[1] Lafiɲɛ don dɔ la, Yesu tun bɛ tɛmɛn ɲɔforo dɔw fɛ. A ka kalandenw ye ɲɔtinsan dɔw tigɛ ka u cɔngɔ u tɛgɛw kɔnɔ ka olu kisɛ ɲimi.
[2] Farisiɛn dɔw y'a fɔ u ye ko: «Ko min dagalen tɛ lafiɲɛ don na, mun na aw bɛ o kɛ?»
[3] Yesu y'u jaabi ko: «Kɔngɔ ye Dawuda ni a nɔfɛ mɔgɔw minɛ tuma min na, a ye min kɛ, aw ma o kalan wa?
[4] A donna Ala ka so kɔnɔ ka jirali nbuurukun dɔw ta ka u dun, ka dɔ di a nɔfɛ mɔgɔw fana ma. O dumuni dagalen tun tɛ mɔgɔ si ye fɔ sarakalasebaaw dama.»
[5] Yesu y'a fɔ u ye fana ko: «Mɔgɔ Denkɛ ye lafiɲɛ don Matigi de ye.»
[6] Yesu donna Alabatoso dɔ kɔnɔ lafiɲɛ don dɔ wɛrɛ la, ka mɔgɔw kalan. Cɛ dɔ tun bɛ yen, a kininbolo jalen tun don.
[7] Sariya karamɔgɔw ni Farisiɛnw tun bɛ Yesu kɔlɔsi k'a filɛ yala ni a na mɔgɔ dɔ kɛnɛya lafiɲɛ don na, walisa u k'a sendon sababu sɔrɔ.
[8] Nka Yesu tun bɛ u ka miiriliw dɔn. O tuma la a y'a fɔ cɛ bolojalen ye ko: «Wuli k'i jɔ mɔgɔw cɛma.» A wulila k'i jɔ.
[9] Yesu y'a fɔ u ye ko: «Ne bɛ aw ɲininka yala a dagalen bɛ lafiɲɛ don na ka ko ɲuman kɛ wa, wala ka ko jugu kɛ? Ka mɔgɔ kisi wa, wala ka mɔgɔ faga?»
[10] A y'a ɲɛ yaala ka mɔgɔw bɛɛ filɛ, o kɔ, a y'a fɔ o cɛ ye ko: «I bolo mɔɔnɔbɔ.» A y'a bolo mɔɔnɔbɔ, a kɛnɛyara.
[11] U dusu bɔra kosɛbɛ. U tun bɛ kuma ɲɔgɔn fɛ ko u bɛ se ka mun kɛ Yesu la.
[12] O kɔ, Yesu taara kulu kan don dɔ la ka Ala deli, a sira Ala delili la.
[13] Dugu jɛlen, a ye a ka kalandenw wele, ka tan ni fila ɲɛnatɔmɔ u la, ka olu wele cidenw.
[14] Olu filɛ ninnu ye: Simɔn, (a ye o tɔgɔ da Piɛrɛ), ani a balimakɛ Andre, Yakuba ni Yuhana, Filipe ni Bartɛlɛmi,
[15] Matiyu ni Tɔma, Alifɛ denkɛ Yakuba ni Simɔn Zelote,
[16] Yakuba denkɛ Jude ni Juda Isikariɔti, o de ye Yesu don bolo la.
[17] Yesu ni a ka kalandenw jiginna ka bɔ kulu kan ka se kɛnɛba dɔ ma, a ka kalandenw caman tun bɛ yen ani jamaba. Olu tun nana ka bɔ Jude jamana bɛɛ la ani Jerusalɛm ni kɔgɔji da la jamana dugubaw Tir ni Sidɔn.
[18] U tun nana walisa k'a ka kuma lamɛn ani a ka u kɛnɛya. Minnu tɔɔrɔlen tun bɛ jinɛw fɛ, olu fana kɛnɛyara.
