[1] Yesu ye a ka kalanden tan ni fila wele ka fanga di u ma ka jinɛw gɛn ka bɔ mɔgɔw la ani ka banaw ni barikantanya bɛɛ kɛnɛya.
[2] Yesu ka ciden tan ni fila tɔgɔw filɛ: Fɔlɔ, Simɔn, o bɛ wele Piɛrɛ, ani o balimakɛ Andre ani Zebede denkɛw Yakuba ni Yuhana,
[3] Filipe ni Bartɛlɛmi, Tɔma ni Matiyu min tun ye faama wari minɛbaa ye fɔlɔ, Alifɛ denkɛ Yakuba ni Tade
[4] ani Simɔn Zelote, ani Juda Isikariɔti, o de ye Yesu don bolo la.
[5] Yesu ye a fɛ taw fɔ a ka tan ni fila ye ka u ci, a ko: «Siya minnu tɛ Yahutuw ye, aw kana taa olu fan fɛ, aw kana don Samarikaw ka duguw si kɔnɔ fana.
[6] A' ye taa Israɛl mɔgɔw fan fɛ, olu minnu kɛra i ko saga tununnenw.
[7] Aw taatɔ ka to ka waajuli kɛ ko sankolo masaya surunyara.
[8] A' ye banabaatɔw kɛnɛya ka suw lakunun. A' ye kunatɔw saniya ka jinɛw gɛn ka bɔ mɔgɔw la. Aw y'a sɔrɔ gansan, aw fana k'a di gansan.
[9] Aw kana sanu wala warijɛ wala wari misɛn bila aw kun.
[10] Aw kana dugutaa minɛn ta fana, wala dulɔki fila wala sabara wala bere. Baarakɛla kɔni ka kan ni a ka dumuni ye.
[11] «Aw mana se dugu o dugu la, duguba wala dugu misɛn, aw ka mɔgɔ sɛbɛ ɲini ka jigin o fɛ fo aw taa tuma ka se.
[12] Aw dontɔ o du kɔnɔ, aw ka foli kɛ.
[13] Ni o du kɔnɔ mɔgɔw ka kan ni o hɛrɛ ye, o ka to u fɛ, nka ni u man kan n'a ye, aw ka hɛrɛ ka kɔsegin aw ma.
[14] Ni u ma sɔn ka aw ladon wala ka aw ka kuma lamɛn, du o du kɔnɔ, wala dugu dɔ kɔnɔ, aw bɔtɔ, a' ye aw senna buguri yuguyugu yen ka taa.
[15] Tiɲɛ la ne b'a fɔ aw ye ko Sodɔmɛ ni Gomɔrɛ jamana mɔgɔw ka tɔɔrɔ tɛna o dugu mɔgɔw ta bɔ kiritigɛ don na.
[16] «A filɛ, ne bɛ aw ci ka taa i n'a fɔ sagaw bɛ taa waraw cɛma. A' ye keguya i ko saw, ka kɛ mɔgɔ jɛlenw ye i ko jɛnɛntubanw.
[17] A' ye aw yɛrɛw kɔlɔsi mɔgɔw la dɛ, k'a masɔrɔ u na aw don kiritigɛ jamaw bolo ka aw gosi ni gɛɲɛw ye u ka Alabatosow kɔnɔ.
[18] U na taa ni aw ye gɔfɛrɛnɛrɛw ni masakɛw ɲɛ kɔrɔ ne tɔgɔ kosɔn. O n'a to aw ka seereya kɛ olu ni siya tɔw ɲɛ kɔrɔ.
[19] Ni u bɛ aw don bolo la tuma min na, aw hakili kana ɲaami aw ka fɔta wala aw ka kuma cogo la. Aw na kuma minnu fɔ, olu na jigin aw hakili la o waati yɛrɛ de la,
[20] katuguni aw yɛrɛw tɛna kɛ kumabaaw ye, nka aw Fa Ala Ni de na kuma aw da la.
[21] «Balima na a balima don bolo la, walisa a ka faga. Fa na o ɲɔgɔn kɛ a den na. Denw fana na wuli u bangebaaw kama walisa u ka faga.
[22] Mɔgɔw bɛɛ na aw koniya ne tɔgɔ kosɔn, nka min bɛ muɲuli kɛ fo a laban na, o na kisi.
