[1] Sɔgɔma da joona fɛ, sarakalasebaaw kuntigiw ni Yahutuw cɛkɔrɔbaw bɛɛ bɛnna a la ko Yesu ka faga.
[2] U y'a siri ka taa n'a ye ka a don gɔfɛrɛnɛrɛ Pilate bolo.
[3] Juda min ye Yesu don bolo la, o y'a ye tuma min na ko Yesu fagali ko latigɛra, a nimisara ka o warijɛ bisaba ta, ko a b'a kɔsegin sarakalasebaaw kuntigiw ni cɛkɔrɔbaw ma.
[4] A y'a fɔ u ye ko: «Ne ye jurumu kɛ ka mɔgɔ jalakibali lase fagali ma.» Nka olu y'a jaabi ko: «An ka mun bɛ o la? O ye e de kun ko ye.»
[5] Juda ye o wari fili duguma Alabatosoba kɔnɔ ka bɔ yen ka taa a yɛrɛ dulon.
[6] Sarakalasebaaw kuntigiw ye o wari cɛ, u ko: «A dagalen tɛ ka nin wari don Alabatosoba kɛsu kɔnɔ, sabu joli sɔngɔ don.»
[7] U bɛnna a la ko u ka o wari kɛ ka daga dilala ka foro san k'a kɛ dunanw sudon yɔrɔ ye.
[8] O de y'a to o foro bɛ wele joli foro fo bi.
[9] Kira Jeremi tun ye kuma min fɔ, o dafara ten, ko: «U ye o warijɛ bisaba minɛ, Israɛl bɔnsɔn tun bɛnna ale sɔngɔ min na kɔni.
[10] U ye o wari kɛ ka daga dilala ka foro san i ko Matigi y'a fɔ ne ye cogo min na.»
[11] Ayiwa, u ye Yesu lajɔ gɔfɛrɛnɛrɛ Pilate ɲɛ kɔrɔ, o y'a ɲininka ko: «I ye Yahutuw ka masakɛ ye wa?» Yesu y'a jaabi ko: «ɔwɔ, ne ye o ye.»
[12] Sarakalasebaaw kuntigiw ni cɛkɔrɔbaw y'a sendon tuma min na, Yesu ma jaabili si kɛ.
[13] Ayiwa Pilate y'a fɔ a ye ko: «U bɛ i sendon ko minnu la, i tulo tɛ olu la wa?»
[14] Nka Yesu ma a jaabi o si la, fo gɔfɛrɛnɛrɛ kabakoyara kosɛbɛ.
[15] Laada tun bɛ gɔfɛrɛnɛrɛ fɛ ka kasolamɔgɔ kelen bila Tɛmɛnkan seli tuma la san o san, ka kɛɲɛ ni jama ka ɲɛnatɔmɔli ye.
[16] Ayiwa o waati la, kasolamɔgɔ tɔgɔ bɔlen dɔ tun bɛ yen min tɔgɔ ko Barabasi.
[17] Pilate ye jama ɲininka ko: «Aw b'a fɛ ne ka jumɛn bila? Barabasi, walima Yesu min bɛ wele Krisita?»
[18] Pilate tun y'a dɔn ko Yesu keleya de y'a to u y'a don bolo la.
[19] Ka Pilate sigilen to kiritigɛ yɔrɔ la, a muso ye ci bila a ma ko: «I kana i sen don o cɛ jalakibali ko la, sabu surɔ ne tɔɔrɔla kosɛbɛ sugo la a ko la.»
[20] O bɛɛ n'a ta sarakalasebaaw kuntigiw ni cɛkɔrɔbaw ye jama lasu ko u ka Pilate deli a ka Barabasi bila ka Yesu faga.
[21] Gɔfɛrɛnɛrɛ ye u ɲininka ko kura ko: «Aw b'a fɛ ne ka jumɛn bila?» U y'a jaabi ko: «Barabasi.»
[22] Pilate ye u ɲininka ko: «Yesu min bɛ wele Krisita, ne ka mun kɛ o la?» U bɛɛ y'a jaabi ko: «A gengen jiri la!»
