[1] ᑖᐯᐧᔦᔨᑕᒧᐃᐧᐣ ᒫᑲ ᐁᐊᐧᑯ ᐁ ᑫᒋᓈᔦᔨᑕᒥᕽ ᐊᓂᐦᐃ ᑳ ᐸᑯᓭᔨᒧᕽ, ᐁ ᑯᑌᔨᑕᒥᕽ ᐊᓂᐦᐃ ᐁᑳ ᑳ ᐋᐧᐸᒋᑳᑌᑭ.
[2] ᒋᑫᒫ ᐁᐊᐧᑫᐧᔨᐤ ᐅᐦᒋ ᑳ ᓂᑳᓀᔨᑖᑯᓯᒋᐠ ᑭ ᒥᔪ ᐋᒋᒥᑯᐃᐧᓯᐊᐧᐠ.
[3] ᑖᐯᐧᔦᔨᑕᒧᐃᐧᐣ ᐅᐦᒋ ᑭ ᓂᓯᑐᑌᓈᓇᐤ ᐊᐢᑭᔭ ᐁ ᑭ ᐅᓯᒋᑳᑌᑭ ᐅᐟ ᐃᑌᐧᐃᐧᐣ ᐅᐦᒋ ᑭᓭᒪᓂᑐ, ᐁᑯᓯ ᐊᓂᐦᐃ ᑳ ᐋᐧᐸᒋᑳᑌᑭ ᐁᑳ ᐁ ᑭ ᐅᓯᒋᑳᑌᑭ ᐊᓂᐦᐃ ᑳ ᓄᑲᐧᑭ ᐅᐦᒋ.
[4] ᑖᐯᐧᔦᔨᑕᒧᐃᐧᐣ ᐅᐦᒋ ᐁᐱᓬ ᑭ ᐸᑭᑎᓇᑦ ᐊᐊᐧᓯᒣ ᐁ ᑭᐢᑕᑭᑌᐠ ᒪᒍᐢᑌᐊᒫᑫᐃᐧᐣ ᐃᔨᑯᕽ ᑫᐣ, ᐁᑯᑕ ᒫᑲ ᐅᐦᒋ ᑭ ᐋᒋᒥᑯᐃᐧᓯᐤ ᐁ ᑲᐧᔭᐢᑳᐧᑎᓯᐟ, ᑭᓭᒪᓂᑐᐊᐧ ᐁ ᐋᒋᒥᑯᐟ ᐁ ᑭᐢᑕᑭᑕᒥᔨᐟ ᐅ ᒣᑭᐃᐧᓇ; ᐁᑯᓯ ᐁᐊᐧᑫᐧᔨᐤ ᐅᐦᒋ ᐁ ᐋᑕ ᓂᐱᐟ ᐁᔨᐁᐧᕽ ᐱᑭᐢᑫᐧᐤ.
[5] ᑖᐯᐧᔦᔨᑕᒧᐃᐧᐣ ᐅᐦᒋ ᐃᓈᐠ ᑭ ᐋᓱᐊᐢᑫᐋᐤ ᐁᑳ ᑭᑕ ᐋᐧᐸᐦᑕᕽ ᓂᐳᐃᐧᐣ; ᐁᑯᓯ ᓇᒪᐃᐧᔭ ᑭ ᒥᐢᑲᐋᐧᐤ ᒋᑫᒫ ᑭᓭᒪᓂᑐᐊᐧ ᐁ ᑭ ᒥᐢᑯᑕᐢᑫᐃᑯᐟ; ᐃᐧᔭ ᒪᐧᔦᐢ ᒥᐢᑯᑕᐢᑫᐃᐦᐟ ᑭ ᐊᔮᐤ ᐅᐟ ᐋᒋᒥᑯᐃᐧᐣ ᐁ ᑭ ᓇᐦᐃᔭᐁᐧᐋᐟ ᑭᓭᒪᓂᑐᐊᐧ;
[6] ᒫᑲ ᐁᑳ ᐁ ᐃᐦᑕᑲᐧᕽ ᑖᐯᐧᔦᔨᑕᒧᐃᐧᐣ ᓇᒪᐃᐧᔭ ᑭᑕ ᑭ ᓇᐦᐃᔭᐁᐧᐃᐦᐟ; ᒋᑫᒫ ᐊᓇ ᑳ ᓈᑖᐟ ᑭᓭᒪᓂᑐᐊᐧ ᐱᑯ ᑭᑕ ᑖᐯᐧᑕᕽ ᐁ ᐃᑖᔨᐟ ᒥᓇ ᐁ ᑎᐸᐊᒪᐋᐧᐟ ᐊᓂᐦᐃ ᑳ ᓇᓈᑐᓈᑯᐟ.
