[1] ᐁᑯᓯ ᒫᑲ ᑭ ᑕᑯᐸᔨᐊᐧᐠ ᑫᐧᐢᑲᑳᑦ ᓵᑲᐦᐃᑲᓂᕽ ᐅᐟ ᐊᐢᑭᔨᕽ ᑫᕒᐊᓯᓇ.
[2] ᐃᐢᐱ ᒫᑲ ᐅᓯᕽ ᑳ ᐅᐦᒋ ᑲᐹᐟ, ᓭᒫᐠ ᑭ ᓇᑭᐢᑳᐠ ᓇᐃᓇᑐᐃᐧᑲᒥᑯᕽ ᐅᐦᒋ ᓈᐯᐊᐧ ᐁ ᑭᑭᐢᑳᑯᔨᐟ ᐁᑳ ᐁ ᐯᑭᓯᔨᐟ ᐊᐦᒑᐦᑲᐧ,
[3] ᐁᐊᐧᑯ ᐁ ᐊᐧᐃᐧᑭᐟ ᒫᓇ ᓇᐦᐃᓂᑐᐃᐧᑲᒥᑯᕽ: ᐁᑯᓯ ᓇᒪᐃᐧᔭ ᐁᑲᐧ ᐊᐃᐧᔭ ᑭ ᒪᒫᒋᑲᐧᐱᑎᐠ, ᓇᒪᐋᐧᐨ ᐊᐦᐳ ᐱᐋᐧᐱᐢᑲᐧ ᐅᐦᒋ:
[4] ᒋᑫᒫ ᐋᑕ ᒥᐦᒉᑖᐧᐤ ᑲᐢᑳᐱᐢᑲᐃᑲᓇ ᒥᓇ ᐱᐋᐧᐱᐢᑲᐧ ᑭ ᐅᐦᒋ ᑕᑯᐱᑖᐤ, ᒫᑲ ᐱᐋᐧᐱᐢᑲᐧ ᑭ ᐸᐢᑭᐱᑕᑦ ᒥᓇ ᑲᐢᑳᐱᐢᑲᐃᑲᓇ ᑭ ᐱᑯᓇᑦ: ᒥᓇ ᓇᒪ ᐊᐃᐧᔭ ᐊᔨᓯᔨᓂᐊᐧ ᐊᔮᔨᐊᐧ ᒪᐢᑲᐃᐧᓯᐃᐧᐣ ᑭᑕ ᑭ ᔪᐢᐱᓯᐃᑯᐟ.
[5] ᒧᓴᐠ ᒫᑲ, ᑌᐱᐢᑳᔨᑭ ᒥᓇ ᑭᔨᓯᑳᔨᑭ, ᓇᐦᐃᓂᑐᐃᐧᑲᒥᑯᕽ ᒥᓇ ᐊᐧᒋᕽ ᑭ ᑖᑌᐯᐧᐤ ᒥᓇ ᑭ ᐸᐯᓯᓱᓱ ᐊᓯᓂᔭ ᐅᐦᒋ.
[6] ᐃᐢᐱ ᒫᑲ ᐃᐧᔮᐸᒫᐟ ᒋᓴᓴ ᐋᐧᔭᐤ ᐅᐦᒋ, ᑭ ᐃᐢᐸᑖᐤ ᑭ ᓇᑕᐃᐧ ᐅᒋᐦᒋᐦᑲᐧᓇᐱᐢᑕᐁᐧᐤ;
[7] ᐁᑯᓯ ᐁ ᒥᐢᑕᐦᐃ ᑌᐯᐧᐟ ᑭ ᐃᑌᐧᐤ, ᑫᑲᐧᐩ ᓂᔭ ᑫᓇᐋᐧᐸᒥᑯᔮᐣ ᑭᔭ ᐅᐦᒋ, ᒋᓴᐢ ᑭᔭ ᐅᑯᓯᓴ ᒫᒪᐁᐧᔭᐢ ᑫᐦᒑᔨᐃᐧᐟ ᑭᓭᒪᓂᑐ? ᐁ ᐊᐢᐱᒧᔮᐣ ᑭᓭᒪᓂᑐ ᑭ ᐃᐧᐦᑕᒫᑎᐣ, ᐁᑳ ᑭᑕ ᑯᑕᑭᐦᐃᔭᐣ.
