[1] ᐁᑯᓯ ᒫᑲ ᑭᔮᓇᐤ ᒥᓇ, ᒋᑫᒫ ᐁ ᐋᐧᐢᑳᐢᑳᑯᔭᑯᐠ ᐁ ᐃᓯ ᐅᓵᒣᔭᑎᒋᐠ ᐅᑖᒋᒧᐊᐧᐠ, ᑭᔮᑦ ᐸᑭᑎᓇᑖᐠ ᑲᐦᑭᔭᐤ ᑫᑲᐧᐩ ᑳ ᐅᑕᒥᐃᑯᔭᕽ ᒥᓇ ᐊᓂᒪ ᒪᒋᐃᑎᐃᐧᐣ ᑳ ᐅᒉᑲᒥᐃᑯᔭᕽ, ᒥᓇ ᐱᒥᐸᑖᑖᐠ ᓯᐯᔨᑕᒧᐃᐧᓂᕽ ᐊᓂᒪ ᑲᑫᐧᒋᐢᑲᑎᑐᐃᐧᐣ ᑭ ᓂᑳᓂᒥᓈᕽ ᑳ ᐊᔮᐠ,
[2] ᐁ ᑲᓇᐋᐧᐸᒫᔭᕽ ᒋᓴᐢ ᑳ ᑭ ᒫᒋᑖᐟ ᒥᓇ ᑳ ᑭ ᒥᑐᓂᑖᐟ ᑭ ᑖᐯᐧᔦᔨᑕᒧᐃᐧᓂᓇᐤ, ᐁᐊᐧᑯ ᐊᓂᒪ ᒪᒪᐦᑖᑯᓯᐃᐧᐣ ᐅᐦᒋ ᐅ ᓂᑳᓂᒥᕽ ᑳ ᑲᐧᔮᑕᐢᑕᒫᐦᐟ ᑳ ᑭ ᓯᐯᔨᑕᕽ ᐱᒥᑖᐢᑯᐃᑲᐣ, ᐁ ᐱᐁᐧᔨᑕᕽ ᓇᓀᐯᐊᐧᑫᔨᑖᑯᓯᐃᐧᐣ ᐁᑯᓯ ᐁ ᑭ ᓇᐦᐊᐱᐟ ᑭᐦᒋᓂᐢᑭᕽ ᐅ ᑭᐦᒋ ᐊᐱᐃᐧᓂᔨᕽ ᑭᓭᒪᓂᑐᐊᐧ.
[3] ᒋᑫᒫ ᒫᒥᑐᓀᔨᒥᕽ ᐊᓇ ᑳ ᑭ ᓯᐯᔨᑕᕽ ᐁ ᒫᔨ ᐃᑎᑯᐟ ᐅᒪᒑᑎᓴ, ᐁᑳ ᑭᑕ ᐃᑫᔨᑕᒣᐠ ᐊᐦᐳ ᑭᑕ ᓄᑌᓯᓂᔦᐠ ᑭᐟ ᐊᐦᒑᐦᑯᐋᐧᕽ.
[4] ᓇᒣᐢᑲᐧ ᐃᐧᔭ ᑯᐦᒋ ᓂᐸᐃᐧᐢᑕᒫᓱᓈᐋᐧᐤ ᒥᐦᑯ ᐃᐢᑯ, ᐁ ᓄᑎᓇᒣᐠ ᒪᒋᐃᑎᐃᐧᐣ;
[5] ᒥᓇ ᑭ ᑭ ᐊᐧᓂᑭᐢᑭᓯᓈᐋᐧᐤ ᓯᑭᑫᒧᐃᐧᐣ ᑖᐱᐢᑯᐨ ᐁ ᐅᑯᓯᓯᐟ ᑳ ᐃᓯ ᓯᑭᒥᑯᔦᐠ, ᓂᑯᓭ, ᐁᑳᐃᐧᔭ ᔮᑫᔨᑕᑦ ᐅ ᑲᑫᐢᑭᒥᐁᐧᐃᐧᐣ ᑳ ᑎᐯᔨᐦᒋᑫᐟ, ᒥᓇ ᐁᑳᐃᐧᔭ ᐃᔨᒧᑫ ᐁ ᑲᑫᑕᐊᒫᐢᐠ;
[6] ᒋᑫᒫ ᐊᓂᐦᐃ ᑳ ᑎᐯᔨᐦᒋᑫᐟ ᑳ ᓵᑭᐋᐟ ᑲᑫᐢᑭᒣᐤ, ᒥᓇ ᐸᓴᐢᑌᐁᐧᐤ ᑲᐦᑭᔭᐤ ᐅᑯᓯᓴ ᑳ ᐅᑎᓈᐟ.