[7] ᑖᐯᐧᔦᔨᑕᒧᐃᐧᐣ ᐅᐦᒋ ᓄᐊ, ᐁ ᑭ ᓂᔮᐠ ᐊᔮᑳᐧᒥᒥᑯᐟ ᑭᓭᒪᓂᑐᐊᐧ ᐊᓂᐦᐃ ᐅᐦᒋ ᐁᑳ ᒉᐢᑲᐧ ᐁ ᓄᑲᐧᓂᔨᑭ, ᐁ ᓯᑭᐢᑳᑯᐟ ᒪᓂᑐᐃᐧ ᐊᐢᑖᓯᐃᐧᐣ, ᑭ ᑲᐧᔮᒋᑖᐤ ᓈᐱᑳᐧᐣ ᐃᑕ ᑭᑕ ᐱᒫᒋᐦᐋᐟ ᐃᐧᑭᕽ ᑳ ᐊᔮᔨᐟ; ᐁᐊᐧᑫᐧᔨᐤ ᐅᐦᒋ ᑭ ᓈᓂᐳᒣᐤ ᐊᐢᑭᕽ ᑳ ᐊᔮᔨᐟ ᒥᓇ ᑭ ᒥᔨᑯᐃᐧᓯᐤ ᐊᓂᒪ ᑲᐧᔭᐢᑳᐧᑎᓯᐃᐧᐣ ᑖᐯᐧᔦᔨᑕᒧᐃᐧᓂᕽ ᑳ ᐃᑕᐢᑌᐠ
[8] ᑖᐯᐧᔦᔨᑕᒧᐃᐧᐣ ᐅᐦᒋ ᐁᑊᕒᐁᐋᑦ ᐃᐢᐱ ᐁ ᓇᑐᒥᐦᐟ ᑭ ᓇᓇᐃᑕᑦ ᑭᑕ ᐃᑐᐦᑌᐟ ᐃᑕ ᑫ ᒥᔨᐦᐟ ᑭᑕ ᐅᑕᐢᑭᐃᐧᓂᑳᐟ; ᐁᑯᓯ ᑭ ᓯᐯᐧᑌᐤ ᐁᑳ ᐁ ᑭᐢᑫᔨᑕᕽ ᑖᓂᑌ ᑳ ᐃᑐᐦᑌᐟ.
[9] ᑖᐯᐧᔦᔨᑕᒧᐃᐧᐣ ᐅᐦᒋ ᑭ ᐊᔭᔮᐤ ᐁᑯᑕ ᐊᐢᑭᕽ ᑳ ᑭ ᐊᓱᑕᒫᐦᐟ, ᑖᐱᐢᑯᐨ ᐁᑳ ᐁ ᑎᐱᔭᐁᐧᐃᐧᓯᐟ ᐊᐢᑭ, ᒥᑭᐋᐧᐱᕽ ᐁ ᐊᐧᐃᐧᑭᐟ, ᑭᑭ ᐋᐃᓴᐠ ᒥᓇ ᒉᑲᑊ ᐁᐊᐧᑯᓂ ᐁ ᐋᓂᐢᑫᐢᑲᒫᑯᐟ ᐊᓂᒪ ᐊᓱᑕᒫᑯᐃᐧᐣ;
[10] ᒋᑫᒫ ᑭ ᐊᓴᐋᐧᐸᐦᑕᑦ ᐊᓂᒪ ᐅᑌᓇᐤ ᑳ ᐋᔮᑕᐢᑌᔨᐠ ᐊᓇ ᑳ ᑭ ᐅᔭᐢᑖᐟ ᒥᓇ ᑳ ᑭ ᐅᓯᑖᐟ ᐁᐊᐧᑯ ᑭᓭᒪᓂᑐ.
