[1] Jama bɛɛ wulila ka taa ni Yesu ye gɔfɛrɛnɛrɛ Pilate ɲɛ kɔrɔ.
[2] U binna a sendonni la ko: «An y'a sɔrɔ nin cɛ bɛ an ka siya lamuruti, ka u bali ko u kana nisɔngɔ sara Romɛ masakɛ ye, ko ale yɛrɛ ye Krisita ye, ko masakɛ don.»
[3] Pilate y'a ɲininka ko: «I ye Yahutuw ka masakɛ ye wa?» A y'a jaabi ko: «Ne ye o ye.»
[4] Pilate y'a fɔ sarakalasebaaw kuntigiw ni jama ye ko: «Ne ma jalaki yɔrɔ si ye nin cɛ la.»
[5] Nka u tora a kan k'a fɔ ko: «A bɛ mɔgɔw kɔnɔnasu n'a ka kalan ye Jude jamana yɔrɔ bɛɛ la, k'a daminɛ Galile fo ka na se yan.»
[6] Pilate ye Galile tɔgɔ mɛn minkɛ, a ye ɲininkali kɛ yala ni a ye Galileka ye.
[7] A y'a mɛn ko a bɛ Hɛrɔde ka mara la tuma min na, a ye mɔgɔw bila ka taa n'a ye Hɛrɔde yɔrɔ. O y'a sɔrɔ Hɛrɔde fana tun bɛ Jerusalɛm o donw la.
[8] Hɛrɔde ye Yesu ye minkɛ, o diyara a ye kosɛbɛ. A tun y'a ko mɛn, a tun b'a fɛ k'a ye kabini tuma jan, katuguni a jigi tun b'a kan ko a na kabako dɔ kɛtɔ ye a fɛ.
[9] A y'a sɛgɛsɛgɛ ni kuma caman ye, nka Yesu m'a jaabi foyi la.
[10] Sarakalasebaaw kuntigiw ni sariya karamɔgɔw jɔlen tun bɛ yen k'a sendon ni kuma caman ye.
[11] Hɛrɔde ni a ka sɔrɔdasiw y'a dɔgɔya ka yɛlɛ bɔ a ma, ka fini ɲuman don a kan na, k'a kɔsegin ka taa Pilate yɔrɔ.
[12] O don na, Hɛrɔde ni Pilate kɛra teriw ye, katuguni u tun ye ɲɔgɔn juguw ye fɔlɔ.
[13] Pilate ye sarakalasebaaw kuntigiw ni fangatigiw ni mɔgɔw wele
[14] k'a fɔ u ye ko: «Aw nana ni nin cɛ ye ne yɔrɔ, ko a bɛ mɔgɔw lamuruti. O bɛɛ n'a ta, ne y'a sɛgɛsɛgɛ aw ɲɛ na. Aw y'a sendon ko jugu minnu na, ne ma o si sɔrɔ a la.
[15] Hɛrɔde fana ma fɛn sɔrɔ a la, katuguni a y'a kɔsegin an ma. Ko min ka kan ni saya ye, a ma o si kɛ.
[16] O de kosɔn ne n'a bugɔ k'a bila.»
[17] [Pilate tun bɛ kasolamɔgɔ kelen bila Tɛmɛnkan seli la san o san.]
[18] Nka u bɛɛ pɛrɛnna ɲɔgɔn fɛ ko: «Nin cɛ faga, ka Barabasi bila.»
[19] Barabasi tun bilara kaso la murutili dɔ kosɔn dugu kɔnɔ ani mɔgɔ fagali.
[20] Pilate tun b'a fɛ ka Yesu bila, a kumana jama fɛ ko kura.
[21] Nka u pɛrɛnna ko: «A gengen jiri la! A gengen jiri la!»
[22] Pilate kumana u fɛ a siɲɛ sabanan la k'a fɔ u ye ko: «A ye mun ko jugu kɛ? Ne ma fagali sababu si ye a la, o de kosɔn ne n'a bugɔ k'a bila.»
[23] Nka u tora k'a fɔ ni kanba ye ko a ka gengen jiri la. U ka pɛrɛnkan ye Pilate sago kɛɲɛ.
[24] O tuma la Pilate y'a latigɛ ko u bɛ min ɲini, o ka kɛ.
[25] Min tun bilara kaso la murutili ni mɔgɔ fagali kosɔn, u ye o min ɲini, a y'o bila, ka Yesu kɛ u sago ye.
[26] U taatɔ ni Yesu ye, Sirɛnɛka dɔ tun bɛ bɔ a ka foro la, o tɔgɔ ko Simɔn. U y'a minɛ ka Yesu gengenjiri da a kun, ko a ka taa n'a ye Yesu nɔfɛ.
[27] Jamaba tugura a nɔfɛ, ani muso caman minnu tun bɛ ɲɛnasisi ka kasi a kosɔn.
[28] Yesu y'i yɛlɛma u fan fɛ k'a fɔ u ye ko: «Jerusalɛm musow, aw kana kasi ne kosɔn. A' ye kasi aw yɛrɛw ni aw denw kosɔn,
[29] katuguni donw bɛ na, mɔgɔw n'a fɔ ko: ‘Muso minnu tɛ se ka bange kɛ, ani minnu ma denw bange fɔlɔ ani minnu ma sin di denw ma, olu ye dubadenw ye.’
