[1] او گونلرده تعمئد ورن یحیا ظوهور اتدی و یهودئیه چؤلونده وعظ ادئب، دیئردی:
[2] «تؤوبه ادئن، چونکی گؤیون پادشاهلیغی یاخیندیر.»
[3] بو، او شخص ائدی کی، اِشَعیا پیغمبرئن واسئطه‌سئله دیئلمئشدی: «چؤلده بئرئنئن سسی نئدا ادئر: ربّئن یولونو حاضیرلایین، یوللاری اونون اوچون دوز ادئن.»
[4] یحیانین دَوه توکوندن پالتاری، بلئنده ده دَرئدن قاییشی وار ائدی؛ یدئیی چیئرتکه و چؤل بالی ائدی.
[5] اورشلئمدن، بوتون یهودئیه‌دن و اوردونون بوتون اطرافلاریندان خالق اونون یانینا گلئردی
[6] و گوناهلارینا اعتئراف ادئب، اوردون چاییندا اوندان تعمئد آلیردی.
[7] لاکئن او زامان کی، یحیا فرئسئلر و صادوقئلردن بئر چوخلوسونو گؤردو کی، تعمئد آلماق اوچون اونون یانینا گلئرلر، اونلارا ددی: «ای افعئلر نسئلی! کئم سئزی خبردار اتدی کی، گله‌جک قضبدن قاچاسینیز؟!
[8] ائندی تؤوبه‌یه لایئق ثمره گتئرئن.
[9] و اؤزونوز-اؤزونوزده دوشونمه‌یئن کی، ”آتامیز ائبراهئمدئر.“ سئزه دیئرم: تاری قادئردئر کی، بو داشلاردان ائبراهئمه اؤولاد یاراتسین.
[10] آرتیق بالتا آغاجلارین کؤکونه یاتیر؛ بله‌جه یاخشی بار وِرمه‌ین هر آغاج کسئلئر و اودا آتیلیر.
[11] من سئزی تؤوبه اوچون سو ائله تعمئد ورئرم، آمّا مندن سونرا گلن، مندن داها قووّتلی‌دئر. من اونون آیاق‌قابیسینی داشیماغا بله لایئق دیئلم. او، سئزی، موقدّس روح و اودلا تعمئد وره‌جک.
[12] اونون شنه‌سی الئنده‌دئر. خرمنئنی تمئز سووروب، بوغداسینی آنبارا ییغاجاق، لاکئن سامانی سؤنمه‌ین اودلا یاندیراجاقدیر.»
[13] او زامان عئسا جلئلدن اوردونا، یحیانین یانینا گلدی کی، اوندان تعمئد آلسین.
[14] لاکئن یحیا قویماییب، ددی: «من سنئن طرفئندن تعمئد آلماغا مؤحتاجام، سن منئم یانیما گلئرسن؟!»
[15] عئسا اونا جاواب ورئب ددی: «ائندئلئک راضی اول، چونکی بئزه بله یاراشیر کی، دوز اولان هر شیی یرئنه یتئرک.» او زامان یحیا راضی اولدو.
[16] عئسا تعمئد آلیب فورَن سودان چیخدی. او آندا گؤیلر آچیلدی و تارینین روحونو گؤردو کی، گؤیرچئن کئمی انئب اونون اوستونه قوندو.
[17] و گؤیدن بئر سس ددی: «بو منئم سوگئلی اوغلومدور، اوندان چوخ راضی‌یام.»