[11] ᑖᐯᐧᔦᔨᑕᒧᐃᐧᐣ ᐅᐦᒋ ᐃᐧᔭ ᓭᕒᐊ ᐊᐦᐳ ᑭ ᒥᔨᑯᐃᐧᓯᐤ ᒪᐢᑲᐃᐧᓯᐃᐧᐣ ᑭᑕ ᐊᔮᐋᐧᐟ ᐊᐋᐧᓯᓴ ᓵᓴᐩ ᐁ ᒪᔮᐢᑲᒧᐸᔨᔨᐠ ᐃᔨᑯᕽ ᐁ ᐃᐢᐱᑎᓯᐟ, ᒋᑫᒫ ᑖᐯᐧᐤ ᑭ ᐃᑕᑭᒣᐤ ᐊᓂᐦᐃ ᑳ ᑭ ᐊᓱᑕᒫᑯᐟ;
[12] ᐁᑯᓯ ᒫᑲ ᑭ ᐅᐦᒋᔨᐊᐧ ᐁᐊᐧᑯ ᐁ ᐯᔭᑯᐟ ᑖᐱᐢᑯᐨ ᒫᑲ ᐁ ᓂᐱᐟ ᐁ ᐃᓯ ᐊᔮᐟ, ᐁ ᐃᓯ ᒥᐦᒉᑎᔨᐟ ᑖᐱᐢᑯᐨ ᐊᒐᐦᑯᓴᐠ ᑭᓯᑯᕽ ᒥᓇ ᑖᐱᐢᑯᐨ ᔦᑲᐤ ᐋᐧᓴᑳᑦ ᑭᐦᒋᑲᒥᕽ ᐁᑳ ᑭᑕ ᑭ ᐊᑭᑌᐠ.
[13] ᑲᐦᑭᔭᐤ ᐅᑭ ᑭ ᓂᐱᐊᐧᐠ ᑖᐯᐧᔦᔨᑕᒧᐃᐧᓂᕽ, ᐁᑳ ᐁ ᑭ ᐅᐦᒋ ᒥᔨᐦᒋᐠ ᐊᓱᑕᒫᑯᐃᐧᓇ, ᒫᑲ ᐁ ᑭ ᐋᐧᐸᐦᑕᐦᑭᐠ ᒥᓇ ᐁ ᑭ ᒥᔦᐧᔨᑕᒥᐃᑯᒋᐠ ᐋᐧᔭᐤ ᐅᐦᒋ ᐁᑯᓯ ᐁ ᑭ ᐃᑖᒋᒥᓱᒋᐠ ᐊᐢᑭᕽ ᐃᐧᔭ ᐁ ᒫᓂᑌᐃᐧᒋᐠ ᒥᓇ ᐁ ᐱᒧᐦᑌᐅᒋᐠ.
[14] ᒋᑫᒫ ᐊᓂᑭ ᐁᑯᓯ ᑳ ᐃᑌᐧᒋᐠ ᓄᑯᑖᐊᐧᐠ ᐁ ᓇᑐᓇᑭᐠ ᐃᑕ ᑎᐱᔭᐤ ᑭᑕ ᐅᐟ ᐊᐢᑭᒋᐠ.
[15] ᒫᑲ ᑖᐯᐧ ᑭᐢᐱᐣ ᑭ ᒫᒥᑐᓀᔨᑕᒥᐃᑯᒋᐠ ᐊᓂᒪ ᐊᐢᑭ ᐃᑕ ᑳ ᑭ ᐅᐦᒋ ᓯᐯᐧᑌᒋᐠ ᐅ ᑲ ᑭ ᑭᐋᐧᑖᐋᐧᐤ.
[16] ᒫᑲ ᐁᑲᐧ ᓄᐦᑌ ᐊᔮᐊᐧᐠ ᓇᐊᐧᐨ ᐁ ᒥᔮᐧᓯᐠ ᐊᐢᑭ, ᐁᐊᐧᑯ ᐁ ᑭᐦᒋ ᑭᓯᑯᐊᐧᕽ; ᐁᑯᓯ ᒫᑲ ᓇᒪᐃᐧᔭ ᑭᓭᒪᓂᑐ ᓇᓀᐯᐃᐧᓯᐤ ᐅ ᑭᓭᒪᓂᑐᒥᐋᐧᐊᐧ ᑭᑕ ᐃᓯᔨᐦᑳᑎᐦᐟ; ᒋᑫᒫ ᐅᑌᓇᐤ ᑭ ᑲᐧᔮᒋᑕᒪᐁᐧᐤ.
