[1] ᒋᑫᒫ ᐅᔭᓱᐁᐧᐃᐧᐣ ᐁ ᐊᔮᐠ ᐁ ᒋᑳᐢᑌᑎᑭ ᐊᓂᐦᐃ ᒥᔪ ᑭᑲᐧᔭ ᑫ ᐅᑎᐦᒋᐸᔨᑭ, ᓇᒫᐃᐧᔭ ᒫᑲ ᒣᒧᐦᐨ ᐁ ᐃᓯᓈᑲᐧᑭ ᐁᐊᐧᑯᓂ, ᓇᒪᐃᐧᔭ ᐃᐧᑳᐨ ᐊᓂᐦᐃ ᑫᔮᐱᐨ ᐸᑭᑎᓈᓱᐃᐧᓇ ᐅᐦᒋ ᑳ ᐸᑭᑎᓇᑭᐠ ᑕᐦᑐ ᐊᐢᑭ ᑭᑕ ᑭ ᐅᐦᒋ ᒪᒥᑐᓂᐋᒋᐠ ᐊᓂᐦᐃ ᑳ ᐯ ᓈᑕᒥᔨᐟ.
[2] ᑭᐢᐱᐣ ᐃᐧᔭ ᑭ ᐃᑭᕽ ᓇᒪ ᒋ ᐅ ᑲ ᑭ ᐳᓂ ᐸᑭᑎᓂᑳᑖᐋᐧᐤ, ᒋᑫᒫ ᐊᓂᑭ ᑳ ᐃᓯ ᐊᔭᒥᐦᐋᒋᐠ, ᐯᔭᑳᐧᐤ ᐁ ᑭ ᐯᑭᐦᐃᐦᒋᐠ ᓇᒪᐃᐧᔭ ᐊᐊᐧᓯᒣ ᐅ ᑲ ᑭ ᑭᐢᑫᔨᒥᓱᑖᐋᐧᐤ ᑭᑕ ᒪᒋᐃᑎᒋᐠ?
[3] ᒫᑲ ᐊᓂᐦᐃ ᑳ ᐃᓯ ᐸᑭᑎᓈᓱᕽ ᒪᓇ ᑭᐢᑭᓯᑐᒋᑳᑌᐊᐧ ᒪᒋᑎᐃᐧᓇ ᑕᐦᑐ ᐊᐢᑭ.
[4] ᒋᑫᒫ ᓇᒪᐃᐧᔭ ᑭᑕ ᑭ ᐃᐦᑭᐣ ᐅ ᒥᐦᑯᐋᐧᐤ ᒧᐢᑐᓴᐧᐠ ᒥᓇ ᐋᐧᐸᑎᑲᐧᐠ ᑭᑕ ᑭ ᐅᑎᓇᒧᒪᑲᑭ ᒪᒋᑎᐃᐧᐣ.
[5] ᐁᐊᐧᑯ ᐅᐦᒋ ᐃᐢᐱ ᐁ ᑕᑯᓯᕽ ᐊᐢᑭᕽ, ᑳ ᐃᑌᐧᐟ, ᐸᑭᑎᓈᓱᐃᐧᐣ ᒥᓇ ᐸᑭᑎᓂᑫᐃᐧᐣ ᓇᒪᐃᐧᔭ ᑭ ᓇᑕᐁᐧᔨᑌᐣ, ᒫᑲ ᒥᔭᐤ ᑭ ᑭ ᑲᐧᔮᒋᑕᒪᐃᐧᐣ;
[6] ᐁ ᒥᓯᐁᐧᔮᑭ ᒪᒍᐢᑌᐊᒫᑫᐃᐧᓇ ᒥᓇ ᐸᑭᑎᓈᓱᐃᐧᓇ ᒪᒋᑎᐃᐧᐣ ᐅᐦᒋ ᓇᒪᐃᐧᔭ ᑭ ᒥᔦᐧᔨᑌᐣ;
[7] ᐁᑳᐧ ᒫᑲ ᓂ ᑭ ᐃᑖᐧᐣ, ᒋᐢᐟ ᓂ ᐯ ᐃᑐᐦᑖᐣ (ᑎᑎᐯᑭᓂᑲᓂ ᒪᓯᓇᐦᐃᑲᓂᕽ ᓂᐟ ᐃᑕᓯᓇᐅᑲᐃᐧᐣ) ᑭᑕ ᐃᑐᑕᒫᐣ ᐁ ᐃᓯ ᓇᑕᐁᐧᔨᑕᒪᐣ, ᑭᓭᒪᓂᑐ.
