[1] Yesu donna Jeriko ka tɛmɛn dugu kɔnɔ.
[2] Cɛ dɔ tun bɛ yen, o tɔgɔ ko Zankɛ. O tun ye faama wari minɛbaaw kuntigi nafolobatigi dɔ ye.
[3] A tun b'a fɛ ka Yesu ye ka a dɔn, nka a ma se k'a ye jama kosɔn, katuguni a tun ka surun.
[4] O tuma la a bolila ka taa ɲɛfɛ ka yɛlɛn torosun na, walisa a ka Yesu ye, k'a masɔrɔ a bɛna tɛmɛn yen.
[5] Yesu selen o yɔrɔ la, a y'a ɲɛ kɔrɔta ka sanfɛla filɛ ka Zankɛ ye k'a fɔ a ye ko: «Zankɛ, i teliya ka jigin. Wajibi don ne ka jigin i ka so kɔnɔ bi.»
[6] Zankɛ jiginna joona, a ɲagalilen taara n'a ye a ka so.
[7] Mɔgɔw bɛɛ y'o ye minkɛ, u binna dajukɔrɔ kuma la, ko: «Nin cɛ taara jigin jurumutɔ ka so!»
[8] Nka Zankɛ wulila k'i jɔ k'a fɔ Matigi ye ko: «Matigi, a filɛ, ne bɛ ne ka nafolo tilancɛ di faantanw ma. Ni ne ye mɔgɔ dɔ ka fɛn dɔ nanbara, ne na o ɲɔgɔn naani segin o tigi ma.»
[9] Yesu y'a fɔ a ye ko: «Kisili sera nin so kɔnɔ bi, k'a masɔrɔ nin cɛ fana ye Ibrahima bɔnsɔn dɔ ye.
[10] Min tununna, Mɔgɔ Denkɛ nana o ɲini k'a kisi.»
[11] Ka mɔgɔw to o kumaw lamɛnni la, Yesu ye nin ntalen da u ye, katuguni a surunyalen Jerusalɛm la, u tun b'a miiri ko Ala ka masaya na i jira o yɔrɔnin kelen.
[12] A ko: «Masakɛden dɔ taara jamana jan na, ko a bɛ taa masaya ɲini a yɛrɛ ye ka kɔsegin.
[13] A taatɔ, a ye a ka jɔn tan wele ka wari manɛ kelen-kelen di u bɛɛ kelen-kelen ma k'a fɔ u ye ko: ‘A’ ye jago kɛ ni ninnu ye sani ne ka kɔsegin.’
[14] Nka a ka siya mɔgɔw y'a koniya, u ye ci bila a nɔfɛ k'a fɔ ko: ‘An t'a fɛ nin cɛ ka sigi an kun na.’
[15] «A ka masaya sɔrɔlen kɔ, a kɔseginna. A tun ye wari di jɔn minnu ma, a ye olu wele walisa u ye tɔnɔ min sɔrɔ jago la, a ka o dɔn.
[16] Fɔlɔ nana k'a fɔ ko: ‘Ne kuntigi, i ka wari manɛ ye a ɲɔgɔn tan tɔnɔ sɔrɔ.’
[17] Masakɛ y'a fɔ o ye ko: ‘A ɲɛ na, jɔn ɲuman. I kɛra dannamɔgɔ ye ko fitinin la, o de kosɔn ne bɛ i sigi dugu tan kun na.’
[18] Jɔnkɛ filanan nana k'a fɔ ko: ‘Ne kuntigi, i ka wari manɛ ye a ɲɔgɔn duuru tɔnɔ sɔrɔ.’
[19] Masakɛ y'a fɔ o fana ye ko: ‘Ne bɛ i sigi dugu duuru kun na.’
[20] O kɔ, jɔn dɔ wɛrɛ nana k'a fɔ ko: ‘Ne kuntigi, i ka wari manɛ filɛ nin ye. Ne ye fini meleke a la ka a mara.
[21] Ne siranna i ɲɛ, katuguni i ye mɔgɔ gɛlɛn ye. I ma fɛn min bila, i bɛ o ta. I ma suman min dan, i bɛ o tigɛ.’
[22] Masakɛ y'a fɔ a ye ko: ‘Jɔn jugu, ne bɛ i ka kiri tigɛ ka kɛɲɛ n'i yɛrɛ da la kumaw ye. I tun b'a dɔn ko ne ye mɔgɔ gɛlɛn ye, ko ne ma fɛn min bila, ne bɛ o ta, ko ne ma suman min dan, ne bɛ o tigɛ.
[23] Mun y'a to i ma ne ka wari bila banki la, walisa ne kɔseginnen ka o wari ni a tɔnɔ sɔrɔ?’