[7] ᑲᑫᐢᑭᒥᑯᐃᐧᐣ ᐅᐦᒋ ᑳ ᓯᐯᔨᑕᒣᐠ; ᑭᓭᒪᓂᑐ ᑭᐟ ᐃᓯ ᐸᒥᐃᑯᐋᐧᐤ ᑖᐱᐢᑯᐨ ᐁ ᐅᑯᓯᓯᕽ; ᒋᑫᒫ ᑖᓈᓇ ᐅᑯᓯᓯᒫᐤ ᐁᑳ ᐁ ᑲᑫᐢᑭᒥᑯᐟ ᐅᑖᐃᐧᔭ?
[8] ᒫᑲ ᑭᐢᐱᐣ ᐁᑳ ᐊᔮᔦᑯ ᑲᑫᐢᑭᒥᑯᐃᐧᐣ, ᐊᓂᒪ ᑲᐦᑭᔭᐤ ᑳ ᐃᓯᐃᑯᐃᐧᓯᕽ ᑭᑕ ᐃᐧᒋᐃᐁᐧᕽ, ᐁᑯᓯ ᐁᓵᓂ ᑭ ᐱᑲᐧᒋ ᓂᐦᑖᐃᐧᑭᓈᐋᐧᐤ ᓇᒪᐃᐧᔭ ᑖᐯᐧ ᐅᑯᓯᓯᒫᐊᐧᐠ ᑭᐟ ᐃᓯ ᐊᔮᓈᐋᐧᐤ.
[9] ᐁᑯᓯ ᒥᓇ ᑭ ᑭ ᐊᔮᐋᐧᓇᐊᐧᐠ ᑯᑖᐃᐧᓇᐊᐧᐠ ᑭ ᐃᐧᔮᓯᓈᕽ ᑭᑕ ᑲᑫᐢᑭᒥᑯᔭᑯᐠ, ᐁᑯᓯ ᑭ ᑭ ᑯᓯᑫᐧᔨᒫᓇᐊᐧᐠ; ᓇᒪ ᒋ ᒫᑲ ᐋᐧᐃᐧᐢ ᑭ ᑲ ᓇᓇᐃᑕᐋᐧᓇᐤ ᐊᓇ ᐊᐦᒑᐦᑯᐃᐧ ᐅᐦᑖᐃᐧᒫᐤ ᐁᑯᓯ ᑭᑕ ᐱᒫᑎᓯᔭᕽ?
[10] ᒋᑫᒫ ᐃᐧᔭᐋᐧᐤ ᒐᑲᐋᐧᓯᐢ ᑭᓯᑳᐋᐧ ᑭ ᑭ ᑲᑫᐢᑭᒥᑯᓇᐊᐧᐠ ᐁ ᐃᓯ ᒥᔮᐧᐱᓯᒥᑯᒋᐠ; ᒫᑲ ᐃᐧᔭ ᑭᑕ ᐋᐸᒋᐃᑯᔭᕽ, ᑭᑕ ᑭ ᐃᐧᒋᐃᐁᐧᔭᕽ ᐅ ᑲᓈᑎᓯᐃᐧᓂᕽ.
[11] ᑲᐦᑭᔭᐤ ᑲᑫᐢᑭᒥᑯᐃᐧᐣ ᐊᓄᐦᐨ ᐃᐧᔭ ᒣᑳᐧᐨ ᓇᒪᐃᐧᔭ ᒥᔦᐧᔨᑖᑲᐧᐣ ᒫᑲ ᐋᔨᒪᐣ; ᒫᑲ ᒣᐧᐢᑕᐢ ᐃᔨᑯᕽ ᓂᐦᑖᐃᐧᑭᑖᒪᑲᐣ ᐯᔭᑕᑫᔨᒧᐃᐧ ᒥᓂᓯᐃᐧᐃᐧᐣ ᐊᓂᑭ ᐁᑯᓯ ᑳ ᑭ ᐃᓯ ᐊᑐᐢᑲᐃᐦᒋᐠ ᑲᐧᔭᐢᑳᐧᑎᓯᐃᐧ ᒥᓂᓯᐃᐧᐃᐧᐣ ᐅᑎ.