[19] Jama bɛɛ tun bɛ u jija ka maga a la, katuguni sebaaya tun bɛ bɔ a la ka u bɛɛ kɛnɛya.
[20] O tuma la Yesu y'a ɲɛ kɔrɔta ka a ka kalandenw filɛ, a ko: «Aw minnu ye faantanw ye, aw ye dubadenw ye, katuguni Ala ka masaya ye aw ta ye.
[21] «Kɔngɔ bɛ aw minnu na sisan, aw ye dubadenw ye, katuguni aw na fa! «Aw minnu bɛ kasi sisan, aw ye dubadenw ye, katuguni aw na yɛlɛ ɲagali fɛ!
[22] «Ni mɔgɔw bɛ aw koniya ka u mago bɔ aw la, ka aw neni, ka aw tɔgɔ jugu fɔ Mɔgɔ Denkɛ kosɔn, o tuma la aw ye dubadenw ye.
[23] O don na, aw na nisɔndiya ka ɲagali kosɛbɛ, katuguni aw ka baraji ka bon sankolo la. U bɛnbaw fana ye kiraw tɔɔrɔ ten.
[24] «Nka aw nafolobatigiw, bɔnɛ bɛ aw ye, katuguni aw ye aw ka ɲɛsuma sɔrɔ ka ban!
[25] «Aw minnu falen bɛ dumuni ɲumanw la sisan, bɔnɛ bɛ aw ye, katuguni kɔngɔ na aw minɛ! «Aw minnu bɛ yɛlɛ sisan, bɔnɛ bɛ aw ye, katuguni aw na ɲɛnasisi ka kasi!
[26] «Ni mɔgɔw bɛɛ bɛ aw tɔgɔ ɲuman fɔ tuma min na, bɔnɛ bɛ aw ye, katuguni u bɛnbaw ye kira nkalontigɛlaw bonya o cogo la!
[27] «Nka aw minnu bɛ ne lamɛn, ne b'a fɔ aw ye ko: A' ye aw juguw kanu, ka ko ɲuman kɛ aw koniyabaaw ye.
[28] A' ye dubaw kɛ aw dangabaaw ye. Minnu bɛ aw tɔɲɔ, a' ye Ala deli olu ye.
[29] Ni mɔgɔ dɔ y'a tɛgɛ ci i taman kelen na, i ka fan dɔ jɔ a ye. Ni dɔ ye i ka dulɔkiba ta, i kana a bali ka i ka dulɔki misɛn fana ta.
[30] Mɔgɔ o mɔgɔ ye fɛn dɔ deli i fɛ, i ka o sɔn. Ni dɔ ye i ka fɛn dɔ ta, i kana a fɔ ko o tigi ka o kɔsegin.
[31] Aw b'a fɛ mɔgɔw ka ko min kɛ aw ye, aw ka o ɲɔgɔn kɛ u ye.
[32] «Ni aw bɛ aw kanubaaw kanu, aw na mun tanuli sɔrɔ o la? Hali jurumutɔw fana bɛ u kanubaaw kanu.
[33] Minnu bɛ ko ɲuman kɛ aw ye, ni aw bɛ ko ɲuman kɛ olu dama ye, aw na mun tanuli sɔrɔ o la? Hali jurumutɔw fana bɛ o de kɛ.
[34] Aw jigi b'a la ko aw nafɛn dɔ sɔrɔ minnu fɛ, ni aw bɛ juru don olu dama la, aw na mun tanuli sɔrɔ o la? Jurumutɔw fana bɛ juru don u tɔɲɔgɔnw la walisa u ka u ta ɲɔgɔn sɔrɔ ko kura.
[35] Nka a' ye aw juguw kanu ka ko ɲuman kɛ u ye ka juru don u la, aw kana aw jigi da fɛn sɔrɔ kan. Aw na barajiba sɔrɔ, aw na kɛ Ala Kɔrɔtalenba denw ye, katuguni ale ka ɲi fitiriwalew ni mɔgɔ juguw ma.
