[1] «Sankolo masaya na bɔ npogotigi tan fɛ. U ye u ka fitinɛw ta ka taa kɔɲɔcɛ kunbɛn.
[2] U la duuru tun ye hakilintanw ye, duuru tun ye hakilimanw ye.
[3] Hakilintanw ye u ka fitinɛw ta, nka u ma tulu ta u fɛ minɛnw kɔnɔ.
[4] Hakilimanw ye fitinɛw ta ka tulu fana ta tulu minɛnw kɔnɔ.
[5] Kɔɲɔcɛ mɛnna, a ma na, u bɛɛ jingɔnna ka sunɔgɔ.
[6] «Dugutila fɛ, pɛrɛnkanba bɔra ko: ‘Kɔɲɔcɛ nalen filɛ, a' ye taa a kunbɛn.’
[7] O la, npogotigi tan wulila ka u ka fitinɛw dabɔ.
[8] Hakilintanw y'a fɔ hakilimanw ye ko: ‘A’ ye tulu dɔɔnin di an ma, an ka fitinɛw bɛ ɲini ka sa.’
[9] Hakilimanw y'u jaabi ko: ‘Ayi. Min bɛ an bolo, o tɛ anw ni aw bɔ. A' ye taa tulu feerebaaw yɔrɔ ka dɔ san aw yɛrɛw ye.’
[10] Hakilintanw taalen kɔ tulu san yɔrɔ la, kɔɲɔcɛ nana. Npogotigi duuru minnu labɛnnen tun bɛ, olu donna kɔɲɔso kɔnɔ a fɛ, da sɔgɔra.
[11] O kɔ, npogotigi tɔw nana ka pɛrɛn ko: ‘Matigi, matigi, da yɛlɛ an ye!’
[12] Nka kɔɲɔcɛ y'u jaabi ko: ‘Tiɲɛ la ne b'a fɔ aw ye ko ne tɛ aw dɔn.’
[13] «O de la, a' ye to aw ɲɛ na, k'a masɔrɔ aw tɛ o don ni o waati dɔn.
[14] «A na kɛ i ko cɛ dɔ taatɔ dugu la min ye a ka jɔnkɛw wele ka a bolofɛnw kalifa u ma.
[15] A ye wari talan duuru di dɔ ma, ka talan fila di dɔ ma, ka talan kelen di a sabanan ma. U bɛɛ ta dira ka kɛɲɛ ni u se ko ye. O kɔ, a taara.
[16] O yɔrɔnin bɛɛ talan duuru tigi taara jago kɛ ni a ka wari ye ka talan duuru wɛrɛ sɔrɔ a la.
[17] O cogo la talan fila tigi fana ye jago kɛ ka talan fila wɛrɛ sɔrɔ.
[18] Talan kelen tigi taara dingɛ sen duguma ka a makɛ ka wari dogo yen.
[19] «O tuma mɛnnen kɔ, u makɛ nana. A ni a ka jɔnw ye jate kɛ.
[20] Talan duuru tigi gɛrɛla a la ni a ka talanw ye, a ko: ‘Ne makɛ, i ye talan duuru kalifa ne ma, ne ye talan duuru wɛrɛ sɔrɔ tɔnɔ ye, u filɛ.’
[21] A makɛ y'a fɔ a ye ko: ‘A ɲɛ na, jɔn ɲuman, dannamɔgɔ. I kɛra dannamɔgɔ ye ko fitinin na, ne na kobaw kalifa i ma. Na, an ka ɲagali ɲɔgɔn fɛ.’
[22] Talan fila tigi fana gɛrɛla a la k'a fɔ a ye ko: ‘Ne makɛ, i ye talan fila kalifa ne ma. Ne ye talan fila wɛrɛ sɔrɔ tɔnɔ ye, u filɛ.’
[23] A makɛ ko: ‘A ɲɛ na, jɔn ɲuman, dannamɔgɔ. I kɛra dannamɔgɔ ye ko fitinin na, ne na kobaw kalifa i ma. Na, an ka ɲagali ɲɔgɔn fɛ.’
[24] Ayiwa, o bɛɛ kɔ, talan kelen tigi gɛrɛla a la k'a fɔ a ye ko: ‘Ne makɛ, ne tun y'a dɔn ko i ye mɔgɔ gɛlɛn ye. I ma danni kɛ yɔrɔ min na, i bɛ suman tigɛ yen. I ma serili kɛ yɔrɔ min na, i bɛ suman kan yen.
[25] Ne sirannen taara i ka wari dogo dugukolo la. I ka wari filɛ.’