[12] ᐁᑯᓯ ᒫᑲ ᐅᐱᓇᒧᐠ ᒪᒋᐦᒋᔭ ᑳ ᓂᒪᑯᑌᑭ ᒥᓇ ᒥᐦᒋᑲᐧᓇ ᑳ ᓇᓇᒥᐸᔨᑭ;
[13] ᐁᑯᓯ ᑲᐧᔭᐢᑲᐧᒧᑖᐠ ᒣᐢᑲᓇᐊᐧ ᑭᓯᑎᐋᐧᐊᐧ ᐅᐦᒋ ᐁᑳ ᒫᑲ ᐊᓇ ᑳ ᐊᐧᒋᐢᑳᐟ ᑭᑕ ᑯᑎᑯ ᐊᔮᐟ ᒫᑲ ᔮᔭᐤ ᑭᑕ ᐃᔨᓂᑲᐃᐦᐟ.
[14] ᐱᒥᑎᓴᐦᐊᒧᐠ ᑭᑕ ᐃᓯ ᒥᔪ ᐃᐧᒉᐋᐧᔦᐠ ᑲᐦᑭᔭᐤ ᐊᔨᓯᔨᓂᐤ, ᒥᓇ ᐊᓂᒪ ᑲᓈᒋᐅᐃᐧᐣ ᑭᐢᐱᐣ ᐁᑳ ᐁᐊᐧᑯ ᐁ ᐊᔮᕽ ᐁᑳ ᐊᐃᐧᔭᐠ ᑭᑕ ᑭ ᐋᐧᐸᒫᐟ ᑳ ᑎᐯᔨᐦᒋᑫᔨᐟ;
[15] ᐯᔭᑕᐠ ᐁ ᑲᓇᐋᐧᐸᐦᑕᒣᐠ ᐁᑳ ᐊᐃᐧᔭᐠ ᑭᑕ ᓄᑖᐢᑲᕽ ᐅ ᑭᓭᐋᐧᑎᓯᐃᐧᓂᔨᐤ ᑭᓭᒪᓂᑐᐊᐧ; ᐁᑳ ᐃᐧᓴᑭ ᐅᒉᐱᑭᐃᐧᐃᐧᐣ ᐁ ᐅᐱᑭᕽ ᑭᑕ ᒥᑯᐢᑳᒋᐃᑯᔦᐠ ᐁᑯᓯ ᐁᑯᑕ ᐅᐦᒋ ᒥᐦᒉᐟ ᑭᑕ ᐁᑳ ᐯᑭᓯᒋᐠ:
[16] ᐁᑳ ᑭᑕ ᐃᑖᐟ ᐅᐱᓯᑳᐧᑎᓯᐤ ᐊᐦᐳ ᐁᑳ ᐁ ᐊᔭᒥᐦᐋᐋᐧᑎᓯᐟ ᐊᔨᓯᔨᓂᐤ, ᑖᐱᐢᑯᐨ ᐃᓵ, ᐯᔭᑳᐧᐤ ᑭᑕ ᒥᒋᓱᐟ ᑳ ᑭ ᐅᐦᒋ ᐊᑖᐋᐧᑫᐟ ᐅᐢᑌᓯᒫᐃᐧᐃᐧᐣ.
[17] ᒋᑫᒫ ᑭ ᑭᐢᑫᔨᑌᓈᐋᐧᐤ ᒣᐧᐢᑕᐢ ᐃᔨᑯᕽ ᐃᐢᐱ ᐁ ᓄᐦᑌ ᐊᔮᐟ ᒥᔭᐧᑭᒥᑯᐃᐧᐣ, ᑭ ᐊᓭᓈᐤ (ᒋᑫᒫ ᓇᒪᐃᐧᔭ ᑭ ᒥᐢᑲᑦ ᑫᐧᐢᑳᑎᓯᐃᐧᐣ), ᐋᑕ ᐁ ᐋᑲᒥ ᓇᑐᓇᕽ ᐅᐦᒋᑲᐋᐧᐱᐃᐧᓂᕽ ᐊᐦᐳ.
