[1] سونرا رب موسا و هارونلا دانیشیب، اونلارا ددی:
[2] «بو، ربّئن امر اتدئیی قانونون قایداسی‌دیر: ائسرایئل اؤولادلارینا دیئن کی، تمئز، عیبسئز و قیرمیزی بئر ائنَک گتئرسئنلر کی، اونون بوینونا هچ واخت یوغ تاخیلماییب.
[3] اونو کاهئن اِلعازارا ورئن. ائنَک دوشَرگه‌نئن باییرینا چیخاریلسین و اونون قاباغیندا کسئلسئن.
[4] سونرا کاهئن اِلعازار بارماغی ائله اونون قانیندان گؤتوروب، قانین بئر آزینی حوضور چادیرینین قاباق طرفئنه طرف یدّی دفه سَپسئن.
[5] سونرا ائنَک اونون گؤزلری قاباغیندا یاندیریلسین. دَرئسی، اَتی و قانی، باغیرساغی ائله بئرلئکده یانسین.
[6] کاهئن سئدر آغاجینین بوداغینی، مرجانکؤشک اوتونو و قیرمیزی ائپی گؤتوروب یاندیریلان ائنه‌یئن اوستونه آتسین.
[7] کاهئن پالتارلارینی یوسون، بدنئنی سو ائله یوسون، سونرا دوشَرگه‌یه گئرسئن. لاکئن آخشاما قدر نجئس ساییلسین.
[8] ائنه‌یی یاندیران آدام دا پالتارلارینی سو ائله یوسون، بدنئنی ده سو ائله یوسون و آخشاما قدر نجئس ساییلسین.
[9] تمئز آدام ائنه‌یئن کولونو ییغیب دوشَرگه‌نئن باییریندا تمئز بئر یره قویسون و ائسرایئل اؤولادلارینین جاماعاتی گرک اونو پاکلاما سویو دوزَلتمک اوچون ساخلاسین. بو، گوناهدان تمئزلَنمه‌دئر.
[10] ائنه‌یئن کولونو ییغان آدام پالتارلارینی یوسون و آخشاما قدر نجئس ساییلسین. بو، ائسرایئل اؤولادلاری اوچون و آرالاریندا یاشایان یاد اِللی اوچون ده ابدی بئر قایدادیر.
[11] هانسی بئر ائنسان مِیئتئنه توخونان آدام یدّی گون نجئس اولاجاق.
[12] اوچونجو و یدّئنجی گون اؤزونو سو ائله پاکلاسین کی، تمئز اولسون؛ آمّا اگر اوچونجو و یدّئنجی گون اؤزونو پاکلاماسا، تمئز اولمایاجاق.
[13] بئر اؤلویه، هر هانسی بئر ائنسان مِیئتئنه توخونان و اؤزونو تمئز اتمه‌یَن آدام ربّئن خیمه‌سئنی نجئس اِدَر، او شخص ائسرایئلدن قووولسون. پاکلاما سویو اونون اوستونه سَپئلمه‌دئیی اوچون نجئس ساییلسین؛ اونون نجئسلئیی حله اوستونده قالیر.
[14] چادیردا اؤلَن آدام اوچون قانون بله‌دئر: چادیرا گئرن و چادیردا اولان هر کس یدّی گون نجئس ساییلسین.
[15] هر آچیق قاب کی، ائپله باغلانمیش قاپاغی یوخدور، نجئس ساییلسین.
[16] چؤلده قیلینجلا اؤلدورولموش اولانا، بئر اؤلویه و یا بئر ائنسان سومویونه، یا دا قبئره توخونان شخص یدّی گون نجئس ساییلسین.
[17] نجئس آدام اوچون یانمیش گوناه قوربانی کولوندن گؤتوروب، اونون اوستونه آخار سو تؤکون.
[18] پاک بئر آدام مرجانکؤشک اوتونو گؤتوروب، او سویا باتیرسین و چادیرین، بوتون قابلارین و اورادا اولانلارین اوستونه سَپسئن. سومویه، اؤلدورولَن آداما، مِیئته یا دا قبئره توخونان آدامین اوستونه ده سَپسئن.
[19] پاک آدام نجئس آدامین اوستونه اوچونجو گون و یدّئنجی گون سَپسئن؛ یدّئنجی گون نجئسلئکدن تمئز اولاجاق. او، پالتارلارینی یوسون، سو ائله یویونسون و آخشام تمئز ساییلسین.
[20] لاکئن نجئس اولوب اؤزونو تمئز اتمه‌یَن آدام جاماعات آراسیندان قووولسون، چونکی ربّئن موقدّس مکانینی نجئسله‌یئب؛ اونون اوستونه پاکلاما سویو سَپئلمه‌دئیی اوچون او، نجئس ساییلسین.
[21] بو اونلارا ابدی قایدادیر. پاکلاما سویو سَپَن آدام پالتارلارینی یوسون و پاکلاما سویونا توخونان آدام آخشاما قدر نجئس ساییلسین.
[22] نجئس آدامین توخوندوغو هر شی نجئس ساییلسین؛ او شیه توخونان آدام آخشاما قدر نجئس ساییلسین.»