[8] ᒋᑫᒫ ᑭ ᐃᑌᐤ, ᐯ ᐊᐧᔭᐃᐧ ᐊᓇ ᐊᔨᓯᔨᓂᐤ ᐅᐦᒋ, ᑭᔭ ᐁᑳ ᑳ ᐯᑭᓯᔭᐣ ᐊᐦᒑᕽ.
[9] ᑭ ᑲᑫᐧᒋᒣᐤ ᒫᑲ, ᑖᓂᓯ ᐁᓯᔨᑳᓱᔭᐣ? ᐁᑯᓯ ᑭ ᐃᑎᐠ, ᓬᐃᒐᐣ ᓂᐟ ᐃᓯᔨᐦᑳᓱᐣ; ᒋᑫᒫ ᓂ ᒥᐦᒉᑎᓈᐣ.
[10] ᐁᑯᓯ ᓱᐦᑭ ᑭ ᑲᑭᓯᒧᑐᑖᐠ ᐁᑳ ᑭᑕ ᓯᐯᐧᑎᓴᐅᑯᒋᐠ ᐁᑯᑕ ᐊᐢᑭᕽ ᐅᐦᒋ.
[11] ᐁᑯᑕ ᒫᑲ ᐅᐱᒣᔮᒪᑎᐣ ᐊᐧᒋᕽ ᑭ ᐊᔮᐊᐧᐠ ᐁ ᐊᓭᔭᑎᒋᐠ ᒥᐦᒉᐟ ᑯᐦᑯᓴᐠ ᐁ ᒥᒋᓱᒋᐠ.
[12] ᑭ ᑳᑭᓯᒧᑐᑖᐠ ᒫᑲ ᐁ ᐃᑌᐧᔨᐟ, ᐃᓯᑎᓴᐦᐅᓈᐣ ᑭᑕ ᓇᑕᐃᐧ ᐱᑎᐢᑲᐋᐧᔮᐦᑭᐠ ᑯᐦᑯᓴᐠ.
[13] ᒋᓴᐢ ᒫᑲ ᓭᒫᐠ ᑭ ᓇᐢᑯᒣᐤ, ᐁᑯᓯ ᐁᑳ ᑳ ᐯᑭᓯᒋᐠ ᐊᐦᒑᐦᑲᐧᐠ ᑭ ᐊᐧᔭᐃᐧᐊᐧᐠ, ᒥᓇ ᐁ ᑭ ᐱᑎᐢᑲᐋᐧᒋᐠ ᑯᐦᑯᓴ: ᐁᑯᓯ ᐁ ᐊᓭᔭᑎᒋᐠ ᑭ ᐱᓇᓯᐁᐧᐸᑖᐊᐧᐠ ᓵᑲᐦᐃᑲᓂᕽ ᓈᐣᑕᐤ ᓂᓵᐧᐤ ᑭᐦᒋ ᒥᑖᑐᒥᑕᓇᐤ ᑭ ᐃᑕᓯᐊᐧᐠ; ᐁᑯᓯ ᑭ ᓂᐢᑖᐹᐁᐧᐊᐧᐠ ᓵᑲᐦᐃᑲᓂᕽ.
[14] ᐊᓂᑭ ᒫᑲ ᑳ ᐊᓴᒫᒋᐠ ᑭ ᑕᐸᓯᐊᐧᐠ, ᐁᑯᓯ ᑭ ᐋᑐᑕᒪᐧᐠ ᐅᑌᓈᕽ, ᒥᓇ ᐁᑯᑕ ᐊᐢᑭᕽ. ᑭ ᐯ ᐋᐧᐸᐦᑕᒪᐧᐠ ᒫᑲ ᐊᔨᓯᔨᓂᐊᐧᐠ ᐊᓂᒪ ᑳ ᑭ ᐃᑭᓂᔨᐠ.
[15] ᑭ ᐅᑎᑌᐊᐧᐠ ᒫᑲ ᒋᓴᓴ, ᐁᑯᓯ ᐳᑎ ᐋᐧᐸᒣᐊᐧᐠ ᐊᓂᐦᐃ ᑳ ᑭ ᑭᑭᐢᑳᑯᔨᐟ ᒪᒋ ᐊᐦᒑᐦᑲᐧ ᐁ ᐊᐱᔨᐟ, ᐁ ᑭᑭᐢᑳᒋᑫᔨᐟ ᒥᓇ ᑲᐧᔭᐢᐠ ᐁ ᐅ ᒥᑐᓀᔨᒋᑲᓀᔨᐟ, ᐊᓂᐦᐃ ᐅᑎ ᓬᐃᒐᓇ ᑳ ᑭ ᐊᔮᐋᐧᔨᐟ; ᑭ ᓭᑭᓯᐊᐧᐠ ᒫᑲ.
