵᔭ ᑭ ᑭᐢᑭᐁᐧᐦᐃᑫᐤ ᑭᔭᐋᐧᐤ ᐅᐦᒋ ᐅᑕᔭᒥᐦᐁᑳᓱᐢᑲᐠ, ᑳ ᐃᑕᓯᓇᐦᐃᑳᑌᐠ, ᐅᑯ ᐊᔨᓯᔨᓂᐊᐧᐠ ᓂ ᑭᐢᑕᑭᒥᑲᐧᐠ ᐅᑐᓂᐋᐧᕽ ᐅᐦᒋ, ᒫᑲ ᐅᑌᐦᐃᐋᐧᐤ ᐋᐧᔭᐤ ᐊᔮᔨᐤ.
[7] ᒫᑲ ᐸᑲᐧᓇᑕ ᓂᐟ ᐊᔭᒥᐁᐢᑖᑲᐧᐠ, ᐊᔨᓯᔨᓂᐃᐧ ᑲᑫᐢᑭᒥᐁᐧᐃᐧᓇ ᐁᐊᐧᑲᐧᓂ ᑭᐢᑭᓄᐦᐊᒫᑫᐃᐧᓇ ᐁ ᐃᓯ ᑭᐢᑭᓄᐦᐊᒫᑫᒋᐠ.
[8] ᑭ ᓇᑲᑕᒫᐧᓈᐋᐧᐤ ᑭᓭᒪᓂᑐ ᐅᔭᓱᐁᐧᐃᐧᐣ, ᒥᓇ ᑭ ᒥᒋᒥᓇᒫᐧᓈᐋᐧᐤ ᐅᐟ ᐋᒋᒧᐃᐧᓂᐋᐧᐤ ᐊᔨᓯᔨᓂᐊᐧᐠ.
[9] ᑭ ᐃᑌᐤ ᒫᑲ, ᒪᒥᔦᐧ ᑭᐟ ᐋᑕᐁᐧᔨᑕᒫᐧᓈᐋᐧᐤ ᐅᔭᓱᐁᐧᐃᐧᐣ ᑭᓭᒪᓂᑐ ᑭᑕ ᐱᒥᑎᓴᐦᐊᒣᐠ ᑭᔭᐋᐧᐤ ᑭᐟ ᐊᒋᒧᐃᐧᓂᐋᐧᐊᐧ.
[10] ᒋᑫᒫ ᒧᓯᐢ ᑭ ᐃᑌᐧᐤ, ᑭᐢᑌᔨᑦ ᑯᑕᐃᐧ ᒥᓇ ᑭᑳᐃᐧ; ᒥᓇ ᐊᓇ ᑫ ᒪᒋ ᐃᑖᑫᐧ ᐅᑖᐃᐧᔭ ᐊᐦᐳ ᐅᑳᐃᐧᔭ ᑭᔮᑦ ᑭᑕ ᓂᐱᐤ ᐊᓂᒪ ᓂᐱᐃᐧᐣ ᐅᐦᒋ:
[11] ᒫᑲ ᑭᔭᐋᐧᐤ ᑭᐟ ᐃᑖᐧᓈᐋᐧᐤ, ᑭᐢᐱᐣ ᓂᑯᑕᐧ ᐊᔨᓯᔨᓂᐤ ᐃᑖᒋ ᐅᑖᐃᐧᔭ ᐊᐦᐳ ᐅᑳᐃᐧᔭ, ᐊᓂᒪ ᑭᑕ ᑭ ᐅᐦᒋ ᐋᐸᒋ ᐃᑖᐹᐣ ᐁᑲᐧ ᑯᕒᐹᐣ ᐃᑕᑭᑌᐤ, ᐁᐊᐧᑳᐧᓂᒪ ᐁ ᐃᑌᐧᕽ ᐁ ᒥᔨᐦᐟ ᑭᓭᒪᓂᑐ;
[12] ᐁᑲᐧ ᓇᒪᐃᐧᔭ ᐊᐊᐧᓯᒣ ᑭᐟ ᐃᔨᓇᒪᐋᐧᐋᐧᐤ ᓈᐣᑕᐤ ᑫᑲᐧᐩ ᑭᑕ ᐃᑐᑕᒪᐋᐧᐟ ᐅᑖᐃᐧᔭ ᐊᐦᐳ ᐅᑳᐃᐧᔭ;
[13] ᒥᑐᓂ ᐁ ᑕᐃᐧᓇᒣᐠ ᑭᓭᒪᓂᑐ ᐅᐟ ᐊᔭᒥᐃᐧᐣ ᑭᐟ ᐋᒋᒧᐃᐧᓂᐋᐧᐤ ᐅᐦᒋ, ᑭᔭᐋᐧᐤ ᑳ ᑭ ᒣᑭᔦᐠ: ᒥᐦᒉᐟ ᒫᑲ ᐁᑯ ᑐᐃᐧ ᑫᑲᐧᔭ ᑭᐟ ᐃᑐᑌᓈᐋᐧᐤ.