[8] ᐅᒪ ᑳ ᐃᑌᐧᐟ, ᐸᑭᑎᓈᓱᐃᐧᓇ ᒥᓇ ᐸᑭᑎᓂᑫᐃᐧᓇ ᒥᓇ ᐁ ᒥᓯᐁᐧᔮᑭ ᒪᒍᐢᑌᐊᒫᑫᐃᐧᓇ ᒥᓇ ᐸᑭᑎᓈᓱᐃᐧᓇ ᒪᒋᑎᐃᐧᓇ ᐅᐦᒋ ᓇᒪᐃᐧᔭ ᑭ ᓇᑕᐁᐧᔨᑌᐣ ᒥᓇ ᓇᒪᐃᐧᔭ ᑯᐦᒋ ᒥᔦᐧᔨᑌᐣ (ᐁᐊᐧᑯᓂ ᑳ ᐸᑭᑎᓂᑳᑌᑭ ᐁ ᐃᑕᐢᑌᐠ ᐅᔭᓱᐁᐧᐃᐧᐣ),
[9] ᐁᑲᐧ ᑳ ᑭ ᐃᑌᐧᐟ, ᒋᐢᐟ, ᓂ ᐯ ᐃᑐᐦᑖᐣ ᑭᑕ ᐃᑐᑕᒫᐣ ᐁ ᐃᓯ ᓇᑕᐁᐧᔨᑕᒪᐣ. ᐯᔭᐠ ᐅᑎᓇᑦ ᑭᑕ ᐋᔮᑕᐢᑖᐟ ᐊᓂᒪ ᑯᑕᐠ.
[10] ᐁᐊᐧᑯ ᐅᐟ ᐃᑌᔨᑕᒧᐃᐧᐣ ᐅᐦᒋ ᑭ ᑭ ᑲᓈᒋᐃᑲᐃᐧᓈᓇᐤ ᐁ ᑭ ᐸᑭᑎᓂᑳᑌᔨᐠ ᐃᐧᔭᐤ ᒋᓴᐢ ᙭ ᐯᔭᑳᐧᐤ ᒫᒪᐃᐧ.
[11] ᐁᑯᓯ ᑖᐯᐧ ᑲᐦᑭᔭᐤ ᐊᔭᒥᐦᐁᐃᐧᔨᓂᐤ ᓂᐸᐃᐧᐤ ᑕᐦᑐ ᑭᓯᑳᐤ ᐁ ᐸᒥᐢᑖᑫᐟ ᒥᓇ ᐁ ᐸᑭᑎᓂᑫᐟ ᒥᐦᒉᑖᐧᐤ ᐁ ᐯᔭᑲᐧᕽ ᐸᑭᑎᓈᓱᐃᐧᐣ ᐁᑳ ᐁᐊᐧᑯ ᑭᑕ ᑭ ᐅᑎᓇᒧᒪᑲᕽ ᒪᒋᑎᐃᐧᓇ;
[12] ᒫᑲ ᐃᐧᔭ ᐃᐢᐱ ᐯᔭᑳᐧᐤ ᑳ ᐸᑭᑎᓂᑫᐟ ᐯᔭᐠ ᐸᑭᑎᓈᓱᐃᐧᐣ ᒪᒋᑎᐃᐧᓇ ᐅᐦᒋ ᑳᑭᑫ, ᑭ ᓇᐦᐊᐱᐤ ᐅ ᑭᐦᒋᓂᐢᑭᔨᕽ ᑭᓭᒪᓂᑐᐊᐧ;
[13] ᐁᑯᐢᐱ ᐅᐦᒋ ᐁ ᐯᐅᐟ ᐃᔨᑯᕽ ᑳ ᐹᑳᐧᑎᑯᐟ ᐅ ᑕᑯᐢᑳᒋᑲᓇ ᑭᑕ ᐃᓯᐃᒥᐦᐟ.