[16] ᐊᓂᑭ ᒫᑲ ᑳ ᑭ ᐋᐧᐸᐦᑕᐦᑭᐠ ᑭ ᐃᐧᐦᑕᒪᐁᐧᐊᐧᐠ ᑳ ᑭ ᐃᓯᒋᑳᑎᒥᐦᐟ ᐊᓂᐦᐃ ᑳ ᑭ ᑭᑭᐢᑳᑯᔨᐟ ᒪᒋ ᐊᐦᒑᐦᑲᐧ, ᒥᓇ ᐊᓂᐦᐃ ᑯᐦᑯᓴ.
[17] ᐁᑲᐧ ᒫᑲ ᑭ ᒫᒋ ᑳᑭᓯᒧᑐᑕᐁᐧᐊᐧᐠ ᐅᐟ ᐊᐢᑭᐋᐧᕽ ᑭᑕ ᐅᐦᒋ ᓯᐯᐧᑌᔨᐟ.
[18] ᐁ ᐊᑎ ᐳᓯᐟ ᒫᑲ ᐅᓯᕽ, ᐊᓂᐦᐃ ᑳ ᑭ ᑭᑭᐢᑳᑯᔨᐟ ᒪᒋ ᐊᐦᒑᐦᑲᐧ ᑭ ᓇᑐᑕᒫᐠ ᑭᑕ ᑭ ᐃᐧᒉᐃᐧᑯᐟ.
[19] ᒫᑲ ᓇᒪᐃᐧᔭ ᑭ ᐃᔨᓇᒪᐁᐧᐤ, ᒫᑲ ᐃᑌᐤ, ᐃᑐᐦᑌ ᑭ ᐋᐧᐢᑳᐦᐃᑲᓂᕽ, ᓈᓯᐠ ᑭ ᑐᑌᒪᐠ, ᒥᓇ ᐃᐧᐦᑕᒪᐃᐧᐠ ᑭᐦᒋ ᑫᑲᐧᔭ ᑳ ᑭ ᑐᑕᒫᐢᐠ ᑳ ᑎᐯᔨᐦᒋᑫᐟ, ᒥᓇ ᑳ ᑭ ᐃᓯ ᑭᑎᒫᑭᓈᐢᐠ.
[20] ᐁᑯᓯ ᑭ ᓯᐯᐧᑌᐤ, ᐁ ᑭ ᓯᐯᐧ ᐋᑐᑕᕽ ᒫᑲ ᑎᑳᐳᓬᐃᓯᕽ ᑭᐦᒋ ᑫᑲᐧᔭ ᒋᓴᓴ ᑳ ᑭ ᑐᑕᒫᑯᐟ; ᑲᐦᑭᔭᐤ ᒫᑲ ᐊᔨᓯᔨᓂᐊᐧᐠ ᑭ ᒪᒪᐢᑳᑕᒪᐧᐠ.
[21] ᐃᐢᐱ ᒫᑲ ᒋᓴᐢ ᑫᐧᐢᑭᑌ ᐃᑌᑫᑳᑦ ᒥᓇ ᑳ ᐃᓯ ᐊᓱᐊᐧᐊᕽ ᐅᓯᕽ, ᒥᐦᒉᐟ ᐊᔨᓯᔨᓂᐊᐧ ᑭ ᐯ ᒫᐊᐧᒋᐃᑐᔨᐊᐧ ᐃᑕ ᐁ ᐊᔮᐟ: ᑭᓯᐋᐧᐠ ᒫᑲ ᓵᑲᐦᐃᑲᓂᕽ ᑭ ᐊᔮᐤ.
[22] ᐁᑯᑕ ᒫᑲ ᑭ ᐯ ᑕᑯᓯᐣ ᐯᔭᐠ ᐅᔭᓱᐁᐧᐃᐧᑭᒪᐤ ᐊᔭᒥᐦᐁᐃᐧᑲᒥᑯᕽ ᒉᕒᐊᐢ ᐁ ᐃᓯᔨᐦᑳᓱᐟ; ᐃᐢᐱ ᒫᑲ ᐃᐧᔮᐸᒫᐟ ᒋᓴᓴ, ᑭ ᐸᐦᑭᓯᐣ ᐅ ᓯᑎᔨᕽ,
[23] ᓱᐦᑭ ᐁ ᑳᑭᓯᒧᑐᑕᐋᐧᐟ ᐁ ᐃᑌᐧᐟ, ᓂ ᑖᓂᓯᐢ ᑫᑳᐟ ᓂᐱᐤ: ᑭ ᐸᑯᓭᔨᒥᑎᐣ ᑭᑕ ᐯ ᓇᑕᐃᐧ ᓵᒥᓇᐟ, ᑭᑕ ᑭ ᒥᔪ ᐊᔮᐟ, ᐁᑯᓯ ᑭᑕ ᐱᒫᑎᓯᐟ.