[23] Pilate ko: «A ye mun ko jugu kɛ?» Nka u pɛrɛnna kosɛbɛ ka tɛmɛn fɔlɔ ta kan ko: «A gengen jiri la!»
[24] Pilate y'a ye tuma min na ko a tɛ se ka foyi ɲɛ, ko murutili bɛ juguya, a ye ji ta ka a tɛgɛ ko jama ɲɛ na, a ko: «Ne sen tɛ nin mɔgɔ tilennen joli bɔnni la, o bɛ aw yɛrɛw ma.»
[25] Mɔgɔw bɛɛ y'a jaabi ko: «A joli hakɛ ka bin an ni an denw kan.»
[26] O la, Pilate ye Barabasi bila, a y'a to Yesu ka bugɔ ni gɛɲɛ ye ka a don u bolo, a ka gengen jiri la.
[27] Gɔfɛrɛnɛrɛ ka sɔrɔdasiw taara ni Yesu ye a ka du kɔnɔ, ka u ka kulu mɔgɔw bɛɛ lajɛ ka a lamini.
[28] U ye Yesu ka finiw bɔ a la ka dulɔki jan bilenman don a kan na.
[29] U ye ŋɔni dɛfɛ k'o kɛ jalamugu ye ka a don Yesu kun na. U ye kala don a kininbolo la. O kɔ, u y'u ɲɔngiri a kɔrɔ ka yɛlɛ bɔ a ma, u ko: «I ni se, Yahutuw ka masakɛ!»
[30] U ye daji tu Yesu kan ka kala ta ka a gosi a kunkolo la.
[31] U tilalen yɛlɛ bɔli la a ma, u ye o dulɔki jan bilenman bɔ a kan na ka a yɛrɛ ka finiw don a la ka taa n'a ye, ka a gengen jiri la.
[32] U bɔtɔ, u ni Sirɛnɛka dɔ kunbɛnna, o tɔgɔ ko Simɔn. U y'o karaba ka Yesu gengenjiri ta.
[33] U sera yɔrɔ dɔ la min tɔgɔ ko Golgota, o kɔrɔ, kunkolo yɔrɔ.
[34] U ye diwɛn ni fyɛ ɲaaminen di a ma ko a ka o min. A y'o nɛnɛ minkɛ, a ma sɔn ka o min.
[35] U ye Yesu gengen jiri la. O kɔ, u ye kala da ka a ka finiw tilatila u cɛ ka kɛɲɛ n'o ye.
[36] O kɔ, u y'u sigi ka a kɔlɔsi.
[37] Yesu jalaki kun sɛbɛnna ka dulon a kun na ko: «Nin ye Yesu ye, Yahutuw ka masakɛ.»
[38] Binkannikɛla fila gengenna jiri la Yesu kɛrɛ fɛ, kelen tun bɛ a kinin fɛ, a dɔ tun bɛ a numan fɛ.
[39] Tɛmɛnbaaw tun bɛ u kun kɔmi ka Yesu neni,
[40] k'a fɔ ko: «E min ko i bɛ Alabatosoba ci ka a jɔ ko kura tile saba kɔnɔ, i yɛrɛ kisi sa. Ni i ye Ala Denkɛ ye, jigin ka bɔ jiri la.»
[41] O cogo la sarakalasebaaw kuntigiw ni sariya karamɔgɔw ni cɛkɔrɔbaw tun bɛ yɛlɛ bɔ Yesu ma k'a fɔ ko:
[42] «A ye mɔgɔ wɛrɛw kisi, nka a tɛ se ka a yɛrɛ kisi. A ye Israɛl ka masakɛ ye wa? A ka jigin ka bɔ jiri la, an na da a la.
[43] A ye a jigi da Ala kan. Ni a ko ka di Ala ye, Ala ka a tila sa, k'a masɔrɔ a ko a ye Ala Denkɛ ye.»
[44] Binkannikɛla minnu gengenna jiri la a kɛrɛ fɛ, olu fana tun b'a neni o cogo yɛrɛ la.
[45] Kabini tile bɛ kuncɛ, dibi donna jamana yɔrɔ bɛɛ la fo ka lɛrɛ saba kɛ.