[30] O tuma la mɔgɔw n'a daminɛ k'a fɔ kuluw ye ko: ‘A’ ye bin an kan!’ k'a fɔ tintinw ye ko: ‘A’ ye an datugu!’
[31] Ni u ye nin kow kɛ jiri kɛnɛ la, mun na kɛ jiri jalen na?»
[32] U taara ni kojugukɛla cɛ fila fana ye, olu ni Yesu ka faga ɲɔgɔn fɛ.
[33] U selen yɔrɔ dɔ la min tɔgɔ ko Kunkolo Yɔrɔ, u y'a gengen jiri la yen, ani o kojugukɛla fila. Kelen tun b'a kinin yanfan fɛ, dɔ tun b'a numan yanfan fɛ.
[34] O tuma la Yesu ko: «Ne Fa, yafa u ma. U bɛ min kɛ, u ma o dɔn.» U ye kala da ka a ka finiw tilatila u cɛ ka kɛɲɛ n'o ye.
[35] Mɔgɔw bɛɛ jɔlen tun bɛ yen ka filɛli kɛ. U ni kuntigiw tun bɛ yɛlɛ bɔ a ma k'a fɔ ko: «A ye mɔgɔ dɔw kisi, a k'a yɛrɛ kisi, ni a ye Krisita, Ala ka ɲɛnatɔmɔlen ye.»
[36] Sɔrɔdasiw fana ye yɛlɛ bɔ a ma. U gɛrɛla a la ka diwɛn kumu di a ma
[37] k'a fɔ ko: «Ni i ye Yahutuw ka masakɛ ye, i yɛrɛ kisi!»
[38] A sɛbɛnnen tun bɛ a kun na tan ko: «Nin ye Yahutuw ka masakɛ ye.»
[39] Kojugukɛla gengennenw la kelen tun b'a lagosi ko: «I tɛ Krisita ye wa? I yɛrɛ kisi, ka an fana kisi.»
[40] Nka kojugukɛla tɔ kelen y'o kɔrɔfɔ, ko: «E min bɛ o ɲɔgɔn tɔɔrɔ la, i tɛ siran Ala ɲɛ wa?
[41] An kɔni ka kan ni nin tɔɔrɔ ye, katuguni an bɛ an ka ko jugu kɛlenw tɔɔrɔ de la, nka nin cɛ ma ko jugu si kɛ.»
[42] O kɔ, a y'a fɔ Yesu ye ko: «Yesu, i hakili to ne la, ni i nana i ka masaya la tuma min na.»
[43] Yesu y'a jaabi ko: «Tiɲɛ la ne b'a fɔ i ye, bi i na kɛ ne fɛ alijɛnɛ la.»
[44] Tile selen kuncɛ, dibi donna jamana yɔrɔ bɛɛ la ka lɛrɛ saba ɲɔgɔn kɛ.
[45] Tile ma kɛnɛ bɔ. Alabatosoba cɛtigɛfini farala fila ye a cɛmancɛ la.
[46] Yesu pɛrɛnna ni kanba ye ko: «Ne Fa, ne bɛ ne ni bila i bolo.» O fɔlen kɔ, a sara.
[47] Jalasabatigi y'o ye minkɛ, a ye Ala bonya, a ko: «Tiɲɛ la, nin cɛ tun ye mɔgɔ tilennen ye.»
[48] Jama minnu bɛɛ lajɛlen tun bɛ ka o filɛ, u ye o ko kɛlenw ye minkɛ, u kɔseginna, u ɲɛnasisilen tun bɛ u disi gosigosi.
[49] Yesu dɔnbaaw bɛɛ jɔlen tora yɔrɔ jan ka o kow filɛ, ani muso minnu tun tugura a nɔfɛ ka bɔ Galile jamana la.
[50] Kiritigɛ jamakulu la mɔgɔ dɔ tun bɛ yen, o tɔgɔ ko Yusufu. Mɔgɔ ɲuman tilennen tun don,
[51] a tun ma sɔn mɔgɔ tɔw ka kuma ni u ka kɛwalew ma. A bɔra Yahutuw ka dugu dɔ la, o tɔgɔ ko Arimate. A tun bɛ Ala ka masaya makɔnɔ.
[52] O cɛ taara Pilate sɛgɛrɛ ka Yesu su deli a fɛ.
[53] O kɔ, a ye a su lajigin ka bɔ gengenjiri la ka lenfu fini meleke a la k'a don kaburu dɔ kɔnɔ, o sennen tun bɛ fara la. Mɔgɔ si su tun ma don yen fɔlɔ.
[54] Lafiɲɛ don ɲɛsigi don tun don, lafiɲɛ don tun bɛ ɲini ka daminɛ.
[55] Muso minnu tun tugura Yesu nɔfɛ ka bɔ Galile jamana la, olu taara Yusufu fɛ ka kaburu filɛ, ani Yesu su donna cogo min na.
[56] O kɔ, u kɔseginna u ka so ka suma diyalanw ni tulu suma dumanw labɛn. U ye u lafiya lafiɲɛ don na ka kɛɲɛ ni Ala ka ci fɔlen ye.