[24] ᑭ ᐊᑎ ᐃᐧᒉᐁᐧᐤ ᒫᑲ; ᒥᐦᒉᐟ ᒫᑲ ᐁ ᒫᒪᐁᐧᔭᑎᔨᐟ ᐊᔨᓯᔨᓂᐊᐧ ᑭ ᐱᒥᑎᓴᐦᐅᐠ ᒥᓇ ᑭ ᐊᑎ ᐸᐱᐢᑎᐢᑳᐠ.
[25] ᐯᔭᐠ ᒫᑲ ᐃᐢᑫᐧᐤ, ᐁ ᑭ ᐃᑖᐢᐱᓀᐟ ᐁ ᐅᐦᒋᑲᐊᐧᓂᔨᐠ ᐅ ᒥᐦᑯ ᒥᑖᑕᐟ ᓂᓱᓵᑊ ᑕᐦᑐ ᐊᐢᑭ,
[26] ᓇᓈᑐᕽ ᒫᑲ ᐁ ᑭ ᐃᓯ ᑯᑕᑭᐦᐃᑯᐟ ᒥᐦᒉᐟ ᒪᐢᑭᑭᐃᐧᔨᓂᐊᐧ, ᐁᑯᓯ ᐁ ᑭ ᒣᐢᑎᓂᑫᐟ ᑲᐦᑭᔭᐤ ᑫᑲᐧᐩ ᑳ ᑭ ᐊᔮᐟ, ᐁᑳ ᒫᑲ ᐊᐊᐧᓯᒣ ᐁ ᑭ ᒥᔪ ᐊᔮᐟ ᒫᑲ ᓇᐊᐧᐨ ᐊᔨᐋᐧᐠ ᐁ ᐊᑎ ᐃᓯ ᐊᔮᐟ,
[27] ᐃᐢᐱ ᐱᔦᐦᑕᕽ ᐁ ᐋᒋᒥᒥᐦᐟ ᒋᓴᓴ ᑭ ᐯ ᐃᑐᐦᑌᐤ ᐃᑕ ᐁ ᐊᓯ ᐊᔮᔨᐟ ᐊᔨᓯᔨᓂᐊᐧ ᐅᐢᐱᐢᑲᐧᓂᔨᕽ ᐅᐦᒋ, ᐁᑯᓯ ᑭ ᓵᒥᓇᒣᐧᐤ ᐅᐢᑯᑖᑳᔨᐤ.
[28] ᒋᑫᒫ ᑭ ᐃᑌᐧᐤ, ᑭᐢᐱᐣ ᓵᒥᓇᒪᐧᑫ ᐱᑯ ᐅᐢᑯᑖᑲᐩ, ᓂ ᑲ ᒥᔪ ᐊᔮᐣ.
[29] ᓭᒫᐠ ᒫᑲ ᑭ ᐳᓂ ᐅᐦᒋᑲᐊᐧᓂᔨᐤ ᐅ ᒥᐦᑯ ᒥᓇ ᑭ ᒧᓯᑖᐤ ᐃᐧᔭᐃᐧᕽ ᐁ ᐃᔨᓂᑲᐃᐦᐟ ᐊᓂᒪ ᑳ ᑭ ᐃᑖᐢᐱᓀᐟ.
[30] ᓭᒫᐠ ᒫᑲ ᒋᓴᐢ, ᐁ ᒧᓯᑖᐟ ᐊᓂᒪ ᑲᐢᑭᐦᐁᐃᐧᓯᐃᐧᐣ ᐃᐧᔭ ᐅᐦᒋ ᐁ ᑭ ᓯᐯᐧᐸᔨᔨᐠ, ᑭ ᑫᐧᐢᑭᑳᐸᐃᐧᐤ ᒣᑳᐧᐨ ᐃᑕ ᐁ ᐊᓭᔭᑎᐃᐧᐦᐟ, ᒥᓇ ᑭ ᐃᑌᐧᐤ, ᐊᐁᐧᓇ ᑳ ᓵᒥᓇᕽ ᓂᐢᑯᑖᑲᐩ?
