[1] U surunyalen Jerusalɛm la ka se Bɛtɛfajɛ, Oliviye kulu kɛrɛ fɛ, Yesu ye a ka kalandenw la fila ci ka taa u ɲɛ,
[2] a ko: «A' ye taa aw ɲɛfɛ dugu la. Ni aw sera dɔrɔn, aw na falimuso dɔ sirilen sɔrɔ yen, den b'a fɛ. A'ye o foni ka na n'u ye ne fɛ yan.
[3] Ni mɔgɔ dɔ ye fɛn fɔ aw ye, aw k'a fɔ o ye ko Matigi mago bɛ u la. O mana kɛ, u na a to aw ka na n'u ye.»
[4] O kɛra walisa kira ka nin kumaw ka dafa ko:
[5] «A' y'a fɔ Sion denmuso ye ko: A filɛ, i ka masakɛ bɛ na i sɛgɛrɛ. A sabalilen bɛ haali, a sigilen bɛ fali kan, faliden kan, falimusoden kɔni.»
[6] Kalandenw taara k'a kɛ i ko Yesu y'a fɔ u ye cogo min na.
[7] U nana ni falimuso ni a den ye. U ye u ka finiw da olu kan, Yesu yɛlɛnna.
[8] Jamaba la mɔgɔ caman ye u ka finiw fɛnsɛ sira kan. Dɔw fana ye fura kɛnɛw tigɛ ka olu fɛnsɛ sira kan.
[9] U taatɔ, Yesu ɲɛfɛ mɔgɔw ani a kɔfɛ mɔgɔw tun bɛ pɛrɛn ko: «Tanuli ka kɛ Dawuda Bɔnsɔn ye. Min natɔ filɛ Matigi tɔgɔ la, o ye dubaden ye. Tanuli ka kɛ Ala ye sanfɛ yɔrɔ kɔrɔtalenbaw la.»
[10] Yesu donna Jerusalɛm minkɛ, dugu bɛɛ lamagara. U tun bɛ ɲininkali kɛ ko: «Nin cɛ in ye jɔni ye?»
[11] Jama ko: «Kira Yesu, Galile Nazarɛtika don.»
[12] Yesu donna Alabatosoba kɔnɔ. Mɔgɔ minnu tun bɛ sannifeere kɛ yen, a ye olu bɛɛ gɛn ka bɔ yen. A ye wari falennaw ka tabaliw ni ntubanni feerelaw ka sigilanw dabiri,
[13] k'a fɔ u ye ko: «A sɛbɛnnen bɛ ko: ‘Ne ka so na wele Aladeliso,’ nka aw kɔni y'a kɛ binkannikɛlaw dogo yɔrɔ ye.»
[14] Fiyentɔ dɔw ni sensalen dɔw gɛrɛla Yesu la Alabatosoba kɔnɔ, a ye u kɛnɛya.
[15] Yesu ye kabako minnu kɛ, sarakalasebaaw kuntigiw ni sariya karamɔgɔw ye olu ye minkɛ, ka denmisɛnw pɛrɛnkan mɛn Alabatosoba kɔnɔ ko: «Tanuli ka kɛ Dawuda Bɔnsɔn ye,» u diminna.
[16] O la, u y'a fɔ Yesu ye ko: «Ninnu bɛ min fɔ, i tulo tɛ o la wa?» Yesu y'u jaabi ko: «ɔwɔ. Aw ma nin kumaw kalan wa ko: ‘I ye tanuli labɛnnen bɔ denmisɛnw ni sinminnaw da la’?»
[17] O fɔlen kɔ, a bɔra dugu kɔnɔ ka u to yen ka taa Bɛtani ka si yen.
[18] O dugusajɛ sɔgɔma fɛ, Yesu kɔsegintɔ ka na dugu kɔnɔ, kɔngɔ y'a minɛ.
[19] A ye torosun dɔ ye sira kɛrɛ fɛ, a gɛrɛla o la, nka a ma foyi ye o la fura kɔ. O la, a y'a fɔ o torosun ma ko: «I tɛna den tun abada.» O torosun sinna ka ja.
[20] Kalandenw y'o ye minkɛ, u kabakoyara kosɛbɛ. U ye Yesu ɲininka ko: «Nin torosun sinna ka ja ten cogo di?»
[21] Yesu y'u jaabi ko: «Tiɲɛ la ne b'a fɔ aw ye, ni dannaya bɛ aw fɛ, ni aw tɛ sigasiga fewu, ne ye min kɛ nin torosun na, aw tɛna dan o ma, nka aw na se k'a fɔ nin kulu ye ko: ‘Bɔ yan ka taa i fili kɔgɔji la,’ o na kɛ.
[22] Aw mana fɛn o fɛn ɲini Ala delili la ni dannaya ye, aw na o sɔrɔ.»
[23] Yesu donna Alabatosoba kɔnɔ ka mɔgɔ kalanni daminɛ. K'a to o kalanni la, sarakalasebaaw kuntigiw ni Yahutu cɛkɔrɔbaw gɛrɛla a la k'a ɲininka ko: «Sebaaya jumɛn b'a to i bɛ nin kow kɛ? Jɔni ye o fanga di i ma?»