[26] A makɛ y'a jaabi ko: ‘Jɔn jugu, salabaatɔ. I tun y'a dɔn ko ne ma danni kɛ yɔrɔ min na, ne bɛ suman tigɛ yen. Ko ne ma serili kɛ yɔrɔ min na, ne bɛ suman kan yen.
[27] Ayiwa, i tun ka kan ka ne ka wari bila banki la. Ne kɔseginnen tun na a ni a tɔnɔ sɔrɔ.
[28] A' ye o talan kelen bɔsi a la k'a di talan tan tigi ma.
[29] Fɛn bɛ min bolo, dɔ na di o ma ka fara a ta kan, a na jiidi. Nka fɛn tɛ min bolo, hali fɛn fitinin min b'a bolo, o na bɔsi a la.
[30] Nin jɔn jugu kɔni, a' ye o fili kɛnɛma dibi la. Kasi ni ɲin ɲimi na kɛ yen.’
[31] «Mɔgɔ Denkɛ mana na ni a nɔɔrɔ ni a ka mɛlɛkɛw bɛɛ ye, a na sigi a ka masasigilan nɔɔrɔma kan.
[32] Siyaw bɛɛ na lajɛ a ɲɛ kɔrɔ. A na u fara ka bɔ ɲɔgɔn na, i ko bagangɛnna bɛ a ka sagaw ni a ka baw fara ka u bɔ ɲɔgɔn na cogo min na.
[33] A na sagaw bila a kinin fɛ ka baw bila a numan fɛ.
[34] O la, masakɛ n'a fɔ a kinin fɛ mɔgɔw ye ko: ‘A’ ye na, ne Fa ka dubadenw. Masaya min labɛnnen bɛ aw ye kabini diɲɛ da tuma, a' ye don o la k'a kɛ aw ta ye.
[35] K'a masɔrɔ kɔngɔ tun bɛ ne la tuma min na, aw ye dumuni di ne ma. Minnɔgɔ tun bɛ ne la, aw ye ji di ne ma. Ne tun ye dunan ye, aw ye ne ladon.
[36] Ne fɛɛrɛtɔ tun don, aw ye ne fɛɛrɛ bɔ. Ne banabaatɔ tun don, aw ye ne mago ɲɛ. Ne tun bɛ kaso la, aw nana bɔ ne ye.’
[37] O mɔgɔ tilennenw na a jaabi ko: ‘Matigi, an ye i kɔngɔtɔ ye tuma jumɛn, ka dumuni di i ma, walima i minnɔgɔtɔ, ni an ye ji di i ma?
[38] An ye i dunanman ye tuma jumɛn, ka i ladon? Walima ka i fɛɛrɛtɔ ye, ka i fɛɛrɛ bɔ?
[39] An ye i banabaatɔ wala kasolama ye tuma jumɛn, ni an taara bɔ i ye?’
[40] Masakɛ na u jaabi ko: ‘Tiɲɛ la ne b'a fɔ aw ye ko ni aw ye o kɛ hali ne balima ninnu la dɔgɔmannin kelen ye, aw ye o kɛ ne yɛrɛ de ye.’
[41] «O kɛlen kɔ, masakɛ n'a fɔ a numan fɛ mɔgɔw ye ko: ‘A’ ye aw mabɔ ne la, dangalenw. A' ye taa tasuma banbali la, o min labɛnnen bɛ Sitanɛ ni a ka mɛlɛkɛw kama.
[42] Sabu kɔngɔ tun bɛ ne la, aw ma dumuni di ne ma. Minnɔgɔ tun bɛ ne la, aw ma ji di ne ma.
[43] Ne dunanman tun don, aw ma ne ladon. Ne fɛɛrɛtɔ tun don, aw ma ne fɛɛrɛ bɔ. Ne banabaatɔ tun don, ne tun bɛ kaso la, aw ma ne mago ɲɛ.’
[44] U n'a jaabi ko: ‘Matigi, an ye i kɔngɔtɔ ye tuma jumɛn, wala i minnɔgɔtɔ, wala i dunanman, wala i fɛɛrɛtɔ, wala i banabaatɔ, wala i kasolama, ni an ma i dɛmɛ?’
[45] Masakɛ na u jaabi ko: ‘Tiɲɛ la ne b'a fɔ aw ye ko ni aw ma o kɛ hali ne balima ninnu la dɔgɔmannin kelen ye, aw ma o kɛ ne ye.’
[46] Olu na taa tɔɔrɔ banbali la, mɔgɔ tilennenw na taa ɲɛnamaya banbali la.»