[14] ᒋᑫᒫ ᐯᔭᑳᐧᐤ ᐁ ᐸᑭᑎᓂᓱᐟ ᑭ ᒪᒥᑐᓂᐁᐤ ᑳᑭᑫ ᐊᓂᐦᐃ ᑳ ᑲᓈᑎᓯᔨᐟ.
[15] ᐁᑯᓯ ᑳ ᑲᓈᑎᓯᐟ ᐊᐦᒑᕽ ᐃᐧᔭ ᒥᓇ ᑭᐟ ᐋᒋᒧᐢᑖᑯᓇᐤ; ᒋᑫᒫ ᒣᐧᐢᑕᐢ ᐃᔨᑯᕽ ᑳ ᐃᑌᐧᐟ,
[16] ᐁᐊᐧᑯ ᐅᒪ ᐊᓱᑕᒫᑫᐃᐧᐣ ᑫ ᐃᓯ ᐃᐧᒋ ᐃᓯᐦᒋᑫᒪᑭᐠ ᒣᐧᐢᑕᐢ ᐁᐊᐧᑯᓂ ᑭᓯᑳᐊᐧ, ᐃᑌᐧᐤ ᑳ ᑎᐯᔨᐦᒋᑫᐟ; ᓂ ᑲ ᐊᐢᑖᐋᐧᐣ ᓄᔭᓱᐁᐧᐃᐧᓇ ᐅᑌᐃᐋᐧᕽ, ᒥᓇ ᐅ ᒥᑐᓀᔨᒋᑲᓂᐋᐧᕽ ᓂ ᑲ ᒪᓯᓇᐦᐊᒫᐧᐣ; ᐁᑲᐧ ᐃᑌᐧᐤ,
[17] ᐁᑯᓯ ᐅ ᒪᒋᑎᐃᐧᓂᐋᐧᐊᐧ ᒥᓇ ᐅ ᐊᐧᓂᑎᐃᐧᓂᐋᐧᐊᐧ ᓇᒪᐃᐧᑳᐨ ᒥᓇ ᓂ ᑲ ᑭᐢᑭᓯᑐᑕᒫᐧᐣ.
[18] ᐃᑕ ᒫᑲ ᐁ ᐳᓀᔨᒋᑳᑌᑭ ᐁᐊᐧᑯᓂ ᐅᐦᐃ, ᓇᒪᐃᐧᔭ ᐊᐊᐧᓯᒣ ᐃᐦᑕᑲᐧᐣ ᐸᑭᑎᓈᓱᐃᐧᐣ ᒪᒋᑎᐃᐧᐣ ᐅᐦᒋ.