[18] ᒋᑫᒫ ᓇᒪᐃᐧᔭ ᑯᑎᑌᓈᐋᐧᐤ ᐊᐧᒋ ᑭᑕ ᑭ ᓵᒥᓂᑳᑌᐠ, ᒥᓇ ᐁ ᑳᐧᑯᑌᐠ, ᒥᓇ ᑳ ᑲᐢᑭᑌᐋᐧᓇᐢᑳᐧᐠ, ᒥᓇ ᑳ ᐊᐧᓂᑎᐱᐢᑳᐠ, ᒥᓇ ᑳ ᑭᐢᑎᕽ,
[19] ᒥᓇ ᑳ ᑭᑐᒪᑲᕽ ᐱᐱᑲᐧᐣ, ᒥᓇ ᐁ ᐯᑖᑲᐧᑭ ᐃᑌᐧᐃᐧᓇ; ᐁᐊᐧᑯ ᐁ ᐯᑖᑲᕽ ᐊᓂᑭ ᑳ ᐯᐦᑕᐦᑳᐧᐠ ᑳ ᓇᑕᐁᐧᔨᑕᐦᑭᐠ ᐁᑳ ᑭᑖᐧᑦ ᒥᓇ ᑭᑕ ᑭᑐᑎᑯᒋᐠ;
[20] ᒋᑫᒫ ᓇᒪᐃᐧᔭ ᑭ ᓯᐯᔨᑕᒪᐧᐠ ᐊᓂᒪ ᑳ ᑭ ᐃᑕᓱᐋᐧᑎᐦᒋᐠ, ᑭᐢᐱᐣ ᐊᐦᐳ ᐱᓯᐢᑭᐤ ᓵᒥᐢᑲᑭ ᐊᐧᒋ ᑭᑕ ᐱᒫᐧᐱᐢᑲᐋᐤ;
[21] ᐁᑯᓯ ᐁ ᐃᓯ ᑯᐢᑖᒥᑯᓈᑳᐧᕽ ᒧᓯᐢ ᑭ ᐃᑌᐧᐤ, ᒥᐢᑕᐦᐃ ᓂ ᓭᑭᓯᐣ ᒥᓇ ᓂ ᓇᓇᒥᐸᔨᐣ;
[22] ᒫᑲ ᑯᑎᑌᓈᐋᐧᐤ ᓵᔭᐣ ᐊᐧᒋ, ᒥᓇ ᐅᑌᓇᐤ ᑳ ᐱᒫᑎᓯᐟ ᑭᓭᒪᓂᑐ, ᑭᐦᒋ ᑭᓯᑯᐃᐧ ᒉᕒᐅᓴᓬᐊᑦ, ᒥᓇ ᐁ ᐅᓵᒣᔭᑌᒋᐠ ᐅᑭᓯᑯᐊᐧᐠ,
[23] ᐁ ᒫᒪᐃᐧ ᒫᐊᐧᒋᐃᑐᒋᐠ ᒥᓇ ᐅᐟ ᐊᔭᒥᐦᐋᐃᐧ ᒫᐊᐧᒋᐃᑐᐃᐧᓂᐋᐧᐤ ᓂᐢᑕᑦ ᓂᐦᑖᐃᐧᑭᐋᑲᓇᐠ ᑳ ᒪᓯᓇᐃᑳᓱᒋᐠ ᑭᐦᒋ ᑭᓯᑯᕽ, ᒥᓇ ᑭᓭᒪᓂᑐ ᑳ ᒫᒪᐃᐧ ᐅᔭᓱᐁᐧᐟ, ᒥᓇ ᐅᐟ ᐊᐦᒑᐦᑯᐋᐧᐊᐧ ᑲᐧᔭᐢᐠ ᐁ ᐃᑖᑎᓯᒋᐠ ᐊᔨᓯᔨᓂᐊᐧᐠ ᐁ ᑭᓯᐃᑯᐃᐧᓯᒋᐠ
[24] ᒥᓇ ᒋᓴᐢ ᐅᓈᑕᒫᑫᐤ ᐅᐢᑭ ᐊᓱᑕᒫᑫᐃᐧᓂᕽ, ᒥᓇ ᐊᓂᒪ ᒥᐦᑯ ᑳ ᓴᓭᐧᐸᔨᑖᕽ ᐊᐊᐧᓯᒣ ᑳ ᒥᔪ ᐱᑭᐢᑫᐧᒪᑲᕽ ᐃᔨᑯᕽ ᐁᐱᓬ ᐅ ᒥᐦᑯ.
