[1] سونرا رب موسا ائله دانیشیب ددی:
[2] «ائسرایئل اؤولادلارینا امر ات و اونلارا دِه: ”کَنَعان اؤلکه‌سئنه گئره‌جَیئنئز، ائرث اولاراق سئزه دوشه‌جک تورپاق، یعنی کَنَعان تورپاغی سرحدلرئنه گؤره بودور:
[3] جنوب طرفئنئز سئن صحراسیندان اِدوم سرحدی بویونجا اوزاناجاق. جنوب سرحدئنئز شرقه طرف دوز دهنزئنئن اوجوندان باشلایاجاق.
[4] سرحدئنئز جنوبدان عَقره‌بّئم گردنه‌سئنه طرف دؤنوب، سئن صحراسینا کچه‌جک و اورادان قِدِش‌بَرنِعه‌نئن جنوبونا قدر اوزاناجاق. اورادان خَصَره‌دّارا اوزانیب، عَصمونا کچه‌جک.
[5] سرحد عَصموندان مئصئر دره‌سئنه قدر گده‌جک و اونون اوجو دهنزئن یانیندا اولاجاق.
[6] قرب سرحدئنئز بؤیوک دهنزی و اونون کناری اولاجاق، قرب سرحدئنئز بله اولاجاق.
[7] شئمال سرحدئنئز بو اولاجاق: بؤیوک دهنزدن حور داغینا قدر سرحد نئشانی قویاجاقسینیز.
[8] حور داغیندان دا لِبو‌خَمات گردنه‌سئنه قدر نئشان قویاجاقسینیز. سرحدئن اوجو صِدادا اولاجاق.
[9] سرحد زئفرونا قدر اوزاناجاق و اونون آخیری خَصَر‌عِیناندا اولاجاق. بو، شئمال سرحدئنئز اولاجاق.
[10] شرق سرحدئنئزه خَصَر عِیناندان شِفاما قدر نئشان قویاجاقسینیز.
[11] سرحد شِفامدان عَیئنئن شرق طرفئنده اولان رئبلایا اِنه‌جک؛ و اورادان کئنّرِت دهنزئنئن شرق کنارینداکی یاماجا چاتاجاق.
[12] سونرا سرحد اوردون چایی بویونجا اِنه‌جک و اونون اوجو دوز دهنزئنئن یانیندا اولاجاق. هر طرفدن اؤلکه‌نئزئن سرحدلری بونلار اولاجاق.“»
[13] بله‌جه موسا ائسرایئل اؤولادلارینا امر ادئب ددی: «بو او تورپاقدیر کی، سئز اونو پوشکله بؤلمه‌لی‌سئنئز. ربّئن امری ائله اونو دوقّوز یاریم قبئله آراسیندا بؤلمه‌لی‌سئنئز.
[14] چونکی رِعوبئن اؤولادلارینین قبئله‌سی، جاد اؤولادلارینین قبئله‌سی، و مِنَسّه قبئله‌سئنئن او بئری یاریسی اؤز ائرثئنی آلیبلار.
[15] بو ائکی یاریم قبئله اَرئحانین موقابئلئنده، اوردون چایینین شرق طرفئنده ائرثلرئنی آلیبلار.»
[16] سونرا رب موسا ائله دانیشیب ددی:
[17] «بودور او آداملارین آدلاری کی، تورپاقلاری سئزه ائرث بؤله‌جکلر: کاهئن اِلعازار و نون اوغلو یوشَع.
[18] تورپاقلاری بؤلمَک اوچون هر قبئله‌دن بئر نفر رهبر گؤتورون.
[19] بو آداملار بونلاردیر: یهودا قبئله‌سئندن یِفونّه اوغلو کالئب؛
[20] شَمعون اؤولادلارینین قبئله‌سئندن عَمّئهود اوغلو شَموئل؛
[21] بِنیامئن قبئله‌سئندن کئسلون اوغلو اِلئداد؛
[22] دان اؤولادلارینین قبئله‌سئندن رهبر اولان یوگلی اوغلو بوقّی؛
[23] یوسئف اوغوللاریندان: مِنَسّه اؤولادلارینین قبئله‌سئندن رهبر اولان اِفود اوغلو خَنّی‌اِل؛
[24] اِفرایئم اؤولادلارینین قبئله‌سئندن رهبر اولان شئفطان اوغلو قِمواِل؛
[25] زِبولون اؤولادلارینین قبئله‌سئندن رهبر اولان پَرناک اوغلو اِلئصافان؛
[26] یئسّاکار اؤولادلارینین قبئله‌سئندن رهبر اولان عَزّان اوغلو پَلطی‌اِل؛
[27] آشِر اؤولادلارینین قبئله‌سئندن رهبر اولان شِلومی اوغلو اَخئهود؛
[28] نَفتالی اؤولادلارینین قبئله‌سئندن رهبر اولان عَمّئهود اوغلو پِده‌‌هِل.»
[29] بونلار ربّئن امر اتدئیی آداملاردیر کی، کَنَعان تورپاغیندا ائسرایئل اؤولادلارینا تورپاقلاری ائرث بؤله‌جک ائدئلر.