[1] O don yɛrɛ la Yesu bɔra so kɔnɔ ka taa i sigi ba da la.
[2] Jamaba y'a lamini fo k'a degun, a donna kurun dɔ kɔnɔ k'i sigi. Jama bɛɛ jɔlen tora ba da la.
[3] A tun bɛ fɛn caman fɔ u ye ntalenw la, a ko: «Cɛ dɔ bɔra ka taa serili kɛ.
[4] K'a to serili la, a ka kisɛ dɔw binna sira da la, kɔnɔw nana olu sogin.
[5] Kisɛ dɔw binna farama yɔrɔ la, bɔgɔ mugu bɛrɛ tun tɛ yen. Olu falenna joona, katuguni bɔgɔ tun man ca yen.
[6] Tile gannen, u fɔsɔnfɔsɔnna ka ja, k'a masɔrɔ dili bɛrɛ tun tɛ u la.
[7] Kisɛ dɔw binna ŋɔniw cɛma. Ŋɔniw wulila ka u degun, u ma den.
[8] Kisɛ dɔw binna dugukolo ɲuman na, u denna. Dɔw ye kisɛ kɛmɛ kɛ, dɔw biwɔɔrɔ, dɔw bisaba.
[9] Tulo bɛ min fɛ ka lamɛnni kɛ, o ka lamɛnni kɛ dɛ.»
[10] Yesu ka kalandenw gɛrɛla a la k'a ɲininka ko: «Mun y'a to i bɛ ntalenw da u ye?»
[11] Yesu ye u jaabi ko: «Sankolo masaya gundow dɔnniya dira aw de ma, a ma di olu ma.
[12] Fɛn bɛ min bolo, dɔ na di o ma ka fara a ta kan, nka fɛn tɛ min bolo, hali o dɔɔnin min b'a bolo, o na bɔsi a la.
[13] O de y'a to ne bɛ ntalenw da u ye, sabu u bɛ filɛli kɛ, u tɛ foyi ye. U bɛ u tulow majɔ ka mɛnni kɛ, nka u tɛ foyi faamu.
[14] Esayi ye kiraya kuma min fɔ, o dafara ninnu ta fan fɛ, ko: ‘Aw tulow majɔlen na mɛnni kɛ, nka aw tɛna faamuli kɛ. Aw ɲɛw jɔlen na filɛli kɛ, nka aw tɛna yeli kɛ.
[15] K'a masɔrɔ nin mɔgɔw hakili goyara. U ye u tulow tugu, u ye u ɲɛw tugu, walisa u ɲɛw kana na yeli kɛ, u tulow kana na mɛnni kɛ, u hakili kana na faamuli kɛ, u kana na u yɛlɛma ne fan fɛ, walisa ne ka u kɛnɛya.’
[16] Aw kɔni, aw ye dubadenw ye, k'a masɔrɔ aw ɲɛw bɛ yeli kɛ, aw tulow bɛ mɛnni kɛ.
[17] Tiɲɛ la ne b'a fɔ aw ye ko kira caman ni mɔgɔ tilennen caman tun b'a fɛ ka aw ka yetaw ye, nka u ma u ye, ka aw ka mɛntaw mɛn, nka u ma u mɛn.
[18] «A' ye aw tulo majɔ serilikɛla ko ntalen kɔrɔ la.
[19] Ni mɔgɔ dɔ bɛ Ala ka masaya kuma mɛn, nka a t'a faamu, Sitanɛ bɛ na ka o kuma mɛnnen bɔ a kɔnɔ. O tigi ta ye serilifɛn bilen ye sira da la.
[20] Farama yɔrɔ ta ye min ye, o tigi bɛ o kuma mɛn k'a minɛ joona ni ɲagali ye.
[21] Nka dili tɛ a la, a tɛ mɛn o la. Ni a degunna wala ni mɔgɔw bɛ tugu a nɔfɛ k'a tɔɔrɔ o kuma kosɔn, a bɛ sin ka kunnatiɲɛ.
