[1] Yesu tilalen kɔ o kuma bɛɛ la, a y'a fɔ a ka kalandenw ye ko:
[2] «Aw y'a dɔn ko tile fila bɛ an ni Tɛmɛnkan seli cɛ, ko Mɔgɔ Denkɛ na don bolo la ka gengen jiri la.»
[3] O tuma la sarakalasebaaw kuntigiw ni Yahutuw cɛkɔrɔbaw ye ɲɔgɔn lajɛ sarakalasebaaw kuntigiba Kayifɛ ka du kɔnɔ.
[4] U y'a latigɛ ko u na Yesu minɛ keguya la ka a faga.
[5] Nka u ko: «An kana a minɛ seli la, walisa balawu kana wuli mɔgɔw cɛma.»
[6] Ka Yesu to Simɔn kunatɔ ka so kɔnɔ Bɛtani,
[7] muso dɔ gɛrɛla a la ni daganin dɔ ye, o tun dilara ni kabakurun sɔngɔ gɛlɛn ye. O falen tun bɛ tulu suma duman sɔngɔ gɛlɛn na. O muso ye o tulu kɛ Yesu kun na ka a to dumuni la.
[8] Yesu ka kalandenw y'o ye minkɛ, u diminna. U y'a fɔ ko: «O tiɲɛni bɛ mun ɲɛ?
[9] O tulu sɔngɔ gɛlɛn tun bɛ se ka feere wari caman na ka o di faantanw ma.»
[10] Yesu ye o dɔn minkɛ, a ko: «Mun na aw bɛ nin muso dusu kasi? A ye min kɛ, o ka ɲi dɛ.
[11] Faantanw bɛ aw cɛma tuma bɛɛ, nka ne kɔni tɛna kɛ aw cɛma tuma bɛɛ.
[12] Muso ye nin tulu suma duman kɛ ne kun na ne kasankɛli kama.
[13] Tiɲɛ la ne b'a fɔ aw ye ko: Kibaru Duman mana fɔ diɲɛ yɔrɔ o yɔrɔ la, nin muso ye min kɛ, o fana na lakali yen ka mɔgɔw hakili jigin a ko la.»
[14] Yesu ka kalanden tan ni fila la kelen min bɛ wele Juda Isikariɔti, o taara sarakalasebaaw kuntigiw sɛgɛrɛ
[15] k'a fɔ u ye ko: «Aw bɛ sɔn ka mun di ne ma, ne ka Yesu don aw bolo?» U ye warijɛ bisaba jate ka o di a ma.
[16] Kabini o tuma, Juda ye cogo bɛnnen ɲini ka Yesu don u bolo.
[17] Nbuuru fununbali seli don fɔlɔ, Yesu ka kalandenw gɛrɛla a la k'a ɲininka ko: «I b'a fɛ an ka Tɛmɛnkan seli dumuni labɛn i ye yɔrɔ jumɛn?»
[18] Yesu y'u jaabi ko: «A' ye taa cɛ dɔ fɛ dugu kɔnɔ k'a fɔ a ye ko: ‘Karisa, Karamɔgɔ ko ale ka waati sera, a ni a ka kalandenw na Tɛmɛnkan seli kɛ i ka so.’»
[19] Kalandenw ye Yesu ka ko fɔlen kɛ ka Tɛmɛnkan seli dumuni labɛn.
[20] Su kolen, Yesu ni a ka kalanden tan ni fila y'u sigi tabali la.
[21] K'u to dumuni la, Yesu y'a fɔ u ye ko: «Tiɲɛ la ne b'a fɔ aw ye ko aw la kelen na ne don bolo la.»
[22] Kalandenw ɲɛnasisira kosɛbɛ, u bɛɛ kelen-kelen y'a daminɛ ka Yesu ɲininka ko: «Matigi, ne don wa?»
[23] Yesu y'u jaabi ko: «Min ye a bolo don minɛn kɔnɔ ne fɛ, o de na ne don bolo la.
[24] Mɔgɔ Denkɛ na sa i ko a sɛbɛnnen bɛ a ko la cogo min na, nka min bɛ Mɔgɔ Denkɛ don bolo la, bɔnɛ bɛ o tigi ye. Ni o cɛ tun ma bange yɛrɛ, o tun ka fisa a ma.»
[25] Juda, ale min tun bɛna a don bolo la, o y'i kan to ko: «Karamɔgɔ, ne don wa?» Yesu y'a jaabi ko: «E yɛrɛ de y'a fɔ.»
[26] Ka u to dumuni la, Yesu ye nbuuru ta ka barika da Ala ye, ka o karikari k'a di a ka kalandenw ma. A y'a fɔ u ye ko: «A' ye dɔ ta ka a dun, nin ye ne farikolo ye.»
[27] O kɔ, a ye jifilen ta ka barika da Ala ye k'a di u ma, a ko: «Aw bɛɛ ka dɔ min nin na,
[28] sabu nin ye ne joli ye, Ala ka layidu sigili joli. A bɔnna mɔgɔ caman ka jurumuw yafa kama.
