[1] ᐁᑯᓯ ᒫᑲ ᐳᓂ ᑕᓯᑕᑖᐠ ᓂᐢᑕᑦ ᐅ ᑭᐢᑭᓄᐦᐊᒫᑫᐃᐧᓇ ᙭ ᒥᓇ ᔭᑯᑌᑖᐠ ᑭᓯᐃᑯᐃᐧᓯᐃᐧᓂᕽ; ᐁᑳ ᑭᑖᐧᑦ ᐁ ᐅᔭᐢᑖᔭᕽ ᑫᐧᐢᑳᑎᓯᐃᐧᐣ ᓂᐳᐃᐧᓂ ᐊᑐᐢᑫᐃᐧᓂᕽ ᐅᐦᒋ ᒥᓇ ᑖᐯᐧᔦᔨᑕᒧᐃᐧᐣ ᑭᓭᒪᓂᑐᕽ ᐃᓯ,
[2] ᐁ ᑭᐢᑭᓄᐦᐊᒫᑫᕽ ᐸᑊᑕᐃᓯᐃᐁᐧᐃᐧᐣ ᒥᓇ ᐁ ᓴᓵᒥᓂᐃᐧᕽ, ᒥᓇ ᐅᐟ ᐋᐱᓯᓯᓄᐃᐧᓂᐋᐤ ᑳ ᓂᐱᒋᐠ, ᒥᓇ ᑳᑭᑫ ᐅᔭᓱᐁᐧᐃᐧᐣ.
[3] ᐁᑯᓯ ᒫᑲ ᐅᒪ ᑫ ᐃᑐᑕᒫᕽ ᑭᐢᐱᐣ ᑭᓭᒪᓂᑐ ᐃᑌᔨᑕᑭ.
[4] ᒋᑫᒫ ᐊᓂᑭ ᑳ ᐃᑕᑭᐠ ᐯᔭᑳᐧᐤ ᓵᓴᐩ ᑳ ᑭ ᐋᐧᐢᑌᕽ ᐃᑕᑎᐦᒋᐠ ᒥᓇ ᑳ ᑭ ᑯᒋᐢᑕᑭᐠ ᑭᐦᒋ ᑭᓯᑯᐃᐧ ᒣᑭᐃᐧᐣ, ᒥᓇ ᑳ ᑭ ᐃᐧᒋᐃᐁᐧᒋᐠ ᑳ ᑲᓈᑎᓯᔨᐟ ᐊᐦᒑᐦᑲᐧ,
[5] ᒥᓇ ᑳ ᑭ ᑯᒋᐢᑕᑭᐠ ᐁ ᐃᓯ ᒥᔮᐧᓯᓂᔨᐠ ᑭᓭᒪᓂᑐ ᐅᐟ ᐃᑌᐧᐃᐧᐣ, ᒥᓇ ᐁ ᐃᓯ ᓱᑫᔨᑖᑲᐧᕽ ᐊᓂᒪ ᐱᒫᑎᓯᐃᐧᐣ ᓂᑳᐣ ᑳ ᐊᔮᐠ,
[6] ᐁᑲᐧ ᒫᑲ ᑳ ᐸᐦᑭᓯᐦᑭᐠ ᐅᐦᐱᒣ; ᓇᒪᐃᐧᔭ ᑭᑕ ᑭ ᐃᐦᑭᐣ ᑳᐃᐧ ᒥᓇ ᑭᑕ ᐅᐢᑭ ᐅᓯᐃᐦᒋᐠ ᑫᐧᐢᑳᑎᓯᐃᐧᓂᕽ ᐃᓯ; ᒋᑫᒫ ᑭᑖᐧᑦ ᐁ ᒋᐢᑕᐦᐋᐢᑳᐧᑕᒫᓱᒋᐠ ᑭᓭᒪᓂᑐ ᐅᑯᓯᓴ, ᒥᓇ ᒧᓯᐢ ᐁ ᓇᓀᐯᐃᐧᐋᒋᐠ.