[36] Aw ka kɛ makarikɛlaw ye i ko aw Fa ye makarikɛla ye cogo min na.
[37] «Aw kana kiri tigɛ tɔw kan, kiri tɛna tigɛ aw kan. Aw kana tɔw jalaki, aw tɛna jalaki. Aw ka yafali kɛ, yafa na kɛ aw ma.
[38] A' ye mɔgɔw sɔn, mɔgɔw na aw sɔn. U na mure ta ka aw ta suma k'a digidigi k'a yigiyigi ka dɔ fara a kan fo a bɛ bɔn, ka o yɛlɛma aw ka dulɔki jufabaw kɔnɔ, k'a masɔrɔ aw bɛ tɔw ta suma ni minɛn min ye, aw ta na suma ni o minɛn yɛrɛ de ye.»
[39] Yesu ye ntalen da u ye fana, a ko: «Fiyentɔ bɛ se ka fiyentɔ ka bere minɛ wa? N'o kɛra, u fila bɛɛ tɛna bin dingɛ kɔnɔ wa?
[40] Kalanden man bon ni a karamɔgɔ ye, nka kalanden o kalanden kalanna ka se, o na kɛ i ko a karamɔgɔ.
[41] «Kalanin min bɛ i balima ɲɛ kan, mun na i bɛ o filɛ? k'a sɔrɔ so cɛtigɛ jiri bɛ i yɛrɛ ɲɛ kan, i ma o ye.
[42] E min tɛ so cɛtigɛ jiri ye i yɛrɛ ɲɛ kan, i bɛ se k'a fɔ i balima ye cogo di ko: ‘Ne balima, kalanin min bɛ i ɲɛ kan, a to ne ka o bɔ?’ Filankafo, so cɛtigɛ jiri bɔ i yɛrɛ ɲɛ kan fɔlɔ. Ni o kɛra, i na se ka yeli kɛ ko ɲuman ka kalanin bɔ i balima ɲɛ kan.
[43] «Jiri ɲuman tɛ den jugu kɛ, jiri jugu tɛ den ɲuman kɛ.
[44] Jiriw bɛɛ bɛ dɔn u den de fɛ, o kɔrɔ: Mɔgɔ tɛ toroden kari ŋɔnisun na, mɔgɔ tɛ rezɛn mɔ kari ɲaamɛ ŋɔni na.
[45] Mɔgɔ ɲuman bɛ fɛn ɲumanw bɔ a ka fɛn ɲuman mara yɔrɔ la, o min ye a dusukun ye. Mɔgɔ jugu bɛ fɛn juguw bɔ a ka fɛn jugu mara yɔrɔ la. Mɔgɔ dusukun falen bɛ min na, a da bɛ o de fɔ.
[46] «Mun y'a to aw bɛ ne wele ‘Matigi, Matigi,’ k'a sɔrɔ ne bɛ min fɔ aw tɛ o kɛ?
[47] Mɔgɔ o mɔgɔ bɛ na ne ma, ka ne ka kumaw lamɛn ka u kɛ, o bɔlen bɛ min fɛ, ne bɛ o jira aw la.
[48] O bɔlen bɛ sojɔla dɔ fɛ min ye dugukolo sen k'a dunya, ka so ju sigi farakolo kan, ka so jɔ o kan. Ji cayara tuma min na, ba karila, a woyo ye o so gosi, nka a ma se k'a lamaga, katuguni a jɔlen tun bɛ ko ɲuman.
[49] Nka min bɛ ne ka kumaw mɛn, ni a ma u kɛ, o bɔlen bɛ cɛ dɔ fɛ min y'a ka so jɔ duguma, ni a ma jusigilan kɛ a kɔrɔ. Baji sera o so ma tuma min na, a binna o yɔrɔnin kelen, o so tiɲɛ ko juguyara.»