[17] ᑖᐯᐧᔦᔨᑕᒧᐃᐧᐣ ᐅᐦᒋ ᐁᑊᕒᐁᐊᑦ, ᐁ ᑲᑫᐧᒋᐃᐦᐟ, ᑭ ᐸᑭᑎᓀᐤ ᐋᐃᓴᑲ; ᐁᐦᐁ ᐊᓇ ᑳ ᑭ ᒪᒪᐦᑖᑯᓯᐟ ᐁ ᒥᔨᐦᐟ ᐊᓱᑕᒫᑯᐃᐧᓇ ᑭ ᐸᑭᑎᓀᐤ ᐁ ᐯᔭᑯᔨᐟ ᐅᑯᓯᓴ;
[18] ᐃᐧᔭ ᑳ ᑭ ᐃᑎᐦᐟ, ᐋᐃᓴᐠ ᐁ ᐅᐦᒋᒋᐠ ᑭᐟ ᐊᐋᐧᓯᒥᓴᐠ ᑭᑕ ᐃᑖᐊᐧᐠ;
[19] ᐁ ᐃᑕᑭᐦᒋᑫᐟ ᑭᓭᒪᓂᑐᐊᐧ ᐁ ᑲᐢᑭᑖᔨᐟ ᑭᑕ ᐊᐧᓂᐢᑳᓈᔨᐟ, ᐊᐦᐳ ᓂᐳᐃᐧᓂᕽ ᐅᐦᒋ; ᐃᑕ ᐅᐦᒋ ᐁ ᐋᐁᐧᒋᑫᕽ ᐃᐧᔭ ᑳ ᑭ ᐅᐦᑎᓈᐟ ᑳᐃᐧ.
[20] ᑖᐯᐧᔦᔨᑕᒧᐃᐧᐣ ᐅᐦᒋ ᐋᐃᓴᐠ ᑭ ᒥᔭᐧᑭᒣᐤ ᒉᑲᐸ ᒥᓇ ᐃᓵᐊᐧ, ᐁ ᒫᒥᐢᑯᑕᕽ ᐊᓂᐦᐃ ᓂᑳᐣ ᑳ ᐊᔮᔨᑭ.
[21] ᑖᐯᐧᔦᔨᑕᒧᐃᐧᐣ ᐅᐦᒋ ᒉᑲᑊ ᐃᐢᐱ ᐁ ᐊᑎ ᐳᓂ ᐱᒫᑎᓯᐟ, ᑭ ᒥᔭᐧᑭᒣᐤ ᐁ ᐃᓯ ᓂᓯᔨᐟ ᒍᓯᐸ ᐅᑯᓯᓯᔨᐊᐧ; ᐁᑯᓯ ᑭ ᐊᔭᒥᐦᐋᐤ ᐁ ᐋᐢᐸᒋᐟ ᐁ ᑭᓯᐹᐢᑲᐧᓂᔨᐠ ᐅ ᓴᐢᑲᐅᓈᑎᐠ.
[22] ᑖᐯᐧᔦᔨᑕᒧᐃᐧᐣ ᐅᐦᒋ ᒍᓯᑊ, ᐃᐢᐱ ᐁ ᐯᓱᓈᑲᐧᓂᔨᐠ ᑭᑕ ᐳᓂ ᐃᑖᐟ ᑭ ᒫᒥᐢᑯᑕᑦ ᑭᑕ ᓯᐯᐧᑌᔨᐟ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᒥᓇ ᑭ ᐅᔭᓱᐋᐧᑕᑦ ᐅᐢᑲᓇ.