[19] ᐁ ᐊᔮᔭᕽ ᒫᑲ, ᓂᒋᐋᐧᒥᑎᐠ, ᓱᑫᔨᒧᐃᐧᐣ ᑭᑕ ᐱᐦᑐᑫᔭᕽ ᐃᑕ ᑳ ᑲᓈᑕᕽ ᐅ ᒥᐦᑯ ᐅᐦᒋ ᒋᓴᐢ,
[20] ᐊᓂᒪ ᒣᐢᑲᓇᐤ ᑳ ᑭ ᑲᐧᔮᒋᑕᒫᑯᔭᕽ, ᐁ ᐅᐢᑳᔨᐊᐧᕽ ᒥᓇ ᐁ ᐱᒫᑕᕽ ᒣᐢᑲᓇᐤ, ᓵᐳ ᐊᓂᒪ ᐋᑯᐁᑲᐃᑫᐣ ᐁᐊᐧᑯ ᑳ ᐃᑕᒥᕽ, ᐅ ᐃᐧᔮᐢ;
[21] ᐁᑯᓯ ᐁ ᐊᔮᐋᐧᔭᕽ ᑭᐦᒋ ᐊᔭᒥᐦᐁᐃᐧᔨᓂᐤ ᐁ ᑎᐯᔨᑕᕽ ᑭᓭᒪᓂᑐ ᐅ ᐋᐧᐢᑳᐦᐃᑲᐣ;
[22] ᑭᔮᑦ ᓈᑖᒧᑐᑕᐋᐧᑖᐠ ᐁ ᑖᐯᐧᒪᑲᕽ ᒥᑌᐦ ᐁ ᑭᑭᔭᕽ ᒥᑐᓂ ᑖᐯᐧᔦᔨᑕᒧᐃᐧᓂᕽ, ᐁ ᐊᔮᔭᕽ ᑭᑌᐃᐧᓇᐊᐧ ᐁ ᐯᑭᑖᕽ ᒪᒋ ᑭᐢᑫᔨᒥᓱᐃᐧᓂᕽ ᐅᐦᒋ ᒥᓇ ᑭᔭᐃᐧᓇᐤ ᐁ ᑭᒋᐢᑖᐹᐁᐧᐠ ᐁ ᐯᑲᕽ ᓂᐱ ᐅᐦᒋ;
[23] ᒥᒋᒥᓇᑖᐠ ᐁ ᐃᓯ ᐊᑐᑕᒪᕽ ᑭᐟ ᐊᐢᐯᔨᒧᐃᐧᓂᓂᐤ ᐁᑳ ᑭᑕ ᐊᐧᐢᑲᐃᐧᐸᔨᐠ; ᒋᑫᒫ ᑖᐯᐧᐤ ᐊᓇ ᑳ ᑭ ᐊᓱᑕᒫᑫᐟ;
[24] ᒥᓇ ᒫᒥᑐᓀᔨᒥᑐᑖᐠ ᑭᑕ ᓯᑭᐢᑳᑐᔭᕽ ᓵᑭᐦᐃᑐᐃᐧᓂᕽ ᒥᓇ ᒥᔪ ᐊᑐᐢᑫᐃᐧᓂᕽ;
[25] ᐁᑳ ᑭᑕ ᐳᓂᑖᔭᕽ ᐁ ᒫᒪᐃᐧ ᒫᐊᐧᒋᐃᑐᔭᕽ ᑖᐱᐢᑯᐨ ᐊᑎᐦᐟ ᑳ ᐃᑐᑕᐦᑭᐠ, ᒫᑲ ᑭᑕ ᓴᓯᑭᒥᑐᔭᕽ; ᐁᑯᓯ ᐊᐊᐧᓯᒣ ᐊᐳᒋᑲ ᐁ ᐋᐧᐸᐦᑕᒣᐠ ᑭᓯᑳᐤ ᑭᓯᐋᐧᐠ ᐁ ᐯ ᐊᔮᐠ,
[26] ᒋᑫᒫ ᑭᐢᐱᐣ ᐅᐦᒋᑕᐤ ᑭ ᒪᒋᑐᑌᓈᓇᐤ ᐁ ᑭ ᑭᐢᑫᔨᑕᒧᐃᑲᐃᐧᔭᕽ ᑖᐯᐧᐃᐧᐣ ᓇᒪᐃᐧᔭ ᐃᐦᑕᑲᐧᐣ ᐸᑭᑎᓈᓱᐃᐧᐣ ᒪᒋᑎᐃᐧᓇ ᐅᐦᒋ,
[27] ᒫᑲ ᑫᒋᓈ ᐁ ᐃᑕᑌᔨᑖᑲᐧᕽ ᐅᔭᓱᐁᐧᐃᐧᐣ ᒥᓇ ᐁ ᐋᑲᐧᕽ ᐃᐢᑯᑌᐤ ᑫ ᓂᓯᐊᐧᓈᒋᐃᑯᒋᐠ ᑳ ᐋᓀᐧᑕᑭᐠ.