[24] Minnu jɔlen tun bɛ yen, a y'a fɔ olu ye ko: ‘A’ ye a ka wari bɔsi a la k'a di wari manɛ tan tigi ma.’
[25] U y'a fɔ a ye ko: ‘An kuntigi, wari tan b'a bolo ka ban!’
[26] A y'u jaabi ko: ‘Ne b'a fɔ aw ye ko: Fɛn bɛ min bolo, dɔ na di o ma, nka fɛn tɛ min bolo, hali fɛn fitinin min b'a bolo, o na bɔsi a la.
[27] Ne juguw kɔni, minnu tun t'a fɛ ne ka sigi u kun na, a' ye na n'u ye yan, ka u faga ne ɲɛ kɔrɔ.’»
[28] Yesu tilalen kɔ o kumaw la, a ye u ɲɛminɛ ka taa Jerusalɛm.
[29] A surunyara Bɛtɛfajɛ ni Bɛtani la tuma min na, ka se kulu dɔ kɛrɛ fɛ, o tɔgɔ ko Oliviye kulu, a ye a ka kalandenw la fila ci ka taa u ɲɛ,
[30] a ko: «A' ye taa aw ɲɛfɛ dugu la. Ni aw donna dugu kɔnɔ tuma min na, aw na faliden dɔ sirilen sɔrɔ yen, mɔgɔ si ma yɛlɛn min kan fɔlɔ. A' ye o foni ka na n'a ye yan.
[31] Ni mɔgɔ dɔ ye aw ɲininka ko: ‘Mun na aw b'a foni,’ aw k'a fɔ o ye ko: ‘Matigi mago b'a la.’»
[32] Cidenw taalen, Yesu y'a fɔ u ye cogo min na, u y'a sɔrɔ ten.
[33] Ka u to faliden fonili la, falitigiw y'a fɔ u ye ko: «Mun y'a to aw bɛ nin faliden foni?»
[34] U ko: «Matigi mago b'a la.»
[35] O kɔ, u taara ni faliden ye Yesu yɔrɔ. U ye u ka finiw da a kan ka Yesu layɛlɛn a kan.
[36] A taatɔ, mɔgɔw ye u ka finiw fɛnsɛ sira kan.
[37] Yesu surunyalen Jerusalɛm la, Oliviye kulu jigin sira fɛ, a ka kalandenw jamakulu bɛɛ ɲagalitɔ binna Ala tanuli la ni kanba ye, u ka kabako yelenw bɛɛ kosɔn.
[38] U ko: «Masakɛ min natɔ filɛ Matigi tɔgɔ la, o ye dubaden ye! Hɛrɛ ka kɛ sankolo la, tanuli ka kɛ Ala ye sanfɛ yɔrɔ kɔrɔtalenbaw la!»
[39] Farisiɛn dɔw tun bɛ jama la, olu y'a fɔ Yesu ye ko: «Karamɔgɔ, i ka kalandenw kɔrɔfɔ.»
[40] A y'u jaabi ko: «Ne b'a fɔ aw ye ko, ni ninnu ye u makun, hali kabakurunw na pɛrɛnkan bɔ!»
[41] Yesu surunyalen Jerusalɛm la, a ye dugu filɛ ka kasi a kosɔn.
[42] A ko: «E kɔni, n'i tun ye hɛrɛ sɔrɔ sira dɔn bi don na! Nka sisan o dogora i la, i ɲɛw tɛ se ka o ye!
[43] Katuguni donw bɛ na, i juguw na folon dingɛba sen k'i lamini, k'i degun i fan bɛɛ la.
[44] U na i ci, ka i kɔnɔ mɔgɔw bɛɛ halaki, u tɛna kabakurun si to ɲɔgɔn kan, katuguni Ala nana i dɛmɛni kama tuma min na, i ma o dɔn!»
[45] Yesu donna Alabatosoba kɔnɔ ka jagokɛlaw gɛn ka bɔ yen.
[46] A y'a fɔ u ye ko: «A sɛbɛnnen bɛ ko: ‘Ne ka so na kɛ Aladeliso ye,’ nka aw kɔni y'a kɛ binkannikɛlaw dogo yɔrɔ ye!»
[47] Yesu tun bɛ mɔgɔw kalan don o don Alabatosoba kɔnɔ. Sarakalasebaaw kuntigiw ni sariya karamɔgɔw ani dugu mɔgɔbaw tun bɛ cogo ɲini k'a faga,
[48] nka u m'a sɔrɔ ka foyi kɛ a la, katuguni a ka kumaw ye mɔgɔw bɛɛ kun minɛ.