[23] ᑖᐯᐧᔦᔨᑕᒧᐃᐧᐣ ᐅᐦᒋ ᒧᓯᐢ ᐃᐢᐱ ᐁ ᓂᐦᑖᐃᐧᑭᐟ, ᑭ ᑳᑎᐠ ᐅᓂᑭᐃᑲᐧ ᓂᐢᑐ ᐱᓯᑦ, ᒋᑫᒫ ᐋᐧᐸᒣᐊᐧᐠ ᑲᑕᐊᐧ ᐁ ᐃᓯ ᐊᐋᐧᓯᓯᐃᐧᔨᐟ; ᐁᑯᓯ ᓇᒪᐃᐧᔭ ᑯᐢᑕᒪᐧᐠ ᑭᐦᒋ ᐅᑭᒫᐊᐧ ᐅᔭᓱᐁᐧᐃᐧᓂᔨᐤ.
[24] ᑖᐯᐧᔦᔨᑕᒧᐃᐧᐣ ᐅᐦᒋ ᒧᓯᐢ, ᐃᐢᐱ ᐁ ᑭᓯ ᐅᐦᐱᑭᐟ ᑭ ᐋᓀᐧᑕᒼ ᐯᕒᐅ ᐅᑖᓂᓴ ᐅᑯᓯᓯᔨᐊᐧ ᑭᑕ ᐃᓯᔨᐦᑳᑎᐦᐟ;
[25] ᓇᐊᐧᐨ ᐁ ᐃᑌᔨᑕᕽ ᑭᑕ ᒫᔨᑐᑖᐦᐟ ᐁ ᐃᐧᒉᐋᐧᐟ ᑭᓭᒪᓂᑐ ᐅᐟ ᐃᔨᓂᒪ, ᐃᔨᑯᕽ ᐃᐧᔭ ᑭᑕ ᒥᔭᐋᐧᑎᑯᑖᐟ ᐁ ᐃᓯ ᒥᔦᐧᔨᑖᑲᐧᕽ ᒪᒋᑎᐃᐧᐣ ᐊᒋᔭᐤ;
[26] ᐊᐊᐧᓯᒣ ᑭᐦᒋ ᐁᐧᔪᑎᓯᐃᐧᐣ ᐁ ᐃᑕᑭᑕᕽ ᑭᑕ ᒫᔨ ᐃᑎᐦᐟ ᙭ ᐅᐦᒋ ᐃᔨᑯᕽ ᒫᐊᐧᒋᓱᓂᔮᐁᐧᐃᐧᐣ ᐃᒋᑊᑎᕽ; ᒋᑫᒫ ᑭ ᑲᓇᐋᐧᐸᐦᑕᑦ ᑳ ᐃᓯ ᐅᐦᑎᓯᕽ ᑎᐸᐦᐊᒫᑯᐃᐧᐣ.
[27] ᑖᐯᐧᔦᔨᑕᒧᐃᐧᐣ ᐅᐦᒋ ᑭ ᓇᑲᑖᒧᑐᑕᑦ ᐃᒋᑊᐟ ᐊᐢᑭ, ᐁᑳ ᐁ ᑯᐢᑕᒫᐧᐟ ᐅ ᑭᓯᐋᐧᓯᐃᐧᓂᔨᐤ ᑭᐦᒋ ᐅᑭᒫᐊᐧ; ᒋᑫᒫ ᑭ ᓯᐯᔨᑕᑦ ᐁ ᐋᐧᐸᒫᐟ ᐊᓂᐦᐃ ᐁᑳ ᑳ ᓄᑯᓯᔨᐟ.
[28] ᑖᐯᐧᔦᔨᑕᒧᐃᐧᐣ ᐅᐦᒋ ᑭ ᑎᐱᑐᑕᑦ ᐊᓂᒪ ᒪᔮᐢᑳᑫᐃᐧᐣ, ᒥᓇ ᑳ ᐊᐧᓭᐧᐸᔨᑖᕽ ᒥᐦᑯ, ᐊᓂᐦᐃ ᑳ ᓂᓯᐊᐧᓈᒋᐋᔨᐟ ᓂᐢᑕᑦ ᓂᐦᑖᐃᐧᑭᐊᑲᓇ ᐁᑳ ᓇᐣᑕᐤ ᑭᑕ ᐃᑐᑖᑯᔨᐟ.