[29] Ne b'a fɔ aw ye ko kabini sisan, ne tɛna nin rezɛn ji min tun, fo ne ka a kɛnɛ min aw fɛ ne Fa ka masaya la don min na.»
[30] Ala tanuli dɔnkili dalen kɔ, u bɔra yen ka taa Oliviye kulu la.
[31] O la, Yesu y'a fɔ a ka kalandenw ye ko: «Bi su in na yɛrɛ, aw bɛɛ na boli ka ne kelen to, katuguni a sɛbɛnnen bɛ ko: ‘Ne na sagagɛnna faga, sagaw bɛɛ na jɛnsɛn.’
[32] Nka ne mana kunun ka bɔ suw cɛma, ne na taa aw ɲɛ Galile jamana la.»
[33] Piɛrɛ ye kuma ta ko: «Hali ni tɔw bɛɛ bolila k'i to, ne tɛna i bila abada.»
[34] Yesu y'a jaabi ko: «Tiɲɛ la ne b'a fɔ i ye ko bi su in na yɛrɛ, sani donon ka kasi, i na i dalacɛ ne la siɲɛ saba ko i tɛ ne dɔn.»
[35] Piɛrɛ y'a fɔ a ye ko: «Hali ni ne bɛ sa i fɛ, ne tɛna ne dalacɛ i la fewu!» Kalanden tɔw bɛɛ fana ye o kuma kelen fɔ.
[36] O kɔ, Yesu ni a ka kalandenw taara yɔrɔ dɔ la min tɔgɔ ko Jetisɛmanɛ. A y'a fɔ u ye ko: «A' ye aw sigi yan, sani ne ka taa yen fɛ ka Ala deli.»
[37] A taara ɲɛ ni Piɛrɛ ni Zebede denkɛ fila ye. Ɲɛnasisi y'a sɔrɔ, a dusu kasilen tun don kosɛbɛ.
[38] A y'a fɔ u ye ko: «Ne dusu tɔɔrɔlen bɛ, fo ne bɛ ɲini ka sa. A' ye to yan ka to aw ɲɛ na nefɛ.»
[39] A taara ɲɛfɛ dɔɔnin ka i bin duguma ka Ala deli ko: «Ne Fa, ni a bɛ se ka kɛ, nin tɔɔrɔ jifilen ka mabɔ ne la. O bɛɛ n'a ta, ne sago kana kɛ, fɔ e sago.»
[40] Yesu kɔseginna a ka kalanden saba yɔrɔ ka u sunɔgɔlen sɔrɔ. A y'a fɔ Piɛrɛ ye ko: «Aw ma se ka to aw ɲɛ na ne fɛ hali ka lɛrɛ kelen kɛ wa?
[41] A' ye to aw ɲɛ na ka Ala deli walisa aw ka tanga kɔrɔbɔli ma. Mɔgɔ ni sɔnnen bɛ, nka a farisogo barika ka dɔgɔ.»
[42] Yesu bɔra u kɔrɔ a siɲɛ filanan ka taa Ala deli tun ko: «Ne Fa, ni nin jifilen tɛ se ka mabɔ ne la fɔ ne ka minni kɛ a la, e sago de ka kɛ.»
[43] O kɔ, a kɔseginna a ka kalandenw yɔrɔ ka u sunɔgɔlen sɔrɔ ko kura, sabu sunɔgɔ tun bɛ u la.
[44] Yesu ye u to yen ka taa k'i mabɔ u la a siɲɛ sabanan na ka Ala deli ka segin o kuma kelen kan.
[45] O kɔ, a kɔseginna a ka kalandenw yɔrɔ k'a fɔ u ye ko: «Aw bɛ sunɔgɔ halisa ka aw lafiya wa? A filɛ, waati sera. Mɔgɔ Denkɛ bɛna don jurumukɛlaw bolo.
[46] A' ye wuli, an ka taa. Min bɛ ne don bolo la, o selen filɛ.»
[47] Ka Yesu to o kuma la, Juda sera. Kalanden tan ni fila la kelen don. A nana ni jamaba ye, npanw ni berew tun bɛ olu bolo. U cilen tun bɛ sarakalasebaaw kuntigiw ni Yahutuw cɛkɔrɔbaw fɛ.
[48] Juda min tun bɛna Yesu don bolo la, o tun ye taamashyɛn jira jama la, ko: «Ne mana cɛ min da susu, o don. A' ye o minɛ.»
[49] Juda sinna Yesu la, k'a fɔ a ye ko: «Karamɔgɔ, i ni se.» O kɔ, a ye Yesu da susu.
[50] Yesu y'a jaabi ko: «Ne teri, i nana min kama, o kɛ.» O la, u tɔw gɛrɛla Yesu la ka a minɛ.
[51] Yesu nɔfɛ mɔgɔ dɔ ye a ka npan foosi ka sarakalasebaaw kuntigi ka jɔnkɛ tulo caron.
[52] Yesu y'a fɔ o kalanden ye ko: «I ka npan don a tan na, k'a masɔrɔ minnu bɛ npan ta, olu na halaki npan fɛ.