[22] Ŋɔni cɛma ta ye min ye, o tigi bɛ o kuma mɛn, nka nin diɲɛ hami kow ni nafolo lafilibanciya bɛ o kuma degun, fo a tɛ den.
[23] Dugukolo ɲuman ta ye min ye, o tigi bɛ o kuma mɛn k'a faamu, a bɛ den caman kɛ. Kisɛ dɔ bɛ a ɲɔgɔn kɛmɛ kɛ, dɔ biwɔɔrɔ, dɔ bisaba.»
[24] Yesu ye ntalen wɛrɛ da u ye ko: «Sankolo masaya bɔlen bɛ min fɛ, o filɛ. Cɛ dɔ ye kisɛ ɲuman seri a ka foro la.
[25] Su fɛ, ka mɔgɔw to sunɔgɔ la, bin min bɔlen bɛ alikama fɛ, o cɛ jugu dɔ nana ka o bin jugu kisɛ seri alikama cɛma ka taa.
[26] Alikama falenna ka tinsan bɔ, o bin jugu fana dɔnna.
[27] Forotigi ka baaradenw nana k'a fɔ a ye ko: ‘Kuntigi, i ma kisɛ ɲuman seri i ka foro la wa? Nin bin jugu dun bɔra min?’
[28] A y'u jaabi ko: ‘Ne jugu dɔ y'a kɛ.’ Baaradenw y'a ɲininka ko: ‘I b'a fɛ an ka taa o bin jugu bɔbɔ wa?’
[29] A ko: ‘Ayi, ne bɛ siran ko bin bɔtɔ, aw na alikama fana bɔ.
[30] A' y'a to yen, u ka kɔgɔ ɲɔgɔn fɛ fo suman tigɛ tuma ka se. O tuma la, ne n'a fɔ sumantigɛlaw ye ko u ka bin bɔ fɔlɔ k'a siri, a ka jeni, o kɔ, ka alikama lajɛ ne ka jiginɛ kɔnɔ.’»
[31] Yesu ye ntalen wɛrɛ da u ye ko: «Sankolo masaya bɔlen bɛ mutarde kisɛ fɛ. Cɛ dɔ ye o seri a ka foro la.
[32] Kisɛ seritaw bɛɛ la dɔgɔmannin don, nka ni a falenna tuma min na, a bɛ bonya ka tɛmɛn nakɔ ɲugu tɔw bɛɛ kan. A bɛ kɛ jiri ye, fo kɔnɔw bɛ u ka ɲaaw da a bolow la.»
[33] Yesu ye ntalen wɛrɛ da u ye tun ko: «Sankolo masaya bɔlen bɛ buurufunun fɛn dɔ fɛ. Muso dɔ ye o kɛ farinimugu kilo mugan ni duuru la ka u nɔɔni fo a bɛɛ fununna.»
[34] Yesu ye o kow bɛɛ fɔ jama ye ntalenw de la. A ma kuma u fɛ ni ntalenw tɛ.
[35] A ye o kɛ walisa kira ye min fɔ, o ka dafa, ko: «Ne na kuma u fɛ ntalenw la. Ko minnu dogolen tun bɛ kabini diɲɛ da tuma, ne na olu fɔ u ye.»
[36] Ayiwa Yesu ye jama to yen ka taa so kɔnɔ. A ka kalandenw nana a sɛgɛrɛ k'a fɔ a ye ko: «Ntalen min dara foro la bin jugu ko la, o kɔrɔ fɔ an ye.»
[37] Yesu ko: «Min ye kisɛ ɲuman seri, o ye Mɔgɔ Denkɛ ye.
[38] Foro, o ye diɲɛ ye. Kisɛ ɲuman, o ye sankolo masaya denw ye. Bin jugu, o ye Sitanɛ denw ye.