[7] ᐃᐧᔭ ᐊᐢᑭ ᑳ ᒥᓂᑫᐧᒪᑲᕽ ᑭᒥᐊᐧᓈᐳ ᒥᐦᒉᑖᐧᐤ ᑳ ᐸᑭᑎᕽ, ᒥᓇ ᑳ ᐅᐱᑭᑖᒪᑲᕽ ᓂᐦᑖᐃᐧᑭᒋᑲᓇ ᑭᑕ ᒥᔮᐧᐸᒋᐃᑯᒋᐠ ᐊᓂᑭ ᑳ ᐱᑯᐱᑕᒪᒋᐠ, ᓴᐁᐧᔨᑖᑯᐃᐧᐣ ᑭᓭᒪᓂᑐᕽ ᐅᐦᑎᓇᒧᒪᑲᐣ;
[8] ᒫᑲ ᑭᐢᐱᐣ ᐅᐱᑭᑖᒪᑲᑭ ᒪᓵᓂᐠ ᒥᓇ ᑳᐃᐧᒥᓇᑲᓯᔭ ᐋᑕᐁᐧᔨᑖᑲᐧᐣ ᒥᓇ ᐊᑎ ᒪᒐᑭᑌᐤ; ᐁᐊᐧᑯ ᐱᔨᐢ ᑭᓯᐸᓄᕽ ᑭᑕ ᑭᓯᑌᐠ.
[9] ᒫᑲ ᓯᔮᑭᐦᐃᑕᑯᐠ ᓇᐊᐧᐨ ᒥᔪ ᑫᑲᐧᔭ ᑭᔭᐋᐧᐤ ᑭᐟ ᐃᑕᑌᔨᑕᒫᑎᓈᐣ ᒥᓇ ᐊᓂᐦᐃ ᐱᒫᑎᓯᐃᐧᓂᕽ ᑳ ᐃᐧᒋᐃᐁᐧᒪᑲᑭ, ᐋᑕ ᐅᒪ ᑳ ᐃᓯ ᐱᑭᐢᑫᐧᔮᕽ;
[10] ᒋᑫᒫ ᓇᒪᐃᐧᔭ ᐁᑳ ᑲᐧᔭᐢᑭᑖᑎᓯᐤ ᑭᓭᒪᓂᑐ ᐁᑯᓯ ᓇᒪᐃᐧᔭ ᑭᑕ ᐊᐧᓂᑫᐤ ᑭᐟ ᐊᑐᐢᑫᐃᐧᓂᐋᐧᐤ ᒥᓇ ᓵᑭᐦᐃᐁᐧᐃᐧᐣ ᑳ ᑭ ᐋᐧᐸᐦᑕᐦᐃᐁᐧᔦᐠ ᐅ ᐃᐧᔪᐃᐧᓂᕽ ᐊᓂᒪ ᐁ ᑭ ᐸᒥᐢᑕᐋᐧᔦᑯᐠ ᐅᑲᓈᑎᓯᐊᐧᐠ ᐁᑯᓯ ᑫᔮᐱᐨ ᐁ ᐸᒥᐢᑕᐋᐧᔦᑯᐠ.
[11] ᐁᑯᓯ ᓂ ᓇᑕᐁᐧᔨᑌᓈᐣ ᑲᐦᑭᔭᐤ ᑭᑕ ᐋᐧᐸᐦᑕᐦᐃᐁᐧᔦᐠ ᐁᐊᐧᑯ ᑫᔮᐱᐨ ᐋᑲᒣᔨᒧᐃᐧᐣ ᐱᔨᐢ ᑭᑕ ᑭᓯᐸᔨᐠ ᑳ ᐸᑯᓭᔨᒧᕽ ᑭᓯᐸᓄᕽ ᐃᐢᑯ;
[12] ᐁᑳ ᑭᑕ ᐸᐯᓄᑫᓯᔦᐠ, ᒫᑲ ᑭᑕ ᑭᐢᑭᓇᐋᐧᐸᒫᔦᑯᐠ ᐊᓂᑭ ᑖᐯᐧᔦᔨᑕᒧᐃᐧᐣ ᒥᓇ ᓯᐯᔨᑕᒧᐃᐧᐣ ᐅᐦᒋ ᑳ ᑭ ᐊᔮᒋᐠ ᐊᓱᑕᒫᑯᐃᐧᓇ.
[13] ᒋᑫᒫ ᐃᐢᐱ ᑭᓭᒪᓂᑐ ᐁᓱᑕᒪᐋᐧᐟ ᐁᑊᕒᐁᐋᒪ, ᐊᔨᐢ ᐁᑳ ᑯᑕᑲ ᐊᐊᐧᓯᒣ ᐁ ᑭᐦᒑᔨᐃᐧᔨᐟ ᐁ ᐃᑖᔨᐟ ᑭᑕ ᑭ ᐊᐢᐱᒧᐟ ᐃᐧᔭ ᑫᐦᒋᐋᐧᐠ ᐁ ᐊᐢᐱᒧᐟ ᑭ ᑭᐦᒋ ᐃᑌᐧᐤ,
[14] ᐁ ᐃᑌᐧᐟ, ᑫᒋᓈ ᐁ ᓴᐁᐧᔨᒋᑫᔮᐣ ᑭ ᑲ ᓴᐁᐧᔨᒥᑎᐣ, ᒥᓇ ᐁ ᒥᒉᑐᐃᐁᐧᔮᐣ ᑭ ᑲ ᒥᐦᒉᑐᐃᑎᐣ.