[53] I m'a dɔn wa ko ne tun bɛ se ka ne Fa deli, a tun na mɛlɛkɛ waa tan sigiyɔrɔma tan ni fila ci ne ma sisan, ka dɔ fara olu kan yɛrɛ?
[54] Nka ni o kɛra, Kitabu kumaw tun na dafa cogo di, olu minnu y'a jira ko wajibi don nin kow ka kɛ?»
[55] O kɔ, Yesu y'a fɔ jama ye ko: «Aw nana ni npanw ni berew ye ne minɛli kama, i n'a fɔ ne ye binkannikɛla ye wa? Ne tun bɛ sigi Alabatosoba kɔnɔ don o don ka mɔgɔw kalan yen, aw dun ma ne minɛ.
[56] Nka nin kow bɛɛ kɛra walisa kiraw ye min sɛbɛn Kitabu la, o bɛɛ ka dafa.» O la, Yesu ka kalandenw bɛɛ bolila k'a to yen.
[57] Minnu ye Yesu minɛ, olu taara n'a ye sarakalasebaaw kuntigi Kayifɛ ka so. Sariya karamɔgɔw ni cɛkɔrɔbaw lajɛlen tun bɛ yen.
[58] Piɛrɛ y'i to yɔrɔ jan ka tugu Yesu nɔfɛ fo ka se sarakalasebaaw kuntigi ka so. A donna du kɔnɔ k'i sigi garadiw fɛ walisa a ka o ko laban ye.
[59] Sarakalasebaaw kuntigiw ni kiritigɛ jamakulu tun bɛ nkalon seereya ɲini Yesu kama, walisa u ka a faga.
[60] Nka u ma a sɔrɔ, hali k'a sɔrɔ seere nkalontigɛla caman nana ka u ta fɔ. A laban, seere nkalontigɛla fila wɛrɛ gɛrɛla,
[61] olu ko: «Nin cɛ y'a fɔ ko a bɛ se ka Alabatosoba ci k'a jɔ ko kura tile saba kɔnɔ.»
[62] Sarakalasebaaw kuntigi wulila k'i jɔ k'a fɔ Yesu ye ko: «Nin mɔgɔw bɛ seereya min kɛ i kama, o bɛ di? I tɛ o si jaabi wa?»
[63] Yesu ma kuma. Sarakalasebaaw kuntigi ko: «Ne b'i ɲininka Ala ɲɛnama tɔgɔ kosɔn, ni i ye Krisita, Ala Denkɛ ye, o fɔ an ye.»
[64] Yesu y'a jaabi ko: «I ye min fɔ, o don, nka ne b'a fɔ aw ye ko nin kɔ, aw na Mɔgɔ Denkɛ sigilen ye Ala Sebaayabɛɛtigi kinin fɛ. Aw na a natɔ ye fana sankabaw kan.»
[65] O la, sarakalasebaaw kuntigi ye a yɛrɛ ka finiw fara k'a fɔ ko: «A ye Ala tɔgɔ tiɲɛ dɛ. An mago bɛ mun na seerew fɛ tun? Aw tulo bɛ a ka Ala tɔgɔ tiɲɛni kuma la.
[66] Aw bɛ mun miiri?» U y'a jaabi ko: «A ka kan ni saya ye.»
[67] O kɔ, u ye daji tu Yesu ɲɛda la k'a bugɔ ni u bolokurunw ye. Dɔw ye tɛgɛ ci a ɲɛ kan,
[68] u ko: «Krisita, kiraya kɛ. I bugɔbaa tɔgɔ fɔ an ye!»
[69] Piɛrɛ sigilen tun bɛ kɛnɛma du kɔnɔ. Baarakɛ muso dɔ gɛrɛla a la k'a fɔ a ye ko: «E fana tun bɛ Yesu Galileka fɛ.»
[70] Nka Piɛrɛ y'i dalacɛ a la mɔgɔw bɛɛ ɲɛ na, a ko: «I bɛ min fɔ, ne ma o dɔn.»
[71] O kɔ, Piɛrɛ taara du donda la. Baarakɛ muso dɔ wɛrɛ y'a ye k'a fɔ o yɔrɔ mɔgɔw ye ko: «Nin cɛ tun bɛ Yesu Nazarɛtika fɛ.»
[72] Piɛrɛ y'i dalacɛ a la ko kura k'i kali, a ko: «Ne tɛ o cɛ dɔn.»
[73] O kɔ dɔɔnin, mɔgɔ minnu tun bɛ yen, olu gɛrɛla Piɛrɛ la k'a fɔ a ye ko: «Siga t'a la, i ye u dɔ ye, i kuma cogo bɛ i bɔ yɔrɔ jira.»
[74] Nka Piɛrɛ y'i kali k'a yɛrɛ danga ko: «Ne tɛ o cɛ dɔn.» O yɔrɔnin kelen, donon kasira.
[75] O tuma la Yesu tun ye min fɔ a ye, a hakili jiginna o la. Yesu tun ko: «Sani donon ka kasi, i na i dalacɛ ne la siɲɛ saba ko i tɛ ne dɔn.» Piɛrɛ bɔra ka taa kɛnɛma ka kasi kosɛbɛ.