[29] ᑖᐯᐧᔦᔨᑕᒧᐃᐧᐣ ᐅᐦᒋ ᑭ ᓵᐳ ᐱᒧᐦᑌᐊᐧᐠ ᒥᑳᐧᑲᒥᐃᐧ ᐃᐧᓂᐯᑯᕽ ᑖᐱᐢᑯᐨ ᐁ ᐹᑲᐧᒑᐠ; ᐁᐊᐧᑫᐧᔨᐤ ᐃᒋᑊᓯᔮᓇᐠ ᐁ ᑲᑫᐧ ᐃᑐᑕᐦᑭᐠ ᑭ ᓂᓯᐊᐧᓈᒋᐦᐅᐊᐧᐠ.
[30] ᑖᐯᐧᔦᔨᑕᒧᐃᐧᐣ ᐅᐦᒋ ᐁ ᐋᐧᐢᑳᐃᑳᑌᐠ ᒉᕒᐃᑯ ᑭ ᐸᐦᑭᐦᑎᐣ, ᐃᐢᐱ ᑳ ᑌᑎᐱᐢᑲᒥᕽ ᑌᐸᑯᑊ ᑭᓯᑳᐤ.
[31] ᑖᐯᐧᔦᔨᑕᒧᐃᐧᐣ ᐅᐦᒋ ᕒᐁᐊᑊ ᐱᓯᑳᐧᑎᐢᑫᐧᐤ ᓇᒪᐃᐧᔭ ᑭᑭ ᓂᓯᐊᐧᓈᑎᓯᐤ ᐊᓂᐦᐃ ᐁᑳ ᑳ ᑖᐯᐧᑕᒥᔨᐟ ᒋᑫᒫ ᑲᐧᔭᐢᐠ ᐁ ᑭ ᐱᑐᑲᐋᐟ ᐅᓇᑕᐋᐧᑖᐊᐧ.
[32] ᑫᑲᐧᐩ ᒫᑲ ᐊᐊᐧᓯᒣ ᑫ ᐃᑌᐧᔮᐣ? ᒋᑫᒫ ᐅᓵᑦ ᑭᓀᐧᐢ ᑭᐢᐱᐣ ᐋᒋᒪᑭᐠ ᑭᑎᔭᐣ, ᐯᕒᐋᐠ, ᓵᑦᓴᐣ, ᒉᑊᑕ; ᒥᓇ ᑌᐱᐟ ᒥᓇ ᓵᑦᔪᐃᓬ ᒥᓇ ᐅᑭᐢᑭᐁᐧᐦᐃᑫᐊᐧᐠ;
[33] ᐁᐊᐧᑯᓂᐠ ᑖᐯᐧᔦᔨᑕᒧᐃᐧᐣ ᐅᐦᒋ ᑳ ᑭ ᓵᑯᒋᑖᒋᐠ ᐅᑌᓇᐃᐧᐃᐧᓇ, ᑳ ᑭ ᐊᑐᐢᑳᑕᐦᑭᐠ ᑲᐧᔭᐢᑭᑖᑎᓯᐃᐧᐣ, ᑳ ᑭ ᒥᔨᑯᐃᐧᓯᒋᐠ ᐊᓱᑕᒫᑯᐃᐧᓇ, ᑳ ᑭ ᑭᐸᐊᒫᐧᒋᐠ ᐅᑐᓂᔨᐊᐧ ᒥᐢᑕᑫᓯᐊᐧ,
[34] ᑳ ᑭ ᐋᐢᑕᐁᐧᐊᑭᐠ ᑳ ᐃᓯ ᒪᐢᑲᐃᐧᓯᒪᑲᕽ ᐃᐢᑯᑌᐤ, ᑳ ᑭ ᐸᐢᐱᒋᐠ ᐁ ᐃᓯ ᑭᓈᐠ ᐃᓴᐁᐧᐢᐠ ᐅᐦᒋ, ᐁ ᓀᓱᐃᐧᓯᒋᐠ ᑳ ᑭ ᐊᑎ ᒪᐢᑲᐃᐧᓯᐃᐦᒋᐠ, ᐊᑐᐢᑲᑦ ᑳ ᑭ ᐊᑎ ᒪᐢᑲᐃᐧᓯᒋᐠ ᓄᑎᓂᑫᐃᐧᓂᕽ, ᐁ ᑭ ᓯᐯᐧᔮᒧᑫᒋᐠ ᐅ ᓄᑎᓂᑫᒥᔨᐊᐧ ᐱᑐᐢ ᐊᔨᓯᔨᓂᐊᐧ.