[31] ᐅ ᑭᐢᑭᓄᐦᐊᒪᐋᐧᑲᓇ ᒫᑲ ᑭ ᐃᑎᐠ, ᑭ ᐋᐧᐸᒫᐊᐧᐠ ᐁ ᒥᐦᒉᑎᒋᐠ ᐊᔨᓯᔨᓂᐊᐧᐠ ᐁ ᐸᐱᐢᑎᐢᑳᐢᑭᐠ, ᑭᐟ ᐃᑖᐧᐣ ᒋ ᒫᑲ ᐊᐁᐧᓇ ᑳ ᓵᒥᓂᐟ?
[32] ᐋᐧᐢᑳ ᒫᑲ ᑭ ᐊᔨᑖᐱᐤ, ᑭᑕ ᐋᐧᐸᒫᐟ ᐊᓂᐦᐃ ᐅᒥᓯ ᑳ ᑭ ᑐᑕᒥᔨᐟ.
[33] ᒫᑲ ᐊᓇ ᐃᐢᑫᐧᐤ ᐁ ᓭᑭᓯᐟ ᒥᓇ ᐁ ᓇᓇᒥᐸᔨᐟ, ᐁ ᑭᐢᑫᔨᑕᕽ ᐊᓂᒪ ᑳ ᑭ ᑐᑖᐦᐟ, ᑭ ᐯ ᐸᐦᑭᓯᐣ ᐁ ᐃᓯ ᐅᑎᐢᑲᐃᐧᑳᐸᐃᐧᔨᐟ, ᑭ ᐃᐧᐦᑕᒪᐁᐧᐤ ᑲᐦᑭᔭᐤ ᐁ ᑖᐯᐧᐟ.
[34] ᐃᐧᔭ ᒫᑲ ᑭ ᐃᑌᐤ, ᓂ ᑖᓂᐢ, ᑭ ᑖᐯᐧᑕᒧᐃᐧᐣ ᑭ ᑭ ᐃᔨᓂᑲᐃᑯᐣ; ᓂᔮ ᐯᔭᐦᑕᑫᔨᒧᐃᐧᓂᕽ, ᑭ ᑲ ᐃᐧ ᒥᔪ ᐊᔮᐣ ᑳ ᑭ ᐃᑖᐢᐱᓀᔭᐣ.
[35] ᒣᑳᐧᐨ ᑫᔮᐱᐨ ᐁ ᐱᑭᐢᑫᐧᐟ, ᑕᑯᓯᓂᔨᐊᐧ ᐊᔭᒥᐦᐁᐃᐧᑲᒥᑯᐃᐧ ᐅᔭᓱᐁᐧᐃᐧᑭᒫᐊᐧ ᐅ ᐋᐧᐢᑳᐦᐃᑲᓂᔨᕽ ᐅᐦᒋ, ᐁ ᐃᑌᐧᔨᐟ, ᑭ ᑖᓂᐢ ᓂᐱᐤ: ᑖᓀᐦᑭ ᐊᐦᒋ ᐱᑯ ᑳ ᒥᑯᐢᑳᒋᒪᐟ ᐅᑭᐢᑭᓄᐦᐊᒫᑫᐤ?
[36] ᒫᑲ ᒋᓴᐢ, ᐁᑳ ᐁ ᐱᓯᐢᑫᔨᑕᕽ ᐊᓂᒪ ᑳ ᐃᑌᐧᐃᐧᐦᐟ, ᑭ ᐃᑌᐤ ᐊᓂᐦᐃ ᐊᔭᒥᐦᐁᐃᐧᑲᒥᑯᐃᐧ ᐅᔭᓱᐁᐧᐃᐧᑭᒫᐊᐧ, ᐁᑳᐃᐧᔭ ᐊᐢᑖᓯ, ᐱᑯ ᑖᐯᐧᑕ.
[37] ᓇᒪᐃᐧᔭ ᒫᑲ ᐊᐃᐧᔭ ᐃᔨᓇᒪᐁᐧᐤ ᑭᑕ ᐱᒥᑎᓴᐦᐅᑯᐟ ᐱᑯ ᐱᑕᕒ ᒥᓇ ᒉᒥᐢ ᒥᓇ ᒑᐣ ᐅᒋᐋᐧᒪ ᒉᒥᐢ.
