[1] عئسا اون‌ائکی شاگئردئنی یانینا چاغیریب، اونلارا قودرت وردی کی، ناپاک روحلاری قووسونلار و هر جور ناخوشلوق و مرضه شفا ورسئنلر.
[2] اون‌ائکی حوارئنئن آدلاری بونلاردیر: بئرئنجئسی پطروس چاغیریلان شمعون، و اونون قارداشی آندریاس. زِبِدِیئن اوغلو یعقوب و قارداشی یوحنّا.
[3] فئلئپوس، و بارتولمای. توما، و باج ییغان متّا. حالفایین اوغلو یعقوب، و تادای.
[4] وطنپرست شمعون، و عئسایا خیانت ادن یهودا ائسکاریوت.
[5] عئسا بو اون‌‌ائکی‌لری گؤندَ‌ردی و اونلارا امر ادئب ددی: «قیرییهودئلره گدن یولا چیخمایین و سامئره‌لی‌لرئن شهرلرئندن هچ بئرئنه گئرمه‌یئن.
[6] بونون یرئنه ائسرایئل خالقینین ائتمئش قویونلارینین یانینا گدئن.
[7] و گتدئکجه وعظ ادئب دیئن کی، گؤیلرئن پادشاهلیغی یاخیندیر.
[8] ناخوشلارا شفا ورئن، اؤلولری دئرئلدئن، جوذاملی‌لاری صاغالدین، ائبلئسلری ائنسانلاردان قووون. موفته آلیبسینیز، موفته ورئن.
[9] قاییشلارینیزدا قیزیل، گوموش، یا دا مئس پول گؤتورمه‌یئن.
[10] سفر اوچون نه توربا گؤتورون، نه آرتیق کؤینک، نه چاریق، نه ده دَیَنک. چونکی ائشچی اؤز روزئسئنه لایئقدئر.
[11] هانسی شهره، یا دا کنده گئره‌سئنئز، دَیَرلی بئرئنی آختارین و یولا چیخانا قدر اورادا قالین.
[12] اِوه گئرنده، اِوده‌‌کئلری سالاملایین.
[13] اگر او اِوده‌کئلر بونا لایئق اولسالار، وردئیئنئز سالام اونلارین اوستونده قالار. لایئق اولماسالار، سالامینیز اؤزونوزه قاییدار.
[14] کئم سئزی قبول اتمه‌سه و سؤزلرئنئزه قولاق آسماسا، او اِودن و یا شهردن چیخان واخت، آیاقلارینیزداکی توزو چیرپین.
[15] دوغروسونو سئزه دیئرم؛ سودوم و گومورا دئیارینین حالی، قئیامت گونونده، او شهرئن حالیندان داها آسان اولاجاق.»
[16] باخین، قوردلار آراسینا سئزی قویونلار کئمی گؤندَ‌رئرم؛ اونا گؤره ده، ائلان کئمی عاغیلّی، گؤیَرچئن کئمی ده ساده اولون.
[17] لاکئن ائنسانلاردان اؤزونوزو گؤزله‌یئن؛ چونکی اونلار سئزی محکمه‌لره تسلئم اده‌جکلر و کنئسه‌لرئنده سئزی دؤیه‌جکلر.
[18] مندن اؤتری والی‌لرئن و حؤکمدارلارین یانینا آپاریلاجاقسینیز کی، اونلارا و قیرییهودئلره شهادت اولسون.
[19] سئزلری تسلئم ادن زامان، نجه و یا نه دئیه‌جه‌یئنئزئن فئکرئنه قالمایین؛ چونکی نه دئیه‌جه‌یئنئز او آندا سئزه بئلدئرئله‌جک.
[20] دوغرودان دا کی، دانیشان سئز دیئلسئنئز، سئزده دانیشان، آتانیزین روحودور.
[21] قارداش قارداشی و آتا اؤولادینی اؤلومه تسلئم اده‌جک. اؤولادلار آتا-آنالارینین ضئدّئنه قالخاجاقلار و اونلاری اؤلدورده‌جکلر.