[25] ᒣᔮᑳᐧᑦ ᐁᑳ ᑭᑕ ᐋᓀᐧᑕᐋᐧᔦᐠ ᐊᓇ ᑳ ᐱᑭᐢᑫᐧᐟ. ᒋᑫᒫ ᑭᐢᐱᐣ ᓇᒪᐃᐧᔭ ᑭ ᐸᐢᐱᐊᐧᐠ ᐃᐢᐱ ᐁ ᐋᓀᐧᑕᐋᐧᒋᐠ ᐊᓂᐦᐃ ᑳ ᐊᔮᑳᐧᒥᒥᑯᒋᐠ ᐊᐢᑭᕽ, ᐋᐧᐃᐧᐢ ᒋ ᑭᔮᓇᐤ ᑭ ᑲ ᑭ ᐸᐢᐱᓈᓇᐤ ᑕᐦᑐ ᑳ ᐊᑎᒥᑳᐸᐃᐧᐢᑕᐋᐧᔭᕽ ᐊᓇ ᑳ ᑭᑐᑎᑯᔭᕽ ᑭᐦᒋ ᑭᓯᑯᕽ ᐅᐦᒋ;
[26] ᐁ ᐱᑭᐢᑫᐧᐟ ᐁᑯᐢᐱ ᑳ ᑭ ᓇᓇᒪᐢᑲᒥᑭᐸᔨᐠ ᐊᐢᑭ; ᒫᑲ ᐁᑲᐧ ᑭ ᐊᓱᑕᑦ ᐁ ᐃᑌᐧᐟ, ᑫᔮᐱᐨ ᐯᔭᑳᐧᐤ ᓂ ᑲ ᐃᓯᒋᑳᐣ ᑭᑕ ᐅᐦᒋ ᓇᓇᒥᐸᔨᐠ ᓇᒪᐃᐧᔭ ᐱᑯ ᐊᐢᑭ ᒫᑲ ᒥᓇ ᑭᓯᐠ.
[27] ᐅᒪ ᒫᑲ ᑳ ᐃᑌᐧᐟ ᑫᔮᐱᐨ ᐯᔭᑳᐧᐤ, ᑭᐢᑭᓇᐋᐧᒋ ᐃᐧᒋᑳᑌᐤ ᑭᑕ ᐅᐱᒣ ᐃᑎᓯᓂᑳᑎᑭ ᐊᓂᐦᐃ ᑳ ᐊᐧᐢᑲᐃᐧᐸᔨᑭ ᑖᐱᐢᑯᐨ ᐊᓂᐦᐃ ᑳ ᑭ ᐅᓯᒋᑳᑌᑭ, ᐁᑯᓯ ᐊᓂᐦᐃ ᐁᑳ ᑳ ᐊᐧᐢᑲᐃᐧᐸᔨᑭ ᑫᔮᐱᐨ ᑭᑕ ᐊᔮᑭ.
[28] ᐁᑯᓯ ᒫᑲ ᐁ ᒥᔨᑲᐃᐧᔭᕽ ᐅᑌᓇᐃᐧᐃᐧᐣ ᐁᑳ ᑭᑕ ᑭ ᐊᐧᐢᑲᐃᐧᓂᑳᑌᐠ, ᑭᔮᑦ ᐊᔮᑖᐠ ᓇᓈᐢᑯᒧᐃᐧᐣ ᑭᑕ ᑭ ᐅᐦᒋ ᐸᑭᑎᓇᒪᐋᐧᔭᕽ ᑭᓭᒪᓂᑐ ᐊᑐᐢᑫᐃᐧᐣ ᑭᑕ ᒥᔪᔭᐁᐧᐃᑯᐟ ᒪᓂᑐᐃᐧ ᐊᐢᑖᓯᐃᐧᓂᕽ ᒥᓇ ᐁ ᑯᓯᑫᐧᔨᒫᔭᕽ;
[29] ᒋᑫᒫ ᑭ ᑭᓭᒪᓂᑐᒥᓇᐤ ᐁᐊᐧᑯ ᑳ ᒣᐢᑎᑲᓱᐁᐧᐠ ᐃᐢᑯᑌᐤ.