[38] ᑭ ᐊᑎ ᑕᑯᓯᓇᐧᐠ ᒫᑲ ᐅ ᐋᐧᐢᑳᐃᑲᓂᔨᐟ ᐊᓂᐦᐃ ᐊᔭᒥᐦᐁᐃᐧᑲᒥᑯᐃᐧ ᐅᔭᓱᐁᐧᐃᐧᑭᒫᐊᐧ; ᐁᑯᓯ ᐳᑎ ᐋᐧᐸᐦᑕᒪᐧᐠ ᐁ ᒥᑯᐢᑳᑕᑲᒥᑭᓯᐃᐧᐦᐟ ᒥᓇ ᐊᓂᐦᐃ ᑳ ᒫᑐᔨᐟ ᒥᓇ ᑳ ᑲᑳᐧᑕᑲᑌᐧᒧᔨᐟ.
[39] ᐃᐢᐱ ᒫᑲ ᑳ ᐱᐦᑐᑫᐟ ᐅᒥᓯ ᐃᑌᐤ, ᑖᓀᑭ ᑳ ᒥᑯᐢᑳᑕᑲᒥᑭᓯᔦᐠ, ᒥᓇ ᑳ ᒫᑐᔦᐠ? ᐊᓇ ᐊᐋᐧᓯᐢ ᓇᒪᐃᐧᔭ ᓂᐱᐤ, ᓂᐹᐤ ᒫᑲ.
[40] ᐁᑯᓯ ᒫᑲ ᑭ ᒣᑕᐋᐧᑫᔮᐱᐁᐊᐧᐠ. ᒫᑲ ᐃᐧᔭ ᐃᐢᐱ ᑲᐦᑭᔭᐤ ᑳ ᐊᐧᔭᐃᐧᑎᓴᐋᐧᐟ, ᑭ ᐊᑎ ᐅᑎᓀᐤ ᐅᑖᐃᐧᔨᐊᐧ ᐊᓂᐦᐃ ᐊᐋᐧᓯᓴ ᒥᓇ ᐅᑳᐃᐧᔨᐊᐧ ᒥᓇ ᐊᓂᐦᐃ ᑳ ᐃᐧᒉᐃᐧᑯᐟ, ᑭ ᐊᑎ ᐱᐦᑐᑫᐤ ᒫᑲ ᐃᑕ ᐊᓂᐦᐃ ᐊᐋᐧᓯᓴ ᐁ ᐊᔮᔨᐟ.
[41] ᐁ ᓴᑭᒋᐦᒉᓈᐟ ᒫᑲ ᐊᓂᐦᐃ ᐊᐋᐧᓯᓴ ᑭ ᐃᑌᐤ, ᑖᓬᐃᑕ ᑯᒫᐩ; ᐁᐊᐧᑯ ᑳ ᐃᑌᐧᕽ, ᐁ ᐃᑌᐧᐢᑕᒪᐋᐧᑕᒥᕽ, ᐅᐢᑭᓂᑭᐢᑫᐧᐤ, ᐊᐧᓂᐢᑳ, ᑭᐟ ᐃᑎᐣ.
[42] ᓭᒫᐠ ᒫᑲ ᐊᓇ ᐅᐢᑭᓂᑭᐢᑫᐧᓯᐢ ᑭ ᐊᐧᓂᐢᑳᐤ ᒥᓇ ᑭ ᐱᒧᐦᑌᐤ; ᒋᑫᒫ ᓈᐣᑕᐤ ᒥᑖᑕᐟ ᓂᓱᓵᑊ ᑭ ᐃᑕᐦᑐ ᐱᐳᓀᐧᐤ, ᑭ ᒫᒪᐢᑳᑕᒪᐧᐠ ᒫᑲ ᓭᒫᐠ ᑭᐦᒋ ᒫᒪᐢᑳᑕᒧᐃᐧᓂᕽ.
[43] ᒥᑐᓂ ᒫᑲ ᑭ ᐊᔭᑳᐧᒥᒣᐤ ᐁᑳ ᐊᐃᐧᔭ ᐊᔨᓯᔨᓂᐊᐧ ᑭᑕ ᑭᐢᑫᔨᑕᒥᔨᐟ: ᒥᓇ ᑭ ᐃᑕᓱᐁᐧᐤ ᑭᑕ ᒥᔨᒥᐦᐟ ᑫᑲᐧᐩ ᑭᑕ ᒥᒋᔨᐟ.