[15] ᐁᑯᓯ ᒫᑲ ᐃᓯ, ᓯᐯᔨᑕᒧᐃᐧᓂᕽ ᐁ ᑭ ᐯᐅᐟ, ᑭ ᐊᔮᐤ ᐊᓱᑕᒫᑯᐃᐧᐣ.
[16] ᒋᑫᒫ ᐊᔨᓯᔨᓂᐊᐧᐠ ᐁ ᑭᐦᒋ ᐃᑌᐧᒋᐠ ᐊᓂᐦᐃ ᐊᔨᐋᐧᐠ ᐁ ᑭᐢᑌᔨᑖᑯᓯᔨᐟ ᐊᐢᐱᒧᐊᐧᐠ; ᐁᑯᓯ ᑕᐦᑖᐧᐤ ᐁ ᐋᓀᐧᑖᑐᒋᐠ ᑭᐦᒋ ᐃᑌᐧᐃᐧᐣ ᐅᑎᓂᑳᑌᐤ ᑭᑕ ᐋᔮᒋᒋᑫᒪᑲᕽ.
[17] ᐃᑕ ᑭᓭᒪᓂᑐ ᐁ ᐃᑌᔨᑕᕽ ᐊᐊᐧᓯᒣ ᑭᑕ ᐁᐧᔪᒋ ᐋᐧᐸᐦᑕᐋᐟ ᐊᓂᐦᐃ ᑫ ᐋᓂᐢᑫ ᐊᔮᔨᐟ ᐊᓱᑕᒫᑯᐃᐧᐣ ᐁ ᐃᓯ ᑫᒋᓈᑕᓂᔨᐠ ᐅᐟ ᐃᑕᓱᐁᐧᐃᐧᐣ ᑭ ᑭᑭᓇᑦ ᑭᐦᒋ ᐃᑌᐧᐃᐧᐣ;
[18] ᐁᑯᓯ ᐃᓯ ᓂᓱ ᐁ ᑫᒋᓈᑕᑭ ᑫᑲᐧᔭ, ᐃᑕ ᐁᑳ ᑭᑕ ᑭ ᐃᑭᕽ ᑭᓭᒪᓂᑐ ᐱᑯᓇᑕ ᑭᑕ ᐃᑌᐧᐟ, ᒪᐢᑲᐃᐧ ᒋᑫᔨᑕᒧᐃᐧᐣ ᑭᑕ ᐊᔮᔭᕽ ᑳ ᑭ ᓈᑖᒧᑐᑕᒪᕽ ᑭᑕ ᐅᑎᑎᓇᒪᕽ ᐊᓂᒪ ᐊᐢᐯᔨᒧᐃᐧᐣ ᑳ ᐅᑎᐢᑲᐊᐧᐢᑖᐧᑲᐃᐧᔭᕽ;
[19] ᐁᐊᐧᑯ ᑳ ᐊᔮᔭᕽ ᑖᐱᐢᑯᐨ ᐁᑯᑕ ᐁ ᒋᐢᑖᐹᓱᐟ ᑭᐟ ᐊᐦᒑᐦᑯᓇᐤ, ᐁᐊᐧᑯ ᐊᐢᐯᔨᒧᐃᐧᐣ ᐁ ᑫᒋᓈᑕᕽ ᒥᓇ ᐁ ᐋᔮᑕᕽ ᒥᓇ ᐁ ᐱᐦᑐᑫᒪᑲᕽ ᐊᓂᑕ ᐱᐦᒋ ᐋᑯᐁᑲᐃᑲᓂᕽ;
[20] ᐃᑌ ᑖᐱᐢᑯᐨ ᐁ ᓂᑳᓄᑖᑫᐟ ᒋᓴᐢ ᑳ ᐱᐦᑐᑫᐟ ᑭᔮᓇᐤ ᐅᐦᒋ, ᐁ ᑭᐦᒋ ᐊᔭᒥᐦᐁᐃᐧᔨᓂᐃᐧᐟ ᑳᑭᑫ ᑳ ᑭ ᐃᓯ ᐅᔭᑭᒥᐦᐟ ᒣᓬᑭᓯᑌᐠ.