[35] ᐃᐢᑫᐧᐊᐧᐠ ᑳᐃᐧ ᑭ ᒥᔮᐊᐧᐠ ᐁ ᐋᐱᓯᐃᒥᐦᐟ ᐊᓂᐦᐃ ᐃᐧᔭᐋᐧᐤ ᐅᐦᒋ ᐁ ᑭ ᓂᐱᔨᐟ; ᐁᑯᓯ ᑯᑕᑲᐠ ᑭ ᑯᑕᑭᐋᐊᐧᐠ, ᐁᑳ ᐁ ᐅᑎᓇᑭᐠ ᐸᐢᐱᐃᐧᐣ; ᑭᑕ ᐊᔮᒋᐠ ᐊᐊᐧᓯᒣ ᒥᔪ ᐋᐱᓯᓯᓄᐃᐧᐣ;
[36] ᑯᑕᑲᐠ ᒫᑲ ᑭ ᑯᑌᔨᑕᒪᐧᐠ ᐁ ᒣᑕᐋᐧᑳᑎᒋᐠ ᒥᓇ ᐁ ᐹᐸᓴᐢᑌᐅᐦᒋᐠ, ᐁᐦᐁ ᐊᐦᐳ ᐁ ᒪᒫᒋᑲᐧᐱᑎᒋᐠ ᒥᓇ ᐁ ᑭᐸᐅᐦᒋᐠ;
[37] ᑭ ᐱᒫᐧᐱᐢᑲᐋᐊᐧᐠ, ᑭ ᑭᐢᑭᐳᔮᐊᐧᐠ, ᑭ ᑲᑫᐧᒋᐋᐊᐧᐠ, ᑭ ᓂᐸᐦᐋᐊᐧᐠ ᐃᓴᐁᐧᐢᐠ ᐅᐦᒋ; ᑭ ᐸᐹ ᑭᑳᓵᑫᐊᐧᐠ ᒫᔭᑎᐦᑲᐧᔮᓇ ᒥᓇ ᐋᐧᐸᑎᑲᐧᔮᓂ; ᒥᑐᓂ ᐁ ᑭᑎᒫᑭᓯᒋᐠ, ᐁ ᑯᑕᑭᐦᐃᐦᒋᐠ, ᐁ ᒫᔨᑐᑖᐦᒋᐠ
[38] (ᐁᐊᐧᑯᓂᐠ ᐁᑳ ᐁ ᑌᐸᑫᔨᑖᑲᐧᕽ ᐅᒪ ᐊᐢᑭ ᐁᑯᑕ ᑭᑕ ᐊᔮᒋᐠ), ᐁ ᐸᐹᒫᒋᐅᒋᐠ ᐱᑲᐧᑕᐢᑭᕽ ᒥᓇ ᐊᐧᒋᕽ ᒥᓇ ᐋᐧᑎᕽ ᒥᓇ ᐁ ᐋᐧᐃᐧᐸᐢᑲᒥᑳᐠ ᐊᐢᑭ.
[39] ᐁᑯᓯ ᐅᑭ ᑲᐦᑭᔭᐤ, ᐁ ᑭ ᐋᒋᒥᐦᒋᐠ ᐅ ᑖᐯᐧᔦᔨᑕᒧᐃᐧᓂᐋᐧᐤ ᐅᐦᒋ ᓇᒪᐃᐧᔭ ᐅᐦᒋ ᒥᔮᐊᐧᐠ ᐊᓱᑕᒫᑯᐃᐧᐣ.
[40] ᑭᓭᒪᓂᑐ ᐁ ᑭ ᑲᐧᔮᒋᑖᐧᑯᔭᕽ ᓇᐊᐧᐨ ᒥᔪ ᑫᑲᐧᐩ ᐁᑯᓯ ᐁᑳ ᐁ ᐃᐧᒉᐋᐧᔭᑳᐧᐤ ᓇᒪᐃᐧᔭ ᑭᑕ ᑭ ᑭᓯᐃᑯᐃᐧᓯᒋᐠ.