[28] ᐊᔨᓯᔨᓂᐤ ᐁ ᒫᔦᔨᑕᒫᐧᐟ ᒧᓯᓴ ᐅᔭᓱᐁᐧᐃᐧᓂᔨᐤ ᑭ ᓂᐱᐤ ᐁᑳ ᐁ ᒪᓈᒋᐃᐦᐟ ᐅᐟ ᐃᑌᐧᐃᐧᓂᔨᐤ ᐅᐦᒋ ᓂᓱ ᐊᐦᐳ ᓂᐢᑐ ᐅᑖᒋᒧᐊᐧ;
[29] ᑖᓂᔨᑯᕽ ᒫᑲ ᐊᐊᐧᓯᒣ ᑭᐟ ᐃᑌᔨᑌᓈᐋᐧᐤ ᑫ ᐃᑕᓱᐋᐧᑎᐦᐟ ᐁ ᑲᐢᑭᑕᒫᓱᐟ ᑭᑕ ᐃᓯ ᑲᑫᐢᑭᒧᐃᐦᐟ, ᐊᓇ ᑳ ᑭ ᑖᑕᑯᐢᑳᑖᐟ ᑭᓭᒪᓂᑐᐃᐧ ᑯᓯᓵᓇ, ᒥᓇ ᐊᓂᒪ ᒥᐦᑯ ᐊᓱᑕᒫᑫᐃᐧᓂᕽ ᐃᑕ ᑳ ᑭ ᐅᐦᒋ ᑲᓈᒋᐃᐦᐟ ᐁᑳ ᐁ ᑲᓈᑕᕽ ᑫᑲᐧᐩ ᑳ ᑭ ᐃᑕᑭᑕᕽ, ᒥᓇ ᑳ ᑭ ᐊᔨᐁᐧᐢᑲᐋᐧᐟ ᑭᓭᐋᐧᑎᓯᐃᐧᓂ ᐊᐦᒑᐦᑲᐧ?
[30] ᒋᑫᒫ ᑭ ᑭᐢᑫᔨᒫᓇᐤ ᐊᓇ ᑳ ᑭ ᐃᑌᐧᐟ, ᐋᐯᐅᐃᐧᐣ ᓂᔭ ᓄᑕᔮᓂᐣ, ᓂᔭ ᓂ ᑲ ᑎᐸᐦᐊᒫᑳᐣ. ᐁᑯᓯ ᒥᓇ, ᑳ ᑎᐯᔨᐦᒋᑫᐟ ᑭᑕ ᐅᔭᓱᐋᐧᑌᐤ ᐅᐟ ᐃᔨᓂᒪ.
[31] ᑯᐢᑖᑌᔨᑖᑲᐧᐣ ᑭᑕ ᐸᐦᑭᓯᓂᕽ ᐅᒋᐦᒋᕽ ᑳ ᐱᒫᑎᓯᐟ ᑭᓭᒪᓂᑐ.
[32] ᒫᑲ ᒫᒥᑐᓀᔨᑕᒧᐠ ᐊᓂᐦᐃ ᑲᔮᐢ ᑭᓯᑳᐊᐧ ᐃᑕ ᐃᐢᐱ ᑳ ᐋᐧᓭᐢᑲᒫᑲᐃᐧᔦᐠ ᑳ ᑭ ᐃᓯ ᓯᐯᔨᑕᒣᐠ ᐁ ᓇᑭᐢᑲᒣᐠ ᑭᐦᒋ ᑯᑕᑭᑖᐃᐧᓇ;
[33] ᑭᓴᐢᑕᐤ ᐁ ᐃᓯᐃᑲᐃᐧᔦᐠ ᑭᑕ ᐋᐧᐸᒋᑲᓂᐃᐧᔦᐠ ᐁ ᒪᒋ ᐃᑎᑲᐃᐧᔦᐠ ᒥᓇ ᐁ ᑯᑕᑭᐦᐃᑲᐃᐧᔦᐠ; ᒥᓇ ᑭᓵᐢᑕᐤ ᐁ ᐅᐃᐧᒉᐋᐧᑲᓂᔦᐠ ᐁᑯᓯ ᑳ ᐃᑐᑖᒋᐠ.