[39] O jugu min ye bin jugu kisɛ seri, o ye Sitanɛ yɛrɛ ye. Suman tigɛ tuma, o ye diɲɛ laban ye. Sumantigɛlaw, olu ye mɛlɛkɛw de ye.
[40] Mɔgɔ bɛ bin jugu bɔ k'a fili tasuma la cogo min na, a na kɛ ten diɲɛ laban tuma la.
[41] Mɔgɔ Denkɛ na a ka mɛlɛkɛw ci. Fɛn o fɛn bɛ mɔgɔ kunnatiɲɛ ani minnu bɛ ko juguw kɛ, mɛlɛkɛw na olu labɔ a ka masaya la.
[42] U na olu fili gantugu tasuma la, u na kasi k'u ɲinw ɲimi yen.
[43] Nka mɔgɔ tilennenw na manamana u Fa ka masaya la i n'a fɔ tile. Tulo bɛ min fɛ ka lamɛnni kɛ, o ka lamɛnni kɛ dɛ.
[44] «Sankolo masaya bɔlen bɛ nafoloba dogolen fɛ foro la. Cɛ dɔ y'a ye, a y'a dogo tun, a ɲagalilen taara a bolofɛnw bɛɛ feere ka na o foro san.
[45] «Sankolo masaya bɔlen bɛ kɔnɔnkisɛ jagokɛla dɔ fana fɛ min bɛ kɔnɔnkisɛ ɲumanw ɲini.
[46] A ye kɔnɔnkisɛ sɔngɔ gɛlɛn dɔ ye minkɛ, a ye a bolofɛnw bɛɛ feere ka o kɔnɔnkisɛ san.
[47] «Sankolo masaya bɔlen bɛ jɛgɛminɛ jɔ fɛ fana, mɔgɔw bɛ a fili baji la ka jɛgɛ sifa bɛɛ minɛ.
[48] Jɔ mana fa, mɔnnikɛlaw b'a sama k'a da ba da la k'u sigi ka jɛgɛw tɔmɔ. U bɛ jɛgɛ ɲumanw kɛ u ka minɛnw kɔnɔ ka jugumanw fili.
[49] A na kɛ ten diɲɛ laban tuma la. Mɛlɛkɛw bɛna mɔgɔ juguw fara ka bɔ mɔgɔ tilennenw la,
[50] ka mɔgɔ juguw fili gantugu tasuma la. U na kasi ka u ɲinw ɲimi yen.»
[51] Yesu ye u ɲininka ko: «Aw ye o kow bɛɛ faamu wa?» U ko: «ɔwɔ.»
[52] A y'a fɔ u ye tun ko: «O cogo la sariya karamɔgɔ fɛn o fɛn kalannen bɛ sankolo masaya ko la, o bɔlen bɛ sotigi dɔ fɛ min bɛ fɛn kuraw ni fɛn kɔrɔw sɔrɔ ka bɔ a ka nafolo mara yɔrɔ la.»
[53] Yesu tilalen kɔ a ka ntalen dali la, a bɔra o yɔrɔ la.
[54] A mɔna dugu min na, a taara yen ka mɔgɔ kalanni daminɛ u ka Alabatoso kɔnɔ. O mɔgɔw kabakoyara. U ko: «A ye nin hakilitigiya sɔrɔ min? A bɛ se ka nin kabakow kɛcogo di?
[55] Jiridɛsɛla denkɛ tɛ wa? Mariyama tɛ a ba ye wa? A balimakɛw tɛ Yakuba ni Yusufu ni Simɔn ani Juda ye wa?
[56] A balimamusow bɛɛ tɛ sigi an cɛma yan wa? A dun ye nin fanga bɛɛ sɔrɔ min?»
[57] O miirili de y'a to u ma da a la. Ayiwa Yesu y'a fɔ u ye ko: «Kira bɛ bonya yɔrɔ bɛɛ, fɔ a yɛrɛ ka dugu kɔnɔ ani a yɛrɛ ka so.»
[58] Yesu ma kabako caman kɛ yen u ka dannabaliya kosɔn.