[24] Yesu ye u jaabi ko: «Ne fana bɛ aw ɲininka ko kelen na. Ni aw ye ne jaabi, o tuma la sebaaya min b'a to ne bɛ nin kow kɛ, ne fana na o fɔ aw ye.
[25] Jɔni de ye Yuhana ci ko a ka batiseli kɛ, Ala wa, wala mɔgɔw?» O tuma la, u kumana ɲɔgɔn fɛ ko: «Ni an ko Ala y'a ci, a n'a fɔ ko mun y'a to an ma da a la?
[26] Nka ni an ko mɔgɔw y'a ci, an bɛ siran jama ɲɛ, katuguni mɔgɔw bɛɛ bɛ Yuhana jate kira ye.»
[27] O de kosɔn u ye Yesu jaabi ko: «Anw ma o dɔn.» Yesu y'a fɔ u ye ko: «Ayiwa, sebaaya min b'a to ne bɛ nin kow kɛ, ne fana tɛna o fɔ aw ye.»
[28] Yesu y'a fɔ u ye ko: «Mun bɛ aw kɔnɔ nin ko la? Denkɛ fila tun bɛ cɛ dɔ fɛ. A y'a fɔ fɔlɔ ye ko: ‘Ne denkɛ, taa baara kɛ ne ka rezɛn nakɔ la bi.’
[29] O y'a jaabi ko: ‘Ne tɛna taa.’ Nka a y'i miiri minkɛ, a taara.
[30] Fa ye o ci kelen fɔ denkɛ filanan ye. O y'a jaabi ko: ‘Ne bɛ taa, baba.’ Nka a ma taa.
[31] Olu fila la jumɛn de ye u fa sago kɛ?» U ko: «Fɔlɔ.» O la, Yesu y'a fɔ u ye ko: «Tiɲɛ la ne b'a fɔ aw ye ko faama wari minɛbaaw ni jatɔmusow bɛ don Ala ka masaya la aw ɲɛ.
[32] Sabu Yuhana nana aw fɛ ka sira tilennen jira aw la, aw ma da ale la, nka faama wari minɛbaaw ni jatɔmusow dara a la. Aw y'o ye, hali o, aw ma sɔn ka nimisa ka da a la.
[33] «A' ye ntalen wɛrɛ lamɛn: Dutigi dɔ ye rezɛn nakɔ bi ka sinsan kɛ ka o lamini. A ye dingɛ sen ka rezɛn ji bɔ yɔrɔ dila a kɔnɔ yen, ka sankanso jɔ kɔlɔsili kama. O kɔ, a ye o nakɔ kalifa rezɛn sɛnɛkɛla dɔw ma ka taa jamana wɛrɛ la.
[34] Rezɛn mɔ tuma surunyalen, a y'a ka baaraden dɔw ci o rezɛn sɛnɛkɛlaw ma ko olu ka rezɛn mɔ minɛ u fɛ.
[35] Nka rezɛn sɛnɛkɛlaw ye a ka baaradenw minɛ ka dɔ bugɔ ka dɔ faga, ka a sabanan bon ni kabakurunw ye.
[36] Nakɔtigi ye baaraden dɔ wɛrɛw ci minnu ka ca ni fɔlɔ taw ye. U ye olu minɛ i ko fɔlɔ taw.
[37] O bɛɛ kɛlen kɔ, nakɔtigi ye a yɛrɛ denkɛ ci, a ko: ‘U na ne denkɛ kɔni bonya.’
[38] Nka kabini rezɛn sɛnɛkɛlaw ɲɛ dara nakɔtigi denkɛ kan, u y'a fɔ ɲɔgɔn ye ko: ‘A ciyɛntala filɛ. A' ye na, an ka o faga. O mana kɛ, a ciyɛn na kɛ an ta ye.’
[39] U ye a denkɛ minɛ ka o fili nakɔ kɔfɛ k'a faga.
[40] «Ni rezɛn nakɔtigi nana, a na mun de kɛ nin rezɛn sɛnɛkɛlaw la sa?»
[41] U y'a jaabi ko: «A na o mɔgɔ juguw faga cogo juguya kosɛbɛ, ka rezɛn nakɔ kalifa mɔgɔ wɛrɛw ma, minnu na a ka rezɛn mɔ di a ma a waati la.»
[42] O kɔ, Yesu y'a fɔ u ye ko: «Aw ma nin kalan Kitabu la wa, ko: ‘Sojɔlaw banna kabakurun min na, o kɛra so selekela kabakurun lakika ye. A filɛ, Matigi de ye o kɛ. Kabako don an ɲɛ na.’»
[43] Yesu ko: «O de y'a to ne b'a fɔ aw ye ko Ala ka masaya na bɔsi aw la ka di siya wɛrɛ ma min na den bɛnnen kɛ o masaya ye.
[44] [Mɔgɔ min mana bin o kabakurun kan, o tigi na karikari. O kabakurun mana bin min kan, a na o tigi ɲɔɲɔ.]»
[45] Sarakalasebaaw kuntigiw ni Farisiɛnw ye Yesu ka ntalen mɛn minkɛ, olu y'a faamu ko a kan bɛ u ma.
[46] O la, u tun bɛ a minɛ cogo ɲini, nka u siranna jama ɲɛ, katuguni olu tun bɛ Yesu jate kira ye.