[34] ᒋᑫᒫ ᑭ ᑭ ᑭᑎᒫᑭᓈᐋᐧᐋᐧᐊᐧᐠ ᐊᓂᑭ ᑳ ᑕᑯᐱᑎᒋᐠ ᒥᓇ ᒪᒪᐦᑖᑯᓯᐃᐧᓂᕽ ᑭ ᑭ ᐃᓯ ᐅᑎᓀᓈᐋᐧᐤ ᐁ ᓂᓯᐊᐧᓈᒋᑖᕽ ᑭᐟ ᐊᔮᐃᐧᓂᐋᐧᐊᐧ, ᐁ ᑭᐢᑫᔨᑕᒣᐠ ᑭᔭᐋᐧᐤ ᐁ ᐊᔮᔦᐠ ᐊᐊᐧᓯᒣ ᒥᔪ ᑎᐯᔨᑕᒧᐃᐧᐣ ᒥᓇ ᑳᑭᑫ ᑫ ᐃᐦᑕᑲᐧᕽ.
[35] ᐁᑳᐃᐧᔭ ᒫᑲ ᐁᐧᐱᓇᒧᐠ ᑭ ᓱᑫᔨᒧᐃᐧᓂᐋᐧᐤ ᐁᐊᐧᑯ ᑳ ᑲᐢᑭᒋᑫᒪᑲᕽ ᑭᐦᒋ ᑎᐸᐦᐊᒫᑯᐃᐧᐣ.
[36] ᒋᑫᒫ ᓇᑕᐁᐧᔨᑖᑲᐧᐣ ᑭᑕ ᐊᔮᔦᐠ ᓯᐯᔨᑕᒧᐃᐧᐣ, ᐁᑯᓯ ᑭ ᐃᑐᑕᒣᑯ ᐅᐟ ᐃᑌᔨᑕᒧᐃᐧᐣ ᑭᓭᒪᓂᑐ ᑭᑕ ᒥᔨᑲᐃᐧᔦᐠ ᐊᓱᑕᒫᑯᐃᐧᐣ.
[37] ᒋᑫᒫ ᑫᔮᐱᐨ ᒥᑐᓂ ᒫᑲ ᐊᒋᔭᐤ ᐱᑯ, ᐊᓇ ᑳ ᐯ ᐃᑐᐦᑌᐟ ᑭᑕ ᑕᑯᓯᐣ ᓇᒪᐃᐧᔭ ᑭᑕ ᐃᑕᓯ ᐊᔮᐤ.
[38] ᒫᑲ ᐅᑲᐧᔭᐢᑳᐧᑎᓯᐤ ᑖᐯᐧᔦᔨᑕᒧᐃᐧᐣ ᑭᑕ ᐅᐦᒋ ᐱᒫᑎᓯᐤ; ᒫᑲ ᑭᐢᐱᐣ ᐊᓭᐸᔨᐅᒋ ᓂᐟ ᐊᐦᒑᐦᑲᐧ ᓇᒪᐃᐧᔭ ᑭᑕ ᒥᔦᐧᔨᒥᐠ.
[39] ᒫᑲ ᓇᒪᐃᐧᔭ ᑭᔮᓇᐤ ᑭ ᐃᐧᒉᐋᐧᓇᐊᐧᐠ ᐊᓂᑭ ᑳ ᐊᓭᐸᔨᐅᒋᐠ ᓂᓯᐊᐧᓈᒋᐦᐅᐃᐧᓂᕽ; ᒫᑲ ᑭ ᐃᐧᒉᐋᐧᓇᐊᐧᐠ ᐊᓂᑭ ᑳ ᐊᔮᒋᐠ ᑖᐯᐧᔦᔨᑕᒧᐃᐧᐣ ᑭᑕ ᐱᒫᒋᐦᐅᐟ ᐊᐦᒑᕽ.