[23] Ni u ye aw tɔɔrɔ dugu dɔ la, a' ye boli ka taa dugu wɛrɛ la. Tiɲɛ la ne b'a fɔ aw ye ko aw tɛna tɛmɛn Israɛl duguw bɛɛ kɔnɔ sani Mɔgɔ Denkɛ ka na.
[24] «Kalanden man bon ni a karamɔgɔ ye. Baaraden man bon ni a ka baara kuntigi ye.
[25] Kalanden dan ye ka kɛ i ko a karamɔgɔ. Baaraden fana dan ye ka kɛ i ko a ka baara kuntigi. Ni gatigi welela Bɛlzebul, tɔgɔ min na fɔ a ka so mɔgɔw ma, o na juguya ni Bɛlzebul ye dɛ.
[26] «Aw kana siran mɔgɔw ɲɛ, sabu foyi dogolen tɛ min tɛna bɔ kɛnɛ kan, gundo si tɛ ni a tɛna dɔn.
[27] Ne bɛ min fɔ aw ye dibi la, a' ye o fɔ kɛnɛ kan. Aw bɛ dogodogonin kuma min mɛn, a' ye o welewele da so san fɛ.
[28] Minnu bɛ farikolo faga k'a sɔrɔ u tɛ se ka foyi kɛ ni la, aw kana siran olu ɲɛ. Min bɛ se ka farikolo ani ni halaki jahanama kɔnɔ, aw ka siran o de ɲɛ.
[29] Cɔrɔnin fila tɛ feere wari misɛn kelen na wa? O bɛɛ n'a ta, hali u kelen tɛ bin duguma ni aw Fa Ala ma sɔn.
[30] Aw kɔni, hali aw kunsigi bɛɛ dama dɔnnen don.
[31] O la, aw kana siran, aw ka fisa ni cɔrɔnin caman ye.
[32] «Mɔgɔ o mɔgɔ mana jɔ a la mɔgɔw ɲɛ na ko a ye ne ta ye, ne fana na jɔ a la ne sankolola Fa ɲɛ kɔrɔ ko o tigi ye ne ta ye.
[33] Nka min bɛ i dalacɛ ne la mɔgɔw ɲɛ na, ne fana na ne dalacɛ o tigi la ne sankolola Fa ɲɛ kɔrɔ.
[34] «Aw kana miiri ko ne nana hɛrɛ kɛ dugukolo kan dɛ, ne ma na hɛrɛ kɛ fɔ npan.
[35] Ne nana bɛnbaliya don cɛ ni a fa cɛ, ani denmuso ni a ba, ani furumuso ni a biranmuso.
[36] Mɔgɔ so mɔgɔw yɛrɛ na kɛ a juguw ye.
[37] «Mɔgɔ min bɛ a fa wala a ba kanu ka tɛmɛn ne kan, o man kan ni ne ye. Mɔgɔ min bɛ a denkɛ wala a denmuso kanu ka tɛmɛn ne kan, o man kan ni ne ye.
[38] Mɔgɔ min tɛ a gengenjiri ta ka tugu ne la, o man kan ni ne ye.
[39] Mɔgɔ min bɛ a yɛrɛ ni mara, o na bɔnɛ a ni la, nka min bɛ bɔnɛ a ni la ne kosɔn, o de na a ni sɔrɔ.
[40] «Mɔgɔ min bɛ aw ladon, o bɛ ne ladon. Mɔgɔ min bɛ ne ladon, o bɛ ne cibaa ladon.
[41] Mɔgɔ min bɛ kira dɔ ladon k'a masɔrɔ Ala ka kira don, o na kira ka baraji ɲɔgɔn sɔrɔ. Min bɛ mɔgɔ tilennen ladon a ka tilennenya kosɔn, o na mɔgɔ tilennen ka baraji ɲɔgɔn sɔrɔ.
[42] Tiɲɛ la ne b'a fɔ aw ye ko: Mɔgɔ o mɔgɔ mana hali jifilen ɲɛ kelen ji suma dama di nin denmisɛnw dɔ ma k'a masɔrɔ a ye ne ka kalanden ye, o tigi tɛna dɛsɛ o baraji la.»