[14] ᑭ ᓇᑐᒣᐤ ᒫᑲ ᒥᓇ ᐁ ᒫᒪᐁᐧᔭᑎᔨᐟ ᐊᔨᓯᔨᓂᐊᐧ, ᒥᓇ ᑭ ᐃᑌᐤ, ᓇᑐᑕᐃᐧᐠ ᑲᐦᑭᔭᐤ ᑳ ᐃᑕᓯᔦᐠ ᒥᓇ ᓂᓯᑐᐦᑕᒧᐠ;
[15] ᓇᒪᐃᐧᔭ ᑫᑲᐧᐩ ᐊᐧᔭᐃᐧᑎᒫᔨᕽ ᐅᐦᒋ ᐊᔨᓯᔨᓂᐤ, ᑳ ᐊᑎ ᐱᒋᐢᑳᑯᐟ ᑭᑕ ᑭ ᐃᐧᔨᐱᐦᐃᑯᐟ; ᒫᑲ ᐊᓂᐦᐃ ᑫᑲᐧᔭ ᑳ ᐊᐧᔭᐃᐧᒪᑲᐦᑭ ᐊᔨᓯᔨᓂᕽ ᐅᐦᒋ ᐁᐊᐧᑲᐧᓂ ᑳ ᐃᐧᔨᐱᐦᐃᑯᐟ ᐊᔨᓯᔨᓂᐤ.
[17] ᐃᐢᐱ ᒫᑲ ᑳ ᐱᐦᑐᑫᐟ ᐋᐧᐢᑳᐦᐃᑲᓂᕽ ᐁ ᓇᑲᑖᐟ ᐊᔨᓯᔨᓂᐊᐧ, ᐅ ᑭᐢᑭᓄᐦᐊᒪᐋᐧᑲᓇ ᑭ ᑲᑫᐧᒋᒥᐠ ᐅᒪ ᐋᐁᐧᒋᑲᐣ,
[18] ᑭ ᐃᑌᐤ ᒫᑲ, ᑭᔭᐋᐧᐤ ᒋ ᒥᓇ ᐁᑯᓯ ᐃᓯ ᓇᒪᐃᐧᔭ ᑯᓂᓯᑐᑕᒧᐃᐧᓂᓈᐋᐧᐤ? ᓇᒪ ᒋ ᑭ ᐋᐧᐸᑌᓈᐋᐧᐤ, ᐱᑯ ᑫᑲᐧᐩ ᐊᐧᔭᐃᐧᑎᒫᔨᕽ ᐅᐦᒋ ᐁ ᐱᒋᐢᑳᑯᐟ ᐊᔨᓯᔨᓂᐤ ᓇᒪᐃᐧᔭ ᑭᑕ ᐃᐧᔨᐱᐃᐠ;
[19] ᒋᑫᒫ ᓇᒪᐃᐧᔭ ᐅᑌᐦᐃᕽ ᐱᐦᒋᐸᔨᔨᐤ ᒫᑲ ᐊᐧᑖᕽ, ᐁᑯᓯ ᐊᐧᔭᐃᐧᐸᔨᐤ? ᐅᒥᓯ ᐃᑌᐧᐤ ᐁ ᐯᑭᑖᐟ ᑲᐦᑭᔭᐤ ᒥᒋᐃᐧᐣ.
[20] ᐁᑲᐧ ᑭ ᐃᑌᐧᐤ, ᐊᓂᒪ ᑳ ᐊᐧᔭᐃᐧᒪᑲᓂᔨᐠ ᐊᔨᓯᔨᓂᐤ ᐅᐦᒋ ᐁᐊᐧᑫᐧᔨᐤ ᑳ ᐃᐧᔨᐱᐦᐃᑯᐟ ᐊᔨᓯᔨᓂᐤ.