[46] Lɛrɛ sabanan surunyalen, Yesu pɛrɛnna ni kanba ye ko: «Eli, Eli, lama sabakatani?» O kɔrɔ ko: «Ne ka Ala, ne ka Ala, mun na i ye ne bila?»
[47] Minnu jɔlen tun bɛ yen, olu dɔw ye o pɛrɛnkan mɛn minkɛ, u ko: «A bɛ Eli wele.»
[48] O yɔrɔnin kelen, u la kelen bolila ka fukuru ta ka o su diwɛn kumu la k'a kɛ bere jan dɔ kun na ka o di Yesu ma, a ka a susu.
[49] Nka u tɔw ko: «I jɔ, an k'a filɛ yala ni Eli bɛ na ka a kisi.»
[50] Yesu pɛrɛnna ko kura ka kulokanba ci ka a yɛrɛ ni bɔ.
[51] O waati yɛrɛ la, Alabatosoba kɔnɔ cɛtigɛfini farala fila ye k'a daminɛ san fɛ fo duguma. Dugukolo yɛrɛyɛrɛla, faraw cira.
[52] Kaburuw dayɛlɛla, Ala ka mɔgɔ salen caman kununna.
[53] U bɔra kaburuw la. Yesu kununlen kɔ, u donna dugu senuma kɔnɔ ka u jira mɔgɔ caman na.
[54] Jalasabatigi ani sɔrɔdasi minnu tun bɛ Yesu kɔlɔsi, olu ye dugukolo yɛrɛyɛrɛ ni o ko kɛlenw bɛɛ ye minkɛ, u ja tigɛra kosɛbɛ, u ko: «Tiɲɛ la, nin tun ye Ala Denkɛ yɛrɛ de ye.»
[55] Muso caman jɔlen tun bɛ yɔrɔ jan ka o kow filɛ. U tun tugura Yesu nɔfɛ ka bɔ Galile ka a mago ɲɛ.
[56] U dɔw tun ye ninnu ye: Magadala Mariyama, Yakuba ni Yusufu ba Mariyama, ani Zebede denkɛw ba.
[57] Wula da selen, Arimateka nafolotigi dɔ nana, o tɔgɔ ko Yusufu, a fana tun ye Yesu ka kalandenw dɔ ye.
[58] Ale taara Pilate sɛgɛrɛ ka Yesu su deli a fɛ. Pilate ko u ka a di.
[59] Yusufu ye Yesu su ta ka lenfu fini kura meleke a la,
[60] ka taa a don a yɛrɛ ka kaburu kura kɔnɔ, o sennen tun bɛ fara la. O kɔ, a ye kabakurun belebeleba dɔ kolonkolon ka kaburu datugu n'o ye ka taa.
[61] Magadala Mariyama ni Mariyama dɔ sigilen tun bɛ yen kaburu kuntilenna la.
[62] O dugusajɛ, lafiɲɛ don ɲɛsigi don dugusajɛ kɔni, sarakalasebaaw kuntigi ni Farisiɛn dɔw taara ɲɔgɔn fɛ Pilate yɔrɔ
[63] k'a fɔ a ye ko: «Kuntigi, an hakili tora a la ko ka o mɔgɔ lafilibaa ɲɛnama to, a y'a fɔ ko a salen kɔ tile saba, a na kunun.
[64] O de kosɔn, an b'a fɛ i ka ci fɔ ko garadiw ka bila kaburu da la fo ka o tile saba dafa, walisa a ka kalandenw kana na a su sonya k'a fɔ mɔgɔw ye ko a kununna ka bɔ suw cɛma. O mɔgɔ lafilili ko laban na juguya ka tɛmɛn fɔlɔ ta kan.»
[65] Pilate y'a fɔ u ye ko: «Sɔrɔdasiw filɛ aw kɔrɔ ka kɛ kɔlɔsibaaw ye. A' ye taa ka aw se ko kɛ ka kaburu kɔlɔsi.»
[66] O la, u taara. U ye kaburu datugulan labɛn ka taamashyɛn da o kan, ka sɔrɔdasiw bila yen ka a kɔlɔsi.