[22] منئم آدیما گؤره هامی سئزدن نئفرت اده‌جک، آمّا آخیرا قدر صبر ادن نئجات تاپاجاقدیر.
[23] بئر شهرده سئزی قوودوقلاری زامان، او بئرئسئنه قاچین. چونکی دوغروسونو سئزه دیئرم، سئز، ائسرایئل شهرلرئنی دولانیب قورتارمامیش، ائنسان اوغلو گله‌جک.
[24] شاگئرد موعلّئمئندن افضل دیئل؛ قول دا آغاسیندان افضل دیئل.
[25] شاگئردئن اؤز موعلّئمی کئمی اولماسی، قولون دا اؤز آغاسی کئمی اولماسی اونلارا کئفایتدئر. اگر اِو صاحئبئنه بعل-زبول دسه‌لر، اونون او اهلئنه نه قدر آرتیق دئیه‌جکلر.
[26] اونا گؤره، اونلاردان قورخمایین؛ چونکی اله گئزلی بئر شی یوخدور کی، آچیغا چیخماسین و اله اؤرتولو شی ده یوخدور کی، بئلئنمه‌سئن.
[27] سئزه قارانلیقدا نه دیئرم، اونو آیدینلیقدا دیئن؛ قولاغینیزا پیچیلدانانی دا داملاردان اعلان ادئن.
[28] اونلاردان قورخمایین کی، بدنی اؤلدوروب، جانی اؤلدوره بئلمئرلر. آنجاق اوندان قورخون کی، هم جانی، هم ده بدنی جهنّمده هلاک اتمه‌یه قادئردئر.
[29] مگر ائکی سرچه بئر قارا پولا ساتیلمیر؟ لاکئن آتانیزین حؤکمو اولمادان، بونلاردان تک بئری یره دوشمز.
[30] سئزئن باشینیزداکی توکلر ده ساییلیب.
[31] اودور کی، قورخمایین. سئز بئر چوخ سرچه‌دن داها افضلسئنئز.
[32] کئم منی ائنسانلار قاباغیندا ائقرار اتسه، من ده اونو گؤیلرده اولان آتامین قاباغیندا ائقرار اده‌جه‌یم.
[33] آمّا کئم منی ائنسانلار قاباغیندا ائنکار اتسه، من ده اونو گؤیلرده اولان آتامین حوضوروندا ائنکار اده‌جه‌یم.
[34] گومان اتمه‌یئن کی، یر اوزونه صولح گتئرمیه گلمئشم؛ صولح یوخ، قیلینج گتئرمیه گلمئشم.
[35] چونکی من گلمئشم کی، اوغولو آتادان، قیزی آنادان، و گلئنی قاینانادان آییریم.
[36] آدامین دوشمنلری، اؤز اِوئنئن خالقی اولاجاق.
[37] آتاسینی و یا آناسینی مندن آرتیق سِوَن، منه لایئق دیئل؛ اوغلونو و یا قیزینی مندن آرتیق سِوَن منه لایئق دیئل.
[38] چارمیخینی گؤتوروب منئم دالیمجا گلمه‌ین، منه لایئق دیئل.
[39] جانینی حئفظ ادن اونو ائتئره‌جک؛ منئم اوچون جانیندان کچن، اونو حئفظ اده‌جکدئر.
[40] سئزی قبول ادن، منی قبول ادئر؛ و منی قبول ادن، منی گؤندَ‌رَنی قبول ادئر.
[41] پیغمبری پیغمبر آدی ائله قبول ادن، پیغمبر اجرئنی آلاجاق و صالحی صالح آدی ائله قبول ادن، صالح اجرئنی آلاجاقدیر.
[42] کئم بو کئچئکلردن بئرئنه، شاگئردئم اولدوغو اوچون، بئر کاسا سویوق سو ائچئرتسه، دوغروسونو سئزه دیئرم کی، اجرسئز قالمایاجاقدیر.