[21] ᒋᑫᒫ ᐱᒑᔨᕽ ᐅᐦᒋ, ᐅᑌᐃᐋᐧᕽ ᐅᐦᒋ ᐊᔨᓯᔨᓂᐊᐧᐠ, ᒪᒋ ᒫᒥᑐᓀᔨᒋᑲᓇ ᐅᐦᒋᐸᔨᐊᐧ, ᒪᒋ ᐃᐧᒉᑐᐃᐧᐣ,
[22] ᑭᒧᑎᐃᐧᓇ, ᓂᐸᑖᑫᐃᐧᓇ, ᐱᓯᑳᐧᑎᓯᐃᐧᓇ, ᒧᐢᑕᐃᐧᓇᒫᑫᐃᐧᓇ, ᒪᒑᑎᓯᐃᐧᓇ, ᑲᑲᔦᔨᓯᐃᐧᐣ, ᑲᑫᐹᑎᓯᐃᐧᐣ, ᒫᔨ ᑲᓇᐋᐧᐸᑐᐃᐧᐣ, ᑭᓯ ᑭᑐᑎᑐᐃᐧᐣ, ᑭᐢᑌᔨᒧᐃᐧᐣ, ᑭᐢᑫᐧᐃᐧᐣ;
[23] ᑲᐦᑭᔭᐤ ᐅᐦᐃ ᒪᒋ ᑫᑲᐧᔭ ᐱᒑᔨᕽ ᐅᐦᒋᐸᔨᐊᐧ ᒥᓇ ᐃᐧᔨᐱᐃᐠ ᐊᔨᓯᔨᓂᐤ.
[24] ᐁᑯᑕ ᒫᑲ ᑭ ᐅᐦᒋ ᐸᓯᑯ, ᐁᑯᓯ ᑭ ᐊᑎ ᐃᑐᐦᑌᐤ ᒋᑳᐢᐠ ᑖᔭᕒ ᒥᓇ ᓴᐃᑕᐣ ᐊᐢᑭᕽ. ᑭ ᐱᐦᑐᑫᐤ ᒫᑲ ᐋᐧᐢᑳᐦᐃᑲᓂᕽ ᐁᑯᓯ ᓇᒪᐃᐧᔭ ᓇᑕᐁᐧᔨᑕᑦ ᐊᐃᐧᔭ ᑭᑕ ᑭᐢᑫᔨᑕᒥᔨᐟ: ᓇᒪᐃᐧᔭ ᒫᑲ ᑭ ᑳᓱ.
[25] ᒫᑲ ᓭᒫᐠ ᐃᐢᑫᐧᐤ ᐅ ᑖᓂᓯᓴ ᐁ ᑭᑭᐢᑳᑯᔨᐟ ᐁᑳ ᐁ ᐯᐦᑭᓯᔨᐟ ᐊᐦᒑᐦᑲᐧ, ᐃᐢᐱ ᐱᐁᑕᕽ ᐁ ᐋᒋᒥᒥᐦᐟ, ᑭ ᐯ ᐸᐦᑭᓯᐣ ᐅᓯᑎᔨᕽ.
[26] ᐊᓇ ᐃᐢᑫᐧᐤ ᑲᕒᐃᐠ ᑐᐃᐧᑳᐣ, ᓴᐃᕒᐅᐱᓂᓯᔭ ᐁ ᐅᑕᐢᑳᓀᓯᐟ. ᑭ ᐯ ᑳᑭᓯᒧᑐᑖᐠ ᒫᑲ ᑭᑕ ᐊᐧᔭᐃᐧᐁᐧᐱᓈᐟ ᒪᒋ ᐊᐦᒑᐦᑲᐧ ᐅᑖᓂᓴ ᐅᐦᒋ.
[27] ᒫᑲ ᑭ ᐃᑌᐤ, ᑭᔮᑦ ᐊᐋᐧᓯᓴᐠ ᓂᑳᐣ ᑭᑕ ᑭᐢᐳᐊᐧᐠ: ᒋᑫᒫ ᓇᒪᐃᐧᔭ ᓇᐃᓈᑲᐧᐣ ᑭᑕ ᐅᑎᓂᒥᐦᐟ ᐊᐋᐧᓯᓴᐠ ᐅ ᐸᑫᐧᓯᑲᓂᒥᐋᐧᐊᐧ ᑭᑕ ᐁᐧᐱᓇᒫᒋᐠ ᐊᑎᒪᐧᐠ,
[28] ᑭ ᓇᐢᑫᐧᐊᐧᓯᒥᐠ ᒫᑲ ᐅᒥᓯ ᑭ ᐃᑎᐠ, ᐁᐦᐁ ᑌᐯᔨᐦᒋᑫᔭᐣ: ᐁᔨᐁᐧᕽ ᒫᑲ ᐊᑎᒪᐧᐠ ᓯᐹ ᒥᒋᓱᐃᐧᓈᑎᑯᕽ ᒥᒋᐊᐧᐠ ᐊᐋᐧᓯᓴ ᐅ ᐱᐊᐧᒋᑲᓂᔨᐊᐧ.
[29] ᐁᑯᓯ ᒫᑲ ᑭ ᐃᑌᐤ, ᐅᒪ ᑭᐟ ᐃᑌᐧᐃᐧᐣ ᐅᐦᒋ ᓂᔮ ᑭᐁᐧ; ᒋᑫᒫ ᒪᒋ ᐊᐦᒑᐦᑲᐧ ᓇᑲᑎᐠ ᑭᑖᓂᐢ.
[30] ᐁᑯᓯ ᑭ ᑭᐁᐧᐤ ᐃᐧᑭᕽ, ᐳᑎ ᒫᑲ ᐊᓂᐦᐃ ᐊᐋᐧᓯᓴ ᑭ ᐱᒥᓯᓂᔨᐊᐧ ᓂᐯᐃᐧᓂᕽ, ᒥᓇ ᒪᒋ ᐊᒑᐦᑲᐧ ᐁ ᑭ ᓇᑲᑎᑯᔨᐟ.
[31] ᐁᑯᓯ ᒥᓇ ᑭ ᓯᐯᐧᑌᐤ ᒋᑳᐢᐠ ᑖᔭᕒ ᐅᐦᒋ, ᒥᓇ ᑭ ᓵᐳ ᐱᒧᐦᑌᐤ ᓵᐃᑕᓂᕽ ᐱᔨᐢ ᑳᓬᐊᓬᐃ ᓵᑲᐦᐃᑲᓂᕽ, ᒣᑳᐧᐨ ᐁ ᒋᑳᐢᑯᐊᐧᕽ ᑎᑳᐳᓬᐃᐢ.
[32] ᑭ ᐯᑐᐁᐧᐊᐧᐠ ᒫᑲ ᐯᔭᐠ ᐁᑳ ᐁ ᐊᐧᐃᐧᔭᐃᐧᑕᒥᔨᐟ ᒥᓇ ᐁ ᓈᓇᑯᐁᐧᔨᐟ; ᐁᑯᓯ ᑳᑭᓯᒧᑐᑕᐁᐧᐊᐧᐠ ᑭᑕ ᓵᒥᓈᔨᐟ.
[33] ᐁᑯᓯ ᓂᓯᕽ ᐅᐱᒣ ᑭ ᐃᑐᑕᐁᐤ ᐃᑕ ᐁᑳ ᐁ ᐊᔮᔨᐟ ᑳ ᒫᒪᐁᐧᔭᑎᔨᐟ ᐊᔨᓯᔨᓂᐊᐧ, ᑭ ᐊᐢᑖᐤ ᒫᑲ ᐅ ᒋᐦᒋᔭ ᐅᑕᐊᐧᑳᔨᕽ, ᐁᑯᓯ ᑭ ᓯᐦᑯ, ᒥᓇ ᑭ ᓵᒥᓇᒣᐧᐤ ᐅᑌᔭᓂᔨᐤ;
[34] ᑭᓯᑯᕽ ᒫᑲ ᐁ ᐃᑖᐱᐟ, ᑭ ᓇᐊᑖᒧ, ᒥᓇ ᑭ ᐃᑌᐤ, ᐁᐦᐸᐦᑕ, ᐁᐊᐧᑳᐧᓂᒪ ᐁ ᐃᑌᐧᕽ, ᔪᐦᑌᐸᔨ.
[35] ᐅᑕᐊᐧᑲᔭ ᒫᑲ ᑭ ᔪᑌᓇᒫᐧᐣ, ᒥᓇ ᑳ ᑕᒋᑌᔭᓂᐁᐧᐱᓱᐟ ᑭ ᐋᐱᑯᓇᒫᐧᐣ, ᐁᑯᓯ ᑭ ᐸᑲᑭᑖᑯᓯᐤ.
[36] ᑭ ᐊᔮᑳᐧᒥᒣᐤ ᒫᑲ ᐁᑳ ᐊᐃᐧᔭ ᑭᑕ ᐃᐧᐦᑕᒪᐋᐧᔨᐟ; ᒫᑲ ᐋᑕ ᐊᐊᐧᓯᒣ ᐁ ᑭ ᐊᔮᑳᐧᒥᒫᐟ, ᐋᐦᒋ ᐱᑯ ᐊᐊᐧᓯᒣ ᒥᐢᑕᐦᐃ ᑭ ᐋᑐᑕᒥᔨᐊᐧ.
[37] ᐊᔨᐋᐧᐠ ᒫᑲ ᑭ ᒫᒪᐢᑳᑕᒪᐧᐠ ᐁ ᐃᑌᐧᒋᐠ, ᑲᐦᑭᔭᐤ ᑫᑲᐧᐩ ᒥᑐᓂ ᑭ ᑐᑕᑦ; ᐃᓯᐦᐁᐤ ᐋᐧᐋᐧᐨ ᐊᓂᐦᐃ ᐁᑳ ᑳ ᐊᐧᐃᐧᔭᐃᐧᑕᒥᔨᐟ ᑭᑕ ᐯᑕᒥᔨᐟ, ᒥᓇ ᐁᑳ ᑳ ᓂᑖᐁᐧᔨᐟ ᑭᑕ ᐱᑭᐢᑫᐧᔨᐟ.